CHAPTA 3

“Dehn Geh Ful Op Wid Hoali Spirit”

Sohn tingz weh mi hapm wen di disaiplz geh di hoali spirit da Pentikaas

Dis chapta bays pahn Aks 2:1-47

1. How tingz mi stan da di festival a Pentikaas?

DEHN mi ga lata eksaitment da Jeroosalem.a Smoak mi-di kom op fahn di alta da di templ az di Leevaits sing Psalm 113 tu 118 fi prayz Jehoava. Di siti mi ful op a vizitaz. Som a dehn mi kohn fahn faar, laik fahn Eelam, Mesopotaymya, Kapadoasha, Pontus, Eejip, ahn Roam.b Weh mi bring aala dehnya peepl da Jeroosalem? Dehn mi gyada tugeda fi selibrayt di festival a Pentikaas, weh dehn mi aalso kaal “di day wen dehn haavis fi di fers taim.” (Num. 28:26) Dis da-mi wahn hapi okayzhan weh dehn mi selibrayt evri yaa fi shoa dat di baali haavis mi-di kohn tu wahn en, ahn dat di weet haavis mi-di staat.

Wahn map weh shoa wehpaat di peepl weh mi hyaa di gud nyooz da Pentikaas 33 C.E kohn fram. 1. Di reejan dehn: Libya, Eejip, Eetiyopya, Bitinya, Pontus, Kapadoasha, Judeeya, Mesopotaymya, Babiloanya, Eelam, Meedya, ahn Paatya. 2. Di siti dehn: Roam, Alegzanjriya, Memfis, Antiyak (eena Siriya), Jeroosalem, ahn Babilan. 3. Di difrent see dehn: Meditaraynyan See, Blak See, Red See, Kaspiyan See, ahn Perzhan Golf.

JEROOSALEM DA-MI DI SENTA A DI JOOISH RILIJAN

Moas a di ivents eena di fers chaptaz a di buk a Aks mi hapm da Jeroosalem. Dis siti mi deh monks di hil dehn eena di senchral paat a Judeeya, bowt 34 mailz fahn di ees said a di Meditaraynyan See. Eena 1070 B.C.E., King Dayvid mi kanka di schrang towa weh mi bil pahn tap a Mongt Zaiyan. Ahn Jeroosalem, di siti weh mi geh bil rong Mongt Zaiyan, mi geh fi bee di kyapital a di aynshent nayshan a Izrel.

Akaadn tu aynshent Jooish chradishan, Aybraham mi bil wahn alta da Mongt Moraiya, weh deh kloas tu Mongt Zaiyan, fi sakrifais ih son Aizak. Dis mi hapm bowt 1,900 yaaz bifoa di ivents a di buk a Aks mi tek plays. Mongt Moraiya mi geh fi bee paat a di siti wen Salaman mi bil di fers templ fi Jehoava. Di templ da-mi di senta a wership ahn dayli laif a di Jooz.

Aala di faytful Jooz mi chravl fahn difrent paats a di werl ahn gyada da Jeroosalem fi aafa sakrifais tu Gaad, fi wership ahn, an fi selibrayt di difrent festival dehn evri yaa. Az dehn mi du dis, dehn mi-di obay dis koman: “Chree taimz fi di yaa, aala di man dehn shuda apyaa fronta Jehoava yu Gaad da di plays weh hihn chooz.” (Deut. 16:16) Di Sanhejrin, er di Jooish Sopreem Koat, mi deh da Jeroosalem. Da koat mi ga powa oava di peepl, di govament, ahn rilijan.

