Yu Hoap fi di Fyoocha Wahn Kohn Chroo

1. Wai wi ku seh dat Aybraham hoap mi reel?

AYBRAHAM mi 100 yaaz oal an ih waif Saara mi 90 yaaz oal ahn dehn stil neva ga no pikni. Bot Jehoava mi pramis ih fren Aybraham dat hihn mi wahn ga wahn son, ahn chroo da son aala di nayshanz mi wahn geh bles. (Jen. 15:5; 21:​1-7; 22:18) Aybraham mi ga lata fayt eena Gaad, soh hihn mi chros dat Jehoava pramis mi wahn kohn chroo. Dat da wai di Baibl seh dat “Aybraham mi kanvins dat hihn wuda mi bee di faada a lata nayshanz. . . . Hihn mi bileev di pramis.” (Roam. 4:18) Da pramis mi did kohn chroo. Aybraham mi en op di ga di son weh ih mi-di hoap fa, Aizak. Bot weh mi mek Aybraham soh shoar dat Jehoava mi wahn kip ih pramis?

2. Wai Aybraham mi kanvins dat Jehoava mi wahn kip ih pramis?

² Aybraham mi ga wahn kloas frenship wid Jehoava, ahn dis mi mek hihn “chros dat Gaad ku du weh ih mi pramis fi du.” (Roam. 4:21) Bikaaz Aybraham mi ga fayt eena Jehoava, Hihn mi aksep ahn az wahn raichos man. (Jay. 2:23) Aybraham mi ga schrang fayt ahn hoap, soh laik weh Roamanz 4:18 seh, hihn kuda mi chros eena Jehoava. Now mek wi si weh di apasl Paal seh bowt hoap eena Roamanz chapta 5.

3. Weh Paal mi seh bowt hoap?

³ Paal tel wi wai wi ku bee shoar dat wi “hoap wahn neva let wi dong.” (Roam. 5:5) An ih help wi andastan how wi ku mek wi Kristyan hoap geh eevn schranga. Az wi diskos weh Paal mi seh da Roamanz 5:​1-5, tink bowt how yu oan hoap fi di fyoocha groa fahn wen yu fers laan di chroot. Den wi wahn taak bowt how wi ku mek da hoap groa eevn moa schranga dan weh ih deh rait now. Soh fers mek wi taak bowt da wandaful hoap weh wahn neva let wi dong.

WI WANDAFUL HOAP

4. Weh Roamanz 5:​1, 2 taak bowt?

⁴ Reed Roamanz 5:​1, 2. Wen Paal mi rait di leta tu di Kristyanz da Roam, di bradaz mi don laan bowt Jehoava ahn Jeezas, dehn mi shoa fayt, ahn dehn mi-di serv Jehoava. Soh “Gaad aksep [dehn] az raichos peepl sayka [dehn] fayt,” ahn hihn mi anoint dehn wid hoali spirit. Sayka dat, dehn kuda mi luk faawod tu wahn wandaful hoap ahn bee shoar dat ih wahn kohn chroo.

5. Wat da di hoap weh anointid Kristyanz luk faawod tu?

⁵ Lee wail afta dat, Paal mi rait tu di anointid Kristyanz da Efisos bowt di hoap weh Gaad mi gi “tu di hoali peepl az wahn inheritans.” (Ifee. 1:18) Ahn Paal mi tel di bradaz fahn Koloaseh wehpaat dehn mi wahn geh dehn riwaad wen ih mi tel dehn bowt “di hoap weh Gaad di sayv op fi [dehn] da hevn.” (Kol. 1:​4, 5) Soh di hoap weh anointid Kristyanz luk faawod tu da fi kohn bak tu laif ahn rool wid Jeezas fareva da hevn.—1 Tes. 4:​13-17; Rev. 20:6.

