Arufuda lumuti Heowá ida luba lan wadügüni wadagimanu le
1. Ka giñe ladügübei Heowá dan le líchugun somu wadagimanu woun?
1 Dan le líchugun Heowá somu wadagimanu houn lubúeingu, ru lumuti giñe ídemuei le hemegeirubei houn lun hagunfuliruni. Aban hénpulu, dan le lariñagunbei Heowá lun Noé lun ladügünu árüka, —aban katei le madügünñaha lágili—, ariñaga lumuti giñe Heowá lun ida luba lan ladügünu (Agu. 6:14-16). Dan le meha lóunahanbalin Heowá Moisesi, aban hóuniri mudún ǘnabuguti lun lidin adimureha hama hábutigu ísüraelina luma lun ladimurehan luma Faraón le lurúeite Ehiptu ariñagati lun: “Búmabadina danme le badimurehan, narufudubei bun kaba lan bariñaga” (Afu. 4:12). Dan le líchugunbalin Heowá wadagimanu lánina apurichihani woun, ariñaga lumuti giñe ida luba lan wadügüni. Larufudahaña woun tidan Leskuela Kristiánu lánina Apurichihani, luma lidan Adamuridaguni lani Eseriwiduni. Ida luba san wasagarun buiti lídangiñe arufudahani le?
2. Ida luba san hasagarun buiti tídangiñe Leskuela Kristiánu lánina Apurichihani?
2 Leskuela Kristiánu lánina Apurichihani. Lubaragiñe kada adamuridaguni, aturiaha huméi ariñahani le lunbei líchugun lidan. Lidan adamuridaguni teni humá lun ida liña lan híchuguni íbirigu hayanun, ítara hasigiruba afurendeira ida luba lan harufudahan houn amu (Ari. 27:17). Barǘ humoun hiliburun Benefíciese lidoun adamuridaguni yusu humounme lun habürühan tidan. Dan le layusuruñoun lan alidihati leskuela líburu lun líchugun eweridihani lárigiñe líchuguni kada íbiri liyanun, gayarati háfiyuraguni puntu burí le habusenrubei hayusurun. Gama lumoun, lúntima wasagarun buiti tídangiñe leskuela to, mosu gafanran wamá tidan. Bürüwaali san hiri tidan? Dan le heresibirun aban yanu, aranseha humá buidu ani sigí huméi adundehani le heresibirubei. Danme le hidin apurichiha yusu huméi le hafurendeirubei.
3. Kaba íderaguawa lun wasagarun buiti lídangiñe Adamuridaguni lani Eseriwiduni?
3 Adamuridaguni lani Eseriwiduni. Ánhawa aranseha lubaragiñe widin adamuridagua, aranseha wagíame lun wóunabun ménrenguntimabei waritaguni adundehani le weresibirúbei lidan. Ánhawa íchiga aban óunabuni le chátiti, gachansinbaña amu íbirigu lun hóunabun. Teni humá lun burí demostrasión, ani yusu humeime ariñahani le gayarabei lahuudun hun lidan ministeriu. Areida huméi arütíkulu tídangiñeti Wani Ministeriu, lun hayusuruni ámuñegü.
4. Ka uagu lunti lubéi wayusuruni le larufudahabei Heowá woun?
4 Ítara kei meha wadagimanu le ichugúbei lun Noé luma Moisesi, wadagimanu le ichugúbei woun le lánina apurichihani lidan sun ubóu barüti giñe turóbuli (Mat. 24:14). Wadügübei buidu ánhawa emenigida luagu Heowá, Wamaisturun le Wéirigutimabei, ani yusu wameime sun le larufudahabei woun (Isa. 30:20).