2. Wat da sohn amayzin tingz weh hapm da Pentikaas 33 C.E.?

² Da Pentikaas 33 C.E., bowt nain aklak di maanin, sohnting amayzin mi hapm weh peepl mi wahn neva ferget. Sodn-wan, “dehn hyaa wahn lowd naiz fahn hevn weh mi song laik wahn schrang breez.” (Aks 2:2) Da lowd naiz mi song eevn haada eena di hows wehpaat di 120 disaiplz mi deh. Weh mi hapm neks mi sopraiz dehn. Dehn si sohnting weh mi luk laik flaym a faiya weh shayp laik wahn tong di res pahn tap a eech wan a dehn hed! Den “aala dehn geh ful op wid hoali spirit” ahn dehn staat tu taak eena difrent langwij! Wen di disaiplz lef di hows ahn gaahn meet di peepl pahn di schreet, di peepl mi sopraiz fi hyaa di disaiplz di taak tu dehn eena “fi dehn oan langwij.”—Aks 2:1-6.

3. (a) Wai Pentikaas 33 C.E. da wahn impoatant dayt eena di hischri a chroo wership? (b) How Peeta mi yooz wan a di chree “keez fi di Kingdom” wen ih mi gi ih speech fronta di krowd?

³ Dis eksaitin ivent da wahn impoatant paat a di hischri a chroo wership bikaaz dis da wen di anointid Kristyan kangrigayshan mi staat op. (Gal. 6:16) Bot dat da noh aal. Wen Peeta mi gi ih speech fronta di krowd da day, hihn mi yooz di fers kee owta di chree “keez fi di Kingdom.” Eech kee wuda alow wahn difrent groop a peepl fi ga wahn apachooniti fi geh speshal blesinz. (Mach. 16:18, 19) Da fers kee mi alow Jooz ahn peepl weh mi jain di Jooish rilijan fi aksep di gud nyooz ahn geh anointid wid Gaad hoali spirit.c Dis wuda mek dehn bee paat a spirichwal Izrel ahn ga di hoap fi rool az king ahn prees lang wid Jeezas eena di Kingdom. (Rev. 5:9, 10) Az taim paas, eevn di Samaritan dehn ahn peepl weh da neva Joo wuda ga dis apachooniti. Weh Kristyanz tudeh ku laan fahn di impoatant ivents weh mi hapm da Pentikaas 33 C.E.?

“Dehn Mi Deh Tugeda Eena di Saym Hows” (Aks 2:1-4)

4. How di Kristyan kangrigayshan tudeh di kantinyu di werk a di kangrigayshan weh mi staat op eena 33 C.E.?

⁴ Di Kristyan kangrigayshan mi staat op wid bowt 120 disaiplz hoo mi deh “tugeda eena di saym hows” da di opstayz room ahn hoo mi geh anointid wid hoali spirit. (Aks 2:1) Bai di en a da day, towznz a peepl mi geh baptaiz ahn geh fi bee paat a di kangrigayshan. Ahn dat da-mi jos di biginin kaaz di aaganaizayshan di kantinyu groa op tu tudeh! Yes, da dis saym Kristyan kangrigayshan a faytful man ahn wuman weh di “preech di gud nyooz bowt di Kingdom aal oava di ert soh dat aala di nayshan dehn ku noa bowt it” bifoa dis sistem kohn tu wahn en.—Mach. 24:14.

5. Weh blesinz di fers-senchri Kristyanz ahn wee tudeh geh eena di Kristyan kangrigayshan wen wi help an inkorij wan anada?

⁵ Di anointid ahn di “ada sheep” geh di help an inkorijment weh dehn need fahn di Kristyan kangrigayshan. (Jan 10:16) Paal mi reeli laik how di Kristyanz da Roam mi help wan ada eena di kangrigayshan. Dat da di reezn wai hihn mi seh: “Ah reeli waahn kohn si unu, soh dat Ah ku giv unu sohn kaina spirichwal gif fi mek unu fayt geh schranga. Laik dat, wi wahn ku inkorij wan anada bai wi fayt.”—Roam. 1:11, 12.

ROAM DA-MI DI BIGIS AHN MOAS POWAFUL SITI

Joorin di peeryad a taim wen di ivents a di buk a Aks mi-di hapm, Roam da-mi di bigis siti ahn di moas powaful govament. Roam da-mi di kyapital siti weh mi kanchroal fahn Great Britain tu North Africa ahn fahn di Atlantic Ocean tu di Persian Gulf.

