Uganu buiti le labürüdübei Matéu

13 Weyu ligía, aba láfuridun Hesusu múnadagiñe lun lidin añuura béyabu. 2 Keiti híbebei gürigia ha ñǘdünbaña áluahei, aba ládinun tidoun aban ugunei ani aba lañuurun tidan sun añaha lan gürigia hagía rara laru barana. 3 Aba layusurun hénpulu lun larufudahan saragu katei houn. Ábati lariñagun: “Aganba humana! Ñǘdünti aban wügüri ábunagua ilaü. 4 Danti le aniha lan ábunagua, dagati lídangiñe ilaü le lachüühabei larun üma ani aba hayabin dunuru, aba héigini ilaü ligía. 5 Le líbiri, aba léiguadun labadinaguóun dübü, le ñein lubéi lougua lan múa, keiti hañali lubéi múa, fureseti labouchun. 6 Danti le lásüdünbei Weyu, aba lásaürün nadü ladüga lougua lan lílagüle. 7 Le líbiri, aba léiguadun labadinaguóun hiiyu. Dan le laweinamudunbei hiiyu, aba lañaradaguagüdüni nadü. 8 Le líbiri, aba léiguadun lidoun múa buiti ani aba lagindun: Anihein lídangiñe, ruti san wéiyaasu lanwoun, le líbiri, ruti ǘrüwa-wein, ánheinti le líbiri, darandi. 9 Sun le garigeiruguti, aganbalá”.

10 Ábati hayarafadun lani Hesusu disipulugu lun ani aba hálügüdüni: “Ka uagu lau lubéi hénpulu barufudaha houn gürigia?”. 11 Ábati lariñagun houn: “Huguya abinirúbei lau chansi lun gunfuranda humani katei burí aramudaguati le luáguti Arúeihani le siélubei, ánheinti houn gürigia ha, michugúnti chansi ligía. 12 Lugundun le gámabei, lichugúba lanwoun lúmati ani ábatimaame lagibedagun lúmati; ánheinti le úabei ni kata luma, íbini le lúmabei, lagidarúba luéi. 13 Ligía nayusurunbei hénpulu lidan nayanuhan houn gürigia ha, ladüga lau sun ariha hamá, úati gunfuranda hamani le harihibei, aganba hagía ani úati gunfuranda hamani le haganbubei. Úati gunfuranda hamá ni kata. 14 Hawagu lagunfulira dimurei le meha lariñagubei profeta Isaíasi: ‘Lau sun haganbuba lan, ariha hagía, úabei gunfuranda hamá. 15 Dereeru hanigi gürigia ha, deré ligía haganbun. Darú hamaali hagu luma harigei, ligíati marihin habéi, maganbun hagía. Keiti le ua lubéi gunfuranda hamá, mánhingichun tumutiña hanigi lun hagiribudun lun Bungiu lun nareidaguagüdüniña’.

16 ”Ánheinti huguya, gúndaatün ladüga ariha lan hagu, aganba harigei. 17 Lugundun gayaraati nachoururuni hun gibe hamá meha profetagu hama gürigia buítiña ayumahatiña harihini katei burí le harihibei guentó luma lun haganbuni katei burí le haganbubei guentó ani mibihin hamuti.

