Uganu buiti le labürüdübei Matéu
10 Ábati lóundaraguniña Hesusu dúusugubei lani disipulugu, ru ligía ubafu houn lun hasagahan sífirigu wuribatiña hawéi gürigia luma lun hareidaguagüdün sun luwuyeri sandi luma danimaü.
2 Anihán hiri dúusugubei lani apostolugu: Simón (le giñe unbei hagúara Féduru) lúmati Andresi le lamulen; Santiagu le liráü Sebedéu lúmati Huan le lamulen; 3 Felipe luma Bartolomé; Tomasi luma Matéu le aguburahabei liseinsuna gumadi; Santiagu le liráü Alféu, luma Tadéu; 4 Simón le gúndaabei, lúmati Húdasi Iskarióte (le agarabaagubei luagun Hesusu dan lárigiñe).
5 Ábati líchuguni Hesusu adundehani le houn dúusugubei dan le lóunahanbaliña apurichiha: “Márügüda humá luéigiñe üma le anügübei lidoun amu burí néchani, mebelu huguyame lidoun ni aban lídangiñe hageira samariana. 6 Lubaragiñe lira, abasiiha humá áluahaña ísraelina ha ítarabaña kei mudún ha féridihañabaña. 7 Lidan hapurichihan, ariñaga humá: ‘Yarafaali Arúeihani le siélubei’. 8 Areidaguagüda humá sánditiña, saragüda humá hilaaña, areidaguagüda humá gürigia láutiña lépüra, asagaha huguyame sífirigu wuribatiña hawéi gürigia. Mafayeihantün lun gayara lan hadügüni sun burí katei le, maguburaha humá giñe. 9 Manüga humá giñe golu, pülata, ni kóbüre lidan búsedu le luágubei hubelitin, 10 manüga humá giñe aban sagü lau burí katei le hemegeirubei lidan huéiyasun, manügün huguyame amu badun ni amu daüguaü ni feru geidi tanwoun to huáguboun; ladüga garichati nadagimeinti lun lichugún leigin.
11 ”Danme le hachülürün lidoun somu uburugu o aüdü, áluaha humá somu gürigia le busenti leresibirunün lau sun uganu le hanügübei, ábameti herederun* lúbiñe gürigia ligía darime háfuridun lídangiñe uburugu o aüdü ligía. 12 Danme le hebelurun tidoun aban muna, busugua humá houn tílana muna tuguya. 13 Anhein gadüna habalin tílana muna darangilaü le hayumahabei houn, suserelá ítara; ánheinti madüna habalin, meferidira huméi hidarangilan. 14 Ánhaña maha gürigia heresibirunün tidan somu muna o lidan somu uburugu, maha hagía haganbuni uganu le hanügübei houn, furú huméi kaliki luéigiñe hugudi danme le háfuridun ñéingiñe. 15 Gayaraati nachoururuni hun, ménrenguntimaabei lan houn lílana Sodoma luma Gomora lun hawanduni luéyuri aguseruni, sügǘ hau lílana uburugu ligía.