Roam da-mi wahn mikscha a difrent kolcha, rays, langwij, ahn soopastishos bileef. Di Roaman empaiya mi ga sohn nais road ahn dat mi mek it eezi fi di tooris ahn biznizman dehn fi goh da Roam. Aalso, lata ship mi chravl tu di poat a Ostia, weh deh kloas tu Roam, fi bring een food ahn lata ekspensiv tingz fi di peepl da Roam.

Eena di fers senchri C. E., moa dan wan milyan peepl mi liv da Roam. Praabli haaf a di papyulayshan mi liv az slayv bikaaz dehn maita mi gilti a wahn kraim, dehn da-mi priznaz weh mi geh kyapcha eena di waar dehn weh di Roamanz mi-di fait, er dehn da-mi chiljren weh geh sel er abandan bai dehn payrents. Som a di slayv dehn da-mi Jooish peepl weh dehn mi kyapcha wen di Roaman Jenaral Pompey mi kanka Jeroosalem eena 63 B.C.E.

Moas a di peepl weh mi liv da Roam mi veri poa, ahn dehn mi liv eena sohn krowdid ahn taal bildin. Di peepl mi pen pahn di govament fi food ahn moni fi servaiv. Di empera dehn mi bil sohn big ahn byootiful bildin fi mek di peepl yooz. Dis mi inklood sohn tayta ahn staydyom wehpaat di peepl wuda wach ada peepl perfaam pahn stayj, wach man an animal fait tu det, ahn wach chariyat rays fi free.

6, 7. How di Kristyan kangrigayshan tudeh di mek Jeezas koman fi preech tu aala di nayshan dehn kohn chroo?

⁶ Di Kristyan kangrigayshan tudeh di fala di saym koman fi preech jos laik weh di fers-senchri Kristyanz mi du. Jeezas mi giv ih disaiplz eksaitin werk eevn doa da neva eezi werk. Hihn mi tel dehn: “Goh ahn teech peepl fahn aala di nayshan dehn fi bee mai disaipl. Baptaiz dehn eena di naym a di Faada, di Son, ahn di hoali spirit. Unu mos teech dehn fi obay aal di tingz weh Ai mi koman unu.”—Mach. 28:19, 20.

⁷ Jehoava di yooz di Kristyan kangrigayshan a Jehoava Witnisiz fi du dis werk tudeh. Af koars, ih noh eezi fi preech tu peepl weh taak wahn difrent langwij. Bot stil yet, Jehoava Witnisiz poblish lichricha weh bays pahn di Baibl eena moa dan 1,000 langwij. If yoo kohn regyula da wi meetinz, preech di gud nyooz, ahn help mek disaiplz, den yu ga plenti reezn fi bee hapi. Wai? Bikaaz yu da paat a wahn smaal groop a peepl pahn ert weh ga di privilij fi gi wahn gud witnis bowt Jehoava naym!

8. How eech persn eena di kangrigayshan di geh di help weh ih need?

⁸ Jehoava help wi chroo wi bradaz ahn sistaz aal rong di werl fi mek wi stil bee hapi ahn noh giv op az wi di du dis werk joorin dehnya laas dayz. Dis da di saym help weh Paal mi taak bowt wen ih mi rait tu di Heebroo Kristyanz. Ih mi seh: “Mek wi tink bowt wan anada soh dat wi ku inkorij wan anada fi shoa lov ahn du gud werks. Bradaz, som a wi ga di kostom fi niglek wi meetin dehn, bot noh mek wi du dat. Insteda dat, mek wi gi moa inkorijment tu wan anada, ahn du aala dehnya tingz moa ahn moa sins wi noa dat di day di jraa kloasa.” (Heeb. 10:24, 25) Di Kristyan kangrigayshan da wahn gif fahn Jehoava weh alow wi fi inkorij adaz ahn stil geh di schrent ahn help weh wi need. Soh stay kloas tu yu bradaz ahn sistaz ahn neva niglek di meetinz!

