Uganu buiti le labürüdübei Matéu
24 Dan le áfurideina liña lubéi Hesusu ténpulurugugiñe, aba hayabin lani disipulugu ínchaha tuagun ténpulu lun harufudunu lun. 2 Ábati lariñagun Hesusu houn: “Ariha humuti san sun le? Gayaraati nachoururuni hun lagululudúaba lan. Meredebei dübü ligibuagu dübü”.
3 Sunti ñun liña lan Hesusu lábuguarügü luagu wübü Oliwu, aba hayabin lani disipulugu álügüdei: “Ídaba san lasusereda sun le, kaba liseinin abunheinya lan wama ani málühali lan sun le asuseredubei ubouagu agumucha?”.
4 Ábati lóunabuniña Hesusu: “Duari humá luéi heyeedún! 5 Ladüga, gíbebaña ayusuruti niri, ariñageina ‘Au Krístubei’, ábameti heyeedun saragu gürigia. 6 Haganbuba luagu wuribu dandu yarafa hun kei dise huéi. Pero, manufudeda humá, ladüga lau sun mosu lan lasuseredun sun burí katei le, mámagilime lagumuchagüle ubóu.
7 ”Ladüga lageindaguba aban néchani luma amu, awuribuha ligíame aban arúeihani luma amu, ñeinbei giñe ilamaü luma burí hárabaganali lidan ámuñegueinarügü fulasu. 8 Sun burí katei le, latatiharügübei aban dan le ídanbei gíbebei lan lénrengunga.*
9 ”Héibaahouba, afarúa huguyame hilagubei ani iyereegubadün houn sun néchanigu ladüga nánigu humá. 10 Ani gíbebaña eferidiruti hafiñen, lagarabaaguba aban gürigia luagun aban, ani ábame heyereegudun hámagua. 11 Hachülaaguba saragu profetagu yéetiña eyeeda saragu gürigia 12 ani, éibume aganwoundeina lan wuribani,* ábame giñe adilireina lan hínsiñehabu hiibe-agei gürigia. 13 Ánheinti le awanduti darí lumoun lagumuhóun, ligíaba esefura. 14 Ani lapurichihóuba uganu buiti le luáguti Larúeihan Bungiu lidan sun Ubóu lun haganbuni sun néchanigu, ligíaalimeti lagumuchun ubóu.
15 ”Danme le harihini katei iyereehabúti le gagünrinchaguadibei rara lidan aban fulasu sánduti, le meha uágubei layanuha profeta Danieli, (gunfurandalá le aliihati),* 16 hame Hudeabaña oura ligía, lunti hanurahan áraabun. 17 Hámeti tábulugubaña haban, mararira hamá hábiñoun abudei hálagu, 18 leti licharirugubei, magiribudalá lúbiñoun áluahoun gamisa to ladaürüboun tigibuagun ligounun. 19 Fugiabume würiña ha dageinabaña o ha átagüdahabaña lídounme dan ligía! 20 Gabügürügualá hafurieidun lun Bungiu lun mama lan lidan lidaani lidiliga ni lidan luéyuri emeraaguni latokara hun hanurahan. 21 Ladüga ñeinbei saragu asufuriruni.* Lúmagiñe lagumeserun ubóu, úagili aban asufuriruni ítarati ani úayabei amu libe. 22 Le linarün aban katei, ánheinme madüraawagun dan ligía, úabei ni aban esefuruti; lau sun lira, ladüraawaguba lun gayara lan hesefurun ha anuadirúaañabaña.
23 ”Ligíati, anhein ariñaga somu gürigia hun ‘Anihán Kristu ya!’ o ‘Aningitán yágüta!’, mafiñera humá lun. 24 Ladüga hachülaaguba profetagu yéetiña hama gürigia ha ariñagubaña hawougua Kristu lan hagía, ani hadügüba óunwenbu burí milaguru luma katei hanarimeguti lun heyeeduniña gürigia, ani háluguba giñe heyeeduniña íbini ha anuadirúaañabaña. 25 Nariñaguñein sun burí katei le hun lubaragiñe lasuseredun. 26 Ligíati, ánhaña ariñaga hun ‘Anihein lidan fulasu mageirawati!’, midin humá ñein; ánhaña ariñaga hun ‘Anihein sóunburugu!’, mafiñera huméi. 27 Ladüga ítara kei gumese lan labirihaniga luéigiñe oubaü le ñéingiñe lubéi laboucha Weyu darí lachülürün lidoun oubaü le ñeinhin lubéi lálüda, ítara luba giñe dánmeya le huma nan, au le Liráü Wügüri.* 28 Ladüga ñein lumuti lúgubu hilaali, ñeinba hóundara ágila.
