Uganu buiti le labürüdübei Matéu
25 ”Ítara liña Arúeihani le siélubei kei diisi nibureintiña máfuridungiña ha anügübalin halanpun lun houdin adunragua luma adari. 2 Seingü hádangiñe marufuduntiña lichú aau, ánhañati ha híbiri seingü, arufudatiña lichú aau. 3 Lau sun barǘ hamani nibureintiña ha marufudunbaña lichú aau halanpun hámagua, manügüntiña agülei. 4 Ánhañati ha chúbaña aau, mámarügüñein halanpun hanüga hámagua, barütiña giñe budéin lau agülei. 5 Keiti aba lubéi ladarasaragun adari, aba ladabudun hagu díisigubei hagía ani aba harumugun. 6 Danti le amidihali áriebu, aba laganbúniwa aban umalali ariñageina: ‘Aniténtia adari! Furí humá eresibirei!’. 7 Ábati hagagudún súngubei hagía ani aba haranseruni halanpun. 8 Aba hariñagun nibureintiña ha machuubaña aau houn ha chúbaña aau: ‘Ru humá murusun lídangiñe hagüledina woun, ni! Léñegucha walanpun’. 9 Ábati hóunabun ha chúbaña aau: ‘Ánhawa íchiga lídangiñe wagüledina hun, háfuga móustarunbei dandu woun kei hun. Héibagubei agañeiha hama ha alugurahabalin’. 10 Sunti añangüran lan nibureintiña ha marufudunbaña lichú aau agañeiha, ligía lachülürün adari. Nibureintiñati ha buga aransebaña, aba hebelurun úara luma adari lidoun fedu lánina maríei ani aba ladourúniwa bena. 11 Lárigiñe katei le, ligía hachülürün ha híbiri nibureintiña ariñageina: ‘Wabureme, wabureme, darabei bena wabá!’. 12 Ábati lóunabuniña adari: ‘Ibidiñegubeitün nun’.
13 ”Ligía lubeiti, agagudúañu humá súnwandan ladüga ibidiñeti hun kaba lan oura ni kaba lan weyu.
14 ”Ítara liña giñe Larúeihan Bungiu kei aban wügüri le agúaragüdübei hawagu lumusuniña lun líchuguni lúmati lábugiñoun haríaahan lubaragiñe lidin gaweiyasun lidoun amu ageiraü. 15 Lun aban hádangiñe, ruti seingü talentu.* Lun le aban, ruti biama. Ánheinti lun le agumuhóuni, ruti aban. Ru lumuti houn según iyaraani le luágubei kada aban lun hagarabahani, ábati lidin luagu luéiyasun. 16 Le eresibirubei seingü talentu, lau lóufudagun, aba lagarabahani, ábati lagañeirun seingü talentu lanwoun. 17 Ligiaméme giñe ladügübei le eresibirubei bián talentu ani aba lagañeirun bián lanwoun. 18 Ánheinti le eresibirubei ábanrügü talentu, aba lidin achiga huyu lun lábununi liseinsun* labureme ñein.
19 ”Saragu dan lárigiñe, aba lagiribudun habureme musu hagía arihei ka lan hadügübei lau liseinsun. 20 Aba liabin le eresibirubei seingü talentu ariñaga lun labureme: ‘Nabureme, séingüñein talentu bíchugun nun, arihabá, ibihaadina seingü lanwoun’. 21 Ábati lariñagun labureme lun: ‘Buiti badüga, aban musu buiti ani úaraguati amürü! Kei arufuda bani lídanrügü fiu katei gayara lan lafiñerúniwa buagu, níchuguba saragu katei lábugiñoun baríaahan. Higabu, gundaabá úara numa’. 22 Aba giñe liabin le eresibirubei bián talentu ariñaga lun labureme: ‘Nabureme, biámañein talentu bíchugun nun, arihabá, ibihaadina bián lanwoun’. 23 Ábati lariñagun labureme lun: ‘Buiti badüga, aban musu buiti ani úaraguati amürü! Kei arufuda bani lídanrügü fiu katei gayara lan lafiñerúniwa buagu, níchuguba saragu katei lábugiñoun baríaahan. Higabu, gundaabá úara numa’.