“Dehn Mi-Di Hyaa Fi Dehn Oan Langwij” (Aks 2:5-13)

Eena wahn bizi schreet, Jeezas disaiplz di preech tu Jooz ahn peepl weh jain di Jooish rilijan. — “Wi hyaa dehn di taak tu wi eena fi wee oan langwij bowt di powaful tingz weh Gaad du.”—Aks 2:11

9, 10. Weh aal sohn Kristyanz du fi mek dehn ku preech tu peepl fahn difrent langwij?

⁹ Da Pentikaas 33 C.E., di Jooz ahn peepl weh mi jain di Jooish rilijan mi soh eksaitid. Moas a dehn weh mi dehdeh mi taak wahn kaman langwij, praabli Greek er Heebroo. Bot den, eech wan a dehn “mi-di hyaa fi dehn oan langwij wen di disaiplz staat tu taak.” (Aks 2:6) Ih mosi mi mek dehn feel soh hapi fi hyaa di gud nyooz eena dehn oan mada tong. Tudeh, no mirakl wahn help Kristyanz fi ga di abiliti fi taak eena lata difrent langwij. Bot, lata dehn di du dehn bes fi preech di gud nyooz a di Kingdom tu peepl a aala di nayshan dehn. How dehn du dat? Som a dehn laan wahn nyoo langwij soh dat dehn ku serv eena wahn kangrigayshan kloas bai weh taak wahn farin langwij, er som mait eevn moov tu wahn nada konchri. Ahn lata peepl weh dehn preech tu reeli apreeshiayt di werk weh dehn du fi laan fi dehn langwij.

¹⁰ Dat da egzakli weh mi hapm tu Christine. Shee ahn sevn ada Witnisiz mi tek wahn klaas fi laan di Gujarati langwij. Wen Christine meet wan a ih werkmayt weh taak Gujarati, shee mi greet ahn eena ih oan langwij. Di yong laydi mi soh sopraiz fi hyaa Christine di taak ih langwij dat ih mi waahn noa wai shee mi-di chrai laan da haad langwij. Dat mi mek Christine gi wahn gud witnis, ahn di yong laydi mi seh: “No ada rilijan wuda inkorij dehn peepl fi laan wahn langwij weh soh haad. Yoo mosi ga sohnting reeli impoatant fi tel mi.”

11. Weh wi ku du fi bee redi fi preech di Kingdom mesij tu peepl weh taak wahn nada langwij?

¹¹ Noh aala wi ku laan wahn difrent langwij. Bot wi ku stil bee redi fi preech di Kingdom mesij tu peepl weh taak wahn nada langwij. How wi ku du dat? Wan way da fi yooz di JW Language^® ap fi laan wahn lee greetin eena wahn langwij weh lata peepl taak eena yu ayrya. Maybi yu ku laan sohnting eena da langwij weh wahn mek peepl waahn laan moa bowt weh di Baibl ga fi seh. Shoa dehn di jw.org websait ahn mek dehn si di difrent veedyo ahn poblikayshan weh avaylabl eena fi dehn langwij. If wi yooz dehnya toolz eena wi minischri, wi ku ekspeeryens di saym kaina hapinis laik wi bradaz ahn sistaz eena di fers senchri wen peepl fahn ada nayshanz mi sopraiz fi hyaa di gud nyooz eena “fi dehn oan langwij.”

JOOZ DA MESOPOTAYMYA AN EEJIP

Di buk weh naym The History of the Jewish People in the Age of Jesus Christ (175 B.C.–A.D. 135) seh: “Afta di Asiriyan ahn di Babiloanyan dehn mi put di disendants a di ten-chraib kingdom [a Izrel] an di disendants a di kingdom a Jooda az priznaz da Babilan, dehn mi liv da Mesopotaymya, Meedya ahn Babiloanya.” Akaadn tu Ezra 2:64, onli 42,360 Izrelaits mi gaahn bak da Jeroosalem afta dehn mi deh az priznaz da Babilan eena 537 B.C.E. Flavius Josephus (Joseefos) mi seh dat dehn mi stil ga towznz a Jooz di liv da Babiloanya eena di fers senchri C.E. Som taim bitween di yaa 200 C. E. ahn 500 C.E., di Jooz mi kom op wid di Babylonian Talmud—sohn buk weh gat een dehn laa.

