STODI AATIKL 53
Yong Bradaz—Mek it Yu Goal fi Bee Beta Kristyanz
“Unu fi bee machoar eena di way unu tink.”—1 Kor. 14:20.
SANG 135 Weh Jehoava Waahn fi Yong Peepl
WEH WI WAHN DISKOS?a
1. Weh wahn Kristyan brada need fi du fi bee wahn beta Kristyan?
DI APASL Paal mi inkorij di Kristyan dehn da Efisos ahn tel dehn: “Unu fi bee machoar eena di way unu tink.” (1 Kor. 14:20) Da advais reeli impoatant fi aal bradaz tudeh. Fi mek dehn du dat, dehn need fi laan fi obay Gaad laa dehn ahn fala Baibl prinsiplz eena dehn laif. (Look 2:52) Wai ih impoatant fi mek yonga bradaz laan fi bee beta Kristyanz?
2-3. Wai ih soh impoatant fi mek wahn yong brada bee wahn machoar Kristyan?
2 Kristyan bradaz ga lata impoatant rispansabiliti eena di famili an eena di kangrigayshan. Fi shoar, unu yong bradaz mosi don tink bowt som a dehnya rispansabiliti. Yu mait ga di goal fi bee wahn painyaa, wahn ministeeryal servant, ahn laytaraan wahn elda. Maybi yu mait aalso waahn geh marid ahn ga pikni. (Ifee. 6:4; 1 Tim. 3:1) Fi reech dehnya goalz ahn handl dehnya rispansabiliti gud, yu need fi bee wahn machoar Kristyan.b
3 Weh ku help yu fi bee wahn machoar Kristyan? Dehn ga impoatant skilz yu need fi laan. Weh yu ku du fahn now fi pripyaa fi eni rispansabiliti yu mait ga eena di fyoocha soh yu ku ga sokses?
HOW FI BEE WAHN MACHOAR KRISTYAN
Kapi Jeezas egzampl ahn dat wahn help yu fi bee wahn machoar Kristyan man (Paragraaf 4)
4. Wehpaat yu ku fain sohn gud egzampl fi fala? (Koment pahn di picha.)
4 Chooz gud egzamplz fi fala. Di Baibl gat een lata gud egzamplz weh yong bradaz ku fala. Dehnya man mi lov Gaad ahn mi tek kayr a fi hihn peepl eena lata difrent wayz. Yu ku aalso kapi di gud egzamplz a machoar Kristyan bradaz eena yu famili an eena di kangrigayshan. (Heeb. 13:7) Ahn yu ga di bes egzampl weh yu ku fala—Jeezas Krais. (1 Peet. 2:21) Wen yu stodi dehnya egzampl, tink bowt di kwalitiz weh stan owt moas tu yoo. (Heeb. 12:1, 2) Den disaid how yu ku kapi dehn egzampl.
5. How yu ku protek yu main, ahn wai dat impoatant? (Psalm 119:9)
5 Laan fi tink gud ahn “protek yu main.” (Prov. 3:21) Wahn man weh tink eena wahn spirichwal way noh ak haysti, bot ih tink gud bowt weh ih wahn du bifoa ih du it. Soh werk haad fi protek yu main ahn mek shoar yu kip aan di du dat eena yu laif. Wai dat soh impoatant? Moas yong man eena di werl mek disizhanz bays pahn dehn oan tinkin er how dehn feel. (Prov. 7:7; 29:11) Aalso, di tingz weh yu wach pahn TV, soashal meedya, an oava di Intanet ku afek di way yu tink an ak. How yu ku laan fi bee waiz? Fers, yooz di Baibl fi laan bowt how Jehoava tink ahn feel, ahn den tink bowt wai ih impoatant fi du weh ih seh. Neks, yooz weh yu laan fi mek beta disizhanz weh wahn pleez Jehoava. (Reed Psalm 119:9.) If yu laan fi tink laik dat, ih wahn help yu fi bee wahn machoar Kristyan man. (Prov. 2:11, 12; Heeb. 5:14) Mek wi si how wizdom wahn help yu eena dehnya too sichuwayshanz: (1) di way yu ak wen yu deh rong sistaz, ahn (2) weh yu wayr ahn how yu luk.
6. How wahn yong brada weh laan fi tink laik Jehoava wahn shoa rispek fi sistaz?
6 Wahn man weh laan fi tink how Jehoava tink wahn shoa rispek tu wahn wuman. Fi egzampl, notn rang fi mek wahn yong brada geh fi noa wahn yong sista beta. Bot, wahn yong man weh di protek ih main wahn neva seh, rait, er du eniting els weh wuda mek shee tink dat hihn waahn dayt ahn if ih noh plan fi marid ahn. (1 Tim. 5:1, 2) If hihn di dayt wahn sista, hihn wahn mek shoar dat dehn noh wahn deh bai dehnself widowt sohnbadi deh wid dehn.—1 Kor. 6:18.
