Aks yuself dehnya kweschanz: ‘Peepl si mi az sombadi weh reeznabl, fleksibl, an eezi fi get lang wid? Er dehn si mi az sombadi weh schrik, haad fi get lang wid, an aalwayz waahn mi oan way? Ai lisn tu ada peepl opinyan an agree wid dehn wen ih okay fi du dat?ʼ Di moa wi chrai bee reeznabl, di moa wi wahn di kapi Jehoava ahn Jeezas egzampl. If wi reeznabl, dat meenz dat wi wahn fleksibl wen tingz eena wi laif chaynj. Wen chaynjiz hapm, wi mait fays prablemz weh wi noh ekspek. Fi egzampl, aal af a sodn, wi mait geh sik reeli bad. Er laif ku geh reeli haad fi wi wen dehn ga wahn sodn chaynj eena di govament er di way how dehn manij moni. (Ikl. 9:11) Eevn wahn nyoo asainment mait bee haad fi aksep. Wi ku ajos tu wahn nyoo chaynj eena wi laif wen wi fala dehnya foa step: (1) aksep di chaynj, (2) tink bowt di fyoocha, (3) foakos pahn pazitiv tingz, ahn (4) du tingz fi adaz. w23.07 21-22 ¶7-8

Di prafit Danyel mi stil yong wen di Babiloanyan dehn mi tek ahn az wahn prizna ahn foas ahn fi goh liv da Babilan. Dis siti mi deh faar fahn Jeroosalem. Eevn doa Danyel mi yong, hihn mi impres di Babiloanyan ofishal dehn. Dehn mi noatis “weh deh rait fronta dehn aiy.” Dehn mi si dat Danyel mi “luk gud” ahn dat ih mi kohn fahn wahn impoatant famili. (1 Sam. 16:7) Sayka dat, dehn mi chrayn ahn soh dat ih ku serv da di palis. (Dan. 1:​3, 4, 6) Jehoava mi lov Danyel bikaaz hihn mi laayal. Jehoava mi si Danyel az sohnbadi raichos, jos laik Noawa ahn Joab weh mi faytful tu Hihn fi lata yaaz. Danyel mosi mi onli bowt 20 yaaz oal wen Jehoava mi menshan fi hihn naym lang wid Noawa ahn Joab. (Jen. 5:32; 6:​9, 10; Joab 42:​16, 17; Ezek. 14:14) Jehoava mi kantinyu lov Danyel aal chroo ih laif.—Dan. 10:​11, 19. w23.08 2 ¶1-2

Wen yu di luk fi bai wahn hows, yu wuda waahn chek owt di hoal hows gud gud bifoa yu bai it, noh chroo? Da jos laik dat wen wi reed ahn stodi di Baibl. If yu jos reed it kwik, yu mait onli laan di baysik tingz—“di fers tingz weh [yu] mi laan fahn Gaad werd.” (Heeb. 5:12) Jos laik how yu wuda goh eena di hows fi laan moa bowt it, yu need fi stodi di Baibl gud fi andastan it. Wahn reeli gud way fi stodi di Baibl da fi si how weh wan paat seh mach op wid weh wahn nada paat seh. Chrai yu bes fi noh onli andastan weh Baibl teechinz yoo bileev eena bot aalso wai yu bileev eena dehndeh teechinz. If wi waahn andastan evriting weh deh eena di Baibl, wi haftu du deep stodi. Di apasl Paal mi inkorij di bradaz ahn sistaz fi stodi Gaad Werd gud soh dat dehn kuda “andastan evriting bowt how waid, ahn how lang, ahn how hai, ahn how deep di chroot.” Den if dehn du dat, dehn fayt wahn “stan op schrang pahn di fongdayshan, jos laik how di roots a wahn chree mek ih stan op schrang.” (Ifee. 3:​14-19) Wi need fi du di saym ting wen wi dig deep eena Gaad Werd fi andastan di meenin moch beta. w23.10 18 ¶1-3