18 ”Ligíati, aganba huméi le lílabei hénpulu luáguti ábunaguti ilaü. 19 Dan le laganbuni aban gürigia uganu luáguti Larúeihan Bungiu ani úati gunfuranda lani, aba liabin Mafia lun láhuluni ilaü le abunúbei tidan lanigi gürigia ligía. Anihán lílabei ilaü le abunúbei laru üma. 20 Ílaüti le abunúbei labadinagua dübü, hagía hawuyeri gürigia ha aganbubalin uganu, anha hagía lun lau lóufudagun. 21 Keiti le málagüle lubéi, luágurügüñein fiu dan hawansera. Ladüga dan le hadunragun luma turobuli o eibaahóuni ladüga gaganbadi hamá lun uganu buiti, aba heferidiruni hafiñen. 22 Ilaü le abunúbei labadinagua hiiyu, hagía hawuyeri gürigia ha aganbubalin uganu buiti ani mawanseruntiña lidan heseriwidun lun Bungiu ladüga weiri lan háhüchürün* luagu katei burí le lánina ibagari, ígiraguagüda hagía houngua lun leyeeduniña irisini. 23 Ánheinti ilaü le abunúbei lidan múa buiti, hagía hawuyeri gürigia ha awanserubaña ladüga gunfuranda hamani uganu buiti le haganbubei. Anati gürigia ha, ítara haña kei ilaü le abouchubei darí lun lagindun san wéiyaasu; luma le agindubei ǘrüwa-wein wéiyaasu luma darandi”.

24 Ábaya líchuguni hénpulu le houn: “Ítara liña Arúeihani le siélubei kei aban wügüri le ábunubei ilaü buiti licharirugu. 25 Danti le harumuguña lan gürigia, aba liabin lágani wügüri ligía ábuna híduru wuribati labadinagua türigu ani aba lidin. 26 Danti le lagumeserunbei türigu egeleweha, aba giñe láfuachun híduru wuribati. 27 Ábati hayabin lumusuniña tabureme muna ariñaga lun: ‘Nabureme, ma san ilaü buiti bábunubei bicharirugu? Kati uagu anihán lubéi híduru wuribati laganagua?’. 28 Aba lariñagun houn: ‘Aban ágani ábunubei híduru wuribati ñein’. Ábati hariñagun lumusuniña lun: ‘Busentibu lun woudin áhulahei híduru wuribati ñéingiñe?’. 29 Ábati lóunabuniña: ‘Uá, lueime giñe háhulahani türigu úara luma híduru wuribati. 30 Ígira humá lun laweinamudun úara, lídanmeti lidaani alubahani, ábame nariñagun houn alubahatiña lun háhulahani híduru wuribati furumiñe, güragua hameime lun háguduni, ítarati, gayaraahalime hátüühani türigu lun hareiduni lidan lagei’”.

31 Ábaya giñe líchuguni hénpulu le houn: “Ítara liña Arúeihani le siélubei kei lila mostasa le lábunubei aban wügüri licharirugu. 32 Ilaü le, ligíatima ñǘraütimaabei lídangiñe sun ilaü, lau sun lira, dan le laweiridun, aba ligíaali lan nadü wéiritima lidan ichari ani aba houdin dunuru áluaha habara luagu lilimun”.

33 Ayanuhayati houn luagu ábanya hénpulu: “Ítara liña Arúeihani le siélubei kei lébini le tíchugubei aban würi lidoun ǘrüwa táhabuchagun fulúaru. Ábati teresirun súngubei”.

34 Sun le larufudahabei Hesusu houn gürigia, arufudaha lumuti lau hénpulu. Le linarün aban katei, marufudahanti meha ni kata houn mayusurunga hénpulu. 35 Ítara liña lagunfulirun le meha ariñawagúbei lau lídehan profeta le ariñagubei: “Nadaarubei niyuma lun narufudahan lau hénpulu; nasubudiragüdübei le meha aramudañubei lúmagiñe furumiñeti dan”.

