How fi Kip Teknalaji Eena ih Plays

Di way how yu yooz teknalaji ku eeda mek yu marij geh schrang er ih ku mek ih geh week. How di yoos a teknalaji di afek fi yoo marij?

• Weh yu shuda noa

• Weh yu ku du

• Weh marid peepl seh

• Diskoshan Gaid

Weh yu shuda noa

• If yu yooz teknalaji eena wahn waiz way, ih ku benifit yu marij. Fi egzampl, som hozban ahn waif yooz teknalaji fi mek dehn ku kamyoonikayt wid wan anada joorin di day wen dehn noh deh tugeda.

  

  “Wahn lee teks laik weh seh ‘Ah lov yu’ er ‘Ah di tink bowt yu, ku mek yoo ahn yu marij paadna feel kloasa tu eech ada.”—Jonathan

• If yu yooz teknalaji eena di rang way, ih ku mek di marij geh week. Fi egzampl, som peepl deh pahn dehn divais evri minit, ahn dis tek weh taim an atenshan weh dehn sopoaz tu di giv dehn marij paadna.

  “Ah noa dat wahn lata taim mi hozban wuda mi waahn taak tu mi if Ah neva deh pahn mi foan soh moch.”—Julissa

• Som peepl tink dat dehn ku du too er moa tingz da di saym taim. Bot wahn persn weh stodi hyooman bihayvya seh dat risaach shoa dat dehn kyaahnt, da jos “sohnting weh dehn bileev dehn ku du.” Eevn doa peepl tink dat wen dehn du moa dan too ting di saym taim da wahn gud ting. Bot dis saiyentis noh reeli bileev dat dat pasabl. Shee kantinyu fi seh, “di moa tingz wi chrai du da di saym taim, di wers wi du dehn.”a

  “Wen Ah ga wahn kanvasayshan wid mi hozban, ih reeli komfertin, bot wen hihn di du ada tingz wail Ah di chrai taak tu ahn, ih mek Ah feel laik hihn noh kay if Ah di dehdeh er nat.”—Sarah.

Di chroot a di mata: Di way yu yooz teknalaji ku help yu marij er ih ku hert yu marij.

Weh yu ku du

Set in plays weh moas impoatant. Di Baibl seh: “noa weh moas impoatant fi du.” (Filipiyanz 1:10) Aks yuself, ‘Di amonk a taim weh mee ahn mai hozban er waif spen pahn wi divais tek owta di taim an atenshan weh wi shuda giv tu eech ada?’

“Ih sad fi si wahn man ahn wahn uman di yooz dehn divais wail dehn di eet da wahn restorant. Di too a dehn jos foakos onli pan dehn divais. Wi noh waahn pay atenshan tu wi divais tu moch dat wi faget weh moas impoatant. Dis da wi rilayshanship wid eech ada.”—Matthew

Set sohn limit. Di Baibl seh: “Unu fi tek kayr how unu di liv unu laif. Unu noh fi liv laik peepl weh noh ga no sens. Unu fi liv laik dehn wan weh ga gud sens. Evri chaans unu ga fi du gud, unu mek yoos a it.” (Ifeezhanz 5:15, 16) Aks yuself, ‘Ai ku set wahn spesifik taim fi mek Ah tek fi reed an ansa teks mesij weh da no imerjensi insteda jos di ansa aal mesij az dehn kom een?’

“Wen Ah put mi foan pahn sailent ih help mi fi mek Ah ansa teks mesij wen di taim rait. Ah noh yoozhwali geh wahn kaal, teks mesij er eemayl weh Ah wuda haftu ansa rait away.”—Jonathan.

If ih pasabl noh du tingz weh ga fi du wid werk wen yu noh deh da werk. Di Baibl seh: “Fi evriting dehn ga wahn apointid taim.” (Ecclesiastes 3:1) Aks yuself dehnya kweschan: ‘Ai di alow ma jab fi disterb mai famili taim bikaaz Ah di yooz mi foan wen Ah di hoam fi mek Ah du tingz weh ga fi du wid werk? If dis da di kays, how dis di afek mai marij? How mai marij paadna wuda ansa dis kweschan?’

“Bikaaz a teknalaji, wi ku di werk enitaim ahn aal di taim. Ah haftu mek wahn efoat fi no chek mi foan evri minit ahn du tingz weh ga fi du wid werk wail mee ahn mi waif deh tugeda.”—Matthew.

Taak wid yu marij paadna bowt how unu wahn yooz teknalaji. Di Baibl seh: “Noh oanli tink bowt unu oanself, bot tink bowt weh gud fi ada peepl tu.” (1 Korintyanz 10:24) Taak tu yu marij paadna bowt how eech a unu yooz ih teknalaji ahn weh mait need fi chaynj. Yu ku yooz di diskoshan gaid eena dis aatikl fi help yu staat.

“Mee ahn mai hozban veri aanis wid eech ada ahn wi tel eech ada evriting. If wi feel laik wi di yooz wi divais wahn lat, wi wahn tel eech ada. Too a wi rekonaiz dat dis ku bee wahn prablem, soh wi kyaafuli tink bowt how eech ada feel bowt dis sichuwayshan.”—Danielle

Di chroot a di mata: Mek shoar dat yu onli alow teknalaji fi mek yu laif eeziya, noh mek ih kanchroal yu.