Áyeiha waméi lǘnabugun Heowá

1. Ka uagu taweirida wanigi dan le wasaminarun luagu ǘnabugu lan Heowá?

DAN LE wasaminarun hawagu gürigia ha gabafubaña ya ubouagu, wariñaguña hamuga san ǘnabugu hamá? Másiñati mítaran lan. Ánheinti Heowá le Suntigabafu ǘnabuguti (Sal. 113:​5-8). Úati ni aban gürigia ǘnabuguti luéi Heowá, ladüga úati ni murusun íñuguni luagu. Lidan aturiahani le warihiba gádürü lubuidun ligaburi Heowá ani warihiba giñe ida liña lan larufuduni kada aban lídangiñe igaburi le ǘnabugu lan Heowá. Warihibei giñe ida liña lan láyeihani Hesusu lǘnabugun Lúguchi, líderagubadiwa sun le lúntima wayarafadun lun Heowá luma lun wáfaagun lúntima ǘnabugu wamá.

AGAMBA LUMUTIWA HEOWÁ

2. Ka larufudubei Sálumu 62:8 luagu Heowá woun? (Ariha humóun giñe iyawaü).

² Gürigia ha íñugubaña hanaagun houngua maganbun hamutiña amu ani wuribati hóuseruniña amu ladüga saminatiña buídutima hamá hawéi, adügati katei le lun mabusenrun hamá gürigia hayarafadun houn. Móuserunti Heowá ítara, kei ǘnabugu lubéi, agunbiraha lumutiwa lun wabahüdaguni sun le wasandirubei luma le wasaminarubei lun (aliiha huméi Sálumu 62:8). Ítara kei aban úguchili hínsiñehabuti le aganbubalin hayanuhan lisaanigu luagu hadiheri, ítara liña Wáguchi le siélubei, aganba lumuti giñe hafurieidun lubúeingu. Ligíati, adügati lun lerederun saragu lídangiñe furíei le tídanbei Bíbülia bürüwañu, arufudati lira busén lan laganbuniwa (Hos. 10:​12-14; 1 Sam. 1:​10-18). Lau sun lira, anihein dan hénrengu lan woun wafurieidun ladüga sanditiwa madüna wamani. Ka gayaraabei líderaguniwa?

3. Ka uagu chouru wabalin busén lan Heowá lun wafurieidun lun súnwandan?

³ Gayaraati wafurieidun lun Heowá lau sun sandigua wamá woungua madüna wamani línsiñehabu. Ida liña wasubudiruni? Wasubudirunbalin ladüga abahüdaguni luáguti isaani le acharagadubei. Lidan abahüdaguni le adimurehati Hesusu luagu aban úguchili gudemehabuti le gasaanibei aban irahü le asandirubei madüna lan lagiribudunya hábiñoun, ladüga gíbeeli lan lichara. Ka ladügübei úguchili dan le lagiribudunbei lisaani múnadoun? Dan le larihinbalin, “aba léibaagun lubaroun, aba lóuburuni, aba lachuuruni” (Luk. 15:​17-20). Ítara liña Heowá kei úguchili ligía. Ligíati, dan le wafurieidun lun ladüga gibe lan wadiheri o ladüga wasandiragun woungua lau duru, aganba lumutiwa lau lóufudagun ladüga ǘnabugu lan (Aya. 3:​19, 20). Adügati lugudemehabu Heowá lun “léibaagun” wawagun, mini lan, líchugun dǘgüdaguaü woun, luma lun larufudun ínsiñehabuni luma ferudun woun (Isa. 57:15). Ida liña ladügüni? Yusu lumutiña wéiyaaña lidan afiñeni, iduheñu ha gefentiña luagu Heowá hama amu íbirigu (Sant. 5:​14, 15). Íderagua lumutiwa Heowá ladüga busén lan lun yarafa wamá lun.

