MWBR19 06 Laif ahn Minischri Meetin Werkbuk Risaach Infamayshan
JOON 3-9
CHREZHAZ FAHN DI WERD A GAAD | GALAYSHANZ 4-6
“Wahn Simbolik Jrama Weh ‘Teech Wi Sohntingʼ”
(Galayshanz 4:24, 25) Now weh mi hapm wid dehn too laydi da-mi fi teech wi sohnting. Dehn mi stan fi too agreement weh Gaad mi mek. Haygar, di slayv uman hoofa pikni baan slayv, stan fi di agreement weh Gaad mek pahn di mongtin weh nayhn Mongt Sainai. 25 Now Jeroosalem tudeh day da jos laik Mongt Sainai da Araybya kaa Jeroosalem ahn aala ih peepl dehn deh anda slayvri tu di Laa, jos laik Haygar.
it-1-E 1018 ¶2
Haygar
Paal mi eksplayn wahn simbolik jrama bowt too laydi. Wan da Haygar, weh mi reprizent di nayshan a Izrel hoo da-mi slayv bikaaz a di agreement weh Jehoava Gaad mek wid dehn pahn di mongtin weh naym Mongt Sainai. Aala Izrel mi deh anda slayvri tu di Laa. Bikaaz dehn mi sinful, dehn kudn fala weh di Laa agreement mi seh fi du ataal. Anda dis agreement di nayshan a Izrel da neva wahn free peepl. Dehn da-mi slayv ahn dehn mi kandem az sinaz weh mi dizerv fi ded. (Jan 8:34; Roam 8:1-3) Jeroosalem, di kyapital eena Paal taim, mi reprizent di nachral nayshan a Izrel, er Haygar. Anointid Kristyanz da di pikni dehn a di “Jeroosalem fahn op da hevn,” weh da di ada simbolik uman. Dis Jeroosalem da laik Sayra, di laydi weh mi free, weh neva deh anda slayvri. Bot jos laik how Ishmel, di son a wahn slayv, mi persikyoot Aizak, sayhn way, tu, di pikni dehn a di “Jeroosalem weh deh op da hevn,” hoo Jeezas mi set free, stay geh persikyoot bai dehn chiljren weh baan anda slayvri da Jeroosalem. Bot, Aybraham mi jraiv owt Haygar an ih pikni, mek dehn goh. Dis mi reprizent weh Jehoava mi du wid di nayshan a Izrel wen Ih neva waahn ga notn fi du wid dehn nohmoh.—Gal 4:21-31; si aalso Jan 8:31-40.
(Galayshanz 4:26, 27) Bot Sayra, weh da di laydi weh mi free, stan fi Jeroosalem weh deh op da hevn. Ahn shee da laik fi wee ma. 27 Kaa di Skripcha seh, “Yoo laydi weh kudn ga no pikni, yu fi glad! Yoo weh noh noa weh ih feel laik fi ga baybi payn, bos owt ahn staat tu sing ahn hala; kaa yoo wahn ga moa pikni dan di laydi weh ga wahn hozban.”
w14-E 10/15 10 ¶11
Ga Schrang Fayt Eena Gaad Kingdom
11 Eevn doa di kovenant weh Gaad mi mek wid Aybraham mi kohn chroo fi aala Aybraham pikni dehn wen dehn mi inherit di Pramis Lan, di Skripchaz aalso shoa wi dat dis kovenant mi wahn kohn chroo eena wahn spirichwal way tu. (Gal. 4:22-25) Jehoava Gaad mi mek Paal rait dong ahn eksplayn dis. Di fos paat a Aybraham disendant da di Krais, ahn di sekant paat rifaa tu di 144,000 Kristyanz weh Gaad anoint wid hoali spirit fi goh da hevn. (Gal. 3:16, 29; Rev. 5:9, 10; 14:1, 4) Di uman weh bayr dehnya pikni da di “Jeroosalem fahn op da hevn,” weh stan fi di hevnli paat a Gaad aaganaizayshan mek op a aala di laayal aynjel dehn. (Gal. 4:26, 31) Az di kovenant weh mek wid Aybraham mi pramis, di pikni dehn fahn dis uman wahn bring blesin tu aal peepl.
(Galayshanz 4:28-31) Now, mi bradaz ahn sistaz, unu da Gaad pikni dehn chroo di pramis weh hihn mi mek, jos laik how Aybraham mi geh ih son Aizak chroo di pramis weh Gaad mi mek tu hihn. 29 Eena Aybraham dayz, Ishmel, weh da-mi di son weh di slayv mi ga far ahn, doz hasl Aizak, di wan weh mi baan chroo weh di Spirit a Gaad mi pramis. Rait soh, dehn wan weh da stil slayv tu di Laa waahn hasl wee fi mek wi goh bak goh kip di Laa fi geh sayv. 30 Bot da weh di Skripcha seh? Ih seh, “Jraiv owt di slayv ahn ih pikni mek dehn goh; kaa di slayv son noh wahn ga no shayr eena weh di pa lef fi di son weh di free laydi ga.” 31 Soh unu si, mi bradaz ahn sistaz, wee da noh di slayv pikni dehn, bot wee bilangz tu di wan weh free.
Saach fi Spirichwal Chrezhaz
(Galayshanz 4:6) Unu da fi hihn pikni dehn tu, ahn dats wai Gaad gi unu di Spirit a ih Son fi liv eena unu, da sayhn Spirit weh mek wi ku kaal Gaad, “Aba, Faada.”
w09-E 4/1 13
Yu Mi Noa?
Wai Jeezas mi rifaa tu Jehoava az “Aba, Faada” wen ih mi-di pray?
