Shoa Lov
Di Prablem
Prejudis da noh sohnting weh yu ku geh rid a soh eezi. Jos laik how ih tek taim fi geh rid a wahn bad dizeez, saym way soh, ih tek taim fi geh rid a prejudis. Weh yu ku du fi geh rid a prejudis fahn owta yu haat?
How di Baibl Ku Help Wi fi Deel Wid Dis Prablem?
“Jres op unuself wid lov, kaaz lov bring peepl tugeda eena wahn perfek way.” —KOLOASHANZ 3:14.
Weh dat meen? Wen wi du kain tingz fi adaz, dat help wi fi geh kloasa tu wan anada. Di moa lov yu shoa fi adaz, di les prejudis yu wahn gat eena yu haat. Wen yu laan fi lov peepl moa, ih wahn help yu fi get oava eni negitiv feelinz weh yu gat tuwaadz dehn.
Weh Yu Ku Du?
Tink bowt spesifik wayz how yu ku shoa lov tuwaadz peepl weh yu ga negitiv feelinz fa. Yu noh haftu du wahn lata tingz. Chrai fi du wan er moa a dehnya sojeshanz:
Tu evri taim wi du sohnting weh lovin fi sombadi, wi wahn feel les prejudis eena wi haat
Shoa gud manaz tu peepl fahn da rays er kolcha. If yu geh di apachooniti, hoal di doa oapm fi dehn, er if yu deh pahn wahn bos, bee wilin fi giv op yu seet soh dat da persn ku sidong.
Chrai fi ga wahn kanvasayshan wid dehn, eevn if dehn noh taak yu langwij gud.
Ga payshens wid dehn, espeshali if dehn du sohnting weh yu noh andastan.
Shoa dat yu kyaa fi dehn wen dehn tel yu bowt dehn prablemz.