24 ”Lagumuhóun, aba liabin le eresibirubei aban talentu ani aba lariñagun: ‘Nabureme, kei subudi lan nun aban lan wügüri héreguti buguya, alubaha ban le ñein lubéi mábunagun ban, abudaha buguya ilaü le mama barumadahan, 25 ligía nanufudedunbei ani aba nidin ábunei biseinsun. Arihabá, anihán talentu le meha bíchugubei nun’. 26 Ábati lariñagun labureme lun: ‘Musu wuribati ani magúaliti amürü le. Kei subudibani alubaha nan le ñein lubéi mábunagun nan, abudaha au ilaü le mama narumadahan, 27 kagia uagu manügün bubalin niseinsun tidoun banku? Ítarati, gánwounhali hamuga niseinsun lumoun dan le’.
28 ”Lárigiñe, aba lariñagun: ‘Gidá huméi talentu le lúmabei luéi ani ru huméi lun le gámabalin diisi talentu. 29 Ladüga le gámabei, lichugúba lanwoun lúmati, ábameti gíbetima lan luma; ánheinti le úati ni kata luma, íbini le lúmabei, lagidarúba luéi. 30 Sagá huméi musu móuniti le lidoun luburiga le bóugudibei. Ñeinba layahuaha, akünrinha ligíame lari’.
31 ”Danme le liabin Liráü Wügüri* lidan luéirigun úara hama sun lani ánheligu, lañuuruba luagu lálana larúeihan le wéirigubei. 32 Hóundaraguba sun néchanigu ligibugiñe, ábameti lafanreinraguniña gürigia hawariuagua, ítara kei lafanreinraguniña hóuniri mudún mudún hawéi gábara. 33 Ha ítarabaña kei mudún, líchugubaña luéigiñe lóunwenren, ánhañati ha ítarabaña kei gábara, líchugubaña luéigiñe lubaünan.
34 ”Ábameti lariñagun Urúei houn ha luéigiñebaña lóunwenren: ‘Higougu, huguya le biní láañabaña Núguchi, resibi huméi Arúeihani le aranserúaalibei hubá lúmagiñe hagumeserun gürigia ubouagu. 35 Ladüga hóugüda humutina dan le nalamachunbei. Ru huguya duna nun dan le mágürabu nubéi. Resibi humutina buidu lau sun meha ibidiñe nan hun. 36 Rutün nadaüragun dan le madaüragun nubéi. Góunigi humutina dan le nasandirunbei. Ani dan le nadaürǘnbei, ñǘdüntün arihana’. 37 Ábameti hóunabun gürigia ha adügübalin le buídubei: ‘Wabureme, ídabugagia wíchiga éigini bun dan le balamachunbei, ru wagía duna bun dan le mágürabu bubéi? 38 Ídabuga weresibirabu buidu lau sun meha ibidiñe ban woun, ru wagía badaüragun dan le madaüragun bubéi? 39 Ídabuga woudin arihabu dan le sándiñadibu lubéi o furisunruguñadibu lan?’. 40 Ábameti lóunabuniña Urúei: ‘Gayaraati nachoururuni hun sun burí lan katei le hadügübei luagu aban hádangiñe namulenu hátima ǘnabugubaña, nun giñe hadügei’.
41 ”Ánheinti houn ha luéigiñebaña lubaünan, lariñaguba: ‘Dise humá nuéi huguya le íñarawaguaalibei. Heiba lidoun watu le siñabei leñeguchúniwa, le aranserúaalibei lubá Mafia luma habá lani ánheligu. 42 Ladüga méigagüdün humutina dan le nalamachunbei, míchugun huguya duna nun dan le namagürabudunbei. 43 Meresibirun humutina buidu dan le ibidiñe nubéi hun. Míchutün nadaüragun dan le madaüragun nubéi. Móunigirun humana dan le nasandirunbei ni dan le nadaürǘnbei’. 44 Ábameti hariñagun lun: ‘Wabureme, ídabugagia ibidiñe ban woun o warihabu lau ilamaü o lau mágürabu o madaüragunga o sándiñu o tidan furisun ani michu wamuti le bemegeirubei bun?’. 45 Ábameti lóunabuniña: ‘Gayaraati nachoururuni hun le lan madügün hubéi luagu aban hádangiñe namulenu hátima ǘnabugubaña, nun giñe madügün humani’. 46 Lagumuchúba hau mutu hagía lun súnwandan, ánhañati ha adügübalin le buídubei, habihuba ibagari le magumuchaditi”.