LESN 37
Weh di Baibl Seh Bowt Werk ahn Moni?
Yoo eva feel schres owt bikaaz yu di wori bowt werk er moni? Ih noh aalwayz eezi fi geh di tingz weh wi need ahn saym taim wership Jehoava di way how hihn waahn. Di Baibl ga sohn gud advais weh ku help wi.
1. Weh di Baibl seh bowt werk?
Gaad waahn wi injai wi werk. Di Baibl seh dat “notn beta dan fi wahn man . . . fain jai eena ih haat fi aala ih haad werk.” (Ecclesiastes 2:24) Jehoava werk haad. Ahn wen wi kapi fi hihn egzampl ahn werk haad tu, wi pleez hihn ahn wi feel gud bowt wiself.
Werk impoatant. Bot wi shuda neva mek ih bee moa impoatant dan wi wership tu Jehoava. (Jan 6:27) Hihn pramis dat wen wi put hihn fers, hihn wahn gi wi weh wi need fi liv.
2. Weh di Baibl seh bowt moni?
Eevn doa di Baibl tel wi dat “moni ku protek wi,” ih stil waan wi dat moni da noh di onli ting weh wi need fi bee hapi. (Ecclesiastes 7:12) Soh di Baibl inkorij wi noh fi lov moni bot fi “bee kantentid wid weh [wi] gat.” (Reed Heebrooz 13:5.) Wen wi satisfai wid weh wi gat, dat help wi fi stay hapi bikaaz wi noh aalwayz waahn moa. Wi noh baro moni if wi noh haftu. (Proverbs 22:7) Ahn wi noh ga di prablemz weh peepl ga wen dehn gyambl ahn goh afta tingz weh dehn tink wahn mek dehn geh rich faas.
3. How wi ku yooz wi moni fi help ada peepl?
Jehoava da wahn jenaros Gaad, ahn wi fala fi hihn egzampl wen wi “jenaros ahn wilin fi shayr.” (1 Timoti 6:18) Wi ku yooz wi moni fi help ada peepl wen wi sopoat di kangrigayshan ahn wen wi help dehn wan weh need it, espeshali wen dehn da wi bradaz ahn sistaz. Jehoava noh luk pahn humoch wi giv, insted hihn foakos pahn di reezn wai wi giv. Soh wen wi giv fahn wi haat, wee wahn bee hapi ahn wi wahn mek Jehoava hapi tu.—Reed Aks 20:35.
SAACH FI MOA
Si how wi benifit wen wi put werk eena ih prapa plays ahn wen wi satisfai wid weh wi gat.
4. Di way how yu werk ku aana Jehoava
Bikaaz wi ga wahn gud frenship wid Jehoava, wee si werk di saym way hihn seeʼt. Play di VEEDYO, ahn den diskos di kweschan dehn.
Di veedyo shoa wi how Jason mi ak da werk ahn how ih mi si ih jab. Weh yoo mi laik bowt den deh tingz?
Weh hihn mi du fi kip ih werk eena ih prapa plays?
Reed Koloashanz 3:23, 24, ahn den diskos dis kweschan:
Wai ih impoatant fi mek wi werk haad?
Werk impoatant. Bot wi noh fi mek ih bee moa impoatant dan wi wership tu Jehoava
5. Wi benifit wen wi satisfai wid weh wi gat
Wahn lata peepl chrai geh az moch moni az dehn kud. Bot di Baibl inkorij wi fi du sohnting difrent. Reed 1 Timoti 6:6-8, ahn den diskos dis kweschan:
Weh di Baibl inkorij wi fi du?
Eevn if wi onli ga wahn lee bit, wi ku bee hapi. Play di VEEDYO, ahn den diskos di kweschan.
Weh mek dehnya famili hapi eevn doa dehn onli ga lee bit a moni?
Bot wat if yu ga wahn lat ahn stil waahn moa? Jeezas mi yooz wahn iloschrayshan fi shoa wai dis daynjaros. Reed Look 12:15-21, ahn den diskos dis kweschan:
Weh yoo laan fahn Jeezas iloschrayshan?—Si vers 15.
Reed ahn kompyaa Proverbs 10:22 ahn 1 Timoti 6:10. Den diskos dehnya kweschan:
Weh yoo tink moa impoatant? Fi ga wahn frenship wid Jehoava er fi ga wahn lata moni? Wai yu wuda seh dat?
Weh kaina prablemz kom op if wi aalwayz waahn moa moni?
6. Jehoava wahn gi wi weh wi need
Wen wi ga prablemz wid werk er wi noh ga nof moni, ih ku help wi fi si if wi reeli chros eena Jehoava. Play di VEEDYO fi si weh wi ku du wen wi ga dehnya kaina prablemz, ahn den diskos di kweschan dehn.
Weh prablemz di brada eena di veedyo mi-di goh chroo?
Weh hihn mi du fi handl dehnya prablemz eena di rait way?
Reed Machyu 6:25-34, ahn den diskos dis kweschan:
Weh Jehoava pramis fi du fi enibadi weh put hihn fers eena dehn laif?
WEH YU WUDA SEH IF SOHNBADI TEL YU: “Ai haftu werk haad fi sopoat mi famili, soh Ah kyaahn goh da aala di meetin dehn.”
Weh skripcha kanvins yoo dat di bes disizhan yu ku mek da fi aalwayz put yu wership tu Jehoava fers?
WEH WI LAAN?
Werk ahn moni impoatant, bot wi noh fi mek ih dischrak wi fahn serv Jehoava.
Mek Wi Rivyoo:
Weh ku help yu fi kip yu werk eena ih prapa plays?
How yu benifit if yu satisfai wid weh yu gat?
How yu ku shoa dat yu chros Jehoava pramis wen ih seh ih wahn giv ih peepl weh dehn need?
FAIN OWT MOA
Fain owt if di Baibl seh dat moni da sohnting bad.
Laan how wi ku yooz wi moni fi pleez Gaad.
Yu tink ih rang fi gyambl?
Si weh mi help wahn man fi chaynj ih laif ahn stap gyambl ahn teef.