6. Weh Brada Frederick Franz mi seh bowt fi hihn hoap?

⁶ Aal anointid Kristyanz reeli apreeshiayt fi dehn hoap. Fi egzampl, Brada Frederick Franz mi eksplayn how hihn mi feel bowt ih hoap wen ih seh: “Fi wee hoap da wahn shoar ting. Aala wi hoo da paat a di 144,000 wahn geh wi riwaad weh Jehoava pramis wi, an ih wahn bee faar beta dan eniting wi kuda eva imajin.” Afta Brada Franz mi serv Jehoava fi yaaz az wahn faytful servant, ih kuda mi seh dis eena 1991: “[Wee] stil cherish wi hoap. . . . Di langa wi wayt far it, di moa tankful wi feel fi di blesinz weh wi wahn get. Soh wi wilin fi wayt eevn if ih wuda tek wahn milyan yaaz. Ah reeli cherish wi hoap moa dan eva bifoa.”

7-8. Weh hoap moas a wi gat? (Roamanz 8:​20, 21)

⁷ Moas a Jehoava peepl tudeh ga wahn difrent hoap. Dehn ga di saym hoap laik Aybraham, weh da fi liv fareva pahn ert anda Gaad Kingdom. (Heeb. 11:​8-10, 13) Paal mi rait bowt dis wandaful hoap tu. (Reed Roamanz 8:​20, 21.) Weh yu mi laik di moas wen yu mi laan bowt di Baibl hoap fi di fyoocha? How yu mi feel wen yu mi fain owt dat wan day yu wahn bee perfek ahn yu noh wahn bee wahn sina nohmoh? Ahn how yu mi feel wen yu geh fi laan dat di peepl weh yu lov mi wahn liv agen, bot dis taim eena wahn paradais? Wi ga wahn lata tingz fi luk faawod tu bikaaz a wi hoap fi di fyoocha.

⁸ Ih noh mata if wi hoap da fi liv fareva da hevn er pahn ert, wi hoap gi wi lata gud reezn fi bee hapi. Ahn wi hoap fi di fyoocha ku geh eevn schranga. Paal mi eksplayn how dat ku hapm. Mek wi diskos weh hihn mi seh bowt wi hoap soh dat wi ku bee moa shoar dat weh wi hoap fa wahn hapm fi chroo.

HOW WI HOAP KU GEH SCHRANGA?

9-10. Weh aal Kristyanz ku ekspek fi hapm? (Roamanz 5:3) (Koment pahn di picha.)

⁹ Reed Roamanz 5:3. Paal mi tel wi dat wen wi sofa, wi hoap ku geh eevn schranga. Bot how dat ku bee pasabl? Wel, evribadi weh fala Krais wahn sofa eena sohn kaina way. Mek wi luk pahn Paal egzampl. Hihn mi rait tu di bradaz da Tesalonaika: “Wen wi mi deh wid unu, wi mi tel unu heda taim dat wi wuda sofa sayka chribyulayshan, ahn dat da egzakli weh hapm.” (1 Tes. 3:4) An ih mi rait tu di Korintyanz: “Wi waahn mek unu noa bowt di chribyulayshan weh wi mi fays . . . Wi neva shoar if wi mi wahn servaiv.”—2 Kor. 1:8; 11:​23-27.

¹⁰ Kristyanz tudeh ku ekspek fi fays aal kaina prablemz tu. (2 Tim. 3:12) How bowt yoo? Yoo eva gaahn chroo persikyooshan bikaaz yu di fala Jeezas? Maybi yu famili er frenz mek fon a yu, er maybi dehn eevn ton gens yu bikaaz a yu fayt. Yu eva fays prablemz da werk bikaaz yu di chrai bee aanis aal di taim? (Heeb. 13:18) Di govament eva persikyoot yu bikaaz yu preech tu adaz bowt yu hoap? Noh mata weh kaina prablemz wi fays, Paal seh dat wi shuda stil bee hapi. Wai ih seh dat?

