• Jraa Kloas tu Gaad Chroo Pryaa
    Injai Laif Fareva!—Si Weh di Baibl Seh

    • Jraa Kloas tu Gaad Chroo Pryaa

      Yoo eva feel laik yu need gaidans eena laif? Er yu waahn ansaz tu sohn impoatant kweschanz weh yu gat? Er yu need komfert? Yu wuda waahn feel kloasa tu Jehoava? Pryaa ku help yu wid aala dehndeh tingz. Bot weh da di rait way fi pray? Yu tink Gaad lisn tu aal pryaaz? Weh yu ku du fi mek shoar dat hihn lisn tu fi yoo pryaaz? Mek wi si.

      1. Da hoo wi fi pray tu, ahn weh wi ku pray bowt?

      Jeezas mi seh dat wi shuda pray onli tu wi hevnli Faada. Jeezas ihself mi pray tu Jehoava. Hihn mi seh: “Soh den, dis da how unu mos pray: ‘Hevnli Faada . . .ʼ” (Machyu 6:9) Wen wi pray tu Jehoava, wi frenship wid hihn wahn geh schranga.

      Wi ku pray bowt aalmoas eniting. Bot fi mek Gaad ansa wi pryaaz, ih need fi deh akaadn tu fi hihn wil. Di Baibl seh: “Noh mata weh wi aks Gaad fa, wans wi aks akaadn tu fi hihn wil, ih hyaa wi.” (1 Jan 5:​14) Jeezas mi gi sohn gud egzampl a weh wi ku pray fa. (Reed Machyu 6:​9-​13.) Pahn tap a dat, wi noh waahn ferget fi gi tanks tu Gaad fi weh ih don du fi wi an aks ahn fi help adaz.

      2. How wi shuda pray?

      Di Baibl inkorij wi fi “poar owt [wi] haat fronta [Gaad].” (Psalm 62:8) Soh wi pryaaz shuda bee sinsyaa an ih shuda kohn fahn wi haat. Wi ku seh wahn sailent pryaa er pray owt lowd eena eni pozishan weh shoa rispek fi hihn. Wi ku pray enitaim, noh mata weh wi deh.

      3. How Gaad ansa wi pryaaz?

      Hihn du dis eena difrent wayz. Jehoava gi wee fi hihn Werd, di Baibl, wehpaat wi aafn fain di ansaz tu wi kweschanz. Gaad Werd di Baibl ku “mek di persn widowt ekspeeryens waiz” wen ih reed it. (Psalm 19:7; reed Jaymz 1:5.) Hihn help wi fi kip kaam wen wi di fays chalenjiz. Ahn hihn ku eevn yooz ih servant dehn fi help wi wen wi reeli need it.

      SAACH FI MOA

      Si how yu ku pray eena wahn way weh pleez Gaad, ahn fain owt how pryaa ku benifit yoo.

      4. Gaad tel wi how fi pray

      Weh wahn mek Gaad aksep wi pryaaz? Play di VEEDYO.

      VEEDYO: Yu Tink Gaad Lisn tu Aal Pryaaz?​—Veedyo Klip (2:​42)

      Jehoava waahn mek wi pray tu hihn. Reed Psalm 65:2, ahn den diskos dehnya kweschan:

      • Yu tink “di Wan weh hyaa wi pryaaz” waahn mek yoo pray tu hihn? Wai, er wai nat?

      If wi waahn mek Gaad lisn tu wi pryaaz, wi need fi chrai wi bes fi liv akaadn tu fi hihn standadz. Reed Micah 3:4 ahn 1 Peeta 3:​12, ahn den diskos dis kweschan:

      • How wi ku mek shoar dat Jehoava wahn lisn tu wi pryaaz?

      Joorin wahn waar, sohn soalja pray tu Gaad fi dischrai dehn enimi, wail dehn enimi di pray fi di saym ting. Yu tink Gaad wahn ansa dehndeh kaina pryaaz?

      5. Wi pryaaz shuda kohn fahn wi haat

      Sohn peepl groa op di seh sertn pryaaz oava ahn oava ahn werd fi werd. Yu tink dat da how Gaad waahn wi pray tu hihn? Reed Machyu 6:7, ahn den diskos dis kweschan:

      • How yu ku avoid fi seh “di saym tingz oava ahn oava agen” eena yu pryaaz?

      Eech day, tink bowt wahn spesifik blesin eena yu laif ahn den tank Jehoava fi da blesin. If yu tink bowt sohnting difrent evriday fi wahn week, yu wahn pray bowt sevn difrent tingz widowt di ripeet yuself.

      Wahn lee bwai di taak tu ih payrents.

      Wahn gud pa waahn mek ih pikni taak tu ahn fan ih haat. Saym way soh, Jehoava waahn mek wi pray tu hihn fahn wi haat

      6. Pryaa da wahn gif fahn Gaad

      How pryaa ku help wi espeshali wen wi di goh chroo haad taimz? Play di VEEDYO.

      VEEDYO: Pryaa Help Wi fi Bayr Op (1:​32)

      Di Baibl pramis wi dat pryaa ku help wi feel kaam. Reed Filipiyanz 4:​6, 7, ahn den diskos dehnya kweschan:

      • Eevn doa pryaa noh aalwayz rimoov wi prablemz, how ih ku help wi?

      • Wat da sohn tingz yu wuda laik fi pray bowt?

      Yu mi noa?

      Di werd “aymen” meen “mek ih bee soh” er “fi shoar.” Sins Baibl taimz dehn yooz di werd “aymen” da di en a wahn pryaa. ​—1 Chronicles 16:​36.

      7. Mek taim fi pray

      Sohntaim wi mait geh soh bizi dat wi ferget fi pray. How Jeezas mi feel bowt pryaa? Reed Machyu 14:​23 ahn Maak 1:​35, ahn den diskos dehnya kweschan:

      • Weh Jeezas mi du fi fain taim fi pray?

      • Weh yoo ku du fi fain taim fi pray?

      Di picha dehn: Wahn laydi di pray chroo owt di day. 1. Eena di maanin. 2. Wid ih pikni dehn. 3. Da werk. 4. Bifoa ih eet.

      WEH YU WUDA SEH IF SOHNBADI TEL YU: “Ih noh mata weh yu pray fa, Gaad lisn tu aal pryaaz.”

      • Wai yu wuda seh dat?

      WEH WI LAAN?

      Sinsyaa pryaaz jraa wi kloas tu Gaad, ih help wi fi bee kaam, an ih gi wi di schrent weh wi need fi pleez Jehoava.

      Mek Wi Rivyoo:

      • Da hoo wi fi pray tu?

      • How wi shuda pray?

      • How pryaa ku benifit yoo?

      Weh Ah Ku Werk Pan

      FAIN OWT MOA

      Fain di ansaz tu sohn kweschanz weh yu mait ga bowt pryaa.

      “Sevn Tingz Yu Need fi Noa Bowt Pryaa” (Di Wachtowa, Aktoaba 1, 2010)

      Laan sohn impoatant reezn wai wi fi pray ahn how yu ku mek yu pryaaz beta.

      “Wai Ai Shuda Pray?” (Web aatikl)

      Si weh di Baibl teech bowt hoo wi shuda pray tu.

      “Yu Tink Wi Shuda Pray tu Wahn Saynt?” (Web aatikl)

      Eena di myoozik veedyo, noatis if ih mata weh wi pray er wen wi pray.

      Pray Enitaim (1:​22)