Di werd ʼab·baʼʹ eena di Aramayik langwij ku meen “di faada” er “Oa Faada.” Eena eech a di difrent plays eena di skripchaz weh wi fain dis werd, da-mi paat a wahn pryaa weh ajres tu wi hevnli faada, Jehoava. Wat da di meenin a dis werd?
The International Standard Bible Encyclopedia seh dat di way dehn yoostu taak bak den eena Jeezas taim, ʼabbāʼ mi maynli geh yooz wen sohnbadi di shoa wahn kloas rilayshanship ahn rispek fi dehn Pa. Da wahn werd weh shoa lov er afekshan, ahn lata taimz, da di fos werd wahn baybi wuda laan fi seh. Jeezas mi yooz dis ekspreshan wen ih mi pray haad-wan tu ih Pa, Jehoava. Eena di gyaadn a Getsemani, jos owaz bifoa Jeezas det, hihn mi pray tu Jehoava wid dehnya werdz: “Aba, Faada.”—Maak 14:36.
Di Encyclopedia kantinyu fi seh dat ih neva kaman bak den fi yooz dis werd fi rifaa tu Gaad, praabli bikaaz peepl mi tink dat ih wudn bee rispekful. Ih bring owt ferda dat Jeezas . . . mi yooz dis ekspreshan eena ih pryaa fi shoa dat hihn mi veri kloas wid ih Faada, Jehoava. Di ada too taimz weh wi fain di werd “Aba,” da di apasl Paal mi yooz it, ahn dis shoa dat di Kristyanz eena Paal taim mi yooz dis ekspreshan eena fi dehn pryaaz tu.—Roamanz 8:15; Galayshanz 4:6.
(Galayshanz 6:17) Ah noh waahn nobadi hasl mi afta dis kaa Ai ga nof skaar pahn mai badi fi shoa seh dat Ai bilangz tu Jeezas Krais.
w10-E 11/1 15
Yu Mi Noa?
Da wat di apasl Paal mi-di rifaa tu wen ih seh dat ih ga inof skaar pahn ih badi ‘fi shoa seh dat hihn bilangz tu Jeezas Kraisʼ?—Galayshanz 6:17.
▪ Dehnya werdz weh Paal mi rait maita mi mek peepl bak eena fi hihn taim tek weh hihn seh fi mi meen sevral tingz. Fi egzampl, dehn doz yooz wahn red-hat aiyan fi bran peepl weh da-mi prizna a waar, er weh da-mi teef fahn di templ dehn, er weh da-mi slayv weh ron weh. Wen dehn mi bran peepl eena dis way, di maak da-mi sohnting shaymful fi ga.
Bot noh aal bran da-mi sohnting fi luk dong pan. Wahn lata peepl mi yooz it fi shoa seh dat dehn da-mi wahn memba a wahn sertn rays er rilijan. Akaadn tu di Theological Dictionary of the New Testament, fi egzampl, “di peepl fahn Siriya dehn doz bran op dehnself pahn dehn han er nek fi di aidol gaad Haydad ahn Atargatis. . . Wail adaz doz ga di bran a wahn aivi leef fi shoa dat dehn wership di aidol Daiyonisos.”
Bot tudeh day, sohn raita bileev dat Paal mi-di rifaa tu di skaar dehn weh hihn mi geh fahn di lata difrent sofarin ih mi gaahn chroo, laik wen dehn mi beet ahn wid wahn stik, stoan ahn wid rak, er wen ih mi ekspeeryens shiprek pahn di difrent mishineri toar dehn. (2 Korintyanz 11:23-27) Maybi, Paal jos mi meen dat di way how hihn mi liv ih laif—noh jos sohn fizikal skaar—mi shoa seh hihn bilangz tu Krais.
Baibl Reedin
(Galayshanz 4:1-20) Dis da weh Ah di seh: Tek wahn lee bwai, far instans, weh fi geh evriting weh ih pa oan. Az lang az ih anda ayj, ih no beta dan di servant dehn, eevn doa di taim wahn kohn wen di bwai wahn oan evriting. 2 Ih wuda hafu deh anda peepl weh tek kayr a ahn, ahn weh luk afta ih bizniz til ih reech di ayj weh ih pa set. 3 Rait soh wee mi stan bifoa Jeezas kohn. Di spirit dehn a dis werl mi ga wi anda dehn kanchroal laik slayv. 4 Bot wen di karek taim kohn, Gaad sen ih Son. Da wahn uman baan ahn, ahn hihn mi hafu obay di Laa 5 soh dat hihn kuda free wee fahn di Laa. Den wee kuda bee fi hihn pikni dehn. 6 Unu da fi hihn pikni dehn tu, ahn dats wai Gaad gi unu di Spirit a ih Son fi liv eena unu, da sayhn Spirit weh mek wi ku kaal Gaad, “Aba, Faada.” 7 Soh unu da noh kaman slayv nohmoh, bot unu da Gaad pikni. Ahn if unu da fi hihn pikni, den evriting weh hihn ga da fi unu tu. 8 Fos, bifoa unu mi noa Gaad, unu da-mi slayv tu sohn faals gaad weh neva eevn egzis. 9 Now dat unu geh fi noa Gaad—er Ah shuda seh, now dat Gaad noa unu—how unu wahn ton bak tu dehn gud fi notn spirit a dis werl weh noh ga no powa? Weh hapm? Da kanchroal unu waahn dehn kanchroal unu laik slayv agen? 10 Now unu waahn bee laik di Jooz dehn, di kip speshal dayz, ahn monts, ahn disya seezn ahn datdeh yaa. 11 Ah frayd dat aala da werk weh Ah du fi unu da-mi loan ways a taim. 12 Mi bradaz ahn sistaz, Ah di bayg unu fi bee laik mee. Ai da laik how unu yoostu stan, free fahn aala di roolz ahn regyulayshanz a di Laa. Unu neva doz chreet mi bad den. 13 Insted, memba Ah mi sik wen Ah mi fos preech di Gud Nyooz bowt Jeezas Krais tu unu? 14 Ahn eevn doa ih mi haad fi unu deel wid mi siknis, unu neva ton unu bak pahn mi er disgos mi. Insted, unu welkom mi jos laik if Ah da-mi wahn aynjel fahn Gaad, er laik how unu wuda welkom Krais Jeezas ihself. 15 Weh hapm tu aala da hapinis unu doz feel wen unu doz bles mi soh moch? Ai ku tel unu fi shoar dat wan taim unu wuda mi dig owt unu oan aiy ahn gi mi. 16 Wat, Ai da unu enimi now kaa Ah tel unu di chroot? 17 Dehn wan weh di chrai chaynj di Gud Nyooz waahn win unu oava tu fi dehn said bad, bot weh dehn waahn du noh gud fi unu. Aal dehn waahn du da kip unu weh fahn mi soh dat dehn ku ga unu aal tu dehnself. 18 Now ih gud if peepl reeli waahn du gud fi unu, az lang az da fi di rait reezn, ahn noh jos bikaa Ai dehdeh wid unu. 19 Aiy, mi lee pikni unu! Ah feel payn fi unu jos laik wahn laydi weh di ga payn fi ga baybi. Ah wahn kip aan di feel da payn til unu geh fi bee laik Jeezas Krais ihself. 20 Ah wish dat Ah kuda mi dehdeh wid unu soh dat Ah wudn hafu song soh beks wid unu. Ah noh noa weh fi du bowt unu.
