Gárada lúmagiñe sétanu le arihibei lau hawadigimari gefentiña luagu Heowá lidan sun ubóu
Íbirigu hínsiñewatiña:
Óunwenbu wagundan lau wabürühan ábanya wéiyaasu houn hóugiñe sedü-míñunu lubúeingu Heowá ha lídanbaña sun ubóu! Ida liña san hasandiragun hungua dan le hasubudirun aban gefenti luagu Heowá le lídangiñeti amu ageiraü? Ma aba línsiñedun hun ouraméme ligía? (Huan 13:34, 35.) Ítara luba hasandiragun hungua danme le haliihani lubuidun burí sügǘ tidan Anuario luagu hénpulu lánina afiñeni luma úaraguni le harufudubei íbirigu lidan ámuñegueinarügü ageiraü.
Ibihaadiwa ariñahani luagu adüga hamani besafu hídangiñe Guñoun lánina Áhuduraguni lidan Familia. Áfaaguatiña agübürigu lun hakipuruniña hasaanigu ha ñǘbürigiña darangilu (Efe. 6:4). Seremei chansi le líchugubei Guñoun lánina Áhuduraguni lidan Familia gíbetiña maríeitiña derebuguhali hamarieidun lárigiñe haturiahanu Bíbülia úara (Efe. 5:28-33). Le linarün katei, sun wagía íderagua lumutiwa wígirun dan lun waturiahanu Lererun Bungiu, wábuguarügü yebe o hama tílana waban (Hos. 1:8, 9).
Sandí wamuti hagarigu ha eferidirubaña haduheñu o hemegen ladüga somu chagaguaü le asuseredubei lidan lagumuhóun dan le, kéiburi hárabaganali o somu durumandei. Ani lidan ókaasion le, busentiwa giñe wíchugun seremei houn sun ha masaminarunbalin bián wéiyaasu lubá houdin íderaguaña ha asufurirubaña lidan burí chagaguaü (Adü. 11:28-30; Gal. 6:9, 10). Haganagua, añahein íbirigu ha ítarabaña kei Dórukasi, ‘súnwandan hau adüga buiti, ani íderagua humaña gudemetiña’, ténitün lun hemegeirun híbirigu lidan damuriguaü ani íderagua humutiña (Adü. 9:36). Haritagua huméi aríagu liña lan Heowá lun le hadügübei lidan límanin ani chóuruti líchugubei lan hafayeiruáha hun (Mat. 6:3, 4).
Lidan fiú ageiraü añahein gürigia ha ahandilihabalin lúrudu kei auti habusenra lun hadügün dañu lun wawadigimari ani mabahüdün hamuti lúrudu le ayanuhabei luagu haricha kada gürigia (Sal. 94:20-22). Gama lumoun, kei subudi hubalin ariñaga lan meha Hesusu luagu houserúba lan wuriba, áünhagua awanda lau ganigi ani áluaha humuti Heowá haramudaguagüleme (Huan 15:19, 20). Chouru huméi luagu furíei wamá huagu súnwandan ani amuriahatiwa lun “aranseñu humá súnwandan lun hóunabuniña ha álügüdütün ka lan lébunabei hemenigin” (1 Fe. 3:13-15).
Busentiwa giñe wariñagun houn saragu míñunu íbirigu luagu buidu lan hadüga, lugundun irumu luagu irumu áfaaguatiña lun hakipuragun houngua harumañu íbini mararamagun lan luadigimaridun Satanási lun laganwoundagüdüni magíaguni. Lidan dan le, arihúati hanarimetimahali lan iwiyei ubouagu, gama lumoun áünhagua ibiha erei “lídanñu aban luma Wabureme, lau lubafu le mébehabei” (Efe. 6:10). Daü humutu “sun daüguaü to líchuguboun Bungiu houn sun lánigu” ani háfaaguña lau sun here “luéi leyeedagunün Mafia” (Efe. 6:11, 12). Mabulieida huméi yusu lani Heowá hani hénpulu lun lóunabuni Satanási le anabagubalin (Ari. 27:11).
Luagu amu oubaü, gúndaatiwa lau wariñahan hun luagu chülǘ hamá 19,374,737 gürigia lidoun Aritaguagülei luagu lounwen Hesukrístu lidan irumu 2011. Aban lídangiñe resun le adügübei lun lasuseredun ítara, lubuidun hóunabun dan le hamisurahounbei lun heseriwidun kei prekursoru ídehatiña lidan gádürü-hati. Óunwenbu alawahani lun Heowá le hadügübei Gefentiña, seriwiti lun haganbuni saragu míñunu gürigia uganu buiti lidan sun ubóu (Rom. 10:18). Lidan hati ligía ñeinñanu 2,657,377 prekursoru ídehatiña, ani ñéinñanu saragu íbirigu áfaagutiña lun haganwoundagüdüni hadaani lidan hani ministeriu. Ruti ugundani woun warihini ubebeni le harufudubei, luma aranseñu humá lun heseriwidun (Sal. 110:3; Kol. 3:23).
Seremei lun lídehan Heowá badiseitiña 263,131 gürigia lidan irumu le ásügürübei. Rútiwa seremei hun luagu hídehan lun hasubudiragüdüni amisurahani le lídanbei Arufudúni 22:17, ñein lubéi lariñaga: “Ariñagati Sífiri Sandu tuma Adari: ‘Higabu’. Le giñe aganbubei, ariñagalá: ‘Higabu’. Le mágürabubei, ñǘbuinla, le busenti, gurala lídangiñe duna le íchugubei ibagari, mafayeihanga luagu”. Ani lárigiñe wakutihan ámuñegueinarügü katei luáguti Larúeihan Bungiu lidan adamurini distritu lidan irumu 2011, hanarimetimahali wariñagun: “Ñǘbuinla barúeihan!”. Ariñaga wamuti giñe dimurei le lariñagubei apostolu Huan lárigiñebei laganbuni füramasei le ladügübei Kristu: “Madiseeli niabin”, aba lariñagun Huan: “Ítarala. Higabu Wabureme Hesusu!”. (Aruf. 22:20).
Lidan áünhagua lan agurabei le lunbei lasuseredun, mabulieida huméi ínsiñeni le wasandirubei huagu kada aban hídangiñe: wíbirigu ha arufudubalin línsiñe Heowá houn lidan sun le ‘hadügübei’ (1 Huan 3:18).
Híbirigu,
Sétanu le arihibei lau hawadigimari gefentiña luagu Heowá lidan sun ubóu