Ítara tiña san Bíbülia kei furumiñeguarügü líburu?
“Sun le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni, ani huutu [...]. Lun aranseñu hamá lubúeingu Bungiu lun hadügün sun luwuyeri wadagimanu buiti.” (2 TIMOTÉU 3:16, 17)
AÑAHEIN gürigia saminatiña siñá lan lariñawagún dimurei burí le lídanbei 2 Timotéu 3:16, 17 tuagu Bíbülia. Agia huguya, ka hisaminanbei? Ariha humutu san Bíbülia kéirügü aban líburu...
• ...to lánina abahüdaguni to subudiwatu lidan sun ubóu?
• ...to ítarati tisudinin kei amu burí líburu sagüráutu?
• ...to lánina abahüdaguni le arufudahati laruman ibagari?
• Odi ariha humutu kei Lererun Bungiu?
Gama lumoun, buiti san lun hakutihani kátima lan Bíbüliaboun? Ariha huméi ka lan tisuunibei: “Sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu” (Rómana 15:4). Lidan amu dimurei bürüwatu Bíbülia lun larufudahóun woun, wibihin dǘgüdaguaü luma lun hemenigi wamá.
Ligíati, hadügüña hamuga san gasu lau le tariñagubei Bíbülia lun hamuga ábanrügü tan líburu lánina abahüdaguni le subudiwati lidan sun ubóu o aban líburu to ítarati tisudinin kei amu burí líburu sagüráutu? Hígiruña hamuga san lun tadundehani hibagari? Lubá hamuga hasaminarun hadügün somu katei le gániti efekütu dandu huagu kei hawagu hufamilian, hasigiruñein hamuga san adundehani le tídanbei íbini múaran lan luma hisaminan? Lun hamuga aban tan líburu lánina abahüdaguni iyeeniti o lánina úraga, líchuguña hamuga san füramasei le tídanbei dǘgüdaguaü luma emenigini hun?
Rúhaña saragu míñunu gürigia ha akutihabarun Bíbülia fe luagu Lererun tan Bungiu. Hínsiñeti hamuga san hun hasubudiruni ka lan uagu marihinhabarun kei furumiñeguarügü líburu? Akutiha lumuti seingü arütíkulu le asigirubei katei le adügübei lun úa tan amu líburu kei Bíbülia.