JOON 10-16
CHREZHAZ FAHN DI WERD A GAAD | IFEEZHANZ 1-3
“Jehoava Plan fi Bring Tugeda Evriting Anda Krais”
(Ifeezhanz 1:8, 9) Ahn hihn gi wi moa ahn moa a fi hihn grays, ahn ih mek wi ga aal wizdom ahn andastandin. 9 Gaad du weh hihn mi plan fi du fahn lang taim. Hihn let wi een pahn fi hihn seekrit plan dehn weh ih mi plan fi du chroo Krais.
it-2-E 837 ¶4
Saykrid Seekrit
Di Mesiyanik Kingdom. Eena di leta dehn weh Paal mi rait, ih giv wahn deetayl akonk bowt Gaad saykrid seekrit bowt di Krais. Da Ifeezhanz 1:9-11 ih taak bowt how Gaad mi mek wi noa ih “seekrit plan” [er, “saykrid seekrit”, NW] wehpaat ih mi seh: “Hihn let wi een pahn fi hihn seekrit plan dehn weh ih mi plan fi du chroo Krais. Dis plan, weh Gaad wahn finish wen di rait taim kohn, da fi bring tugeda evriting weh deh eena hevn ahn weh deh pahn ert, wid Krais da di hed. Eniting weh tek plays da bikaaz Gaad plan it, ahn da fi hihn disizhan. Gaad pik wee fi bee fi hihn oan peepl, bikaaz wi da wan wid Krais, bikaaz dat da fi hihn oan plan weh hihn mi disaid fahn di biginin a taim.” Dis da bowt Gaad govament, wid Jeezas Krais az di Roola. “Evriting weh deh eena hevn,” rifaa tu di anointid Kristyanz weh wahn rool lang wid Krais Jeezas da hevn. Di tingz “weh deh pahn di ert” da peepl hoo hoap fi liv pahn di ert. Jeezas mi shoa ih disaipl dehn dat di saykrid seekrit da bowt di Kingdom wen ih mi tel dehn: “Gaad pik unu fi noa di seekrit bowt fi hihn kingdom, bot fi ada peepl Ah tel dehn evriting eena parabl.”—Maak 4:11.
(Ifeezhanz 1:10) Dis plan, weh Gaad wahn finish wen di rait taim kohn, da fi bring tugeda evriting weh deh eena hevn ahn weh deh pahn ert, wid Krais da di hed.
w12-E 7/15 27-28 ¶3-4
Jehoava Bring Ih Famili Tugeda
3 Moaziz mi tel di Izrelait dehn: “Lisn gud, peepl a Izrel! Jehoava wi Gaad, hihn da di Wan ahn onli Gaad weh deh.” (Deut. 6:4, NW) Jehoava akshanz an ih perpos aalwayz mach op wid wan anada. Soh, “Gaad wahn finish [ih plan] wen di rait taim kohn” wen Hihn tek akshan fi bring tugeda evriting weh deh eena hevn ahn weh deh pahn ert, wid Krais da di Hed. (Reed Ifeezhanz 1:8-10.) Dis plan wahn geh don eena too stayj. Di fos stayj da fi pripyaa di kangrigayshan a anointid Kristyanz fi goh liv da hevn wid Jeezas Krais az dehn Hed. Dis mi staat fahn way bak pahn di day a Pentikaas 33 C.E. Fahn den, Jehoava mi staat gyada di anointid Kristyanz weh mi wahn rool lang wid Krais da hevn. (Aks 2:1-4) Soh den, Gaad mi mek evriting rait wid hihn ahn di anointid dehn; dis mi hapm wen Krais Jeezas mi bai aala dehn wid ih blod. Ahn soh, dehn peepl weh geh chooz ton “Gaad pikni dehn.”—Roam. 3:23, 24; 5:1; 8:15-17.
4 Di sekant stayj pripyaa evribadi hoo wahn liv eena Paradais pahn di ert anda Krais Roolaship. Di “big big krowd” mek op di fos paat a dis groop. (Rev. 7:9, 13-17; 21:1-5) Joorin di towzn yaa Rool, bilyanz a peepl wahn geh rezorek bak tu laif ahn jain di big krowd a servaivaz. (Rev. 20:12, 13) Jos imajin how dis rezorekshan wahn yoonait bilyanz a peepl bak tugeda! Da di en a di towzn yaaz, di tingz “weh deh pahn di ert” wahn geh put tu wahn fainal tes. Fi dehn peepl weh rimain faytful, Gaad wahn free dehn soh dat ih ku gi dehn di sayhn gloari weh bilangz tu ih “pikni dehn.”—Roam. 8:21; Rev. 20:7, 8.