Dehn ga evidens weh proov dat Jooish peepl mi-di liv da Eejip sins sohn taim afta di yaa 500 B.C.E. Joorin da taim, Jerimaiya mi sen wahn mesij fahn Jehoava tu aala di Jooz da difrent paats a Eejip, inkloodin Memfis. (Jer. 44:1, ftn.) Praabli lata Jooz mi moov tu Eejip joorin di yaa 323 tu 330 B.C.E. Akaadn tu Joseefos, di Jooz da-mi som a di fers peepl fi staat tu liv da Alegzanjriya. Laytaraan, dehn mi ga kanchroal oava da hoal ayrya. Eena di fers senchri C.E., di Jooish raita Philo mi seh da wan milyan Jooz mi liv eena difrent paats a Eejip, fahn “Libya tu di Eetiyopyan boada.”

“Peeta Stan Op” (Aks 2:14-37)

12. (a) How Joawel mi prafesai di mirakl weh mi hapm da Pentikaas 33 C.E.? (b) Wai Jeezas disaiplz eena di fers senchri mi-di wayt fi mek Joawel prafesi kohn chroo?

¹² “Peeta stan op” fi taak tu di peepl fahn difrent nayshanz. (Aks 2:14) Hihn mi eksplayn dat bikaaz a wahn mirakl Gaad mi mek di disaiplz taak eena difrent langwij. Ahn da way hihn mi mek di prafesi eena di buk a Joel kohn chroo; ih seh: “Ah wahn poar owt mi spirit pahn aal flesh.” (Joel 2:28) Soh dehnya disaiplz mi-di wayt fi dis bikaaz bifoa Jeezas gaahn bak da hevn, hihn mi tel ih disaiplz: “Ah wahn aks di Faada, ahn hihn wahn giv unu wahn nada helpa.” Jeezas mi seh dat da helpa mi wahn bee di “hoali spirit.”—Jan 14:16, 17.

13, 14. Weh Peeta mi du fi chrai reech di haat a di peepl weh mi lisn tu ahn, an how wi ku kapi fi hihn egzampl?

¹³ Peeta mi finish aaf ih speech wid dehnya schrang ahn klyaa werdz: “Evribadi eena di nayshan a Izrel haftu noa dat Gaad mi apoint hihn, Jeezas, az Laad ahn Krais, di saym wan weh unu mi nayl tu di stayk.” (Aks 2:36) Da chroo dat noh evribadi weh mi-di lisn tu Peeta mi dehdeh wen dehn nayl Jeezas pahn di stayk. Bot az wahn nayshan, dehn mi stil rispansabl fi Jeezas det. Peeta mi stil taak tu dehn wid rispek an ih mi chrai reech dehn haat. Peeta neva mi-di chrai kandem dehn, bot hihn mi-di hoap dat dehn mi wahn ripent. Yu tink di peepl mi geh beks fi weh Peeta mi seh? Non ataal. Insteda dat, “dehn mi feel laik sombadi stab dehn eena dehn haat.” Soh dehn aks: “Weh wi need fi du now?” Di way how Peeta mi taak tu dehn mi toch dehn haat, ahn dat da weh moov dehn fi ripent.—Aks 2:37.

¹⁴ Wee ku kapi di way Peeta mi chrai reech peepl haat. Wen wi di preech eena wi teritori, wi noh need fi karek evri rang aidyaa weh peepl mait ga. Insted, wi waahn taak bowt tingz weh wi gree pan. If wi du dat, den wi ku help dehn andastan weh deh eena Gaad Werd. Wen wi shayr Baibl chroots eena wahn rispekful way, ih ku help peepl wid di rait haat kandishan fi rispan eena wahn pazitiv way.

