LESN 38
Shoa Dat Yu Tankful fi di Gif a Laif
Dehn ga wahn lata wandaful tingz weh wi ku du an injai bikaaz wi ga laif. Eevn wen wi fays prablemz, wi stil ga tingz weh wi ku injai. How wi ku shoa Jehoava dat wi tankful fi di gif a laif? Ahn wat da di moas impoatant reezn fi mek wi du dat?
1. Wai wi fi bee tankful fi laif?
Wi fi bee tankful fi laif bikaaz da wahn gif fahn wi lovin Faada, Jehoava. Hihn da “di wan weh laif kohn fram.” (Psalm 36:9) “Da hihn giv evribadi laif ahn bret an evriting els.” (Aks 17:25, 28) Soh Jehoava noh onli gi wi laif bot ih gi wi evriting weh wi need fi liv. An eevn moa dan dat, hihn mek it pasabl fi mek wi injai di laif wi liv.—Reed Aks 14:17.
2. How wi ku shoa Jehoava dat wi tankful fi di gif a laif?
Jehoava mi kay bowt yoo fahn di taim yu mi deh eena yu ma beli. Eena wahn pryaa weh Jehoava mi mek dehn rait eena di Baibl, ih servant Dayvid mi tel ahn: “Yoo kuda mi si mi eevn bifoa Ah baan.” (Psalm 139:16) Yu laif preshos tu Jehoava. (Reed Machyu 10:29-31.) Soh ih wuda reeli hert hihn if enibadi chooz fi en di laif a wahn nada persn, eevn if da ih oan laif.a (Exodus 20:13) An ih wuda hert Jehoava if wi put wi laif eena daynja er if wi noh du aal weh wi kud fi protek ada peepl laif. Wen wi tek kayr a wi laif ahn rispek di laif a ada peepl, wi di shoa Jehoava dat wi tankful fi dis wandaful gif weh ih gi wi.
SAACH FI MOA
Laan difrent wayz how yu ku shoa dat yu tankful fi di gif a laif.
3. Tek kayr a yu helt
Bikaaz wi pramis Jehoava fi aalwayz du weh hihn waahn, wi yooz wi laif eena evriway fi serv ahn. Sins chroo Kristyanz shuda “aafa op [dehn] badi . . . az wahn hoali sakrifais” tu Gaad, dehn need fi tek kayr a it. Reed Roamanz 12:1, 2, ahn den diskos dehnya kweschan:
Weh shuda mek yu waahn tek kayr a yu helt?
Weh da sohn tingz yu ku du fi tek kayr a yu helt?
4. Bee kyaaful eena evriting yu du soh dat nobadi geh hert er looz dehn laif
Di Baibl inkorij wi fi noh du tingz weh ku put fi wee laif er ada peepl laif eena daynja. Play di VEEDYO fi si sohn tingz weh yu ku du fi kip sayf.
Reed Proverbs 22:3, ahn den diskos how yoo an ada peepl ku bee sayf . . .
wen yu deh hoam.
wen yu deh da werk.
wen yu di play spoats.
wen yu di jraiv er wen sombadi els di jraiv.
5. Rispek di laif a wahn baybi weh noh baan yet
Dayvid mi eksplayn dat Jehoava kay bowt evriting weh hapm wail wahn baybi di groa eena ih ma woom. Reed Psalm 139:13-17, ahn den diskos dis kweschan:
Tu Jehoava, wahn persn laif staat wen ih baan er fahn wen ih ma geh pregnant wid ahn?
Di laa weh Jehoava mi gi tu di Izrelaits mi protek wahn ma an ih baybi weh noh baan yet. Reed Exodus 21:22, 23, ahn den diskos dehnya kweschan:
If sohnbadi bai mistayk mi en di laif a wahn baybi weh noh baan yet, how Jehoava mi feel bowt da persn?
How Jehoava wuda feel if sohnbadi du dat pahn perpos?b
How yoo feel bowt di way Gaad si dehnya tingz?
Eevn wahn wuman weh si laif az preshos mait feel laik aboarshan da ih onli opshan. Reed Isaiah 41:10, ahn den diskos dehnya kweschan:
If dehn di presha wahn laydi fi ga wahn aboarshan, hoo shee shuda geh help fram? Wai yu wuda seh dat?
WEH YU WUDA SEH IF SOHNBADI TEL YU: “Wahn wuman ga di rait fi disaid if ih wahn ga wahn aboarshan, bikaaz da fi shee badi.”
Weh mek yoo bileev dat Jehoava si di laif a wahn ma an ih baybi weh noh baan yet az preshos?
WEH WI LAAN?
Di Baibl teech wi fi lov, rispek, ahn protek di gif a laif weh kohn fahn Jehoava. Dis meenz fi wee oan laif an ada peepl laif tu.
Mek Wi Rivyoo:
Wai laif preshos tu Jehoava?
How Jehoava feel wen sohnbadi en ih oan laif er sohnbadi els laif pahn perpos?
Yoo tankful fi di gif a laif? Wai yu seh dat?
FAIN OWT MOA
How wi ku tank Jehoava fi di laif weh ih gi wi?
Gaad ku fergiv wahn wuman weh mi ga wahn aboarshan?
Laan how di way Gaad si laif fi afek di kaina tingz weh wi du fi fon.
“Yu Shuda Tek Paat Eena Spoats Weh Put Yu Laif Eena Daynja?” (Awayk!, Aktoaba 8, 2000)
Wat if wahn persn di tink bowt en ih laif? Si how di Baibl ku help.
“Ah Jos Waahn Ded—Di Baibl Ku Help Mi if Ah Di Tink Bowt Kil Miself?” (Web aatikl)
a Jehoava reeli kay bowt dehn wan weh sad eena dehn haat. (Psalm 34:18) Hihn andastan di payn ahn hert weh sohnbadi feel weh ku mek dehn waahn en dehn laif, ahn hihn waahn help dehn. Fi si how hihn ku gi sohnbadi di schrent fi fait gens tinkin laik dat, reed di aatikl “Ah Jos Waahn Ded—Di Baibl Ku Help Mi if Ah Di Tink Bowt Kil Miself?” weh deh eena di Fain Owt Moa sekshan da di en a dis lesn.
b Peepl weh mi ga wahn aboarshan bifoa dehn laan how Jehoava feel bowt it noh need fi kip di feel gilti, bikaaz Jehoava ku fergiv dehn. Fi fain moa infamayshan, si di aatikl “Weh di Baibl Seh Bowt Aboarshan?” weh deh eena di Fain Owt Moa sekshan da di en a dis lesn.