4. Ida liña meha larufuduni Hesusu gayara lan layanuhóuniwa luma?

⁴ Áyeiha lumuti Hesusu Lúguchi. Ǘnabuguti Hesusu ítara kei Heowá. Ligíati, dan meha le ya lubéi ubouagu, buiti meha hasandiragun gürigia houngua dan le hayarafadun lun ani adügatiña meha álügüdahani lun manufudeuga (Mar. 4:​10, 11). Ani dan meha le lálügüdüniña ka lan hasaminanbei luagu somu katei, ariñaga hamuti le hasaminarubei lun manufudeuga (Mat. 16:​13-16). Dan meha le hachararun, madadagaruntiña meha lau anufudei ladüga subudi hamuti aban lan wügüri buiti ligaburi Hesusu, gudemehabuti ani gaguraasunti (Mat. 17:​24-27). Seremei láyeihani Hesusu Lúguchi buidu, ligía hasubudirunbalin lani Hesusu disipulugu Heowá buidu buidu (Huan 14:9). Aba meha híchugun fe luagu ǘnabugu lan Heowá ani gayara lan hayarafadun lun, ani mítaran lan kei meha tábutigu relihión ha lánina dan ligía, ha meha adügüdarubaña hawagu gürigia, magudemehabu hagía ani barügua hagía houngua.

5. Ka uagu adüga lubéi ǘnabuguni lun busén hamá amu hayarafadun woun?

⁵ Ida luba wáyeihani Heowá? Adügati ǘnabuguni lun busén hamá amu hayarafadun woun. Ka uagu? Lugundun íderagua lumutiwa lun wagidaruni luriban igaburi wawariua le adügübei lun mabusenrun hamá amu hayarafadun woun, kéiburi, gimugaü, barüguaü unguaü luma igarihabu. Ani luagu le aban oubaü, íderagua lumutiwa arufuda igaburi le achawahabaliña amu, kéiburi areiduni, gaguraasuni luma gíchigadi ferudun (Kol. 3:​12-14). Wéiyaaña lidan afiñeni hagíatima lúnbaña háfaagun lun gayanuhouadi lan hama. Furanguti, lun lan hasandiragun íbirigu houngua buidu mosu herederun wéiyaaña lidan afiñeni harugabu íbirigu. Mini lan le, lunti lan houdin wéiyaaña lidan afiñeni adamuridagua tidan Luban Adamuridaguni anhein gayara lubéi, lubaragiñe herederun hábiñe adamuridagua luéigiñe zoom. Ani lunti hadügüni sun hayaraati lun háfuridun apurichiha úara hama íbirigu. Ítara luba híchugun chansi houn íbirigu lun hasubudiruniña buidu luma lun buidu lan hasandiragun houngua dan le háluahani hídehan.

ABAN BUNGIU GUNFURANDATI HEOWÁ

6, 7. Írida humá somu sügǘ le ídanbei ladügei Heowá le hamuriahabei lubúeingu luma.

⁶ Liibe-agei dan mabuseeruntiña gürigia ha barüguabaña houngua hasansiruni le hasaminarubei hadügün. Ánheinti Heowá ǘnabuguti ani aranseñu liña lun lasansiruni lisaminan lau sun garicha lan súnwandan, ani weiri ligía lichú lau. Kei hénpulu, samina wamá ida liña lan meha lóunabun Heowá dan le tagumeserunbei María (o Míriam) luma Aarón ayanuha wuriba luagu Moisesi wügüri le meha ayanuhabei lidan liri Heowá. Aban meha lagañidun Heowá tuma María saragu, ladüga le linarün katei tarufuduña meha minebenehabu lun Heowá. Ligía aba lubéi ladügün lun ladagarun lépüra tuagu. Ábati layumuragun Aarón lun Moisesi lun líderagunu, ani lárigiñe aba layumuragun Moisesi lun Heowá lun lareidaguagüdünu. Ka san ladügübei Heowá? Aba san lasigirun lau lisaminan lun lafayeiragüdünu luagu le tadügübei? Ligíaba yebe ladüga aban gürigia le baruguati lungua. Ánheinti Heowá ǘnabuguti, ligía aba lubéi ladügüni le lamuriahabei Moisesi luma aba lareidaguágüdünu María (1 Lur. 12:​1-15).