HOW DI KRISTYAN RILIJAN MI REECH PONTUS

Monks di peepl weh mi-di lisn tu Peeta speech da Pentikaas 33 C.E. da-mi Jooz fahn Pontus, wahn ayrya naat a di dischrik a Aysha Maina. (Aks 2:9) Wen dehn gaahn bak da dehn konchri, som a dehn mi tel adaz bowt di gud nyooz weh dehn mi hyaa da Jeroosalem. How wi noa dis? Wel, wen Peeta mi rait ih fers leta, hihn mi-di taak tu Kristyanz weh mi deh eena difrent ayryaz, laik Pontus. (1 Peet. 1:1) Peeta werdz shoa dat dehnya Kristyanz mi-di sofa ‘sayka di chraiyalz weh dehn mi-di goh chrooʼ bikaaz a dehn fayt. (1 Peet. 1:6) Fi shoar peepl mi deh gens dehn ahn dehn mi-di fays persikyooshan.

Wen wi egzamin di letaz bitween di Roaman Empera Trajan ahn Pliny the Younger, hoo da-mi di govna a Pontus, ih proov dat Kristyanz reeli mi-di sofa. Eena bowt 112 C.E., Pliny mi rait fahn Pontus di seh dat di Kristyan rilijan da-mi laik wahn dizeez weh ku spred tu enibadi, noh mata if dehn da man er wuman, if dehn yong er oal, er if dehn rich er poa. Pliny mi gi di peepl weh geh akyooz fi bee Kristyanz di apachooniti fi dinai it, an if dehn neva du it, ih mi kil dehn. Bot ih mi set free enibadi weh mi insolt Krais, weh mi pray tu di gaadz, er weh mi wership Trajan. Bot Pliny mi andastan dat dehn mi kyaahn foas wahn reel Kristyan fi du dehndeh tingz.

“Eech Wan a Unu fi Geh Baptaiz” (Aks 2:38-47)

15. (a) Weh Peeta mi seh, ahn weh di peepl weh hihn mi-di taak tu mi du? (b) Wai towznz a peepl weh mi hyaa di gud nyooz da Pentikaas 33 C.E mi kwalifai fi geh baptaiz pahn da day?

¹⁵ Pahn da eksaitin day da Pentikaas 33 C.E., Peeta mi tel di Jooz ahn di peepl weh mi jain di Jooish rilijan: “Unu mos ripent ahn geh baptaiz.” (Aks 2:38) Soh, bowt 3,000 peepl mi geh baptaiz eena sohn pon kloas tu er eena Jeroosalem.d Yu tink dehn peepl neva redi ahn jos gaahn hed gaahn geh baptaiz? Yu tink dis akonk shoa dat peepl weh di stodi di Baibl ahn chiljren fahn wi bradaz ahn sistaz shuda hori geh baptaiz bifoa dehn eevn redi? Non ataal. Memba dat dehndeh Jooz ahn di peepl weh mi jain di Jooish rilijan da-mi gud styoodents a Gaad Werd, ahn dehn da-mi paat a di nayshan weh mi dedikaytid tu Jehoava. Pahn tap a dat, dehn mi don shoa dat dehn ga lata zeel. Som a dehn mi eevn chravl wahn lang distans fi aten di festival evri yaa. Afta dehn mi aksep di chroot bowt Jeezas impoatant roal fi mek Gaad perpos kohn chroo, dehn mi redi fi kantinyu serv Gaad az baptaiz falowaz a Krais.

HOO DA-MI DI PEEPL WEH MI JAIN DI JOOISH RILIJAN?

Som a di peepl weh mi lisn tu Peeta speech da Pentikaas 33 C.E. da-mi “Jooz, ahn som a dehn [mi-di] fala di Jooish teechinz.”—Aks 2:10.

