Wat if yu feel laik yu di seh di saym ting oava ahn oava wen yu pray er dat yu noh di injai yu minischri? If yu staat feel laik dis afta yu geh baptaiz, pleez noh tink dat yu noh ga Jehoava hoali spirit. Bikaaz wi noh perfek, wi feelinz chaynj aal di taim. If yu feel laik yu noh az hapi az yu yoostu bee di serv Jehoava, den wahn gud aidyaa da fi stodi di apasl Paal egzampl. Eevn doa hihn mi chrai ih bes fi fala Jeezas egzampl, sohntaim hihn neva feel fi du weh ih mi sopoas tu du. Paal mi mek op ih main fi du di asainment weh Jeezas mi giv ahn, eevn wen ih neva waahn du it. Noh alow di way yu feel fi kanchroal weh yu du. Mek op yu main fi aalwayz du weh rait eevn if yu noh waahn du it. Az taim paas, yu feelinz wahn chaynj an ih wahn bee eeziya fi du weh rait.—1 Kor. 9:16. w24.03 11-12 ¶12-13

Wi ku shoa wi bradaz ahn sistaz dat wi lov dehn wen wi mek fren wid dehn. (2 Kor. 6:​11-13) Moas a wi deh eena wahn kangrigayshan weh ful a bradaz ahn sistaz wid difrent bakgrong ahn persnaliti. If wi foakos pahn dehn gud kwalitiz, fi wee lov fi dehn wahn geh schranga. Wen wi si wi bradaz ahn sistaz di way Jehoava si dehn, wi shoa dat wi lov dehn. How Jehoava wahn protek wi joorin di grayt chribyulayshan? Wi wahn haftu lov wi bradaz ahn sistaz joorin di grayt chribyulayshan. Tink bowt weh Jehoava mi tel ih peepl fi du bifoa Babilan mi geh atak. Hihn mi tel dehn: “Mi peepl, unu goh haid eena unu room ahn kloaz unu doa. Haid unuself fi wahn lee wail til Gaad anga paas.” (Isa. 26:20) Maybi wi wahn haftu fala dehndeh saym inschrokshanz joorin di grayt chribyulayshan. w23.07 6-7 ¶14-16

Aks yuself dehnya kweschanz: ‘Peepl si mi az sombadi weh reeznabl, fleksibl, an eezi fi get lang wid? Er dehn si mi az sombadi weh schrik, haad fi get lang wid, an aalwayz waahn mi oan way? Ai lisn tu ada peepl opinyan an agree wid dehn wen ih okay fi du dat?ʼ Di moa wi chrai bee reeznabl, di moa wi wahn di kapi Jehoava ahn Jeezas egzampl. If wi reeznabl, dat meenz dat wi wahn fleksibl wen tingz eena wi laif chaynj. Wen chaynjiz hapm, wi mait fays prablemz weh wi noh ekspek. Fi egzampl, aal af a sodn, wi mait geh sik reeli bad. Er laif ku geh reeli haad fi wi wen dehn ga wahn sodn chaynj eena di govament er di way how dehn manij moni. (Ikl. 9:11) Eevn wahn nyoo asainment mait bee haad fi aksep. Wi ku ajos tu wahn nyoo chaynj eena wi laif wen wi fala dehnya foa step: (1) aksep di chaynj, (2) tink bowt di fyoocha, (3) foakos pahn pazitiv tingz, ahn (4) du tingz fi adaz. w23.07 21-22 ¶7-8