Saach fi Spirichwal Chrezhaz
(Ifeezhanz 3:13) Soh den, Ah di bayg unu fi noh geh diskorij bikaaz Ah di sofa dehn ting ya fi fi unu sayk. Kaaz da fi fi unu benifit dat Ah di sofa.
w13-E 2/15 28 ¶15
Noh Mek Notn Stap Yu Fahn Tek Hoal a Gaad Gloari
15 Wen wi kip aan di bayr op eena weh Jehoava waahn wi du, dis wahn mek adaz aksep how wandaful Gaad wandaful. Paal mi rait tu di kangrigayshan da Efisos: “Soh den, Ah di bayg unu fi noh geh diskorij bikaaz Ah di sofa dehn ting ya fi fi unu sayk. Kaaz da fi fi unu benifit dat Ah di sofa.” (Ifee. 3:13) Eena weh way Paal chribyulayshan da-mi wahn “benifit” tu di Kristyanz da Efisos? Paal mi eega fi kantinyu preech, eevn doa hihn mi sofa wahn lat fi di kangrigayshan da Efisos. Dis neva eezi fi du, bot Paal mi kansida dis wan a di graytis ting hihn kuda mi du. If Paal mi giv op wen ih mi deh anda persikyooshan, dis wuda mi gi adaz di aidyaa dat dehn rilayshanship wid Jehoava, di preshos minischri, ahn hoap weh dehn mi ga, neva wert notn. Bikaaz Paal neva giv op, hihn mi shoa dat servis tu di Krais mi wert aal di sakrifais.
(Ifeezhanz 3:19) Da chroo! Non a wi kuda eva noa jos humoch Krais lov wi. Bot wen yu noa Gaad lov, ih wahn kip aan di werk eensaida yu moa ahn moa, sotay yu ton laik Gaad ihself.
cl-E 299 ¶21
“Non a Wi Kuda Eva Noa Jos Humoch Krais Lov Wi”
21 Di Greek werd weh chranslayt az “fi noa” meenz dat yu noa sohnting bikaaz yu “akchwali gaan chroo di ekspeeryens.” Wen wi shoa lov laik how Jeezas mi du it—wi giv a wiself fi adaz, wi shoa kompashan tu adaz, ahn wi fagiv eech ada fahn wi haat—den da onli soh wi kud reeli andastan how hihn mi feel. Wen wi du dis, wi kom fi noa ‘jos humoch Krais lov wi, ahn dis . . wahn kip aan di werk eensaida wi moa ahn moa.ʼ Ahn mek wi noh faget dat di moa wi chrai bee laik Krais, di kloasa wi jraa tu fi hihn lovin Pa, Jehoava.
Baibl Reedin
(Ifeezhanz 1:1-14) Dis leta da fahn mee, Paal, weh da wahn apasl a Krais Jeezas, kaa dat da weh Gaad waahn. Dis leta da tu Gaad peepl dehn weh liv da Efisos, ahn weh faytful eena di way dehn liv dehn laif wid Krais Jeezas. 2 Ah di pray seh dat Gaad di Faada ahn di Laad Jeezas Krais gi unu grays ahn pees eena unu haat. 3 Mek wi prayz Gaad, weh da di Faada a wi Laad Jeezas Krais! Bikaaz wi da wan wid Krais, hihn bles wee wid evri spirichwal blesin weh Krais bring fi wi fahn hevn. 4 Eevn bifoa di werl mi mek, Gaad mi don pik wee fi bee wan wid Krais, soh dat wi wuda bee hoali ahn noh ga no faalt wen wi stan op fronta ahn. Bikaaz a fi hihn lov, 5 Gaad mi don disaid seh dat chroo Jeezas Krais, ih wahn mek wi fi hihn pikni. Dis da weh mi gi hihn pleja, ahn kehr owt fi hihn plan. 6 Mek wi prayz Gaad fi di free gif a ih grays weh soh wandaful, weh ih gi wi chroo ih Son weh ih lov. 7 Da bai di blod a Jeezas Krais wi set free, ahn Gaad fagiv wi sin dehn. Di grays a Gaad reeli grayt! 8 Ahn hihn gi wi moa ahn moa a fi hihn grays, ahn ih mek wi ga aal wizdom ahn andastandin. 9 Gaad du weh hihn mi plan fi du fahn lang taim. Hihn let wi een pahn fi hihn seekrit plan dehn weh ih mi plan fi du chroo Krais. 10 Dis plan, weh Gaad wahn finish wen di rait taim kohn, da fi bring tugeda evriting weh deh eena hevn ahn weh deh pahn ert, wid Krais da di hed. 11 Eniting weh tek plays da bikaaz Gaad plan it, ahn da fi hihn disizhan. Gaad pik wee fi bee fi hihn oan peepl, bikaaz wi da wan wid Krais, bikaaz dat da fi hihn oan plan weh hihn mi disaid fahn di biginin a taim. 12 Mek aala wi den, weh da-mi di fos wan dehn fi ga hoap eena Krais, prayz di gloari a Gaad! 13 Ahn unu tu mi kohn fi bee di peepl a Gaad wen unu yehr di chroo mesij. Dat da di Gud Nyooz weh gi unu salvayshan. Unu mi bileev eena Krais, ahn Gaad put fi hihn stamp pahn unu fi shoa dat ih oan unu. Da stamp da di Hoali Spirit weh ih mi pramis unu. 14 Di stamp a di Spirit da weh mek wi shoar seh dat wee wahn geh weh Gaad mi pramis ih peepl dehn. Dis tel wee seh dat wi noh haftu wori, bot dat Gaad wahn mek aala wi weh bilangz tu ahn free fi prayz fi hihn gloari!
