Weh di Baibl Seh Bowt Singl ahn Marid Laif?

Eena sohn kolcha, peepl bileev dat wahn persn kyaahn bee hapi if ih noh marid. Bot dat da noh chroo. Weda wi marid er nat wi ku bee hapi, ahn di Baibl seh dat eeda wan da wahn gif fahn Jehoava.

1. Weh da sohn gud tingz wahn persn ku du if ih noh marid?

Di Baibl seh: “Enibadi weh geh marid du gud, bot enibadi weh noh geh marid du beta.” (Reed 1 Korintyanz 7:32, 33, 38.) Eena weh way wahn persn weh noh marid ku “du beta”? Wahn Kristyan weh noh marid noh ga di rispansabiliti fi tek kayr a wahn hozban er waif. Soh dehn wuda ga moa taim fi du ada tingz. Som ku du moa fi Jehoava. Fi egzampl, dehn ku moov tu wahn nada konchri fi preech di gud nyooz. Bot moa dan eniting els, dehn ku spen moa taim di jraa kloasa tu Jehoava.

2. How yu benifit wen yu leegali marid?

Marid peepl ku benifit eena difrent wayz tu. Di Baibl seh dat “too beta dan wan.” (Ecclesiastes 4:9) Dis da chroo wen Kristyanz fala Baibl prinsiplz eena dehn marij. Koplz weh leegali marid pramis fi lov, rispek, ahn cherish eech ada. Bikaaz a dat, dehn feel moa sikyoar dan koplz weh jos di liv tugeda. Ahn pahn tap a dat, dehn pikni wahn groa op di feel sayf tu.

3. Weh standad Jehoava set fi marid peepl?

Wen Jehoava marid di fers kopl, hihn seh: “Wahn man wahn lef ih pa an ih ma, an ih wahn stik tu ih waif.” (Jenisiz 2:24) Jehoava waahn wahn hozban ahn waif fi lov eech ada ahn stay tugeda fi az lang az dehn liv. Hihn onli alow wahn divoas wen di hozban er di waif komit adolchri—ga seks wid sohnbadi els. Wen sohnting laik dat hapm, Jehoava gi di inosent hozban er waif di rait fi disaid if dehn wahn get wahn divoas.a (Machyu 19:9) Jehoava noh alow wahn Kristyan fi ga moa dan wan hozban er waif at di saym taim.—1 Timoti 3:2.

SAACH FI MOA

4. Yooz yu laif eena di bes way wen yu noh marid

Jeezas mi seh dat singl laif da wahn gif. (Machyu 19:11, 12) Reed Machyu 4:23, ahn den diskos dis kweschan:

• Bikaaz Jeezas neva marid, how hihn mi yooz ih laif fi serv ih Faada ahn fi help adaz?

Kristyanz weh noh marid ku injai dehn laif jos laik Jeezas. Play di VEEDYO, ahn den diskos di kweschan.

VEEDYO: Singl Peepl Weh Faytful (3:11)

• Weh da sohn tingz Kristyanz weh noh marid ku du weh wahn mek dehn hapi?

Yu mi noa?

Di Baibl noh tel wi egzakli how oal wahn persn need fi bee fi geh marid. Bot, ih inkorij yong peepl fi wayt til ‘di taim a dehn yoot don paas.ʼ Dis da di taim wen wahn yong persn ku fain it haad fi mek waiz disizhanz bowt marij bikaaz ih ga schrang sekshwal dizaiyaz.—1 Korintyanz 7:36.

5. Bee waiz wen yu di chooz hoo yu wahn marid

Hoo yu wahn marid da wan a di moas impoatant disizhan yu wahn eva mek. Reed Machyu 19:4-6, 9, ahn den diskos dis kweschan:

• Wai wahn Kristyan noh fi hori fi geh marid?

Di Baibl ku help yu noa weh kwalitiz fi luk fa eena wahn persn wen yu waahn geh marid. Di moas impoatant ting da fi luk fi sombadi weh lov Jehoava.b Reed 1 Korintyanz 7:39 ahn 2 Korintyanz 6:14. Den diskos dehnya kweschan:

• Wai wi fi onli marid sombadi hoo di serv Jehoava?

• How yoo tink Jehoava wahn feel if wi geh marid tu sombadi weh noh lov Hihn?

6. Si marij laik how Jehoava seeʼt

Eena di Izrelait dehn taim, sohn man mi divoas dehn waif fi no gud reezn. Reed Malachi 2:13, 14, 16, ahn den diskos dis kweschan:

• Wai Jehoava hayt wen peepl geh divoas fi reeznz weh noh deh eena di Baibl?

Play di VEEDYO, ahn den diskos di kweschan.

VEEDYO: Marij—Wahn Pramis Weh fi Laas Fareva (4:30)

• If yu marid tu sombadi weh noh serv Jehoava, weh yoo ku du fi ga wahn hapi marij?

7. Obay Jehoava standadz fi marij

VEEDYO: Yoo Ku Fala Weh Jehoava Seh Bowt Marij (4:14)

Reed Heebrooz 13:4, ahn den diskos dehnya kweschan:

• Yoo tink ih pasabl fi obay Jehoava standadz fi marij? Wai yu wuda seh dat?

Jehoava waahn aal Kristyanz rejista wen dehn get marid er get divoas, bikaaz dis da weh moas govament tel peepl fi du eena dehn konchri. Reed Taitos 3:1, ahn den diskos dis kweschan:

• If yoo marid, yu shoar dat yu marij leegal wid di govament?

WEH WI LAAN?

Weda wi marid er nat da wahn gif fahn Jehoava. Eeda wan ku mek wi hapi ahn satisfai wen wi du tingz di way how Jehoava waahn.

Mek Wi Rivyoo:

• How sohnbadi weh noh marid ku mek di bes yoos a ih laif?

• Wai di Baibl seh wi fi onli marid sombadi weh serv Jehoava?

• Wat da di onli reezn di Baibl giv fi geh wahn divoas?

FAIN OWT MOA

Weh ih meen wen di Baibl seh fi marid “wahn falowa a di Laad”?

“Kweschanz Weh Peepl Aks” (Di Wachtowa, Joolai 1, 2004)

Fi help yu mek gud disizhanz bowt daytin ahn marij, wach dehnya too shaat veedyo.

Pripyaa fi Marij (11:53)

Laan wai wahn brada feel dat hihn mi geh moch moa fahn Jehoava dan eniting weh hihn mi giv op.

Ah Mi-Di Hoap Dat Shee Wuda Laan di Chroot (1:56)

Bifoa wahn persn tink bowt separayt er geh wahn divoas, wat da sohn tingz ih fi kansida?

“Aana ‘Weh Gaad Don Jain Tugedaʼ” (Di Wachtowa, Disemba 2018)