LAIF STOARI
Da Jehoava Wahn Fait di Waar
PAHN Janiweri 28, 2010, Ah mi deh da Strasbourg, France. Dat da wahn priti siti, bot Ah neva dehdeh pahn haliday. Ah mi dehdeh az paat a wahn leegal teem fi difen di raits a Jehoava Witnisiz fronta di European Court of Human Rights (ECHR). Di govament da France mi seh dat wi bradaz eena da konchri mi haftu pay taks weh amonk tu nayli 64 milyan euroz ($89,000,000 U.S.). Wi mi dehdeh fi proov dat da neva soh. Bot di moas impoatant reezn wai wi mi-di difen wi bradaz da fi bring prayz tu Jehoava naym, klyaa wi bradaz repyutayshan, ahn mek wi bradaz ku bee free fi wership Jehoava da France. Weh mi hapm joorin da koat kays mi shoa wi dat “da Jehoava wahn fait dis waar.” (1 Sam. 17:47) Mek Ah tel unu weh gaan aan.
Eena 1999, di French govament mi chaaj di branch da France taks pahn di doanayshanz weh dehn kalek bitween 1993 ahn 1996. Wi gaahn da koat fi chrai geh jostis, bot ih neva werk owt. Wi chrai apeel, bot wi neva geh di ansa weh wi mi waahn, ahn di govament tek weh oava foa an a haaf milyan euroz ($6,300,000 U.S.) fahn di branch bank akonk. Di onli chaans fi geh bak wi moni da-mi fi kehr di kays da di ECHR. Bot bifoa di ECHR wuda hyaa wi kays, dehn mi mek wi meet wid di French govament leegal teem ahn sohnbadi fahn di ECHR fi si if wi kuda setl tingz bifoa di kays goh da koat.
Wi mi ekspek dat di laydi fahn di ECHR mi wahn tel wi fi pay paat a di taks tu di French govament. Bot if wi mi eevn pay wan euro, dat wuda goh gens Baibl prinsiplz. Di bradaz ahn sistaz mi gi dehn doanayshanz fi sopoat di Kingdom, soh da moni neva bilangz tu di govament. (Mach. 22:21) Stilyet, wi gaahn da di meetin owta rispek fi di ECHR roolz.
Wi leegal teem fronta di ECHR eena 2010
Wi mi meet eena wahn fansi kanfrens room da di ECHR. Di fers ting di laydi seh da dat Jehoava Witnisiz mi wahn haftu pay at lees som a di taks moni weh di French govament mi-di chaaj dehn. Sodn-wan wi mi feel laik wi need fi aks ahn, “Yoo noa dat di govament don tek weh moa dan foa an a haaf milyan euroz fahn wi bank akonk?”
Di way di laydi mi riyak mi shoa dat shee neva noa dehn mi du dat ahn shee mi sopraiz dat di govament wuda du sohnting laik dat. Wen di govament leegal teem mi kanferm dat dehn mi du dat, fi shee hoal atichood chaynj. Shee mi skoal dehn an en di meetin. Ah riyalaiz dat da Jehoava chaynj evriting soh dat wi kuda mi win. Wi kudn bileev weh mi hapm, ahn wi mi eksaitid wen wi lef fahn deh.
Pahn Joon 30, 2011, di ECHR anonks dehn disizhan. Dehn mi disaid dat di govament neva fi taks wi ahn dehn mi fi pay bak di moni weh dehn mi tek plos inchres! Di disizhan eena da koat kays stil di protek wi bradaz ahn sistaz da France, soh dat di govament noh intafyaa wid pyoar wership. Di kweschan weh wi neva noa wi mi wahn haftu aks da laik di stoan weh kil Golaiyat. Dat mi chaynj evriting. How wi en op di win? Da laik weh Dayvid tel Golaiyat: “Da Jehoava wahn fait dis waar.”—1 Sam. 17:45-47.
Dis da neva di onli leegal kays wi mi win. Lata govament ahn rilijan chrai stap wi fahn serv Jehoava, bot wi win 1,225 kays eena di haiyis koat dehn da 70 difrent konchri an intanashanal koat. Dehnya leegal vikchri protek wi raits, laik wi rait fi rejista az wahn rilijan, fi preech, fi noh tek paat eena eni nashanal serimoni, ahn fi noh tek blod.
How Ah mi en op eena dis kays da Europe, wen Ah mi-di serv da di Werl Hedkwaataz a Jehoava Witnisiz da New York, U.S.A.?
MI PAYRENTS MI GA LATA LOV FI DI MINISCHRI
Mi payrents, George ahn Lucille, grajuayt fahn di 12th klaas a Gilyad ahn dehn mi-di serv da Ethiopia wen Ah mi baan eena 1956. Dehn mi naym mi Philip, afta di Baibl karakta. (Aks 21:8) Di yaa afta dat, di govament ban wi wership. Eevn doa Ah mi reeli yong, Ah stil memba mi famili di haid fi wership. Wen Ah mi smaal, Ai mi tink dat eksaitin! Bot den di govament mi foas wi fi lef di konchri eena 1960.