⁷ Ariha wamá ábanya sügǘ le ídanbei larufuda Heowá ǘnabugu lan. Yúsuti aban profeta lun lawisaruni urúei Esekíasi le sándibei luagu lounwen lan. Buin lagu Esekíasi lau águiraü aba layumuragun lun Heowá lun lareidaguagüdüni. Ida liñati lóunabuni Bungiu? Aba larufudun Bungiu gudemehabu lun, aba líchugun 15 irumu lanwoun libagari (2 Uru. 20:​1, 5, 6). Kei aubei warihei, ladüga ǘnabugu lan Heowá sandí lumuti hagarigu gürigia ani aganba lumutiña.

8. Ka burí hénpulu arufudubalin gudemehabu lan Hesusu? (Márükosu 3:​1-6).

⁸ Áyeiha lumuti Hesusu Lúguchi. Dan meha ya lubéi Hesusu ubouagu, súnwandan líderaguniña gürigia dan le gayara lan ladügüni. Kei hénpulu, areidaguagüdati gürigia lidan luéyuri emeraaguni íbini magundan hamá tábutigu relihión ha magudemehabubaña (aliiha huméi Márükosu 3:​1-6). Ani aniheingua Hesusu arufudei igaburi le keisi lichügüdina damuriguaü kristiánu. Kei hénpulu, dan le ladügün aban íbiri somu figóu wéiriti arufudati Hesusu gaguraasuni ani ruti ámuñegueinarügü chansi lun gürigia ligía lun lasansirun (Aruf. 2:​2-5).

9. Ida luba wáyeihani Heowá lidan gunfuranda wamaniña amu? (Ariha humóun giñe iyawaü).

⁹ Ida luba wáyeihani Heowá? Lunti ǘnabugu wamá lun wáyeihani ligaburi lisaminan luma lóuserun Heowá (Sant. 3:17). Agübürigu ha áyeihabalin Heowá mígirun hamutiña hasaanigu lun hadügüni sun le habusenrun, ani magurabuntiña giñe lun hadügün lóugiñe le hayaraabei adüga. Daritiwa aban hénpulu buiti luagu katei le lidan Agumesehani 33:​12-14, ñein lubéi waliiha luagu gudemehabu lan Hobu houn lisaanigu. Agübürigu ha chúbaña aau ani ǘnabugutiña masaminaruntiña ani mariñagun hagía buídutima lan aban hasaani luéi le aban. Ǘnabugutiña giñe wéiyaaña lidan afiñeni. Lubaragiñe hafuudun lun ladügǘniwa le hariñagubei, ánhatiña lun le hasaminarubei ha híbiri wéiyaaña lidan afiñeni dan le úara lan luma adundehani le tídanbei Bíbülia (1 Tim. 3:​2, 3). Ani súngubei wagía lunti wáfaagun lun gunfuranda wamani le hasaminarubei ha híbiri íbini múaran lan luma wasaminan (Rom. 14:1). Sun wagía áfaaguatiwa lun wafalaruni adundehani le: “Subudiwa humá kei gürigia areidatiña [o ‘richatiña’, TNM]” (Fili. 4:5).

GAGURAASUNTI HEOWÁ

10. Ida liña larufuduni Heowá gaguraasun lan?

¹⁰ Másiñati arihaadiwa lan gürigia íñugutiña maguraasuntiña ani mínsiñeti houn lun higirún agurabaha. Mítaranti Heowá! Úati gaguraasunti kei ligía. Lidan lidaani Noé, ariñagati lagurabahaba lan 120 irumu lubá lagumuchun hau wuribatiña (Agu. 6:3). Gachansinti meha Noé lun lagüriaruniña lisaanigu luma lun ladügünu árüka úara hama. Dan lárigiñe, aganba lumuti Heowá Abüraámü lau gaguraasuni dan le ladügünbei Abüraámü álügüdahani lun luagu le lasaminarunbei Heowá ladügün luagu lagünrinchaguni Sodoma luma Gomora. Aban gürigia íñuguti háfuga aba lan hamuga lariñagun lun Abüraámü: “Kátañadibu san lun biabin álügüdaguana?”. Ánheinti Heowá madügün lumuti lira ladüga ǘnabuguti ani gaguraasunti (Agu. 18:​20-33).

