Aal oava di werl, peepl ga difrent feelinz bowt alkohol.a Sohntaim wen dehn deh wid dehn frenz, dehn injai di tek wahn jrink tugeda. Ada peepl mait chooz fi noh jrink non ataal. Wail som jrink fi geh jronk. Bot weh di Baibl seh bowt alkohol?

1. Ih rang fi jrink alkohol?

Di Baibl noh seh dat ih rang fi jrink. Insted, wen di Baibl taak bowt di gud tingz weh Gaad gi wi, ih taak bowt “wain fi mek [wi] haat rijais.” (Psalm 104:14, 15) Pahn tap a dat, dehn ga faytful peepl eena di Baibl weh mi chooz fi jrink.—1 Timoti 5:23.

2. Weh di Baibl tel peepl hoo chooz fi jrink?

Jehoava noh onli seh dat ih rang fi geh jronk bot ih aalso seh dat ih rang fi jrink tu moch eevn if yu noh luk laik yu jronk. (Galayshanz 5:21) Fi hihn Werd di Baibl seh: “Noh kip kompni wid peepl weh jrink tu moch wain.” (Proverbs 23:20) Soh if wi disaid fi jrink, eevn if wi deh bai wiself, wi noh fi jrink soh moch dat wi kyaahn tink karek, wi kyaahn kanchroal weh wi seh er du, er wi damij wi oan badi. Wi fi bee wilin fi kompleetli stap dis habit if wi kyaahn kanchroal humoch wi jrink.

3. How wi shoa rispek fi weh ada peepl disaid bowt alkohol?

Aala wi haftu disaid fi wiself weda er nat wi wahn chooz fi jrink. Soh wi noh fi joj enibadi weh chooz fi du dis eena di rait way, ahn wi noh fi presha nobadi if dehn disaid noh fi jrink. (Roamanz 14:10) If jrinkin ku bee wahn prablem fi ada peepl, wi chooz noh fi jrink. (Reed Roamanz 14:21.) Wen wi du dehnya tingz, wi luk owt fi “weh gud fi adaz, ahn noh jos weh gud fi wiself.”—Reed 1 Korintyanz 10:23, 24.

SAACH FI MOA

4. Disaid weda er nat yu wahn jrink

Jeezas mi tink dat ih rang fi jrink alkohol? Fi fain di ansa, laan bowt fi hihn fers mirakl. Reed Jan 2:1-11, ahn den diskos dehnya kweschan:

• Weh dis mirakl teech wi bowt how Jeezas feel bowt alkohol ahn dehn wan weh chooz fi jrink?

• Sins Jeezas neva tink dat ih rang fi jrink alkohol, how wahn Kristyan fi feel bowt sohnbadi weh chooz fi jrink?

Bot jos bikaaz wahn Kristyan ku jrink, dat noh meenz dat ih aalwayz gud fi du it. Reed Proverbs 22:3, ahn si weda er nat ih wuda bee gud fi jrink wen:

• Yu wahn jraiv er werk wid wahn masheen.

• Yu pregnant.

• Wahn dakta tel yu noh fi jrink.

• Yu fain it haad fi kanchroal humoch yu jrink.

• Di laa seh dat yu kyaahn jrink alkohol.

• Yu deh wid sohnbadi weh noh jrink bikaaz ih yoostu bee wahn prablem far ahn.

Yu ku serv alkohol da wahn wedn er da wahn get-tugeda? Fi help yu disaid, play di VEEDYO.

VEEDYO: Ah Shuda Ga Alkohol Da Wahn Get-Tugeda? (2:41)

Reed Roamanz 13:13 ahn 1 Korintyanz 10:31, 32. Afta yu reed eech skripcha, diskos dis kweschan:

• How yu ku yooz dis prinsipl fi help yu mek wahn disizhan weh wahn mek Jehoava hapi?

5. Disaid humoch yu wahn jrink

If yu disaid fi jrink alkohol, memba dat Jehoava noh stap wi fahn jrink, bot hihn seh dat ih rang fi jrink tu moch. Wai? Reed Isaiah 28:7, ahn den diskos dis kweschan:

• Weh ku hapm wen sohnbadi jrink tu moch?

