Spirichwaliti
Di fos aatikl eena dis magazeen mi seh dat wahn lata peepl kansida di Baibl az wahn hoali buk. Dehn si dat wen dehn reed ahn fala weh di Baibl seh, dehn feel kloasa tu Gaad ahn kohn fi andastan wat da dehn perpos eena laif.
Di Baibl yooz di werd “spirichwaliti” fi rifaa tu wahn atichood er wahn way a laif. (Jood 18, 19, NW) Wahn persn weh noh waahn Gaad gaidans pen pahn ih oan opinyan, bot wahn persn weh waahn Gaad gaidans cherish fi Hihn standadz.—Ifeezhanz 5:1.
HOAP
BAIBL PRINSIPL: “If yu geh diskorij wen haad taim kohn pahn yu, yu wahn geh week.”—Proverbs 24:10, futnoat.
WEH IH MEEN? Diskorijment ku kaaz wi fi looz di schrent weh wi need fi deel wid prablemz eena laif. Pahn di ada han, hoap ku gi wi di schrent weh wi need fi deel wid dehndeh prablemz. Wen wi ga hoap, ih help wi fi riyalaiz dat moas a wi prablemz da onli fi wahn wail; az a mata a fak, sohnting gud ku akchwali kohn fahn dehn.
WEH YU KU DU: Tink bowt di gud tingz weh wahn hapm eena di fyoocha; bee pazitiv. Noh di wori bowt weh mait hapm er di wayt fi di perfek taim fi werk tuwaadz yu goal dehn. Da chroo, eevn doa wi pazitiv bowt di fyoocha ahn wi di werk pahn wi goalz, sohntaimz ‘tingz weh wi noh ekspekʼ ku stil hapm. (Ecclesiastes 9:11) Bot moas a di taim, tingz ton owt beta dan wi mi ekspek. Fi egzampl, di Baibl yooz wahn byootiful iloschrayshan bowt faamin. Ih seh: “Plaant yu seed eena di maanin ahn noh mek yu han res til eevnin; bikaaz yu noh noa weh yu wahn ga sokses, weda da dis wan er da wan, er maybi di too a dehn wahn du gud.”—Ecclesiastes 11:6.
ANSAZ TU SOHN IMPOATANT KWESCHANZ EENA LAIF
BAIBL PRINSIPL: “Gi mi andastandin . . . Fi yoo werd da di chroot.”—Psalm 119:144, 160.
WEH IH MEEN? Di Baibl ga di ansaz tu kweschanz weh moas peepl aks. Fi egzampl, ih ansa kweschanz laik:
Wehpaat wi kohn fram?
Wat da di perpos a laif?
Weh hapm wen sombadi ded?
Wai wi deh ya?
Aal rong di werl, milyanz a peepl fain di ansaz tu dehndeh kweschanz an moa bikaaz dehn stodi di Baibl. Ahn dat mek dehn laif beta.
WEH YU KU DU: Fain owt fi yuself weh di Baibl teech. Aks eni wan a Jehoava Witnisiz fi help yu andastan di Baibl. Vizit wi websait, jw.org, er goh da wan a wi meetinz. Wi noh chaaj fi goh een an evribadi welkom fi kohn.
SOHN ADA BAIBL PRINSIPL
Wach di veedyo Wai Stodi di Baibl? pahn jw.org. Ih avaylabl eena honjridz a difrent langwij
BEE KANSHOS A YU SPIRICHWAL NEED.
“Gaad bles dehn wan weh noa seh dehn need hihn.”—MACHYU 5:3.
LAAN MOA BOWT DI GAAD WEH DI BAIBL TAAK BOWT.
“Gaad du aala dis soh dat wee wuda luk far ahn, ahn chrai fain ahn, bikaa reeli ahn chrooli Gaad noh deh faar fahn non a wi.”—AKS 17:27.
REED AHN TINK BOWT DI MESIJ A DI BAIBL.
“Bot fi hihn jai deh eena di laa a Jehoava,a an ih reed it ahn stodi it day ahn nait. . . . Evriting weh ih du wahn ga sokses.”—PSALM 1:2, 3, futnoat.
a Di Baibl tel wi dat Gaad naym da Jehoava.