7. Wen wahn yong brada tink di way Jehoava tink, how dat wahn help ahn wen ih di chooz weh fi wayr er weh hyaa stail ih waahn?
7 Wahn yong man weh laan fi tink di way Jehoava tink wahn shoa it bai di way ih jres ahn di hyaa stail ih chooz. Moas a di taim, peepl weh dizain an advataiz nyoo kloaz noh rispek Jehoava ahn dehn mait aalso liv wahn imoaral laif. Di way dehn mek dehn kloaz shoa dehn doti tinkin, bikaaz dehn mek kloaz weh ku fit wahn man tait er mek ih luk laik wahn wuman. Bot wen wahn yong brada weh di groa fi bee machoar di chooz weh kloaz fi wayr, hihn wahn mek Baibl prinsiplz gaid ahn, an ih wahn fala di gud egzamplz weh ih si eena di kangrigayshan. Ih ku aks ihself: ‘Di chois dehn weh Ah mek shoa wizdom ahn rispek fi adaz? Di way Ai jres mek it eezi fi peepl si dat Ai di serv Jehoava?ʼ (1 Kor. 10:31-33; Taitos 2:6) Di bradaz ahn sistaz eena di kangrigayshan wahn rispek wahn yong man weh laan fi tink di way Jehoava tink, ahn Jehoava wahn rispek ahn tu.
8. How wahn yong brada ku bee sohnbadi weh peepl ku chros?
8 Bee wahn persn weh peepl ku chros. Wahn yong man weh peepl ku chros wahn mek shoar ih tek kayr a aala ih rispansabiliti dehn. (Look 16:10) Mek wi luk pahn di perfek egzampl weh Jeezas mi set. Jeezas da-mi sohnbadi weh aalwayz tek kayr a ih asainment dehn, ahn hihn mi rispansabl. Hihn mi aalso du aal weh Jehoava mi aks ahn fi du, eevn wen dat mi haad far ahn. Hihn mi lov peepl, espeshali ih disaipl dehn, an ih mi wilin fi ded fi dehn. (Jan 13:1) Jos laik Jeezas, werk haad pahn eni asainment weh yu get. If yu noh noa how fi du sohnting, bee hombl an aks machoar bradaz fi help. Wen yu geh wahn asainment, noh chrai du az lee bit az pasabl, bot bee wilin fi du moa dan weh dehn aks yu fi du. (Roam. 12:11) Insted, du yu asainment laik yu di du it “fi Jehoava ahn noh fi peepl,” soh werk haad fi du yu bes ahn finish yu asainment. (Kol. 3:23) Af koars, yu noh perfek, soh bee hombl an admit eni mistayk weh yu mek.—Prov. 11:2.
LAAN GUD SKILZ WEH KU HELP YU EENA YU LAIF
9. Wai wahn yong brada need fi ga gud skilz?
9 Fi bee wahn machoar Kristyan man, yu need fi ga skilz weh ku help yu eena laif. Dehnya skilz wahn help yu fi tek kayr a yu rispansabiliti dehn eena di kangrigayshan, fi kip wahn jab weh wahn sopoat yoo er yu famili, ahn fi ga wahn gud rilayshanship wid adaz. Mek wi taak bowt som a dehnya skilz.
Wen yu laan fi reed ahn rait gud, ih noh onli help yoo, bot ih help di kangrigayshan tu (Paragraaf 10-11)
10-11. How wahn yong brada weh laan fi reed ahn rait gud help di kangrigayshan an ihself? (Psalm 1:1-3) (Koment pahn di picha.)
10 Laan fi reed ahn rait gud. Di Baibl seh wahn man weh hapi ahn weh du gud eena laif tek di taim fi reed di Baibl evri day ahn tink bowt weh ih reed. (Reed Psalm 1:1-3.)c Wen yu reed di Baibl evri day, yu wahn laan fi tink di way Jehoava tink ahn yu wahn laan fi yooz di Skripchaz eena di rait way. (Prov. 1:3, 4) Wai di kangrigayshan need bradaz laik dat?
11 Wi bradaz ahn sistaz eena di kangrigayshan need help fahn spirichwali machoar bradaz hoo ku teech dehn ahn gi dehn gud advais fahn di Baibl. (Taitos 1:9) If yu noa how fi reed ahn rait gud, yu ku pripyaa paats ahn koments weh ku help dehn ahn mek dehn fayt geh schranga. Yu ku aalso yooz dis skil fi tek noats wen yu di du yu oan risaach ahn wen yu deh da meetin, asembli, ahn kanvenshan. Dehnya noats wahn help yu schrentn fi yoo fayt an inkorij adaz tu.