JOON 17-23
CHREZHAZ FAHN DI WERD A GAAD | IFEEZHANZ 4-6
“Unu fi Put Aan Aal Weh Gaad Gi Unu fi Protek Unu”
(Ifeezhanz 6:11-13) Unu fi put aan aal weh Gaad gi unu fi protek unu wen unu fait gens eevl, jos laik wen wahn soalja put aan dehn aiyan kloaz fi protek dehn hoal badi. Unu fi du dat soh dat wen di devl kohn wid ih eevl plan, unu wahn ku stan op gens ahn. 12 Bikaaz wi noh di fait gens peepl. Wi di fait gens dehn powa weh wi kyaahn si, di eevl spirit dehn weh liv hai op deh eena di ayaa. Wi di fait gens di schrang powa dehn weh di rool oava peepl weh noh bileev eena Gaad, dehn powa weh ga atariti now eena dis daak taim weh wi di liv eena. 13 Soh den, unu fi put aan aal weh Gaad gi unu fi protek unu eena di fait, soh dat wen di day kohn wen eevl kohn tu unu fi chroo, unu wahn ku stan op ahn fait gens di eevl plan a di devl. Ahn wen yu don fait tu di en, yu wahn lef di stan op di hoal yu grong.
Yong Bradaz ahn Sistaz—Stan Op Schrang Wan Gens di Devl
DI APASL Paal mi seh dat fi wee laif az wahn Kristyan da laik wahn soalja weh deh eena wahn han-tu-han batl. Af koars, dis da wahn spirichwal waar. Bot wi enimiz reel. Saytan an ih deemon dehn da soalja wid lata ekspeeryens. Fi di fos, ih mait luk laik wi noh stan wahn chaans gens dehn. Wi yong bradaz ahn sistaz mait luk helples. Bot dehn ku win. In fak, dehn di win! Wai wi seh dat? Bikaaz ‘dehn geh schrent fahn di Laad ahn geh fi hihn powa.ʼ Bot dehn noh onli geh powa fahn Gaad, dehn jres fi batl. Jos laik how wahn soalja mek shoar ih gat aan wahn soot fi protek ihself ahn wepan fi batl, wi need fi gat aan wi “spirichwal aama” ahn ga wi “spirichwal wepan.”—Reed Ifeezhanz 6:10-12.
(Ifeezhanz 6:14, 15) Soh den, fi stan schrang gens di devl, mek aal weh da di chroot bee laik di belt weh unu faasn rong unu ways. Ahn mek di aiyan ves weh kova yu ches stan fi di rait way unu fi du tingz. 15 Ahn unu fi bee redi fi preech di Gud Nyooz a pees weh Gaad gi, ahn mek dat bee laik di shooz weh unu fi put aan pahn unu fut.
Yong Bradaz ahn Sistaz—Stan Op Schrang Wan Gens di Devl
4 Jos laik dat, di chroot wi laan fahn di Werd a Gaad protek wi eena wahn spirichwal way fahn faals teechinz. (Jan 8:31, 32; 1 Jan 4:1) Ahn di moa wi lov Baibl chroot, di eeziya ih wahn bee fi kehr wi “aiyan ves,” er liv bai Gaad raichos standadz. (Ps. 111:7, 8; 1 Jan 5:3) Bisaidz dat, wen wi ga wahn gud andastandin a di chroot fahn di Werd a Gaad, wi ku stan op wid kanfidens ahn noh frayd fi difen di chroot gens peepl weh noh laik wi.—1 Peet. 3:15.
7 Dis da wahn gud way fi teech how raichosnis fahn Jehoava ku protek wi haat! (Prov. 4:23) Jos laik how wahn soalja wudn ekschaynj ih aiyan ves fi sohnting weh mek owta wahn lesa kwaliti metal, wi wuda neva waahn ekschaynj Jehoava standadz a weh rait fi wi oan. Wee noh perfek, soh wi mek mistayk wen wi chrai mek disizhan fi wiself. Fi wee oan tinkin kuda neva protek wi az moch az di “aiyan ves”—Jehoava raichos standadz. (Prov. 3:5, 6) Insted, wi haftu chek dat wi aiyan ves di kova wi haat gud gud.
10 Di Roaman soalja dehn mi yooz dehn boots fi goh da waar. Bot di simbolik shooz weh Kristyanz yooz kehr dehn owt eena di minischri fi taak bowt wahn mesij a pees. (Isa. 52:7; Roam. 10:15) Bot, ih tek korij fi taak wen di apachooniti kom op. Wahn brada weh naym Bo, weh 20 yaaz oal, seh: “Ah tink Ai mi shaym. Bot wen Ah luk bak, Ah noh eevn noa wai Ah mi feel shaym. Ahn now Ah glad fi taak bowt Jehoava tu mi frenz.”
(Ifeezhanz 6:16, 17) Den, mek unu fayt eena Jeezas Krais bee laik wahn sheel weh unu kehr. Wid dis sheel unu wahn kud blak aal di aro dehn wid faiya da en, weh di eevl wan di shoot aata unu. 17 Unu fi mek di salvayshan weh Gaad gi protek unu laik wahn helmit weh unu di wayr pahn unu hed. Ahn mek di Werd a Gaad, weh di Hoali Spirit gi unu, bee laik wahn soad fi fait gens di enimi.
