Soon, Jehoava wahn yooz fi hihn Kingdom fi geh rid a aala wi prablemz. Dat da gud nyooz, soh evribadi need fi noa bowt it. Jeezas mi waahn mek fi hihn falowaz shayr dis mesij wid evribadi! (Machyu 28:19, 20) How Jehoava Witnisiz di du weh Jeezas mi koman?

1. How Machyu 24:14 di kohn chroo tudeh?

Jeezas mi prafesai: “Dehn wahn preech di gud nyooz bowt di Kingdom aal oava di ert.” (Machyu 24:14) Jehoava Witnisiz hapi fi du dis impoatant werk. Wi di preech di gud nyooz aal rong di werl eena moa dan 1,000 difrent langwij! Dis da wahn lata werk; ih tek lata werk jos fi aaganaiz it. Wi kuda neva du aala dis werk widowt Jehoava help.

2. Weh aal wi du soh dat wi ku preech tu peepl?

Wi preech eniway wehpaat wi ku fain peepl. Laik di Kristyanz eena di fers senchri, wi preech “fahn hows tu hows.” (Aks 5:42) Dis da wahn aaganaiz way how wi ku taak tu milyanz a peepl evri yaa. Sins peepl noh aalwayz deh hoam, wi aalso preech eena ada plays wehpaat peepl naamali deh. Wi aalwayz luk fi eni apachooniti fi tel adaz bowt Jehoava ahn fi hihn perpos.

3. Hoo ga di rispansabiliti fi preech di gud nyooz?

Aal chroo Kristyanz ga di rispansabiliti fi shayr di gud nyooz wid adaz. Wi tek wi rispansabiliti seeryos. Wi preech az moch az wi kud bikaaz wi noa dat ih ku sayv peepl laif. (Reed 1 Timoti 4:16.) Wi noh geh pay fi du dis werk, kaaz di Baibl seh: “Unu mos du tingz fi free bikaaz unu neva pay fi notn.” (Machyu 10:7, 8) Da chroo, noh evribadi lisn tu di mesij weh wi preech, bot wi kantinyu fi preech bikaaz dis shoa dat wi obay Jehoava ahn dat wi waahn mek hihn hapi.

SAACH FI MOA

4. Wi werk haad fi preech tu evribadi

VEEDYO: Di Preech “Aal Oava di Werl” (7:38)

• Weh yoo laik bowt weh aal Jehoava Witnisiz du fi preech?

Reed Machyu 22:39 ahn Roamanz 10:13-15, ahn den diskos dehnya kweschan:

• How wi preechin werk shoa dat wi lov peepl?

• How Jehoava feel bowt dehn wan weh preech di gud nyooz?​—Si vers 15.

5. Wi di werk lang wid Gaad

Lata peepl ekspeeryens shoa dat Jehoava di dairek wi werk. Fi egzampl, da New Zealand wahn brada weh naym Paul mi meet wahn laydi wen hihn mi-di preech fahn hows tu hows wahn aftanoon. Da saym maanin, di laydi mi pray tu Gaad, an ih eevn yooz Gaad naym, Jehoava. Shee mi aks Gaad fi sen sohnbadi fi kohn vizit ahn. Paul seh: “Chree owaz layta, Ah mi deh rait da ih doa.”

Reed 1 Korintyanz 3:9, ahn den diskos dis kweschan:

• How difrent ekspeeryens laik di wan da New Zealand shoa dat Jehoava di dairek di preechin werk?

Reed Aks 1:8, ahn den diskos dis kweschan:

• Wai wi need Jehoava help fi du di preechin werk?

Yu mi noa?

Evri week da wi midweek meetin, wi geh chraynin fi help wi preech tu peepl. If yu eva gaahn da wan a dehnya meetin, weh yu tink bowt di chraynin weh wi get?

