Ida luba wasandirun darangilaü lau sun anihein lan wuribu luma anarimeni?
Ariñagati Gary, aban wügüri le meha asudarahabei: “Lubaragiñe meha naturiahanu Bíbülia, úati meha gunfuranda nani ka lan uagu anihein lubéi bandi turóbuli, marichaü luma furundei ubouagu. Ánheinti guentó, sanditina darangilaü ani subuditi nun ladügüba lan Heowá lun aban lan fulasu chóuruti sun ubóu”.
Mámarügüñein Gary asandiragua lungua ítara. Ariha waméi ida liña lan tíderaguniña Bíbülia amu gürigia.
LE TARIÑAGUBEI BÍBÜLIA: “Ladüga, buguya Nabureme, buítibu ani gíchigadi buguya ferudun” (Sálumu 86:5).
IDA LIÑA LÍDERAGUNIWA ARIÑAHANI LE: “Ruti dimurei burí le darangilaü nun ladüga arufudahati gudemehabu lan Heowá. Subuditi nun aranseñu liña lan lun feruduna lani sun le meha nadügübei lidan wuribu” (Wilmar, Kolonbia).
LE TARIÑAGUBEI BÍBÜLIA: “Nadügüba aban iseri sielu luma aban iseri ubóu. Labulieidúaba sun le sügühalibei, úaalime aritaguti luagun” (Isaíasi 65:17).
IDA LIÑA LÍDERAGUNIWA ARIÑAHANI LE: “Súfuritina lau lueirin idiheri luma íruni ladüga sun katei le nawinwandubei dan le meha nasudarahanbei. Lau sun lira, haritaguagüda lumutina bérusu le málühali lan Heowá agumucha lau sun katei wuribati le nasandirubei nídangua le agaridagüdübalun nanigi. Ani masandi náalime ni lidan nisaminan ni tidan nanigi. Maame lubuidun!” (Zafirah, Meriga).
LE TARIÑAGUBEI BÍBÜLIA: “Ñeinlá saragu darangilaü luma úaraguni lidan lidaani larúeihan, darí lachülürün dan lun lúadun hati” (Salumu 72:7).
IDA LIÑA LÍDERAGUNIWA ARIÑAHANI LE: “Súnwandan nasaminarun luagu dimurei burí le. Málühali wuribu luma sun katei wuribati le lanügübei agumucha, ani madiheridun háadiwame luagu gayara lan lasuseredun katei wuribati houn waduheñu” (Olexandra, Ukürania).
LE TARIÑAGUBEI BÍBÜLIA: “Ha óunwegubaña afiñeñu buagu, habagaridayaba, hásaaruba lídangiñe óunweni ábame hagúarahan lau ugundani” (Isaíasi 26:19).
IDA LIÑA LÍDERAGUNIWA ARIÑAHANI LE: “Dan le meha háfarawagunbei saragu tutsis, afarúatiña hiibe-agei hádangiñe niduheñu. Chóurugüda lumuti dimurei burí le nun narihayabaña lan niduheñu. Memeniha nanigi lun naganbuni lamuri hamalali buin lau ugundani danme le háguyugun” (Marie, Ruanda).
LE TARIÑAGUBEI BÍBÜLIA: “Málühaña ánhaña ua wuribatiña […]. Ánhaña ha ǘnabubei hanaagun houngua, hagíaba laburiña múa, habagariduba lidan darangilaü le dayarüti” (Sálumu 37:10, 11).
IDA LIÑA LÍDERAGUNIWA ARIÑAHANI LE: “Íbini gumuha lan wuribu ya, aniheingua saragu marichaü ani añaheingua gürigia wuribatiña. Ruti bérusu le saragu erei nun. Ariha lumuti Heowá sun katei, ani gunfuranda lumuti le násügürübei. Lanwoun lira, ariñagaali málühali lan agidarei sun asufuriruni ani maritagun háadiwame luagu” (Daler, Tayikistán).
Gürigia ha uágubaña layanuhóua tidan garüdia to, hádangiñetiña saragu míñunu gefentiña luagu Heowá ha adarirubaña darangilaü lau tídehan Bíbülia. Másiñati sandí hamá meha iyereehabúni ladüga ligaburi houserúniwa, harasan o ageiraü le ídangiñebei hayabin. Lau sun lira, furendeihaña ida luba lan hígiruni iyereehabúni (Éfesuna 4:31, 32). Mádaraguntiña gefentiña luagu Heowá houngua lidoun katei lánina polítika ni lidoun anarimeni (Huan 18:36).
Ídehatiña Gefentiña hámagua keisi iduheñu lidan sun ubóu (Huan 13:35). Kei hénpulu, abahüdaguatu Olexandra, to uáguboun wayanuhan lidan amu párafu, mosu lan meha tanurahan lidoun amu ageiraü úara tuma tamulelua ladüga wuribu. Ariñagatu: “Dan meha le wánhiñuragunbalin láfadaragun ageiraü, aba hayabin Gefentiña ha lílana ageiraü ligía lau lóufudagun, aranseñu lun híchugun lubuidun achülürüni woun. Lau hídehan ménrenguti meha woun lun wéchudun luagu iseri wabagari keisi gürigia ha anurahabaña hageiragiñe”.
Agunbiraha wamutün lun hiabin adamuridagua wamá le ñeinba lubéi hafurendeira ida luba lan hasandirun darangilaü, hafurendeiruba giñe luagu le tariñagubei Lererun Bungiu, luagu aban ubóu buin lau darangilaü. Heiba lidoun jw.org lun hadarirun ariñahani luagu fulasu le ñein lubéi wadamuridagua ani gayaraati giñe hamuriahan aban aturiahani tídangiñeti Bíbülia mafayeihanga. Líchuguba aban gefenti luagu Heowá aturiahani hun tau líburu Winwan humá lau ugundani!