Wat Da di Sain a “di Laas Dayz,” er “di Taim a di En”?
Weh di Baibl Seh
Di Baibl taak bowt sertn tingz weh wahn hapm weh wahn shoa dat wi reech “di en a di sistem a tingz,” er “di en a di werl.” (Machyu 24:3; King James Version) Di Baibl aalso kaal dis taim “di laas dayz” ahn di “taim a di en,” er “en taimz.”—2 Timoti 3:1; Daniel 8:19; Easy-to-Read Version.
Wat da sohn prafesi weh wahn kohn chroo joorin “di laas dayz”?
Di Baibl mi prafesai lata tingz weh mi wahn hapm joorin di saym taim weh mi wahn bee “di sain” weh proov dat wi deh eena di laas dayz. (Look 21:7) Mek wi go oava sohn egzampl.
War aal oava di plays. Jeezas mi seh: “Di nayshan dehn wahn fait gens wan anada ahn di kingdom dehn wahn fait gens wan anada.” (Machyu 24:7) Revilayshan 6:4 mi aalso seh sohnting simila wen ih taak bowt wahn haasman weh riprezent war hoo mi wahn“tek weh pees fahn di ert.”
Famin. Jeezas mi seh: “Dehn wahn ga famin.” (Machyu 24:7) Ahn Revilayshan taak bowt wahn nada haasman weh mi wahn mek dehn ga famin aal oava di plays.—Revilayshan 6:5, 6.
Lata big ertkwayk. Jeezas mi aalso tel wi dat dehn mi wahn gat “ertkwayk eena wahn lata plays.” (Machyu 24:7; Look 21:11) Dehnya big ertkwayk aal rong di werl mi wahn kaaz lata sofrin ahn kil wahn lata peepl laik neva bifoa.
Siknis. Akaadn tu Jeezas, dehn mi wahn ga “sohn terabl dizeez” weh wahn spred tu wahn lata peepl.—Look 21:11, Contemporary English Version.
Wahn lat moa kraim. Eevn doa kraim egzis fi towznz a yaaz, Jeezas mi seh dat eena di laaz dayz, “lata wikidnis wahn deh.”—Machyu 24:12.
Peepl wahn damij di ert. Revilayshan 11:18 seh dat hyoomanz mi wahn di “rooin di ert.” Dehn mi wahn du dis bikaaz a di vailens, koropshan, ahn ada akshanz weh damij di ert.
Peepl wahn bihayv wers ahn wers. Eena 2 Timoti 3:1-4, di Baibl prafesai dat lata peepl wahn shoa dat dehn “noh tankful, noh laayal, . . . noh wilin fi get lang wid wan anada, slanda eech ada, noh ga no self-kanchroal, bihayv laik wail animal, hayt evriting weh gud, bichray wan anada, stobant an onli waahn du dehn oan ting, ahn tink tu moch a dehnself.” Peepl atichood mi wahn get soh bad dat wi kuda reeli si dat di taims weh wi di liv eena ‘daynjaros ahn dat laif haad.’
Familiz wahn brok op. Eena 2 Timoti 3:2, 3, ih mi aalso seh dat peepl mi wahn “ga no afekshan” fi dehn famili ahn pikni “noh wahn obay dehn payrents.”
Peepl lov fi Gaad wahn kool aaf. Jeezas mi seh: “Peepl lov wahn kool aaf.” (Machyu 24:12) Hihn mi-di seh dat moas peepl mi wahn stap lov Gaad. Ahn 2 Timoti 3:4 seh dat eena di laas dayz, peepl mi wahn “lov plezha insteda lov Gaad.”
Rilijos peepl wahn ak laik hipokrit. Eena 2 Timoti 3:5, di Baibl seh dat peepl wuda play laik dehn di wership Gaad, bot dehn neva mi wahn liv akaadn tu weh dehn seh dehn bileev.
Gaad peepl wahn andastan Baibl prafesi beta. Di buk a Daniel mi prafesai dat eena “di taim a di en,” peepl mi wahn andastan lat moa fahn di Baibl, ahn dat inklood aala di prafesi dehn weh ga fi du wid di laas dayz.—Daniel 12:4, footnote.
Di gud nyooz di geh preech evriway. Jeezas mi seh: “Mai disaipl dehn wahn preech di gud nyooz bowt di Kingdom aal oava di ert.”—Machyu 24:14.
Peepl noh wahn kay bowt di Baibl. Jeezas mi seh dat peepl noh wahn kay bowt di sainz a di en weh dehn si. (Machyu 24:37-39) Ahn 2 Peeta 3:3, 4 eevn seh dat enibadi weh waan dehn dat di en di kohn, dehn wahn tek dehn mek papishoh.
Aala di prafesi dehn di kohn chroo. Jeezas mi tel wi dat joorin di laas dayz wi mi wahn si aala dehnya Baibl prafesi di kohn chroo rong di saym taim.—Machyu 24:33.
Wee reeli di liv eena “di laas dayz”?
Yes. Di kandishan a di werl ahn tingz weh di Baibl prafesai shoa dat di laas dayz mi staat eena 1914, di yaa Werl Waar I mi bigin. Wach dis veedyo fi si how di kandishan a di werl shoa dat wi di liv eena di laas dayz:
Eena 1914, wen Gaad Kingdom mi staat tu rool fahn hevn, wan a di ferst ting weh ih mi du da-mi fi chroa Saytan ahn di deemonz fahn owta hevn ahn mek dehn stay pahn di ert. (Revilayshan 12:7-12) Wi ku si dat da Saytan di kanchroal di werl bikaaz a di bad atichood a peepl ahn bikaaz a di bad tingz weh dehn du. Aala dehndeh tingz mek di taimz weh wi liv eena ‘dayjnaros ahn haad.’—2 Timoti 3:1.
Dehnya haad taimz wori peepl wahn lat ahn dehn eevn feel laik dehn kyaan liv eena pees nohmoh. Som eevn frayd dat hyoomanz wahn en op di kompleetli dischrai eech ada.
Bot dehn ga ada peepl weh ga wahn hoap fi di fyoocha eevn doa dehn wori tu. Dehn bileev dat Gaad Kingdom wahn soon tek oava di ert ahn fiks aala di prablemz weh wi di fays tudeh. (Daniel 2:44; Revilayshan 21:3, 4) Dehn di wayt payshent wan fi mek aala Gaad pramis kohn chroo. Weh Jeezas seh komfert dehn wahn lat; hihn mi seh: “Di wan weh stay faytful tu di en a dis sistem a tingz wahn geh sayv.”—Machyu 24:13; Micah 7:7.