36 Lárigiñebei lóunahaniña Hesusu gürigia hábiñoun, aba lebelurun múnadoun. Ábati houdin lani disipulugu ariñaga lun: “Afuranguagüdabei woun ka lan lílabei hénpulu luáguti híduru wuribati le abunúbei lidan ichari”. 37 Aba lóunabuniña: “Liráü Wügüri,* ligía ábunagubei ilaü buiti. 38 Ubóu, icharibei. Ilaü buiti, hagía ha lúnbaña hebelurun lidoun Larúeihan Bungiu. Ha lánigubaña Mafia, hagía hídurubei wuribati. 39 Mafia, ligía ágani le ábunubalin híduru wuribati ligía. Lagumuchagüle katei burí le asuseredubei ubouagu, lidaanibei alubahani ani ánheligu lúnbaña halubahan. 40 Ítara kei hulawa lan híduru wuribati lun lagudún, ítara luba giñe lasuseredun lidan lagumuchagüle katei burí le asuseredubei ubouagu. 41 Lóunahabaña Liráü Wügüri lani ánheligu asagarei, lídangiñe Larúeihan Bungiu, sun le adügübei lun hafigouhan gürigia hama sun ha magunfulirunbaña lau lúrudu, 42 ábameti hachüürüniña lidoun régigi durunguti le ñeinba lubéi hayahuaha, akünrinha ligíame hari. 43 Lídanme dan ligía, ítara luba hámirihan gürigia ha richaguabaña lidan Larúeihan Bungiu le Háguchi kei lámirihan Weyu. Sun le garigeiruguti, aganbalá.

44 ”Ítara liña Arúeihani le siélubei kei aban irisini le ladarirubei aban wügüri aramudañu lidan aban fulasu. Ábaya laramuduni wügüri ligía irisini ligía, leti lueirin lugundan, aba lidin alugurei sun lúmati lun lagañeihani fulasu ligía.

45 ”Ítara liña giñe Arúeihani le siélubei kei aban bogoneru le ñǘdünbei áluaha pérüla fínuti. 46 Dan le ladarirun aban le wéiriti lebegi, aba lidin alugurei sun lúmati lun lagañeihani pérüla ligía.

47 ”Ítara liña giñe Arúeihani le siélubei kei aban seni to achüürǘboun baranahoun, ani aba tañugun sun hawuyeri úduraü. 48 Danti le tabuinchun seni, aba hadurugudunu larun beya, ábati hañuurun lun hanúadahaniña úduraü. Ha buídubaña, aba híchaahaniña lidoun aban ágeidinaü, ánhañati ha meseriwínbaña, aba hachagaruniña. 49 Ligíaba asusereda lídanme lagumuchagüle katei burí le asuseredubei ubouagu. Hayabinba ánheligu afanreinraguaña gürigia ha wuribabaña hawéi ha buídubaña. 50 Ábameti hachüürüniña gürigia ha wuribabaña lidoun régigi durunguti, le ñeinba lubéi hayahuaha, akünrinha ligíame hari.

51 ”Gunfuranda humuti san lila sun le nafuranguagüdübei hun?”. Aba hariñagun lun: “Anha, gunfuranda wamuti”. 52 Ábati lariñagun houn: “Anhein ítara liña lubéi, nariñaga aban katei hun: Sun máisturu le ibihaalibei arufudahani luáguti Arúeihani le siélubei, ítara liña kei tabureme aban muna, le asagahabei katei iseri luma binadu lídangiñe katei burí gebegiti le lúmabei”.

53 Lárigiñebei layanuhan Hesusu luagu hénpulu burí le, aba lidin ñéingiñe. 54 Dan le lachülürünbei lageiroun, aba lidin arufudaha tidan luban hadamuridagun huríu to ñeinboun, leti tueirin hanigi gürigia lau ligaburi larufudahan, ábaha hariñagun: “Halíagiñe san libihei wügüri le lichú aau le luma ubafu lun ladaahan milaguru? 55 Ma funagia anihán liraübei sarafangei? Ma María tíribei lúguchu, le líbugaña Santiagu, Hosé, Simón luma Húdasi? 56 Ma giñe ya heredera lítunu waganagua? Halíagiñeti lasagahei wügüri le sun katei le?”. 57 Anihán burí katei le adügübei lun mafiñerun hamá luagu. Ábati lariñagun Hesusu houn: “Buítimaati louserún aban profeta lidan amu ageiraü sügǘ lau lageira guánarügü luma lúbiñe”. 58 Keiti lougua lan hafiñerun luagu, madaahanti saragu milaguru ñein.