Nathan H. Knorr (pahn di faar lef) di vizit mi famili da Addis Ababa, Ethiopia eena 1959
Mi famili gaahn liv da Wichita, Kansas, U.S.A. Ah mi ga wahn oalda sista weh naym Judy ahn wahn yonga breda weh naym Leslie, ahn chree a wi baan da Ethopia. Eevn doa mi payrents da neva mishineri nohmoh, dehn mi stil lov di minischri wahn lat, ahn dehn mi teech di chree a wi fi lov ahn serv Jehoava wid wi hoal haat. Ah mi geh baptaiz wen Ah mi 13. Chree yaaz layta, wi mi moov da Arequipa, Peru fi help owt.
Eena 1974 wen Ah mi jos 18, di branch da Peru mi asain mee ahn foa ada bradaz fi serv az speshal painyaaz. Wi mi fi preech eena sohn plays op eena di mongtin dehn weh nobadi neva preech yet. Wi mi preech tu peepl weh taak Quechua an Aymara. Wi yoostu liv ahn chravl eena wahn bos weh wi mi kaal Di Aak bikaaz ih mi shayp laik wahn baks. Ah memba di yooz di Baibl fi shoa peepl dat soon Jehoava wahn fiks tingz soh dat nobadi wahn poa, geh sik, er ded. (Rev. 21:3, 4) Wahn lata dehn mi staat serv Jehoava.
“Di Aak,” 1974
AH STAAT SERV DA WERL HEDKWAATAZ
Eena 1977, Brada Albert Schroeder, wahn memba a di govanin badi, mi vizit Peru. Hihn mi inkorij mi fi aplai fi serv da werl hedkwaataz. Soh Ah put een mi aplikayshan. Pahn Joon 17, 1977, Ah mi staat serv da Brooklyn Betel. Joorin di neks foa yaaz, Ah mi werk eena di kleenin ahn mantaynans dipaatment.
Mee an Elizabeth pahn wi wedn day eena 1979
Eena Joon 1978, Ah en op di meet Elizabeth Avallone da wahn intanashanal kanvenshan da New Orleans, Louisiana. Fi shee payrents mi lov Jehoava wid dehn hoal haat, jos laik mai payrents. Elizabeth mi-di serv az wahn regyula painyaa fi foa yaaz, ahn shee mi lov ful-taim servis. Wi mi kip in kantak, ahn neks ting yu noa wi faal in lov wid eech ada. Pahn Aktoaba 20, 1979, wi mi geh marid, ahn wi staat serv tugeda da Betel.
Di fers kangrigayshan wi mi geh asain tu da Brooklyn Spanish, ahn di bradaz ahn sistaz mi reeli lovin. Wi mi serv da chree ada kangrigayshan, ahn di bradaz mi inkorij wi fi kantinyu serv da Betel. Wi mi apreeshiayt di help ahn sopoat fahn dehndeh bradaz ahn sistaz, ahn fahn wi frenz ahn famili weh mi help tek kayr a wi payrents wen dehn mi geh oal.
Di Betelaits weh mi deh eena di Brooklyn Spanish Kangrigayshan eena 1986
AH JAIN DI LEEGAL DIPAATMENT
Ah mi geh asain fi serv eena di leegal dipaatment eena Janiweri 1982. Dat mi sopraiz mi. Chree yaaz layta, dehn aks mi fi gaahn da skool fi bee wahn laaya. Ah mi laan dat peepl fahn di United States ahn fahn ada konchriz mi free fi du lata tingz bikaaz a di leegal kaysiz weh Jehoava Witnisiz win. Wi mi spen wahn lata taim di taak bowt dehndeh impoatant kays eena klaas.
Eena 1986, Ah mi geh apointid az di oavaseeya fi di Leegal Dipaatment da Betel. Ah mi 30 yaaz oal wen Ah geh da asainment. Ah mi hapi dat Betel mi chros mi wahn lat eevn doa Ah mi yong. Bot Ah mi feel laik da tu moch fi mek Ah handl, bikaaz Ah noa ih neva mi wahn bee eezi ahn dehn mi stil ga lat moa fi mek Ah laan.
Eena 1988, Ah mi kwalifai fi bee wahn laaya, bot Ah neva riyalaiz how da ejukayshan mi afek mi rilayshanship wid Jehoava. Haiya ejukayshan ku mek wahn persn waahn bee moa impoatant ahn tink ih beta dan adaz. Elizabeth mi help mi fi du tingz weh Ah yoostu du fi Jehoava bifoa Ah mi staat laa skool, ahn dat help karek mi tinkin. Soh Ah foakos pahn spirichwal tingz agen, an afta wahn wail mi rilayshanship wid Jehoava geh schranga. Now Ah noa dat fi ga lata nalij da noh di moas impoatant ting eena laif. Ih moa impoatant fi ga wahn kloas rilayshanship wid Jehoava ahn fi ga lata lov fi hihn an ih peepl.
