3. Weh Jehoava ekspek fan ih fren dehn?

Jehoava ga lov fi evribadi, “bot Hihn da kloas fren wid di raichos persn.” (Proverbs 3:​32) Jehoava ekspek ih fren dehn fi chrai du tingz weh gud, ahn fi avoid du tingz weh bad. Som peepl mait feel dat dehn kuda neva liv op tu Jehoava raichos standadz a weh gud ahn bad. Bot, Jehoava mersiful. Hihn aksep enibadi weh reeli lov Hihn ahn du dehn bes fi pleez Hihn.​—Psalm 147:​11; Aks 10:​34, 35.

Evribadi waahn bee frenz wid peepl weh aanis. Ahn Jehoava ekspek ih fren dehn fi bee aanis tu. Bot dis da noh sohnting eezi fi du, bikaaz wi liv eena wahn werl weh lata peepl noh aanis. Weh gud tingz kohn fahn di bee aanis eena evriting weh wi du?

1. Wat da di moas impoatant reezn fi bee aanis?

Wen wi aanis wid ada peepl, wi shoa Jehoava dat wi lov ahn rispek hihn. Tink bowt dis: Jehoava noa aal weh wi tink bowt ahn du. (Heebrooz 4:13) Hihn si wen wi disaid fi bee aanis, ahn dat mek hihn hapi. Fi hihn Werd seh: “Jehoava hayt wahn chriki persn, bot Hihn da kloas fren wid di raichos persn.”—Proverbs 3:32.

2. Weh da sohn tingz wi ku du evriday fi shoa dat wi aanis?

Jehoava waahn mek wi “taak di chroot wid wan anada.” (Zechariah 8:16, 17) Dat meenz dat weda wi di taak tu wi famili, di peepl weh wi werk wid, wi bradaz ahn sistaz, er peepl weh werk eena govament, wi noh tel lai er gi dehn rang infamayshan. Peepl weh aanis noh teef er chrik peepl fi tek dehn moni. (Reed Proverbs 24:28 ahn Ifeezhanz 4:28.) Ahn dehn pay aal dehn taks weh dehn oa. (Roamanz 13:5-7) Wen wi di du tingz laik dehnya, wi wahn bee “aanis eena evriting weh wi du.”—Heebrooz 13:18.

3. Weh gud tingz kohn fahn di bee aanis?

Wen wi aanis peepl wahn ku chros wi. Wi wahn help evribadi eena di kangrigayshan feel sayf jos laik wahn famili weh lov eech ada. Wi wahn hapi wen wi ga wahn kleen kanshans. Ahn pahn tap a dat, wi ku “shoa peepl how byootiful di teechinz a Gaad, wi Sayvya,” ahn dat ku mek dehn waahn serv Jehoava.—Taitos 2:10.

SAACH FI MOA

4. Jehoava feel hapi wen wi aanis

Reed Psalm 44:21 ahn Malachi 3:16, ahn den diskos dehnya kweschan:

• Wai ih noh mek sens fi tink dat wi ku haid di chroot?

• How yu tink Jehoava feel wen wi tel di chroot, eevn wen ih noh eezi fi du dat?

5. Aalwayz bee aanis

VEEDYO: Tingz Weh Ku Mek Wi Rijais—Wahn Kleen Kanshans (2:32)

Reed Heebrooz 13:18, ahn den taak bowt how wi ku bee aanis . . .

• wid wi famili.

• wen wi deh da werk er skool.

• eena ada sichuwayshanz weh kom op eena laif.

6. Wi ga wahn beta laif wen wi aanis

Sohntaim wen wi aanis ih ku kaaz prablemz fi wi. Bot eena di en, tingz aalwayz werk owt beta wen yu aanis. Reed Psalm 34:12-16, ahn den diskos dis kweschan:

• Wen yu aanis, how dat mek yu laif beta?

1. Wahn hozban ahn waif mek dehn marij schranga wen dehn aanis wid eech ada

2. Wen wahn werka aanis, ih baas ku chros ahn

3. Aanis peepl geh wahn gud repyutayshan wid peepl weh werk fi di govament

WEH WI LAAN?

Jehoava waahn ih frenz bee aanis eena evriting weh dehn seh ahn du.

Mek Wi Rivyoo:

• Eena weh wayz wi ku shoa dat wi aanis?

• Wai ih noh mek sens fi tink dat wi ku haid di chroot?

• Wai yoo waahn bee aanis aal di taim?

FAIN OWT MOA

How payrents ku teech dehn pikni fi bee aanis?

Tel di Chroot (1:44)

How yu benifit wen yu kip yu pramis dehn?

Kip Yu Pramis Dehn ahn Jehoava Wahn Bles Yu (9:09)

Fain owt if wi fi pay taks eevn if dehn noh yooz it di rait way.

“Yu Haftu Pay Taks?” (Di Wachtowa, Septemba 1, 2011)

Weh mi mek wahn man weh neva aanis chaynj ih laif ahn staat tu du aanis werk?

“Ah Laan Dat Jehoava Mersiful ahn Fergivin” (Di Wachtowa, May 1, 2015)

2. How Jehoava feel bowt di frenz weh yoo chooz?

Jehoava kyaaful wen ih di chooz ih frenz. “Hihn da kloas fren wid di raichos persn.” (Proverbs 3:32) If wi chooz frenz weh noh lov Jehoava, how dat wuda mek hihn feel? Dat wuda reeli hert hihn! (Reed Jaymz 4:4.) Bot if wi stay weh fahn bad kompni ahn jraa kloas tu hihn ahn tu peepl weh lov ahn, Jehoava wahn hapi wid wi, an ih wahn mek wi bee ih fren.—Psalm 15:1-4.