11. Según 2 Féduru 3:​9, ka uagu aniheingua lubéi Heowá arufuda saragu gurasu uguñe weyu?

¹¹ Uguñe weyu, larufuduñein giñe Heowá gaguraasun lan. Lagurabahañein dan le seti láalibei lun lagumuchun lau ubóu wuribati le. Ka uagu gaguraasun lubéi Heowá habá gürigia? “Ladüga mabusenrunti lun leferidirun ni aban hádangiñe; labusenrun lun hasakürihan sun gürigia” (aliiha huméi 2 Féduru 3:9). Seriwiti san luguraasun Heowá? Anha! Ladüga luguraasun Heowá yarafaaña saragu míñunu gürigia lun ani busentiwa giñe lun hasubudiruni saragu amu gürigia. Gama lumoun gébehati luguraasun Heowá. Hínsiñetiña gürigia lun, lau sun lira magundanti lau katei wuribati le hadügübei gürigia. Mígirunbei giñe lun ladurarun wuribani lun súnwandan (Abak. 2:3).

12. Ida liña láyeihani Hesusu luguraasun Heowá?

¹² Áyeiha lumuti Hesusu Lúguchi. Barühali Hesusu saragu milu irumu áyeihei luguraasun Heowá. Ariha laali ida liña lan laburuchaguagüdün Satanási lanarime burí iyeeni luagu Bungiu luma hawagu gürigia ha úaraguabaña (Agu. 3:​4, 5; Hob. 1:11; Aruf. 12:10). Ariha laali giñe Hesusu lanarime hasufurirun gürigia. Samina wamá luagu lanarime layumahan Hesusu “lun lagünrinchaguni luadigimari Mafia” (1 Huan 3:8). Ka san íderagubalin lun lagurabahan lau gurasu darime lachülürün lóurate lariñaguni Heowá lun gayaraahali lan lagumuchun lau luadigimari Mafia sunsuinagubei? Íderagua lumuti ǘnabuguni Hesusu ani subudi lumuti lúnrügüñein lan Heowá yu lan lanúadiruni kaba lan dan lagumucha lau luadigimari Mafia (Adü. 1:7).

13. Ka sügǘ ídanbei larufuda Hesusu gaguraasuni houn lani apostolugu, ani ka uagu?

¹³ Dan le ya lubéi Hesusu ubouagu gaguraasunti meha giñe habá lani apostolugu. Dan meha le larihiniña asigeneha luagu ka lan hádangiñe súdinitimabei, meferidirun lumuti meha luguraasun, lubaragiñeti lira gaguraasunmemeti habá (Luk. 9:46; 22:​24-27). Chouru lumuti meha lachülürüba lan dan lun hasansirun. Agia wagía? Adüga wamaali san ligiaméme charati saragu wéiyaasu? Ánheinti ítara liña lubéi, wéiriti weteingiruni luagu ǘnabuguni luma gurasu le larufudubei Warúeite.

14. Kaba íderaguawa lúntima gaguraasun wamá?

¹⁴ Ida luba wáyeihani Heowá? Lun wáyeihani Heowá lunti warufuduni ligaburi “lisaminan Kristu” (1 Ko. 2:16). Kaba íderaguawa lun wasaminarun kei Hesusu? Úati amu katei lunti wadügüni luéidigia waliihanu Ewanhéliu luma lun wasagarun dan lun wasaminarun hulili luagu ligaburi lóuserun Hesusu luma ka lan uagu ladüga ítaga katei. Súdiniti giñe lun wamuriahan luma Heowá lun líderaguniwa lun ǘnabugu wamá kei Liráü. Éibutima wafurendeirun asaminara kei Kristu, buídutimaabei wáyeihani Bungiu ani gaguraasuntimabadiwa wabaruagua luma habá íbirigu (Mat. 18:​26-30, 35).

