Jehoava luk fi wayz fi shoa ih servants humoch ih lov dehn, an ih mek dehn noa dat hihn hapi wid dehn. Eena di Baibl, too difrent taimz Jehoava tel Jeezas dat ih lov ahn an dat ih pleez wid ahn. (Mach. 3:17; 17:5) Yoo wuda waahn Jehoava tel yu dat ih lov yu an ih hapi wid yu? Wi noh wahn hyaa Jehoava di taak tu wi fahn hevn, bot ih taak tu wi chroo di Baibl. Wen wi reed bowt how Jeezas mi taak tu ih disaiplz, da laik if Jehoava di taak tu wi. Jeezas da jos laik ih Pa. Jeezas falowaz neva perfek. Stilyet, Jeezas mi tel dehn dat ih hapi wid dehn. Dat help wi fi si how Jehoava wuda taak tu wee. (Jan 15:​9, 15) Wen wi fays prablemz, ih noh meen dat Jehoava noh hapi wid wi. Wen wee goh chroo wahn haad taim, da wahn chaans fi shoa how deep wi lov fi Jehoava ahn humoch wi chros ahn.—Jay. 1:12. w24.03 28 ¶10-11

If yu ga pikni, yu ku help dehn fi pripyaa wahn koment weh prapa fi dehn ayj. Sohntaim wi taak bowt seeryos tingz da wi meetin dehn, laik marij prablemz er tingz weh goh gens Jehoava moaral standadz, bot dehn wahn aalwayz ga wan er too kweschan weh wahn lee pikni ku ansa. Help yu pikni fi andastan wai di kandokta noh wahn aalwayz pik dehn fi gi wahn koment. Wen yu eksplayn dat tu dehn, yu wahn help dehn fi noh feel bad wen di kandokta pik sohnbadi els. (1 Tim. 6:18) Aala wi ku pripyaa wahn koment weh wahn bring prayz tu Jehoava ahn weh wahn inkorij wi bradaz ahn sistaz. (Prav. 25:11) Sohntaim wi mait shayr wahn lee ekspeeryens, bot ih gud fi mek wi noh taak tu moch bowt wiself. (Prav. 27:2; 2 Kor. 10:18) Insted, wi waahn kip di foakos pahn Jehoava, fi hihn Werd, an ih peepl.—Rev. 4:11. w23.04 24-25 ¶17-18

Lov impoatant fi mek wi bee redi ahn sensabl. (Mach. 22:​37-39) Lov fi Gaad wahn help wi fi kantinyu preech noh mata weh chalenjiz mait kom op. (2 Tim. 1:​7, 8) Ahn lov fi peepl weh noh serv Jehoava wahn moov wi fi kantinyu preech, du foan witnisin, er rait letaz. Wi noh giv op pahn peepl er stap hoap dat wan day dehn wahn staat du weh rait. (Ezek. 18:​27, 28) Wi aalso lov wi bradaz ahn sistaz. Wi shoa dehn dat wi lov dehn wen wi “inkorij wan anada ahn . . . bil op wan anada.” (1 Tes. 5:11) Wi help eech ada jos laik how soaljaz wuda help wan anada eena waar. Wee wuda neva hert wi bradaz ahn sistaz fi spait er tek rivenj wen dehn hert wi. (1 Tes. 5:​13, 15) Wi aalso shoa lov wen wi rispek di bradaz weh di tek di leed eena di kangrigayshan.—1 Tes. 5:12. w23.06 10 ¶6; 11 ¶10-11