Yong Bradaz ahn Sistaz—Stan Op Schrang Wan Gens di Devl
13 Som a di “aro dehn wid faiya” weh Saytan mait shoot aata wi da laiz bowt Jehoava. Hihn waahn wi bileev dat Gaad noh kay bowt wi ahn dat nobadi kuda eva lov wi. Ida, wahn 19 yaa-oal sista, seh: “Sohntaim Ah feel laik Ah noh wot eniting. Ah aalwayz mi feel dat Jehoava noh kloas tu mi ahn dat ih noh waahn bee mi Fren.” How shee mi deel wid dis atak? Ida seh: “Ah yoostu jos sidong ahn noh koment ataal da di meetin dehn. Ah wuda tink dat nobadi waahn hyaa weh Ah gat fi seh eniwayz. Now doh, Ah pripyaa fi di meetin ahn chrai fi ansa at lees too er chree taimz. Ih haad, bot Ah feel beta wen Ah koment. Ahn di bradaz ahn sistaz soh inkorijin. Ah aalwayz lef di meetin di feel dat Jehoava lov mi.”
16 Jos laik how wahn helmit protek wahn soalja brayn, wi hoap protek wi main ahn how wi tink. (1 Tes. 5:8; Prov. 3:21) Wi hoap help wi fi stay foakos pahn Gaad pramis an ih help wi fi ga wahn beta vyoo a wi prablemz. (Ps. 27:1, 14; Aks 24:15) Bot if wi waahn mek gud yoos a wi “helmit,” wi haftu put it aan pahn wi hed, noh kehr it eena wi han.
20 Di apasl Paal seh dat Gaad Werd da laik wahn soad weh Jehoava gi wi. Bot wi haftu laan how fi yooz it wid skilz wen wi difen wi bileef dehn, er wen wi di karek di way wi tink. (2 Kor. 10:4, 5; 2 Tim. 2:15) How yu ku du beta wid yu skilz? Sebastian, weh 21 yaaz oal, seh: “Soh faar, Ah rait dong wan vers fahn evri chapta eena mi Baibl reedin. Ah mek wahn lis a mi fayvrit vers dehn. Da way deh, Ah feel laik Ah di tink moa ahn moa laik Jehoava.” Daniel, weh wi mi taak bowt lee erliya, seh: “Wen Ah di du mi Baibl reedin, Ah pik owt sohn vers weh Ah tink wahn help peepl Ah meet eena di minischri. Ah fain dat peepl rispan eena wahn gud way wen dehn si dat yu lov weh di Baibl ga fi seh ahn dat yu di du yu bes fi help dehn.”
Saach fi Spirichwal Chrezhaz
(Ifeezhanz 4:30) Unu noh fi mek di Hoali Spirit sad. Bikaaz di Spirit a Gaad da weh Gaad yooz fi maak unu fi shoa dat unu bilangz tu hihn. Dat da unu garantee dat di day wahn kohn wen Gaad wahn set unu free.
it-1-E 1128 ¶3
Hoalinis
Hoali spirit. Di hoali spirit da Jehoava powa, er enerji, weh ih yooz fi du fi hihn wil. Di hoali spirit kleen, pyoar, saykrid, ahn Jehoava yooz it fi du gud. Soh ih mek sens dat wi kaal it “hoali spirit” ahn “spirit weh hoali.” (Ps 51:11; Lk 11:13; Roam 1:4; Ifee 1:13) Di hoali spirit da sohnting weh hoali er kleen. Eni habit weh involv doti er rong kandok di goh gens di hoali spirit er mek it “sad.” (Ifee 4:30) Di hoali spirit da noh wahn persn, bot sins ih kohn fahn Jehoava, wi ku mek di hoali spirit “sad.” Eni habit weh involv doti er rong kandok ku “put owt di faiya a di hoali spirit.” (1Tes 5:19) If di persn noh lisn tu Jehoava ahn stap di rong kandok, ih wahn mek Gaad hoali spirit “sad,” ahn sayka dat, Jehoava ku en op di bee ih enimi. (Isa 63:10) Wahn persn weh mek di hoal spirit “sad” ku en op di insolt it. Jeezas mi seh dat Gaad wahn neva fagiv dis kaina sin.—Mach 12:31, 32; Mk 3:28-30; si SPIRIT.
(Ifeezhanz 5:5) Unu beta noa seh dat nobadi noh wahn geh wahn plays eena Krais ahn Gaad kingdom if dehn di liv loos laif, ahn if dehn di sleep rong, ahn ga red aiy fi ada peepl tingz. Bikaaz sohn badi weh ga red aiy akchwali di wership aidal.
it-1-E 1006 ¶2
Greedi
Greedi Dizaiya Wahn Shoa Op Eena Peepl Akshanz. Wen sombadi greedi, dehn kyaahn haid it. Weh ih du wahn shoa op di rong dizaiyaz weh deh eena ih haat. Di Baibl raita Jaymz tel wi dat afta wi wikid haat don los ahn geh pregnant, ih baan sin. (Jay 1:14, 15) Soh yu ku noa wahn greedi persn bai weh ih du. Di apasl Paal mi seh dat “sohnbadi weh ga red aiy akchwali di wership aidal.” (Ifee 5:5) Wateva di greedi persn dizaiya, dat da ih gaad. Fi satisfai ih selfish dizaiya wahn moa impoatant dan ih rilayshanship wid ih Kriyayta.—Roam 1:24, 25.