29 ”Lárigiñeme asufuriruni le lunbei lawinwandúniwa lídounme dan ligía, laburigaduba Weyu luma Hati, héiguaduba burí waruguma, hingigua ligíame ubafu burí le siélubei. 30 Ábameti larihín liseinin Liráü Wügüri sielu, ladügübati lira lun háfarahani gürigia* haniguagu lau igarigu, ábame harihini Liráü Wügüri ararireina tidan dúeri siélugiñe lau ubafu luma óunwenbu uéiriguni. 31 Ábameti lóunahaniña lani ánheligu lau aban óunwenbu tamuri fidu óundaraña anuadirúaaña ha lídanbaña gádürügubei larigei Ubóu, lúmagiñe aban oubaü sielu darí le aban.
32 ”Furendei humá lídangiñe hénpulu luáguti tídibu igu le. Dan le latatirun tilimun áhücha, bou ligía tubana, subudi humaali luagu yarafaali lan lidaani lubachouga. 33 Ligiamémeba asusereda lidan hikesin, danme le harihini sun burí katei le, subudi huméi yarafaali lan Liráü Wügüri ani aniheinhali lan bénabu. 34 Gayaraati nachoururuni hun móunwegunbaña lan sun gürigia ha lánina dan le darime harihini lasuseredun sun burí katei le. 35 Lásügürüba sielu luma Ubóu, ánheinti nererun, meredebei magunfulirunga.
36 ”Úati asubudirúti weyu luma oura, ni ánheligu ha siélubaña ni Liráü Bungiu; Úguchilirügüñein asubudirei. 37 Ladüga, ítara kei meha lidan lidaani Noé, ítara luba giñe dánmeya le huma nan, au le Liráü Wügüri. 38 Ladüga lidan meha dan le lubaragiñebei ladibirun ubóu, heteniruña meha gürigia eiga, ata, wügüriña amarieida, würiña ichaahóua lun maríei... darí weyu le lebelurunbei Noé tidoun arka; 39 madügüntiña gasu darí ladagarun Guran ani aba hañaradagun súngubei. Ítara luba giñe dánmeya le huma nan, au le Liráü Wügüri. 40 Ñéinbaña bián wügüriña hacharirugu: lanügǘba aban, igirúame le aban. 41 Ñéinbaña bián würiña amuliiha: tanügǘba aban, igirúame to aban. 42 Ligía lubeiti, agagudúañu humá súnwandan ladüga ibidiñeti hun kaba lan weyu liabin Habureme.
43 ”Gabaroun huméi le: lun hamuga subudi lani tabureme aban muna kaba lan oura lebelura híweruti lúbiñoun áriebu, lerederuña hamuga agagudúañu lun mebelurun lan híweruti ligía lúbiñoun. 44 Ligía lunti lubéi giñe agagudúañu humá ladüga liábinba Liráü Wügüri lidan oura le magurabun humuti.
45 ”Katei san musu úaraguati ani gunfurandati* le líchugubei labureme lun larihin hau ha eseriwidubaña lúbiñe, lun líchuguni heigin houn lidan lidaani? 46 Maame lugundan musu ligía danme le liabin labureme ani ladarireime agunfulira lau lidasin! 47 Gayaraati nachoururuni hun líchugubei lan lun larihin lau sun lúmati.
48 ”Anhein hamugati wuriba lubéi ligaburi musu ligía ani aba lariñagun lúnguarügü ‘Darasaguaali nabureme’ 49 ani aba lagumeserun agayuaha hawagu lupanáagu, eiga luma átagua hama bacharuatiña, 50 liábinba labureme musu ligía lidan aban weyu luma oura le magurabun lumuti, 51 wéiribei labeichuni, óunahaleime hadoun ha biánguabaña igibu. Ñeinba layahuaha, akünrinha ligíame lari.