LESN 49
How Wahn Hozban ahn Waif Ku Bee Hapi?
Peepl weh jos geh marid hoap dat dehn wahn aalwayz bee az hapi az di day dehn geh marid, an ih pasabl fi mek dat hapm. Servants a Jehoava weh marid fi wahn lang taim ahn weh di werk haad fi fala weh di Baibl seh bowt marij, noa dat dis da chroo.
1. Weh di Baibl tel wahn hozban fi du?
Jehoava gi di hozban di rispansabiliti fi bee di hed a ih famili. (Reed Ifeezhanz 5:23.) Soh hihn ekspek wahn hozban fi mek gud disizhanz fi ih famili. Di Baibl tel di hozban dehn: “Kantinyu lov unu waif.” (Ifeezhanz 5:25) Dat meenz dat wahn hozban weh lov ih waif wahn chreet shee eena wahn kain way, weda dehn deh hoam er fronta peepl. Hihn chrai kip ih waif sayf, hapi, ahn giv ahn weh shee need. (1 Timoti 5:8) Bot di moas impoatant ting da fi help shee geh kloasa tu Jehoava. (Machyu 4:4) Fi egzampl, hihn ku pray ahn reed di Baibl wid ih waif. Wen wahn hozban tek kyaa a ih waif eena wahn lovin way, hihn kip ih frenship wid Jehoava schrang.—Reed 1 Peeta 3:7.
2. Weh di Baibl tel wahn waif fi du?
Di Baibl seh dat wahn waif “fi ga lata rispek fi ih hozban.” (Ifeezhanz 5:33) Bot how shee ku du dat? Shee ku tink bowt di gud kwalitiz weh ih hozban gat ahn how hihn werk haad fi tek kayr a shee ahn dehn chiljren. Pahn tap a dat, shee shoa rispek wen ih sopoat ahn werk lang wid di disizhanz weh ih hozban mek, an eevn if ih hozban noh serv Jehoava, shee yooz kain werdz wen ih di taak tu ahn an wen ih taak tu adaz bowt ahn.
3. How wahn hozban ahn waif ku mek dehn marij schranga?
Wen di Baibl taak bowt wahn hozban ahn waif, ih seh: “Di too a dehn wahn bee wan persn.” (Machyu 19:5) Soh dehn hafu werk haad fi noh jrif weh fahn eech ada. Weh ku help dehn du dis, da fi aalwayz tek owt taim fi spen wid eech ada ahn taak tu wan anada bowt how dehn tink ahn feel. Ada dan Jehoava, dehn noh mek notn ner nobadi bee moa impoatant dan eech ada. Ahn dehn mek shoar dat dehn noh geh tu kloas tu nobadi els.
SAACH FI MOA
Fain owt wat Baibl prinsiplz ku help yu ga wahn schranga marij.
4. Unu hozban, lov ahn tek gud kyaa a yu waif
Di Baibl seh dat “wahn hozban fi lov ih waif jos laik how ih lov ih oan badi.” (Ifeezhanz 5:28, 29) Weh ih meen fi du dis? Play di VEEDYO, ahn den diskos di kweschan.
Eena weh wayz wahn hozban ku shoa dat ih lov ahn kyaa fi ih waif?
Reed Koloashanz 3:12, ahn den diskos dis kweschan:
How wahn hozban ku shoa dehnya sayhn kwalitiz eena ih marij?
5. Unu waif, lov ahn rispek yu hozban
Di Baibl inkorij wahn waif fi rispek ih hozban weda hihn di serv Jehoava er nat. Reed 1 Peeta 3:1, 2, ahn den diskos dehnya kweschan:
Fi shoar yu waahn yu hozban serv Jehoava if ih noh di du dat yet. Weh yoo tink wuda help hihn moa, fi aalwayz di preech tu ahn er fi bee wahn gud, kain, ahn rispekful waif? Wai yu wuda seh dat?
Wahn hozban an ih waif ku mek gud disizhanz tugeda, bot wahn waif mait noh aalwayz si tingz di way ih hozban seeʼt. Soh eena wahn kaam ahn rispekful way shee mait tel ahn weh ih tink, bot shee need fi memba dat Jehoava gi ih hozban di rispansabiliti fi disaid weh bes fi di famili. Soh shee du ih bes fi sopoat weh ih hozban disaid. Wen ih du dat, shee di help di hoal famili fi bee hapi. Reed 1 Peeta 3:3-5, ahn den diskos dis kweschan:
How Jehoava feel wen wahn waif rispek ih hozban?
6. Yoo ku werk chroo di prablemz eena yu marij
Sins no marij perfek, wahn hozban ahn waif hafu werk tugeda fi deel wid dehn prablemz. Play di VEEDYO, ahn den diskos di kweschan dehn.
How di veedyo shoa dat di hozban an ih waif neva az kloas tu eech ada agen?
Weh aal dehn mi du fi mek dehn marij geh schranga?
Reed 1 Korintyanz 10:24 ahn Koloashanz 3:13. Afta yu reed eech skripcha, diskos dis kweschan:
How wahn marij ku geh schranga wen yu fala weh dis skripcha seh?
Di Baibl tel wi fi aana wan anada. Wen wi du dis, wi chreet adaz eena wahn kain ahn rispekful way. Reed Roamanz 12:10, ahn den diskos dehnya kweschan:
Wahn hozban er waif shuda wayt fi mek di neks wan shoa dehn aana fos? Wai yu wuda seh dat?
WEH YU WUDA SEH IF SOHNBADI TEL YU: “Mee ahn mai hozban er waif noh kloas nohmoh.”
Weh yoo ku tel dehn fi mek dehn noa dat di Baibl ku help dehn?
WEH WI LAAN?
Wahn hozban ahn waif ku bee hapi if dehn lov ahn rispek eech ada, ahn fala Baibl prinsiplz.
Mek Wi Rivyoo:
Weh wahn hozban ku du fi mek ih famili bee hapi?
Weh wahn waif ku du fi mek ih famili bee hapi?
If yu marid, wat Baibl prinsiplz ku help yu marij geh schranga?
FAIN OWT MOA
Laan weh ku help yu ga wahn hapi famili laif.
Wach wahn myoozik veedyo weh shoa di blesinz yu wahn ga eena yu marij wen yu fala weh Gaad seh.
Si weh ih meen fi rispek di hozban az hed a di famili.
“Wai Wahn Waif fi Sopoat Ih Hozban az Hed a di Famili?” (Di Wachtowa, May 15, 2010)
Wahn hozban ahn waif mi geh divoas bikaaz a aala di prablemz dehn mi fays eena dehn marij. Wach weh mi help dehn fi kohn bak tugeda.