Baibl Reedin
(Ifeezhanz 4:17-32) Ai Paal, weh di fala di Laad, di waan unu seh, unu noh fi liv unu laif laik how dehn wan weh noh noa Gaad di liv. Weh dehndeh peepl deh tink noh wot notn. 18 Dehn haat noh oapm, soh dehn kyaahn andastan di laif weh Gaad gi. Dehn stobant ahn kyaahn laan ataal. 19 Dehn noh ga no shaym bowt notn nohmoh. Dehn du aal kaina eevl ting weh dehn main tel dehn fi du. Dehn sleep rong ahn liv bad laif kyaahn don. 20 Now, dat da neva weh unu laan bowt Krais! 21 Ah noa seh dat unu weh da ih falowa dehn yehr bowt hihn, ahn dehn don teech unu di chroot weh yu ku fain oanli eena Jeezas. 22 Soh den, unu fi giv op unu oal way a livin, weh mek unu du dehn bad tingz weh unu yoostu du. Da way a livin wahn dischrai unu, bikaaz ih wahn mek unu waahn du wikidnis weh mek unu sin. 23 Unu fi mek Gaad Spirit chaynj unu haat ahn di way unu tink. 24 Unu fi bihayv laik di nyoo persn weh Gaad mek fi bee laik hihn. Da nyoo persn wahn liv hoali, ahn du weh rait eena Gaad sait. 25 Soh den, evri wan a unu fi stap tel lai. “Unu fi tel di chroot tu di ada bileeva dehn,” bikaaz aala wi tugeda bilangz tu Krais. Wi da aal wan badi. 26 “If unu beks bad til unu di si red, unu noh fi mek dat mek unu sin.” Ahn unu noh fi mek di son goh dong ahn unu stilyet beks bad. 27 Unu noh fi gi di devl no chaans fi mek unu sin. 28 Enibadi weh doz teef, ih noh fi teef nohmoh. Ih mos werk, ahn du sohnting gud wid ih han, soh dat ih ku help ihself plos enibadi weh ga need. 29 Unu noh fi seh notn hatful weh noh wahn du nobadi no gud. Insteda dat, unu fi seh werdz weh wahn help ada peepl soh dat unu werdz wahn bil dehn op, akaadn tu weh dehn need fi yehr. Eena da way, unu wahn bee wahn blesin tu peepl weh di yehr unu. 30 Unu noh fi mek di Hoali Spirit sad. Bikaaz di Spirit a Gaad da weh Gaad yooz fi maak unu fi shoa dat unu bilangz tu hihn. Dat da unu garantee dat di day wahn kohn wen Gaad wahn set unu free. 31 Unu noh fi ga no kaina bitanis eena unu haat; ahn unu noh fi geh soh beks dat ih get owta kanchroal needa. Unu noh fi hala op aata wan anada ner di insolt op wan anada. Unu noh fi di shoa no kaina haytful feelinz tu wan anada. 32 Insteda dat, unu fi du gud tu wan anada. Unu fi ga wahn waam, kain haat fi wan anada, ahn fi fagiv wan anada, jos laik how Gaad mi fagiv unu, kaaz unu bilangz tu Krais.
JOON 24-30
CHREZHAZ FAHN DI WERD A GAAD | FILIPIYANZ 1-4
“Unu Noh fi Wori Bowt Notn”
(Filipiyanz 4:6) Unu noh fi wori bowt notn, bot unu mos pray ahn aks Gaad fi evriting. Ahn unu mos tank ahn tu wen unu di aks ahn fi weh unu need.
w17.08-E 10 ¶10
“Den Gaad Wahn Gi Unu Wahn Kaina Pees Weh Nobadi Kyaahn Andastan”
10 Weh ku help wi kip kaam ahn geh pees fahn Gaad? Weh Paal rait tu di kangrigayshan da Filipai shoa wi dat di solooshan fi woriz da fi pray. Soh wen wi ga woriz, wi need fi ton wi woriz intu pryaaz. (Reed 1 Peeta 5:6, 7.) Wid kompleet fayt eena Jehoava, pray tu ahn, bikaaz yu noa hihn kyaa bowt yoo. Wen yu pray, “tank ahn” az yu tink bowt yu blesinz. Wi kanfidens eena Jehoava wahn geh schranga wen wi kip eena wi main dat “hihn kud du faar way moa dahn weh wee kud eva aks fa er eevn tink.”—Ifee. 3:20.
(Filipiyanz 4:7) Den Gaad wahn gi unu wahn kaina pees weh nobadi kyaahn andastan. Ih wahn mek da sayhn pees wach oava unu haat ahn unu main bikaa unu da wan wid Krais Jeezas.
w17.08-E 10 ¶7
“Den Gaad Wahn Gi Unu Wahn Kaina Pees Weh Nobadi Kyaahn Andastan”
7 Fi shoar wen di bradaz da Filipai mi reed Paal leta tu dehn, ih mi help dehn memba wat aal mi hapm tu Paal ahn how Jehoava mi help ahn eena wayz weh nobadi mi ekspek. Da weh lesn Paal mi-di chrai teech dehn? Di point mi klyaa: Noh wori. Pray ahn den yu wahn geh pees fahn Gaad. Bot noatis dat pees fahn Gaad da “wahn kaina pees weh nobadi kyaahn andastan.” Weh dat meen? Sohn chranslayta eksplayn di skripcha dis way, “da moa dan yu ku jreem bowt” er “ih faar beta dan eni hyooman tinkin.” Soh Paal mi-di seh dat pees fahn Gaad moa wandaful dan weh wi ku imajin er tink bowt. Soh wen wi ga woriz, wi noh mait si wahn way owt, bot Jehoava kud. Jehoava ku tek kyaa a wi eena wayz weh wi noh ekspek.—Reed 2 Peeta 2:9.
w17.08-E 12 ¶16
“Den Gaad Wahn Gi Unu Wahn Kaina Pees Weh Nobadi Kyaahn Andastan”
16 Weh wi ku ekspek wen wi geh di pees fahn Gaad weh nobadi kyaahn andastan? Di Skripcha seh dat ih ‘wahn wach [er, gyaad] oava wi haat ahn main bikaa wi da wan wid Krais Jeezas.ʼ (Fil. 4:7) Eena di orijinal langwij, di werd “gyaad” da-mi wahn werd weh di aami mi yooz. Di werd “gyaad” mi rifaa tu wahn groop a soalja weh rispansabl fi gyaad di siti. Dis da egzakli weh di soalja dehn mi du da Filipai. Di peepl weh mi liv deh mi feel sayf fi goh sleep da nait bikaaz di soalja dehn mi-di gyaad di siti. Sayhn way soh, wen wi geh pees fahn Gaad ih wahn mek wi haat ahn main geh kaam kaam. Wi noa dat Jehoava kyaa fi wi ahn hihn waahn wi ga sokses. (1 Peet. 5:10) Bikaaz wi noa dis, ih help gyaad wi haat ahn main fahn woriz ahn fahn geh diskorij.