11. Wai wi need fi mek op wi main fi bayr op wen wi di fays chraiyalz?

¹¹ Wen wi di sofa, wi ku bee hapi bikaaz wi noa ih wahn help wi laan fi shoa wahn impoatant kwaliti. Roamanz 5:3 seh: “Wen wi sofa, wi laan fi bayr op.” Aala Jehoava servants wahn fays prablemz, soh aala wi need fi laan fi bayr op. Wi need fi mek op wi main fahn now fi bayr op noh mata weh prablemz kom op eena wi laif. Den wi wahn ku bee shoar dat wi wahn geh weh wi di hoap fa. Wan taim, Jeezas mi giv wahn iloschrayshan bowt sohn seed weh jrap monks di rak dehn wehpaat onli lee bit a soil mi deh. Dehndeh seed mi rifaa tu peepl hoo mi hapi fi hyaa di chroot, bot “wen chroblz ahn persikyooshan kohn,” dehn mi giv op. (Mach. 13:​5, 6, 20, 21) Wi noh waahn bee laik deh kaina peepl. Da chroo, nobadi laik fays haad taimz er laik wen peepl ton gens dehn, bot wi noa fi shoar dat wi wahn geh lata blesinz if wi noh giv op. Mek wi si how.

12. How wi benifit wen wi bayr op anda chraiyalz?

¹² Jaymz mi taak bowt how wi ku benifit wen wi bayr op anda chraiyalz. Hihn mi rait: “If unu kantinyu bayr op, dis wahn chrayn unu fi bee kompleet eena evriting, ahn nobadi wahn ku fain faalt wid unu, an unu noh wahn shaat a notn.” (Jay. 1:​2-4) Rait ya, Jaymz mi-di seh dat wen wi bayr op, wi di geh chraynin. Weh gud tingz kohn fahn dis chraynin wen wi bayr op? Ih ku help wi fi bee moa payshent, fi schrentn wi fayt, ahn fi chros eena Jehoava eevn moa. Pahn tap a dat, wen wi bayr op anda chraiyalz, ih help wi eena wahn nada impoatant way.

13-14. Akaadn tu Roamanz 5:​4, wat da wahn nada way how wi benifit wen wi bayr op, ahn weh hapm tu wi hoap sayka dat?

¹³ Reed Roamanz 5:4. Paal mi rait dat wen wi bayr op, “Gaad wahn pleez wid wi.” Soh wi ku bee shoar dat wi mek Jehoava hapi wen wi bayr op anda chraiyalz. Dat noh meen dat Jehoava hapi fi si yu di sofa er di goh chroo haad taimz. Bot di reezn hihn hapi da bikaaz hihn si yoo di bayr op noh mata wat. Dat soh wandaful fi noa dat wee ku mek Jehoava feel da way bikaaz wi bayr op!—Ps. 5:12.

¹⁴ Memba dat Jehoava mi hapi wid Aybraham bikaaz ih mi bayr op chroo ih chraiyalz, ahn bikaaz a dat Jehoava si ahn az wahn raichos persn ahn kaal ahn ih fren. (Jen. 15:6; Roam. 4:​13, 22) Dis help wi fi si dat Jehoava ku si wi di saym way tu. Hihn noh pleez wid wi jos bikaaz a humoch wi du far ahn er di privilij dehn weh wi gat. Hihn hapi wen wi stay faytful ahn bayr op chroo wi chraiyalz. Dat da sohnting weh aala wi ku du, noh mata wi ayj, weh wi di goh chroo, er humoch wi ku du. If yoo di goh chroo wahn chraiyal rait now, yu ku bee shoar dat yu di mek Jehoava hapi bikaaz yu stay faytful tu ahn. Wen wi tink bowt dat, dat ku reeli mek wi hoap geh schranga.