MABULIEIDUN LUMUTIÑA HEOWÁ HA ǗNABUGUBAÑA

15. Ida liña lagunfuliruni Heowá dimurei burí le lídanbei Santiagu 4:6?

¹⁵ (Aliiha huméi Santiagu 4:6). Samina wamá luagu Bungiu le Wéirigutimaabei lidan sun ubóu etenira houn ha ǘnabugubaña. Ariha wamá fiu hénpulu hawaguti fiu gürigia ha mabahüdǘnbaña ani íbini ítara téniti Heowá houn. Añahein fiu hádangiñe háfuga miábinti hiri lidoun wasaminan, gama lumoun ígirati Heowá lun labürüdǘniwa tidan Bíbülia. Kéiburi Débora, seriwitu meha houn liduheñu Isaakü luma Hakobu luagu 125 irumu. Lóuguati wasubudirun tuagu würi úaraguatu to, ligía ladügübei Heowá lun labürüdüni Moisesi tiri luma somu katei le arufudubalin tínsiñe houn (Agu. 24:59; 35:8). Saragu sígulu lárigiñe, anúadira lumuti Heowá Dawidi aban hóuniri mudún le nibureingili lun ligía lan lurúeite Ísüraeli (2 Sam. 22:​1, 36). Lárigiñe lagüriahóun Hesusu aba lóunahan Heowá aban ánheli lun líchuguni chansi houn fiu hóuniri mudún ǘnabugutiña lun hagía lan furumiñetiña asubudirei luagu agüriahóuaali lan Mesíasi Belén (Luk. 2:​8-11). Ani dan le hanügünbalin Hosé tuma María Hesusu ténpulurugu, ruti Heowá chansi lun Simeón tuma Ana, bián gürigia derebuguhaña lun harihini Liráü (Luk. 2:​25-30, 36-38). Chóuruti, “íderagua lumutiña [lan Bungiu] ha ǘnabugubaña”.

16. Ida liña láyeihani Hesusu Lúguchi?

¹⁶ Áyeiha lumuti Hesusu Lúguchi. Hínsiñetiña meha gürigia ha ǘnabugubaña lun Hesusu kei hínsiñe lun Lúguchi. Arufudaha lumuti meha inarüni luáguti Larúeihan Bungiu houn gürigia íbini “mama hamá gürigia aturiahatiña saragu, luagu gürigia hamá ha furumiñeguarügü” (Adü. 4:13; Mat. 11:25). Ani lau ínsiñeni, areidaguagüdati Hesusu sánditiña, adügati lira lun hasandiragun houngua inebewa hamá (Luk. 5:13). Guñoun le lubaragiñebei lounwen chibá lumuti hagudi lani apostolugu, aban dasi le meha hadügübei idamuni (Huan 13:5). Lubaragiñe lidin sielun, ruti aban gumadi súdiniti houn lani disipulugu lun híderaguniña gürigia lun habagaridun lun súnwandan, ru lumuti giñe dasi le woun uguñe weyu (Mat. 28:​19, 20).

17. Ida luba wáyeihani Heowá? (Ariha humóun giñe iyawaü).

¹⁷ Ida luba wáyeihani Heowá? Áyeiha wamuti dan le wapurichiha. Arufudatiwa inebehabu luma ínsiñeni dan le wapurichihani uganu buiti houn gürigia meberesenga hechun, harasan o anhein ñüdün habéi tidan luban furendei íñuti o midin hamá. Áyeiha wamuti giñe Heowá lidan ligaburi wóuseruniña íbirigu, kei burí dan le wasaminarun buídutima hamá wawéi, meberesenga ka lan wadasinbei lidan damuriguaü o iyaraani le wawagubei (Fili. 2:3). Gúndaati Heowá dan le larihin ǘnabugu wamá ani arufuda wagía inebehabu wámagua lidan sun le wadügübei (Sof. 3:12; Rom. 12:10).

18. Ka uagu busén wabéi háyeihani ǘnabuguni le luágubei Heowá?

¹⁸ Dan le wadügüni sun wayaraati lun wáyeihani Wáguchi le siélubei le hínsiñehabubei ani ǘnabugu ligía, ábame hádangiñe wamá gürigia ha gayaraati layarafadúniwa houn, ha gunfurandatiña ani gaguraasun hagía. Wáfaaguba giñe lun wóuseruniña amu lau ínsiñehabuni luma lau inebesei, kei ladügüni Heowá. Haritagua waméi dan le lan wáfaagun lun wáyeihani lǘnabugun Heowá adügati lira lun gebegi wamá lun (Isa. 43:4).