LESN 17
Da Weh Kaina Persn Jeezas?
Wen wi laan bowt aal di tingz weh Jeezas mi seh ahn du pahn ert, wi fain owt dat hihn ga kwalitiz weh jraa wi kloasa tu hihn an ih Faada, Jehoava. Wat da som a dehnya byootiful kwalitiz? Ahn how wi ku kapi Jeezas egzampl eena wi oan laif?
1. Eena weh wayz Jeezas da laik ih Faada?
Jeezas mi deh da hevn fi bilyanz a yaaz, an ih si how ih lovin Faada werk an ih laan fan ahn. Bikaaz a dat, hihn tink, feel, an ak jos laik Hihn. (Reed Jan 5:19.) In fak, Jeezas kapi ih Pa kwalitiz soh gud dat ih mi seh: “Hooeva si mee, don si di Faada tu.” (Jan 14:9) Az yu kantinyu laan bowt Jeezas persnaliti, yu wahn geh fi noa Jehoava beta. Fi egzampl, di way how Jeezas mi shoa kompashan fi peepl shoa humoch Jehoava kay bowt yoo.
2. How Jeezas mi shoa dat hihn lov Jehoava?
Jeezas mi seh: “Ai du egzakli weh di Faada koman mi fi du, soh dat di werl ku noa dat Ai lov di Faada.” (Jan 14:31) Wail Jeezas mi deh pahn ert, hihn mi shoa humoch ih lov ih Pa wen ih mi stay obeedyant eevn wen dat neva eezi fi du. Jeezas mi aalso lov taak bowt ih Pa ahn help adaz ga wahn frenship wid Hihn.—Jan 14:23.
3. How Jeezas shoa dat hihn lov peepl?
Di Baibl seh dat Jeezas ga wahn “speshal lov fi hyoomanz.” (Proverbs 8:31) Hihn mi shoa dis lov wen ih mi inkorij adaz ahn du ih bes fi help dehn. Di miraklz weh hihn mi du neva jos shoa di powa weh ih gat, bot dehn shoa wi dat ih ga kompashan tu. (Maak 1:40-42) Hihn mi chreet aal peepl di saym an ih mi kain tu dehn. Di tingz weh ih seh mi gi komfert ahn hoap tu sinsyaa peepl weh mi lisn tu ahn. Jeezas mi wilin fi sofa ahn ded bikaaz a di lov weh hihn ga fi hyoomanz. Bot hihn ga wahn veri speshal lov fi dehn wan weh obay fi hihn teechinz.—Reed Jan 15:13, 14.
SAACH FI MOA
Laan moa bowt Jeezas persnaliti. Ahn si how yoo ku bee lovin ahn jenaros jos laik hihn.
4. Jeezas lov ih Faada
Jeezas egzampl teech wi how fi shoa Gaad dat wi lov ahn. Reed Look 6:12 ahn Jan 15:10; 17:26. Afta yu reed eech skripcha, diskos dis kweschan:
How wi ku kapi Jeezas ahn shoa dat wi lov Jehoava?
Jeezas mi lov ih hevnli Faada an ih mi pray tu ahn wahn lat
5. Jeezas kay bowt peepl weh need help
Jeezas mi kay moa bowt ada peepl dan bowt ihself. Eevn wen ih mi taiyad, hihn mi yooz ih taim an enerji fi help adaz. Reed Maak 6:30-44, ahn den diskos dehnya kweschan:
Akaadn tu dehndeh vers, how Jeezas mi shoa kansaan fi adaz?—Si vers 31, 34, 41, ahn 42.
Wai Jeezas mi help di krowd a peepl?—Si vers 34.
Bikaaz Jeezas kapi Jehoava persnaliti, weh dis teech yu bowt Jehoava?
Eena weh wayz wi ku kapi Jeezas egzampl ahn shoa kansaan fi adaz?
6. Jeezas jenaros
Jeezas mi jenaros eevn doa ih neva ga lata mateeryal tingz, ahn hihn waahn mek wee bee jenaros tu. Reed Aks 20:35, ahn den diskos dis kweschan:
Akaadn tu Jeezas, how wi ku bee hapi?
Play di VEEDYO, ahn den diskos di kweschan.
Eena weh wayz wi ku shayr wid adaz, eevn if wi noh ga lata mateeryal tingz?
Yu mi noa?
Di Baibl teech wi fi pray tu Jehoava eena Jeezas naym. (Reed Jan 16:23, 24.) Wen wi pray laik dat, wi shoa dat wi tankful fi aal weh Jeezas du fi help wi bee Jehoava fren.
WEH YU WUDA SEH IF SOHNBADI TEL YU: “Gaad noh kay bowt fi wee sofarin.”
Sins Jeezas kapi Jehoava persnaliti, how di tingz weh hihn du proov dat Jehoava kay bowt wi?
WEH WI LAAN?
Jeezas lov Jehoava an ih lov peepl. Sins Jeezas da laik ih Pa, di moa yu geh fi noa ahn, di moa yu wahn geh fi noa Jehoava.
Mek Wi Rivyoo:
How wi ku kapi Jeezas egzampl ahn shoa dat wi lov Jehoava?
How wi ku kapi Jeezas egzampl ahn shoa lov fi adaz?
Weh yoo laik di moas bowt Jeezas persnaliti?
FAIN OWT MOA
Laan bowt som a Jeezas kwaliti dehn weh wi ku kapi.
“Kapi Jeezas Egzampl” (Jeezas—Di Way, di Chroot, ahn di Laif, payj 317)
Fain owt wai ih impoatant fi pray eena Jeezas naym.
“Wai Wi fi Pray Eena Jeezas Naym?” (Di Wachtowa, Febiweri 1, 2008)
Yu tink di Baibl seh eniting bowt how Jeezas mi luk?
Weh wi ku laan fahn di way how Jeezas mi chreet di uman dehn?
“Gaad Rispek an Aana di Uman Dehn” (Di Wachtowa, Septemba 1, 2012)