WI HOAP WAHN NEVA LET WI DONG

15. Wat els Paal mi seh bowt hoap, ahn weh kweschan wi mait aks bikaaz a dat?

¹⁵ Da Roamanz 5:​2, Paal mi seh dat di Kristyanz da Roam mi don ga di “hoap fi geh di gloari weh Gaad wahn gi [dehn].” Bot den laytaraan ih mi seh dat Jehoava pleez wid wi wen wi stay faytful tu ahn an bayr op anda chraiyalz, ahn dat ‘wen Gaad pleez wid wi, wi ga hoap, ahn da hoap wahn neva let wi dong.ʼ (Roam. 5:​4, 5) Wai Paal mi menshan hoap agen eevn doa hihn mi don seh dat di Kristyanz da Roam mi don ga wahn hoap?

16. How wi hoap eena Jehoava pramis dehn ku geh schranga? (Koment pahn di picha dehn.)

¹⁶ Fi mek wi andastan weh Paal mi-di seh, wi haftu memba dat hoap da sohnting weh ku geh schranga. Tink bow how yu mi feel wen yu mi fers laan dat wi ku liv fareva eena paradais pahn ert. Yu praabli mi tink dat da sohnting weh kuda neva hapm er da jos wahn jreem. Bot oava taim, yu hoap geh schranga bikaaz yu mi laan moa bowt Jehoava ahn fi hihn pramis dehn, ahn soh now yu eevn moa kanvins dat disya hoap wahn reeli kohn chroo.

17. How wi hoap kantinyu fi geh schranga eevn afta wi dedikayt wi laif tu Jehoava ahn geh baptaiz?

¹⁷ Eevn afta yu dedikayt yu laif tu Jehoava ahn geh baptaiz, yu hoap mi kantinyu fi geh schranga. Dat da bikaaz yu geh fi noa Jehoava beta ahn yu lov fi hihn groa. (Heeb. 5:13–6:1) Yu praabli si aredi dat weh Roamanz 5:​2-4 seh da chroo. Yu bayr op chroo difrent chraiyalz ahn yu noa fi shoar dat Jehoava pleez wid yu. Bikaaz a aala dehnya tingz weh yu don gaahn chroo, yu moa shoar dat Jehoava pramis dehn wahn kohn chroo fi yoo. Now dat yu hoap don groa soh moch, ih afek evriting weh yu du: di way yu chreet yu famili, di disizhanz weh yu mek, an eevn how yu yooz yu taim.

18. How Jehoava mek wi noa dat weh hihn pramis wahn kohn chroo?

¹⁸ Di apasl Paal tel wi sohnting reeli impoatant bowt di hoap wi ku ga wen Jehoava pleez wid wi. Hihn tel wi dat wi ku bee shoar dat wi hoap wahn kohn chroo. How wi noa dat? Hihn mi seh: “Hoap wahn neva let wi dong, bikaaz Gaad yooz ih hoali spirit weh ih gi wi fi shoa dat ih lov wi.” (Roam. 5:5) Soh wi noh need fi ga no dowt eena wi main weda er nat wi hoap eena Jehoava pramis dehn wahn kohn chroo.

19. Weh wi ku bee shoar a wen ih kohn tu wi hoap?

¹⁹ Tink bowt di pramis weh Jehoava giv Aybraham ahn bowt how hihn mi pleez wid ahn, an si ahn az Ih fren. Di Baibl seh, “Afta Aybraham mi shoa payshens, Gaad mi mek dis pramis tu ahn.” (Heeb. 6:15; 11:​9, 18; Roam. 4:​20-22) Ahn wi noa dat Jehoava pramis tu hihn mi kohn chroo. Saym way soh, if wi stay faytful, weh wee hoap fa wahn kohn chroo tu. Wi hoap da sohnting reel weh bring wi lata jai. (Roam. 12:12) Paal mi rait: “Ah pray dat di Gaad weh gi wi hoap ful op unu haat wid lata jai ahn pees bikaaz unu di chros eena ahn. Den di powa a di hoali spirit ku ful op unu haat wid hoap.”—Roam. 15:13.