DIFEN DI GUD NYOOZ AHN YOOZ DI LAA FI GEH DI RAIT FI PREECH DI GUD NYOOZ
Wen Ah mi don wid laa skool, Ah staat help owt wid di leegal needz da Betel ahn fi help protek Jehoava aaganaizayshan ahn wi raits fi preech. Tingz mi-di chaynj ahn dat mi eksaitin, bot ih neva aalwayz eezi. Fi egzampl, wi yoostu aks fi kanchribyooshan fi wi lichricha, bot eena 1991 dehn aks wi fi help fain wahn way fi stap dat. Afta dat wi staat aafa lichricha widowt chaaj. Dat mi mek tingz eeziya da Betel, eena di kangrigayshan dehn, ahn fi di bradaz ahn sistaz aal rong di werl. Dat mi aalso help fi avoid eni prablemz wid taks. Sohn peepl mi tink dat disya chaynj mi wahn mek wi neva gat inof moni fi mek moa lichricha fi gi peepl weh inchrestid, ahn dehn mi tink dat mi wahn mek it haad fi peepl laan moa bowt Jehoava. Bot dat neva hapm. Wi ga lat moa peepl di serv Jehoava now dan weh mi-di serv ahn eena 1990. Now evribadi ku laan fahn wi poblikayshan dehn widowt di pay eniting. Ah si fi miself dat wi ku onli du dehnya tingz bikaaz Jehoava gi wi di schrent an ih yooz ih faytful ahn waiz slayv fi dairek ih aaganaizayshan.—Eks. 15:2; Mach. 24:45.
Wi noh jos win koat kays bikaaz wi ga gud laayaz. Di joj dehn an ada govament ofishalz help wi bikaaz a di gud egzampl weh wi set. Wahn egzampl a dis da wen chree membaz a di Govanin Badi lang wid dehn waif mi aten sohn speshal kanvenshan da Cuba eena 1998. Dehn mi kain ahn rispekful, ahn dat mi help klayr op eni misandastandin weh di govament mi ga bowt Jehoava Witnisiz.
Sohntaim, wi kyaahn setl leegal mataz widowt goh da koat, soh wi haftu goh da koat fi “difen di gud nyooz ahn yooz di laa fi geh di rait fi preech di gud nyooz.” (Fil. 1:7) Fi egzampl, fi wahn lang taim som a di govament da Europe ahn di govament da South Korea mi seh dat wi bradaz haftu jain di aami, ahn dehn nevarispek wi bradaz raits fi rifyooz militeri servis. Sayka dat, bowt 18,000 bradaz da Europe ahn moa dan 19,000 bradaz da South Korea gaahn da jayl bikaaz dehn rifyooz fi jain di aami.
Pahn Joolai 7, 2011, di ECHR mi mek wahn disizhan eena di Bayatyan v. Armenia kays. Dehn mi disaid dat evri konchri da Europe fi gi peepl di rait fi serv eena wahn difrent way if dehn rifyooz fi jain di aami bikaaz a weh dehn bileev. Ahn pahn Joon 28, 2018, di South Korean Constitutional Court mi mek wahn simila disizhan. If jos wahn lee bit a wi bradaz mi giv een ahn jain di aami, di koat dehn neva mi wahn mek dehnya impoatant disizhan.
Di leegal dipaatment da di hedkwaataz ahn di wan dehn eena di difrent branch aafis rong di werl di werk reeli haad fi difen wi rait fi wership Jehoava ahn fi preech. Da wahn privilij fi difen wi bradaz ahn sistaz wen di govament chrai stap dehn fahn serv Jehoava. Weda wi win er nat, wi stil gi wahn gud witnis fronta govna, king, ahn nayshanz. (Mach. 10:18) Di joj dehn, di peepl weh reprizent di govament, peepl weh ripoat di nyooz, an ada peepl haftu reed aal di skripchaz weh wi menshan da koat er eena wi leegal dakyuments. Peepl wid di rait haat kandishan laan hoo da Jehoava Witnisiz ahn dat weh dehn bileev kohn fahn di Baibl. Ahn som a dehn saym peepl staat serv Jehoava.
TANK YU, JEHOAVA!
Fi oava 40 yaaz, Ah geh di privilij fi werk wid difrent branch aafis werlwaid. Wi mi werk pahn difrent leegal kays eena sohn hai koat ahn wi mi meet wid difrent hai ofishalz. Ah lov an apreeshiayt di bradaz ahn sistaz Ah werk wid eena di leegal dipaatment aal rong di werl. Ah geh lata blesinz eena mi laif an Ah feel laik Ah di du sohnting gud.
Oava di paas 45 yaaz mee an Elizabeth gaahn chroo wahn lat. Bot shee aalwayz lov mi ahn sopoat mi eena evriting. Ah admaiya ahn bikaaz shee werk haad eevn doa shee di sofa fahn wahn siknis weh mek ih feel week.
Wi si fi wiself dat schrent ahn vikchri noh kohn fahn wee. Da laik weh Dayvid seh: “Jehoava gi schrent tu ih peepl.” (Saa. 28:8) Da chroo, “da Jehoava wahn fait dis waar.”