Weh ku help wi fi noh jrink tu moch? Wi need fi noa wi limit, er humoch wi ku handl. Reed Proverbs 11:2, ahn den diskos dis kweschan:

• Wai ih gud fi mek wi disaid egzakli humoch wi wahn jrink?

6. Weh ku help sohnbadi fi stap jrink tu moch?

VEEDYO: ‘Ah Mi Taiyad a How Ah Mi-Di Livʼ (6:32)

• Eena di veedyo, how Dmitry mi bihayv wen ih mi jrink tu moch?

• At fers, ih mi eezi fi mek hihn stap jrink?

• Weh mi help hihn fi fainali brok dis habit?

Reed 1 Korintyanz 6:10, 11, ahn den diskos dehnya kweschan:

• Di geh jronk da sohnting seeryos? Wai yu wuda seh dat?

• How wi noa dat sohnbadi weh jrink tu moch ku chaynj?

Reed Machyu 5:30, ahn den diskos dis kweschan:

• Eena Jeezas iloschrayshan fi kot aaf wahn han, hihn mi-di help wi fi si dat sohntaim wi need fi giv op sohnting fi pleez Jehoava. If yu di chrai brok di habit fi jrink tu moch ahn yu di ga wahn haad taim, weh yu ku du?b

Reed 1 Korintyanz 15:33, ahn den diskos dis kweschan:

• Weh ku hapm if yu spen taim wid peepl weh laik jrink tu moch?

WEH WI LAAN?

Jehoava gi wi alkohol fi mek wi injai, bot hihn seh ih rang fi mek wi jrink tu moch er geh jronk.

Mek Wi Rivyoo:

• Weh di Baibl seh bowt alkohol?

• Weh aal ku hapm if wi jrink tu moch?

• How wi ku shoa rispek fi ada peepl disizhan bowt alkohol?

FAIN OWT MOA

Weh yong peepl fi tink bowt wen dehn di disaid weda er nat fi jrink?

Tink Bifoa Yu Jrink (2:31)

Fain owt weh da sohn tingz yu ku du fi help yu geh rid a wahn jrinkin prablem.

“Kip Alkohol Eena ih Prapa Plays” (Di Wachtowa, Janiweri 1, 2010)

Ih rang fi mek wahn Kristyan gi wahn toas er rayz dehn glaas er byaa ahn gi wahn speech?

“Kweschanz Weh Peepl Aks” (Di Wachtowa, Febiweri 15, 2007)

Eena di stoari weh naym “Ai Kuda Mi Jrink Moa Dan Enibadi Els,” si weh mi help wahn man fi stap jrink soh moch.

“Di Baibl Chaynj Peepl Laif” (Di Wachtowa, May 1, 2012)

Aala wi ga wi oan stail weh wi laik wayr ahn wi aal ga difrent wayz how wi fiks op wiself. Bot wi ku stil chooz tingz weh wi laik an at di saym taim mek Jehoava hapi wen wi fala sohn baysik Baibl prinsiplz. Mek wi taak bowt som a dehnya prinsiplz.

1. Weh ku help wi disaid weh fi wayr ahn how fi fiks op wiself?

Wi fi “jres eena wahn rispektabl way weh deesent ahn sensabl” ahn wi fi aalwayz luk kleen soh dat ada peepl ku si dat wi “di serv Gaad.” (1 Timoti 2:9, 10) Tink bowt dehnya foa prinsiplz weh wi jos luk pan: (1) Wi fi jres eena wahn “rispektabl way.” Laik weh yu si da wi meetin dehn, aala wi laik difrent tingz, bot wi kloaz ahn how wi du wi hyaa shoa rispek fi di Gaad weh wi wership. (2) Fi jres “deesent” meenz dat wi noh wahn wayr tingz weh ku mek peepl tink eena wahn sekshwal way er weh wahn jraa tu moch atenshan tu wiself. (3) Wi shoa dat wi jres eena wahn “sensabl” way wen wi noh di fala evri nyoo stail weh di kom owt. (4) Di way wi luk fi aalwayz shoa dat wi “di serv Gaad,” bikaaz dis da how wi shoa peepl dat wi di wership di chroo Gaad.—1 Korintyanz 10:31.