16 ”Nóunahañadüntia kei mudún haganagua ounli áraabuna. Ligíati duari humá ítara kei hewe, madurun huguyame ítara kei unhun. 17 Góunigigua humá hungua hawéi gürigia, lugundun hederegerubadün houn lúrudugu ani habeichagubadün tidan burí luban hadamuridagun huríu. 18 Hanügübadün hagibugiñoun gumadimatiña luma hagibugiñoun urúeigu nuéigiñe. Lahuuduba lira lun haganbuni uganu, dandu hagía kei lílana amu burí néchani. 19 Íbini ítara, danme le hederegerúniwa houn gumadimatiña, máhüchüra humá luagu kaba lan hariñaga o ida luba lan hariñaguni, lugundun danme le lachülürün dan ligía, larufudúba hun kaba lan hariñaga. 20 Ladüga mámarügübei huguya ayanuha: ladimurehaba giñe lani Húguchi sífiri sandu huéigiñe. 21 Lanwoun lira, lederegerubei gürigia líbiri guánarügü lun lafarúniwa hilagubei, deregeléime úguchili liráü, hagarabaaguba isaanigu hawagun hagübürigu ani hadügüba lun hafarúniwa hilagubei. 22 Iyereegubadün houn sun gürigia ladüga nánigu humá. Ánheinti le awanduti darí lumoun lagumuhóun, ligíaba esefura. 23 Danme le heibaahóuniwa lidan aban uburugu, anuraha humá lidoun amu; ladüga gayaraati nachoururuni hun másubei lan hegeyedaguni sun uburugu le Ísraelibei lubaragiñe lachülürün Liráü Wügüri.*
24 ”Inebewatimaati máisturu luéi aturiahati, inebewatimaati giñe iyubudiri luéi idamuni. 25 Lunti lubeiti lagurabun aturiahati louserúba lan kei louserún lumaisturun, lunti giñe lagurabun idamuni louserúba lan kei louserún liyubudiri.* Anhein wa habéi gürigia lun tabureme aban muna Belsebú,* gúbumeti houn tílana luban! 26 Ligíati, manufudeda humá hawéi, ladüga úati ni aban katei aramudaguati lun masubudirúabei lan. 27 Le nariñagubei hun lidan luburiga, ariñaga huméi lidan larugounga; le nagülülühabei harigeirugun, apurichiha huméi lúmagiñe tábulugugiñe burí muna. 28 Ani manufudeda humá hawéi ha gayaraabei háfarunün hilagubei ani siñati hagumuchun lau hibagari. Lueilá le gabafubei lun lagumuchun dandu lau húgubu kei lau hibagari lidan Heena* hanufudeda. 29 Lau sun alugurúa hamá bián harahüñü dunuru luagu aban gáwanaü,* úatu ni aban hádangiñe éiguadutu múarugun sin líchugun Húguchi le siélubei fe. 30 Ánheinti lidan hikesin, abahüdǘwati kada aban lídangiñe hídiburi. 31 Manufudeda humá lubeiti, lugundun gebegitimaatün sügǘ hau saragu dunuru.
32 ”Le manufudeti larufudagun lungua hagibugiñe amu keisi nani disipulu, másuhanbadina giñe lun narufuduni keisi nani disipulu ligibugiñe Núguchi le siélubei. 33 Leti nibusigariti nau hagibugiñe gürigia, nibusigaribadina giñe lau ligibugiñe Núguchi le siélubei. 34 Masaminara humá ladügüña lan niabin lun ñein lan darangilaü ubouagu; mama ladügüña niabin lun ñein lan darangilaü, ladügüña lun ñein lan wuribu. 35 Ladügüña niabin lun ñein lan fánreinguaü. Lagaganiraguba isaani luma lúguchi, gáganigua tuguyame isaani tuma túguchu, ídiñu tuma tágürü. 36 Tílana guánarügüba luban gürigia agaganiragúa luma. 37 Le hínsiñehabutimaati lun lisaani o tun lisaani sügǘ lau nínsiñe lun, madünati lun nani lan disipulu. 38 Ani le máhati lárügüdüni luágaburi* keisi aban hádangiñe nánigu, madünati giñe lun nani lan disipulu. 39 Le áfaaguti lun lesefuruni libagari leferidirubei, ánheinti le eferidiruti libagari ladüga nani lan disipulu, lesefurubei.
40 ”Le ánhati leresibirunün, resibi lumutina giñe, ani le eresibirutina, leresibiruñein giñe le óunahabalina. 41 Le eresibiruti aban profeta ladüga profeta lan, leresibirubei abinirúni le lunbei leresibiruni aban profeta, ani le eresibiruti aban gürigia le áfaaguti súnwandan lun ladügüni le buídubei, leresibirubei giñe abiniruni le lunbei leresibiruni gürigia ligía. 42 Ninarün hau furumiñeguarügü lan le íchuguti duna lun aban hádangiñe nánigu, hátima ǘnabugubaña, leresibiruba abiniruni”.