Saach fi Spirichwal Chrezhaz
(Filipiyanz 2:17) Sayka unu fayt, unu di sakrifais unu laif fi serv Gaad. Maybi Ai wahn hafu sakrifais mi oan laif pahn tap a aal weh unu di du. Eevn if dat hapm, Ah wahn oanli glad ahn rijais wid aala unu.
it-2-E 528 ¶5
Di Aafrin Dehn
Di Jrink Aafrin. Dehn yoostu sakrifais di jrink aafrin lang wid moas a di ada aafrin dehn, espeshali afta di Izrelait dehn mi setl dong eena di lan weh Jehoava mi pramis dehn. (Nu 15:2, 5, 8-10) Fi du dis sakrifais, di prees mi poar wain pahn di alta. (Nu 28:7, 14; kompyaa Ex 30:9; Nu 15:10.) Di apasl Paal mi rait tu di Kristyanz da Filipai dehnya werdz: “Sayka unu fayt, unu di sakrifais unu laif fi serv Gaad. Maybi Ai wahn hafu sakrifais mi oan laif pahn tap a aal weh unu di du. Eevn if dat hapm, Ah wahn oanli glad ahn rijais wid aala unu.” Rait ya, hihn mi-di kompyaa ih laif tu wahn jrink aafrin [er, sakrifais] fi shoa dat hihn mi wilin fi goh aal owt fi help di bradaz ahn sistaz. (Fil 2:17) Wahn shaat taim bifoa Paal mi ded, ih mi rait tu Timoti dehnya werdz: “Az fi mee, fi mee laif da wahn sakrifais weh don poar owt tu Gaad. Da soon taim fi mee ded.”—2Tim 4:6.
(Filipiyanz 3:11) wid di hoap dat Ah wahn rayz op bak fahn di ded.
w07-E 1/1 26-27 ¶5
“Dis Fos Rezorekshan”—Ih Di Hapm Now!
5 Neks, di anointid Kristyanz weh mek op di Izrel a Gaad wahn deh wid Jeezas da hevn, dehn wahn “bee wid di Laad fareva.” (Galayshanz 6:16; 1 Tesaloanyanz 4:17) Da ivent da weh wi kaal di erli rezorekshan er di “fos rezorekshan.” (Filipiyanz 3:10, 11; Revilayshan 20:6) Wen di fos rezorekshan don, den ih wahn soon bee taim fi mek milyanz geh rayz op bak pahn ert wid di hoap fi liv fareva eena Paradais. Soh weda wi hoap da fi liv da hevn er fi liv pahn di ert, wi inchrestid eena di “fos rezorekshan.” Da weh kaina rezorekshan dat? Ahn wen ih wahn hapm?
Baibl Reedin
(Filipiyanz 4:10-23) Di Laad oanli mek Ah feel gud bikaa at laas unu ku shoa dat unu stil kansaan bowt mi. Ah noa dat unu mi aalwayz kansaan, bot til now unu neva ga wahn chaans fi shoa it. 11 Ah noh di seh dis bikaa Ah need notn, kaa Ai don laan how fi satisfai wid eni kaina sichuwayshan. 12 Ah noa how ih feel wen ting tait, an Ah noa how ih feel fi ga wahn lat. Ai don laan di seekrit a how fi satisfai wid eniting, noh mata if mi beli ful er if ih emti, if Ah rich er if Ah poa. 13 Da Jeezas Krais gi mi di schrent fi fays eniting! 14 Bot ih mi gud dat unu mi shayr wid mi eena mi chroblz. 15 Moroava, az unu Filipiyan peepl noa, fahn di fos taim unu mi geh fi yehr di Gud Nyooz bowt Jeezas Krais, wen Ah mi kohn fahn Masidoanya, nat wahn nada cherch neva mi gi mi wan ting eksep unu. 16 Eevn wen Ah mi stil deh da Tesalonaika, evri now ahn agen unu wuda mi sen wahn lee sohnting fi mi wen Ah mi need it. 17 Da noh laik Ah di chrai shoola notn fahn unu, bot Ah waahn unu geh di blesin fi di gud weh unu di du. 18 Ai don geh pay oava ahn oava aredi. Ai ga moa dan inof, sayka di lee asistans weh unu mi sen wid Epafrodaitos. Unu gif da-mi laik wahn sakrifais tu Gaad weh smel gud tu hihn. Hihn aksep da sakrifais ahn ih oanli pleez wid it. 19 Ahn fi mee Gaad, weh ga wahn lata richiz, wahn werk chroo Krais Jeezas fi mek shoar unu ga evriting weh unu need. 20 Ahn wi mos aalwayz gi Gaad wi Faada gloari, ahn wi mos neva stap. Aymen. 21 Tel aala Gaad peepl dehn weh da wan wid Krais Jeezas dat Ah seh heloa; ahn aala dehn brada weh deh ya wid mi, 22 ahn aala Gaad peepl dehn, espeshali dehn wan weh werk da Seeza palis, seh fi tel unu heloa tu. 23 Ah pray dat di grays a di Laad Jeezas Krais deh wid unu.