2. Wai wi fi tink bowt wi bradaz ahn sistaz wen wi di disaid weh fi wayr?

Eevn doa wi ku disaid weh wi waahn wayr, wi need fi tink bowt adaz ahn weda er nat ih wahn bee wahn prablem fi dehn. Wi chrai wi bes noh fi ofen nobadi, insted wi waahn, “mek adaz hapi ahn du weh gud soh dat wi ku bil dehn op.”—Reed Roamanz 15:1, 2.

3. How di way wi jres ku mek peepl waahn laan bowt Jehoava?

Wi waahn mek shoar dat wi aalwayz jres eena di rait way, bot ih eevn moa impoatant fi bee kyaaful bowt weh wi wayr wen wi goh da meetin ahn goh preech. Wi noh waahn dischrak peepl fahn di gud nyooz. Insted, di way wi luk fi mek peepl waahn laan bowt Jehoava an ih shoa dehn “how byootiful di teechinz a Gaad, wi Sayvya.”—Taitos 2:10.

SAACH FI MOA

4. Wi shoa rispek fi Jehoava wen wi jres eena di rait way

Weh da di moas impoatant reezn wai wi fi kay bowt di way wi luk? Reed Psalm 47:2, ahn den diskos dehnya kweschan:

• How wi wahn jres wen wi memba dat weh wi wayr afek di way peepl si Jehoava?

• Yoo tink ih impoatant fi mek wi pay atenshan tu how wi jres ahn luk wen wi goh da meetin er goh preech? Wai yu wuda seh dat?

5. Weh ku help wi disaid how fi jres ahn luk

Play di VEEDYO.

VEEDYO: “Du Evriting Eena Soch a Way Dat Gaad Geh di Gloari Far It” (10:18)

Ih noh mata if wi kloaz ekspensiv er nat, wi fi aalwayz mek shoar ih kleen ahn da di prapa ting fi wayr fi weh wi di du. Reed 1 Korintyanz 10:24 ahn 1 Timoti 2:9, 10. Den, diskos wai wi noh waahn wayr kloaz weh . . .

• mash op ahn noh kleen er tu kazshwal.

• tu tait, shoa tu moch skin er mek peepl tink eena wahn sekshwal way.

Eevn doa Kristyanz noh deh anda di Laa weh Jehoava gi Moaziz, dis laa stil tel wi how Hihn tink. Reed Deuteronomy 22:5, ahn den diskos dis kweschan:

• Wai wi noh fi fiks op wiself er wayr kloaz weh mek wahn man luk laik wahn laydi er wahn laydi luk laik wahn man?

Reed 1 Korintyanz 10:32, 33 ahn 1 Jan 2:15, 16, ahn den diskos dehnya kweschan:

• Wai wi shuda kay if di way wi luk ku ofen peepl wehpaat wi liv er eena di kangrigayshan?

• Eena yu ayrya, how peepl laik jres ahn fiks op dehnself?

• Yoo tink som a dehn stail noh prapa fi wahn Kristyan? Wai yu wuda seh dat?

WEH WI LAAN?

Wen wi mek gud disizhanz bowt di way wi jres ahn luk, wi shoa rispek fi Jehoava an ada peepl.

Mek Wi Rivyoo:

• Wai di way wi jres ahn luk impoatant tu Jehoava?

• Weh da sohn prinsiplz weh ku help wi disaid how wi fi luk?

• How di way wi luk ku mek ada peepl feel bowt chroo wership?

FAIN OWT MOA

Weh kaina mesij yu ku gi peepl bikaaz a di way yu jres?

“Weh Peepl Wahn Tink Bowt Weh Ai Di Wayr?” (Web aatikl)

Laan wai ih impoatant fi tink bifoa yu geh wahn tatoo.

“Weh di Baibl Seh Bowt Di Geh Wahn Tatoo?” (Web aatikl)

Fain moa prinsiplz weh ku help wi wen wi di disaid weh fi wayr.

“Di Tingz Weh Yoo Laik Wayr Gi Aana tu Gaad?” (Di Wachtowa, Septemba 2016)

How wahn laydi weh mi wahn pleez Gaad laan fi aksep weh ada peepl disaid fi wayr?

“Ah Mi Ga Wahn Prablem Wid di Way Peepl Jres ahn Fiks Op Dehnself” (Awayk!, Disemba 22, 2003)