Kweschanz Weh Peepl Aks

Weh Paal mi meen wen ih seh dat hihn da-mi laik “wahn baybi weh baan bifoa di rait taim”? (1 Korintyanz 15:8)

Eena 1 Korintyanz 15:8 Paal mi seh: “Pahn di laas, ih mi apyaa tu mee laik if Ai da-mi wahn baybi weh baan bifoa di rait taim.” Eena di paas, wi yoostu tink dat hihn mi-di taak bowt weh hapm tu hihn wen ih mi si wahn vizhan a Jeezas da hevn. Da mi laik if Paal mi-di geh di privilij fi baan az wahn spirit heda taim, honjridz a yaaz bifoa da kaina rezorekshan mi fi hapm. Bot afta wi stodi dis vers moa wi need fi chaynj di eksplanayshan.

Da chroo dat Paal mi-di taak bowt weh hapm tu ahn wen ih mi ton Kristyan. Bot weh ih mi meen wen ih seh dat ih “baan bifoa di rait taim”? Wi ku andastan it eena moa dan wan way.

Paal gaahn chroo wahn tof sichuwayshan wen ih ton Kristyan. Wen Saal (hoo mi laytaraan chaynj ih naym tu Paal) mi-di goh da Damaskos fi persikyoot di Kristyanz, hihn neva di ekspek fi geh wahn vizhan a Jeezas. Needa hihn ner di Kristyanz weh ih mi-di plan fi persikyoot mi-di ekspek fi mek hihn ton Kristyan. Dis mi sopraiz dehn, jos laik how wahn baybi weh baan bifoa di rait taim wuda kohn bai sopraiz. Dis mi soh tof pan ahn dat ih eevn gaahn blain fi wahn lee wail.—Aks 9:1-9, 17-19.

Hihn mi ton Kristyan “di rang taim.” Di orijinal Greek werd weh chranslayt az “wahn baybi weh baan bifoa di rait taim” ku aalso meen “wahn baybi weh baan da di rang taim.” The Jerusalem Bible seh it laik dis: “Da laik if Ah mi baan wen nobadi ekspek it.” Bai di taim Paal mi ton Kristyan, Jeezas mi don gaahn bak da hevn. Di peepl weh Paal mi taak bowt erliya mi si Jeezas afta ih geh rezorek ahn bifoa ih gaahn bak da hevn, bot Paal neva geh di chaans fi si ahn.(1 Kor. 15:4-8) Wen Jeezas mi apyaa tu Paal hihn mi gi Paal da chaans, eevn doa ih mi luk laik “di rang taim.”

Hihn mi-di taak bowt ihself eena wahn hombl way. Sohn peepl weh stodi di langwij a di Baibl seh dat Paal mi-di kritisaiz ihself. If dat da weh Paal mi-di du, den hihn mi-di aksep dat hihn neva dizerv fi bee wahn apasl. In fak, hihn mi eevn seh: “Ai da di lees wan owta aala di apasl dehn. Ai noh eevn dizerv fi mek dehn kaal mi wahn apasl, bikaaz Ah mi persikyoot di kangrigayshan a Gaad. Da onli bikaaz a Gaad grayt kainis dat Ai da wahn apasl.”—1 Kor. 15:9, 10.

Soh ih luk laik Paal kuda mi-di taak bowt di way how Jeezas mi apyaa tu hihn aal af a sodn, er bowt how hihn neva ekspek fi ton Kristyan er dizerv fi si da amayzin vizhan. Wi noh noa egzakli weh Paal mi-di taak bowt, bot wi noa dat dis ekspeeryens mi preshos tu ahn. Dis mi kanvins Paal dat Jeezas mi geh rezorek bak tu laif. Dat da wai ih mi taak bowt dis ekspeeryens wahn lat wen ih mi preech bowt Jeezas rezorekshan.—Aks 22:6-11; 26:13-18.