Nikolayos da-mi wan a di spirichwali machoar bradaz weh di apasl dehn mi chooz fi shayr owt di food evri day. Nikolayos da-mi “wahn man fahn Antiyak weh mi jain di Jooish rilijan.” (Aks 6:3-5) Di peepl weh mi fala di Jooish teechinz da-mi peepl fahn ada nayshanz weh da neva Joo. Bot peepl mi did si dehn az Joo bikaaz dehn mi bileev eena di Gaad a Izrel, fala di Laa a Izrel, rijek aal ada gaadz, geh serkomsaiz (if ih da-mi wahn man), ahn geh fi bee wahn memba a di nayshan a Izrel.

Afta di Jooz mi geh free fahn Babilan eena 537 B.C.E., lata dehn mi liv faar fahn Izrel bot dehn mi kantinyu praktis di Jooish rilijan. Bikaaz a dat, peepl weh mi liv eena di konchri dehn rong Izrel ahn sohn faar plays mi laan bowt di Jooish rilijan. Aynshent Roaman raitaz, laik Horace ahn Seneca, mi proov dat peepl eena difrent konchri mi laik di Jooz ahn weh dehn bileev eena. Soh dehn jain dehn ahn staat tu fala di Jooish rilijan.

16. How di fers-senchri Kristyanz mi help wan anada?

¹⁶ Fi shoar Jehoava mi-di bles dehndeh Kristyanz. Di akonk tel wi: “Aala di nyoo bileeva dehn gyada tugeda ahn shayr evriting weh dehn mi ga wid wan anada. Dehn sel dehn lan an evriting els weh dehn mi oan ahn dehn gi di moni tu eech persn, akaadn tu weh dehn mi need.”e (Aks 2:44, 45) Aala wi az chroo Kristyanz waahn kapi di lovin ahn jenaros bradaz ahn sistaz eena di fers senchri.

17. Weh di Baibl seh wahn persn need fi du fi kwalifai fi geh baptaiz?

¹⁷ Akaadn tu di Baibl, bifoa wahn persn ku dedikayt ihself tu Gaad ahn kwalifai fi geh baptaiz, dehn ga sohn impoatant tingz weh ih need fi du. Fers, ih need fi laan weh di Baibl seh. (Jan 17:3) Ih aalso need fi shoa dat ih ga fayt ahn ripent fan ih sin dehn. Dat wahn proov dat ih reeli sari. (Aks 3:19) Den, ih need fi ton fan ih sin dehn ahn staat tu liv di way Gaad waahn ih liv. (Roam. 12:2; Ifee. 4:23, 24) Afta ih don du aala dehndeh tingz, ih seh wahn speshal pryaa fi dedikayt ih laif tu Gaad ahn den ih geh baptaiz.—Mach. 16:24; 1 Peet. 3:21.

18. Weh privilij wahn baptaiz falowa a Krais gat?

¹⁸ Yoo da wahn baptaiz falowa a Krais? If yes, den yoo shuda cherish di privilij weh yu gat. Jos laik di disaiplz eena di fers senchri, Jehoava ku yooz yu eena wahn amayzin way fi gi wahn gud witnis bowt fi hihn Kingdom!

a Si di baks weh naym “Jeroosalem Da-Mi di Senta a di Jooish Rilijan.”

b Si di baks weh naym “Roam Da-Mi di Bigis ahn Moas Powaful Siti,” “Jooz da Mesopotaymya an Eejip,” ahn “How di Kristyan Rilijan Mi Reech Pontus.”

c Si di baks weh naym “Hoo Da-Mi di Peepl Weh Mi Jain di Jooish Rilijan?”

d Sohnting simila mi hapm pahn Aagas 7, 1993 da di intanashanal kanvenshan da Kiev, Ukraine. Ih mi tek too owaz ahn fifteen minits fi baptaiz 7,402 bradaz ahn sistaz eena siks pool.

e Dis da-mi wahn lovin temporari araynjment fi help di vizitaz weh mi kohn fahn faar fi di festival ahn weh mi disaid fi stay lee langa fi laan moa ahn bil op dehn fayt. Nobadi mi foas di bradaz ahn sistaz fi gi weh dehn gat; dehn mi gi fahn dehn haat.—Aks 5:1-4.