Uganu buiti le labürüdübei Matéu
20 ”Ladüga ítara liña Arúeihani le siélubei kei labureme aban beibei-agei le furigiabei áluaha nadagimeintiña. 2 Lárigiñebei lariñagun houn nadagimeintiña lafayeirubaña lan aban denariu* luagu weyu, aba lóunahaniña nadagimein lidan lichari. 3 Kéiburi ladáün nefu binaafin, ábaya láfuridun ani aba larihin fiu gürigia rara tubadu mágidu madügünga ni kata. 4 Ábati lariñagun houn: ‘Heiba giñe nadagimein lidan nichari, nafayeirubadün keisi lubudubu’. 5 Ábati houdin. Furiti giñe adügei ligiaméme amidirugu, kéiburi ladáün duusu luma yarafa lun ladáün ǘrüwa rábounweyu. 6 Lagumuhóun, aba láfuridun kéiburi ladáün seingü rábounweyu ani aba larihin amu gürigia ñein ráramañahadügü, ábati lálügüdüniña: ‘Ka san uagu herederunbei sun weyu ya mawadigimaridunga?’. 7 Aba hóunabuni: ‘Ladüga úagili íchuguti wadagimanu woun’. Aba lariñagun houn: ‘Heiba giñe nadagimein lidan nichari’.
8 ”Dan le laguñeedunbei, aba lariñagun labureme ichari lun le arihibei hau nadagimeintiña: ‘Waba houn nadagimeintiña fayei báamugaña. Bagumeserame hámagiñe ha achülürübaña nadagimein agumuhóuni, bagumuchame hama ha achülürübaña nadagimein furumiñe’. 9 Fáyeiwati aban denariu* lun kada aban hádangiñe nadagimeintiña ha achülürübaña nadagimein ladáün seingü rábounweyu. 10 Ligía yebe hasaminarunbei ha achülürübaña nadagimein furumiñe gíbetimaabei lan fáyeiti heresibirun, lau sun lira, ábanrügüñein giñe denariu* ichugúti houn. 11 Lárigiñebei hafayeirúniwa, aba hagumeserun ekehara luagu labureme ichari. 12 Ábati hariñagun lun: ‘Arihabá! Fayei bumutiña ha nadagimeinbaña ábanrügü oura kei bafayeiruniwa, wagía le nadagimeinbei sun weyu, awandei lara Weyu’. 13 Ábati lariñagun labureme ichari lun aban hádangiñe: ‘Numada wei, kagia wuribati nadügübei bun? Ma ánhatibu bawadigimaridun nun dan le nariñagunbei bun ábanbei lan denariu* nafayeirunibu? 14 Ragübei lubeiti le yuubei bun ani beiba. Le nafayeirubei bun, ligiaméme nabusenrubei nafayeirun lun le ñǘbuinbei nadagimein agumuhóuni. 15 Siñati funagia nadügüni le nabusenrun lau númati? Odi gimugatibu ladüga gíchigadi nan?’. 16 Ítara liña lubeiti, ha furumiñebaña, herederuba agumuhóuni, hati agumuhóuni, hagíaañame furumiñe”.
17 Lídanti amudeireina lan Hesusu úara hama dúusugubei lani disipulugu uburugun Herusalén, aba ladiñurun hau ani aba lariñagun houn: 18 “Nariñaga aban katei hun, wamudeiruña Herusaléun le ñeinba lubéi nederegerúa, au le Liráü Wügüri,* háhaburugun hábutigu fádirigu luma háhaburugun arufudahatiña Lilurudun Moisesi. Ábame nasiadirúniwa lun nounwen 19 ani ábame hederegerunina háhaburugun ha mámabaña huríu, hadügüba bula nau, habeichubadina, dagua hamaname luagu wagabu* darí nounwen; lídanmeti lǘrüwan weyu, ábame lásaaragüdünina Bungiu lídangiñe óunweni”.
20 Ábati tiabin háguchu lirahüñü Sebedéu, hau bián tisaanigu, abuluchagua ligibugiñe Hesusu lun tamuriahan aban katei luma. 21 Aba lálügüdünu: “Ka babusenrubei?”. Aba tóunabuni: “Ruba gumadi lun hañuurun bián nisaanigu aban luéigiñe bóunwenren, le aban luéigiñe bubaünan lidan Barúeihan”. 22 Aba lariñagun Hesusu houn: “Ibidiñeti hun ka lan hamuriahabei. Gayaraabei funagia hatun lídangiñe uniñein le lunbei nátaali lan?”. Aba hariñagun lun: “Anha, gayaraati”. 23 Aba lariñagun houn: “Anha, gayaraabei hatun lídangiñe uniñein le lunbei nátuni, lau sun lira, mama nun yu lan nariñaguni kaba lan añuura luéigiñe nubaünan luma luéigiñe nóunwenren. Ubaraü burí le, hounbei ha ubaabaña laranserei Núguchi”.
24 Dan le híchugunbei ha híbiri diisi disipulugu fe luagu le asuseredubei, aba hasafaragun hama bián gamulenuguátiña ha. 25 Aba lóundaraguniña Hesusu súngubei hagía ani aba lariñagun houn: “Subuditi hun ha lan agumadihabaña hadan néchanigu gabafubaña hawagu lílana hageira ani wügüriña lan ha wéirigubaña agumadihabaña hawagu ha híbiri gürigia. 26 Moun lumuti lasuseredun katei le haganagua. Lubaragiñe lira, le busenbei lun wéirigu lan haganagua, lunti leseriwidun houn ha híbiri, 27 ani le busenti lun ligía lan furumiñe, mosu hamusunbei lan ha híbiri. 28 Ligía nadügübei, au le Liráü Wügüri, mama niábiña lun neseriwidúniwa, niábiña lun neseriwidun houn amu luma lun níchuguni nibagari lebegime hasalbarun saragu”.
29 Dan le áfurideina lubéi Hesusu hama lani disipulugu Herikógiñe, aba houdin saragu gürigia lárigi. 30 Ñéinñanuti bián wügüriña marihintiña ñun lubadu üma, aba haganbun aningirán lan Hesusu ásügüreina, ábati hagúarahan: “Nabureme, Ladügawagun Dawidi, gudemehabubá woun!”. 31 Ábati hadeinhan gürigia houn marihintiña hagía lun hámanichun. Ligíatima hagúarahan: “Nabureme, Ladügawagun Dawidi, gudemehabubá woun!”. 32 Ábati lararamagun Hesusu, aba láwarun houn ani aba lálügüdüniña: “Ka habusenrunbei lun nadügüni huagu?”. 33 Ábati hóunabuni: “Nabureme, adügabá lunya gayara lan warihin”. 34 Aba hagudemedagun lun Hesusu, aba laguurun luagu hagu. Ouraméme ligía, aba harihin, ábati hafalaruni.