6. Wi obay Gaad koman fi preech

Eena di fers senchri, som peepl mi chrai stap Jeezas falowaz fahn preech tu peepl. Di fers-senchri Kristyanz mi difen dehn rait fi preech ahn dehn mi “yooz di laa fi geh di rait fi preech di gud nyooz.” (Filipiyanz 1:7) Jehoava Witnisiz di du di saym ting tudeh.a

VEEDYO: Jehoava Witnisiz Yooz di Laa fi Difen di Gud Nyooz (2:28)

Reed Aks 5:27-42, ahn den diskos dis kweschan:

• Wai wi noh wahn stap preech?—Si vers 29, 38, ahn 39.

WEH WI LAAN?

Jeezas koman ih falowaz fi preech di gud nyooz tu peepl fahn evri nayshan. Jehoava di help ih peepl fi du dis werk.

Mek Wi Rivyoo:

• Hoo di preech di gud nyooz aal rong di werl?

• How wi preechin werk shoa dat wi lov peepl?

• Yu tink di preechin werk ku mek wi hapi? Wai?

FAIN OWT MOA

Si how Jehoava Witnisiz preech tu peepl weh liv eena wahn big siti.

Speshal Mechropolitan Poblik Witnisin da Paris (5:11)

Weh Jehoava Witnisiz du fi help owt peepl weh da refyujee?

Help Refyujeez Laan di Chroot Bowt Gaad (5:59)

Lisn tu di persnal ekspeeryens a wahn sista weh mi spen ih laif di preech ahn how dat mi mek shee hapi.

Ah Hapi Ah Mi Chooz Dis Laif (6:29)

Laan bowt sohn impoatant koat disizhan weh mek it eeziya fi preech di gud nyooz.

“Dehn Wan Weh Preech Bowt Gaad Kingdom Kehr Dehn Kays da Koat” (Godʼs Kingdom Rules!, chapta 13)

Jeezas mi teech dat fi mek sohnbadi bee wahn Kristyan, ih need fi geh baptaiz. (Reed Machyu 28:19, 20.) Bot wat da baptizm? Ahn weh wahn persn need fi du fi reech da goal?

1. Wat da baptizm?

Di werd “baptaiz” kohn fahn wahn Greek werd weh meenz “fi dip” anda waata. Wen Jeezas mi geh baptaiz, dehn mi dip fi hihn hoal badi eena di Jaadn Riva, ahn den hihn “kom op owta di waata.” (Maak 1:9, 10) Saym way soh, wen wahn Kristyan geh baptaiz, dehn dip dehn hoal badi anda di waata.

2. Weh wahn persn shoa wen ih geh baptaiz?

Wen sohnbadi geh baptaiz, dehn shoa dat dehn dedikayt dehnself tu Jehoava Gaad. How sohnbadi dedikayt dehnself tu Gaad? Bifoa dehn geh baptaiz, dehn seh wahn praivit pryaa tu Jehoava ahn tel Ahn dat dehn waahn serv Hihn fareva. Dehn pramis Jehoava dat hihn da di onli wan weh dehn wahn wership ahn dat di moas impoatant ting eena dehn laif wahn bee fi du weh Gaad waahn. Soh dehn chooz fi “disoan [dehnself] ahn . . . kip aan di fala” Jeezas teechinz an egzampl. (Machyu 16:24) Wen sohnbadi dedikayt dehnself tu Jehoava ahn geh baptaiz, dehn ku ga wahn kloas rilayshanship wid Jehoava ahn wid ada peepl weh wership hihn.

