Wenzdeh, Aktoaba 29
Ah waahn prayz Jehoava; Ah waahn prayz fi hihn hoali naym wid aala mi haat.—Saa. 103:1.
Peepl weh lov Jehoava waahn prayz fi hihn naym. King Dayvid mi noa dat wen wi prayz Jehoava naym, da Jehoava wi di prayz. Wen wi hyaa Jehoava naym, wi tink bowt weh kaina persn hihn, aala ih byootiful kwalitiz, ahn di amayzin tingz weh hihn du. Dayvid mi waahn prayz Jehoava naym ahn mek it hoali. Ahn hihn mi waahn du dat wid ‘aala ih haat.ʼ Dis da di saym way di Leevait dehn mi prayz Jehoava, ahn dehn mi set di egzampl fi di peepl. Dehn mi hombl an aksep dat noh mata humoch dehn prayz Jehoava naym ih mi wahn aalwayz dizerv moa. (Neh. 9:5) Fi shoar, di prayz weh dehn giv Jehoava mi mek hihn hapi. w24.02 9 ¶6
Terzdeh, Aktoaba 30
Wateva proagres wi don mek, mek wi kantinyu eena di saym way a laif.—Fil. 3:16.
Jehoava noh wahn joj yu jos bikaaz yu kudn reech wahn goal weh mi tu haad fi yu. (2 Kor. 8:12) Kantinyu tink bowt goalz weh yu don reech. Di Baibl seh dat “Gaad da wahn raichos Gaad, ahn hihn noh wahn ferget . . . how unu du unu bes.” (Heeb. 6:10) If hihn noh ferget how haad yu di chrai fi du yu bes, den yoo shudn ferget needa. Tink bowt di goalz weh yu don reech aredi. Ih ku bee dat yu mek yu rilayshanship wid Jehoava schranga, yu preech tu adaz bowt ahn, er yu geh baptaiz. Jos laik how yu mi chrai yu bes fi reech dehndeh goalz eena di paas, yu wahn kantinyu chrai du beta fi reech yu spirichwal goalz now. Yoo kud reech yu goal tu, wid Jehoava help. Noh ferget fi foakos pahn how Jehoava di help yu ahn bles yu lang di way az yu di chrai fi reech yu goal. (2 Kor. 4:7) Yu wahn geh lat moa blesinz if yu noh giv op.—Gal. 6:9. w23.05 31 ¶16-18
Fraideh, Aktoaba 31
Di Faada lov unu, bikaaz unu mi lov mee an unu bileev dat Ai kom az di wan weh reprizent Gaad.—Jan 16:27.
Jehoava luk fi wayz fi shoa ih servants humoch ih lov dehn, an ih mek dehn noa dat hihn hapi wid dehn. Eena di Baibl, too difrent taimz Jehoava tel Jeezas dat ih lov ahn an dat ih pleez wid ahn. (Mach. 3:17; 17:5) Yoo wuda waahn Jehoava tel yu dat ih lov yu an ih hapi wid yu? Wi noh wahn hyaa Jehoava di taak tu wi fahn hevn, bot ih taak tu wi chroo di Baibl. Wen wi reed bowt how Jeezas mi taak tu ih disaiplz, da laik if Jehoava di taak tu wi. Jeezas da jos laik ih Pa. Jeezas falowaz neva perfek. Stilyet, Jeezas mi tel dehn dat ih hapi wid dehn. Dat help wi fi si how Jehoava wuda taak tu wee. (Jan 15:9, 15) Wen wi fays prablemz, ih noh meen dat Jehoava noh hapi wid wi. Wen wee goh chroo wahn haad taim, da wahn chaans fi shoa how deep wi lov fi Jehoava ahn humoch wi chros ahn.—Jay. 1:12. w24.03 28 ¶10-11