12. Weh wahn help yu fi laan fi lisn an ekspres yuself gud?
12 Laan fi lisn ahn taak eena wahn way weh peepl ku andastan yu. Wahn Kristyan man need fi laan fi lisn an ekspres ihself gud. Wahn man weh du dat wahn lisn an andastan how adaz tink ahn feel. (Prov. 20:5) Hihn ku laan fi andastan how sohnbadi di feel bai di way dehn taak, di ekspreshan pahn dehn fays, ahn di way how dehn ak. Yu kyaahn laan how fi du dis if yu noh spen taim wid peepl. If yu aalwayz yooz eemayl, teks mesij, er ada ilekchranik divais fi taak tu peepl, den dat wahn mek it moa haada fi taak tu dehn fays tu fays. Soh chrai luk fi wayz fi taak tu peepl fays tu fays.—2 Jan 12.
Ih gud fi laan wahn chrayd weh ku help yu fain wahn jab (Paragraaf 13)
13. Wat els wahn yong man need fi laan? (1 Timoti 5:8) (Koment pahn di picha.)
13 Laan fi mek inof moni fi tek kayr a yuself. Wahn machoar Kristyan man need fi tek kayr a ihself an ih famili. (Reed 1 Timoti 5:8.) Eena sohn konchri, yong bradaz laan wahn chrayd fahn dehn pa er ada relitiv. An eena sohn ada konchri, wahn yong man mait laan wahn chrayd er ada skilz da hai skool. Ih gud fi laan wahn skil er chrayd weh ku help yu fain wahn jab. (Aks 18:2, 3; 20:34; Ifee. 4:28) Mek adaz noa yu az sohnbadi weh werk haad ahn finish weh yu staat. If yu du dat, ih wahn eeziya fi fain wahn jab ahn kip it. Di kwalitiz ahn skilz weh wi taak bowt impoatant fi wahn Kristyan man soh dat ih ku tek kayr a moa rispansabiliti eena di fyoocha. Mek wi taak bowt som a dehndeh rispansabiliti.
PRIPYAA FI YU FYOOCHA
14. Weh wahn yong brada ku du fi bee wahn ful-taim servant?
14 Ful-taim servant. Wahn lata machoar Kristyan bradaz staat serv Jehoava ful-taim wen dehn yong. Wahn yong man weh di painyaa laan fi werk wid lata difrent peepl. Ih aalso laan how fi manij ih moni soh dat ih noh spen moa dan weh ih mek. (Fil. 4:11-13) Wahn gud way fi werk tuwaadz ful-taim servis da fi agzilari painyaa. Lata wi bradaz ahn sistaz fain dat wen dehn staat agzilari painyaa fi wahn fyoo monts fers, dat help dehn geh redi fi staat regyula painyaa. Wen yu painyaa, yu wahn geh lata chaans fi du moa eena ful-taim servis. Fi egzampl, yu ku geh fi serv az wahn kanschrokshan servant er wahn Betelait.
15-16. Weh wahn yong brada ku du fi kwalifai fi serv az wahn ministeeryal servant er wahn elda?
15 Ministeeryal servant er elda. Kristyan bradaz shuda ga di goal fi reech owt ahn serv dehn bradaz ahn sistaz az kangrigayshan eldaz. Di Baibl seh dat dehn bradaz weh di chrai dehn bes fi reech dehnya goalz “waahn du wahn gud werk.” (1 Tim. 3:1) Bifoa wahn brada ku kwalifai fi serv az wahn elda, ih need fi kwalifai fi serv az wahn ministeeryal servant fers. Di bradaz weh serv az ministeeryal servants help di eldaz tek kayr a di bradaz ahn sistaz eena di kangrigayshan. Eldaz ahn ministeeryal servants ga wahn hombl atichood wen dehn di help dehn bradaz ahn sistaz ahn wen dehn preech wid dehn eena di minischri. Wahn yong brada ku serv az wahn ministeeryal servant az yong az 17 tu 19 yaaz oal. Ahn wahn ministeeryal servant weh kwalifai ku eevn geh apointid az wahn elda fahn wen ih 20 yaaz oal.