3. Weh sohnbadi need fi du bifoa dehn ku geh baptaiz?

If yoo waahn geh baptaiz, ih impoatant fi mek yu laan bowt Jehoava ahn bil op schrang fayt eena ahn. (Reed Heebrooz 11:6.) Di moa yu geh fi noa Jehoava ahn di schranga yu fayt get, di moa yu wahn lov ahn tu. Den fi shoar yu wahn waahn preech bowt ahn an liv akaadn tu fi hihn standadz. (2 Timoti 4:2; 1 Jan 5:3) Wans sohnbadi di liv “di way how peepl weh serv Jehoava fi liv ahn . . . du di tingz weh bring prayz tu hihn,” dehn wahn praabli disaid fi dedikayt dehnself tu Gaad ahn geh baptaiz.​—Koloashanz 1:9, 10.a

SAACH FI MOA

4. Wi ku laan fahn Jeezas baptizm

Reed Machyu 3:13-17 fi laan moa deetaylz bowt Jeezas baptizm. Den diskos dehnya kweschan:

• Jeezas da-mi wahn baybi wen ih mi geh baptaiz?

• How dehn mi baptaiz ahn? Dehn mi jos sprinkl ahn wid waata?

Afta Jeezas mi geh baptaiz, ih staat du di werk weh Gaad giv ahn fi du. Reed Look 3:21-23 ahn Jan 6:38, ahn den diskos dis kweschan:

• Afta Jeezas mi geh baptaiz, wat da-mi di moas impoatant werk tu hihn?

5. Yoo kud geh baptaiz

Yu mait feel laik ih tu haad fi dedikayt yuself tu Gaad ahn geh baptaiz. Bot, if yu kantinyu laan bowt Jehoava ahn geh fi noa ahn beta, yu wahn bee moa kanfident fi mek da impoatant disizhan. Fi si sohn peepl weh mi du dat, play di VEEDYO.

VEEDYO: Schrentn Yu Rilayshanship Wid Jehoava (1:11)

Reed Jan 17:3 ahn Jaymz 1:5, ahn den diskos dis kweschan:

• Weh ku help sohnbadi fi geh redi fi baptizm?

1. Wi dedikayt wi laif tu Jehoava wen wi tel ahn dat wi waahn serv ahn fareva

2. Wen wi geh baptaiz, wi shoa evribadi dat wi don dedikayt wi laif tu Gaad

6. Wen wi geh baptaiz, wi geh fi bee paat a Jehoava famili

Wen wi geh baptaiz, wi geh fi bee paat a wahn yoonaitid famili weh deh aal rong di werl. Eevn doa wi kohn fahn difrent plays ahn kolcha, aala wi ga di saym bileef ahn wi liv akaadn tu di saym moaral standadz. Reed Psalm 25:14 ahn 1 Peeta 2:17, ahn den diskos dis kweschan:

• How baptizm afek sohnbadi rilayshanship wid Jehoava ahn wid ada peepl weh wership ahn?

WEH WI LAAN?

Jeezas mi teech dat Kristyanz need fi geh baptaiz. Fi reech da goal, wahn persn need fi bil op schrang fayt eena Jehoava, liv akaadn tu fi Hihn standadz, ahn dedikayt ih laif tu Ahn.

Mek Wi Rivyoo:

• Wat da baptizm, ahn wai ih impoatant?

• Weh wahn persn shoa wen ih geh baptaiz?

• Weh wahn persn need fi du bifoa ih dedikayt ih laif tu Jehoava ahn geh baptaiz?

FAIN OWT MOA

Laan di chroot bowt baptizm.

“Wat Da Baptizm?” (Web aatikl)

Luk pahn sohn sojeshan weh ku help yu kwalifai fi geh baptaiz.

“Lov fi Jehoava Wahn Mek Yu Waahn Geh Baptaiz” (Di Wachtowa, Maach 2020)

Reed weh mi mek wahn man chooz fi geh baptaiz.

“Dehn Mi Waahn Ah Proov di Chroot tu Miself” (Di Wachtowa, Febiweri 1, 2013)

Si wai ih gud fi geh baptaiz, ahn how yu ku geh redi far it.

“Ai Shuda Geh Baptaiz?” (Kweschanz Weh Yong Peepl Aks​—Ansaz Weh Werk, Valyum 2, chapta 37)