16 Weh yu ku du fi kwalifai fi serv az wahn ministeeryal servant er elda? Di Baibl gi wi wahn lis a kwalitiz weh yu need fi gat. Dehnya kwalitiz bays pahn di lov weh yu ga fi Jehoava, yu famili, ahn di kangrigayshan. (1 Tim. 3:1-13; Taitos 1:6-9; 1 Peet. 5:2, 3) Chrai haad fi andastan eech kwaliti weh yu need fi werk pan ahn pray tu Jehoava fi help yu reech dehnya kwalifikayshanz.d
Jehoava ekspek wahn hozban fi lov ih famili, gi dehn weh dehn need, bee dehn gud fren, ahn help dehn stay kloas tu Jehoava (Paragraaf 17)
17. How wahn yong brada ku pripyaa ihself fi bee wahn gud hozban ahn famili hed? (Koment pahn di picha.)
17 Wahn hozban ahn famili hed. Laik weh Jeezas seh, dehn ga sohn machoar Kristyan bradaz weh chooz fi stay singl. (Mach. 19:12) Bot if yu chooz fi geh marid, yu di tek op di rispansabiliti fi bee wahn hozban ahn famili hed. (1 Kor. 11:3) Jehoava ekspek wahn hozban fi lov ih waif ahn tek kayr a ahn, bee wahn gud fren far ahn, an help ahn stay kloas tu Jehoava. (Ifee. 5:28, 29) Di kwalitiz ahn skilz weh wi mi taak bowt erliya eena dis aatikl, laik di protek yu main, ga rispek fi wuman, ahn di bee sohnbadi weh evribadi ku chros, wahn help yu if yu disaid fi geh marid. If yu laan fi du dehndeh tingz, yu di pripyaa yuself fi bee wahn gud hozban ahn famili hed.
18. Fi bee wahn gud pa eena di fyoocha, weh wahn yong brada ku du fahn now?
18 Pa. Afta yu geh marid, yu mait ga pikni. Jehoava ku teech wi wahn lat bowt how fi bee wahn gud pa. (Ifee. 6:4) Jehoava mi aalwayz tel ih son Jeezas dat ih lov ahn, an ih hapi wid ahn. (Mach. 3:17) If yoo da wahn pa, mek shoar dat yu tel yu pikni aal di taim dat yu lov dehn. Komen yu pikni aal di taim fi di gud tingz weh dehn du. Wahn pa hoo kapi Jehoava egzampl wahn help ih pikni dehn fi bee machoar Kristyan man ahn wuman. Wen yu shoa adaz eena yu famili an eena di kangrigayshan fahn now dat yu lov an apreeshiayt dehn ahn yu tek gud kayr a dehn, dat wahn pripyaa yu fi bee wahn gud pa eena di fyoocha. (Jan 15:9) Aala dehnya tingz wahn help yu fi bee wahn gud hozban ahn pa laytaraan. Bot fi rait now, Jehoava wahn apreeshiayt yu, ahn yu wahn bee wahn big help tu yu famili ahn di kangrigayshan.
WEH YOO WAHN DU NOW?
Wahn lata yong bradaz weh praktis weh dehn laan fahn di Baibl en op di bee machoar Kristyan bradaz (Paragraaf 19-20)
19-20. Weh wahn help yong bradaz fi bee machoar Kristyanz? (Koment pahn di picha pahn di kova.)
19 Yong bradaz, yu noh wahn bee wahn machoar Kristyan oavanait. Ih tek haad werk fi reech dis goal. Memba, yu need fi kapi di gud egzampl a adaz rong yu, laan fi tink di way Jehoava tink, bee sombadi weh evribadi ku chros, laan gud skilz weh ku help yu eena laif, ahn pripyaa fi yu fyoocha.
20 Wen yu tink bowt aala di tingz weh yu haftu werk pan, yu mait feel laik ih tu haad fi du. Bot yu ku du it! Ahn memba dat Jehoava reeli waahn help yu. (Isa. 41:10, 13) Di bradaz ahn sistaz eena yu kangrigayshan wahn help yu tu. Wen yu geh fi bee di man weh Jehoava waahn yu bee, yu wahn ga wahn hapi laif ahn yu wahn feel satisfai. Wi lov unu yong bradaz! Ahn wi hoap dat Jehoava wahn kantinyu fi bles unu az unu werk haad fi bee machoar Kristyan bradaz.—Prov. 22:4.
SANG 65 Neva Stap Groa!
a Eena di kangrigayshan, wi need machoar Kristyan bradaz. Eena dis aatikl, wi wahn taak bowt how wahn yong brada ku reech dis goal.
b Si “Weh Ih Meen?” eena di laas aatikl.
c Psalm 1:1-3: “Di man weh noh fala advais fahn wikid peepl ahn weh noh waak pahn di road weh sinaz waak pan ahn weh noh sidong monks peepl weh noh ga no rispek fi weh rait wahn bee hapi. 2 Bot ih hapinis wahn kohn fahn di laa a Jehoava, an ih reed ahn meditayt pahn fi Hihn laa day ahn nait. 3 Hihn wahn bee laik wahn chree weh dehn plaant bai di riva, wahn chree weh aalwayz giv froot tu taim; ih leef dehn wahn neva geh jrai owt. Evriting weh ih du wahn ga sokses.”