Ka gayaraabei nadügüni lun neteingiruni Heowá luagu líchuguni Lisaani lun lounwen luagu nifigoun?

1, 2. Ru lumuti Hesusu libagari wawagu, ka un línchahawa katei le? (2 Korintuna 5:​14, 15; ariha huméi giñe dibuhu).

SAMINA humá sun liña lan hesefurún tábugiñegiñe muna to éiguaduboun huagun. Ma wéiribei hamuga heteingiruni gürigia le esefurubalin hibagari? Íbini anhein mámarügüñadün lubéi huguya lesefura, chóuruti busenbadün lan heteingiruni luagu le ladügübei huagu ani maweiyasunbadün abulieidei.

² Kei wafurendeiruni lidan aturiahani le lubaragiñebei le, mégeitiwa lun wesefurúniwa lídangiñe lubafu figóu le galagante wabéi. Ani anihán katei le ladügübei Heowá lau líchuguni Liráü keisi adagaragüdüni. Adügati lebegi esefuruni lun 1) ferudunawa lan wafigoun, 2) lunme mafigoun wamá, lúmati 3) lun warandarun luma Bungiu. Seremei katei le, hemenigitiwa lun wawinwandun lun súnwandan lídanme iseri ubóu. Lau líchuguni Hesusu libagari wawagu, gayaraati wachoururuni hínsiñe hamá gürigia lun íbini lubaragiñe liabin ubouagun (Ari. 8:​30, 31). Ligía labürühanbei apostolu Pábulu: “Gumadi lumutiwa línsiñehabu Kristu” (aliiha huméi 2 Korintuna 5:​14, 15). Ka labusenrunbei lariñagun? Luagu mosu lan línchahaniwa línsiñehabu Kristu lun wadügün somu katei lun warufuduni weteingiradi luagu lebegi esefuruni ani maweiyasunbadiwa lan abulieidei le ladügübei wawagu.

3. Ka uagu ámuñegeinarügü lubéi larufuduni kada gürigia leteingiradi luagu lebegi esefuruni?

³ Ida luba harufuduni heteingiradi luagu lebegi esefuruni? Háfuga mítaranbei óunabagülei le híchugubei lun álügüdahani le lumoun óunabagülei le híchugubei amu gürigia. Samina humá luagu hénpulu le. Samina wamá hawagu ǘrüwa gürigia ha aweiyasuhabaña lidoun ligiaméme fulasu, kada aban hádangiñe lídangiñe ámuñegeinarügü fulasu háfurida. Ligíati, ámuñegueinarügüti üma le hárügüdübei. Ítarameme, según ligaburi humadagua luma Heowá guentó, ítara luba giñe üma le lunbei hárügüdüni lun harufuduni heteingiradi luagu lebegi esefuruni. Ligíati, hounti ǘrüwa hawuyeri gürigia aturiahani le: 1) houn aturiahatiña Bíbülia, 2) houn kristiánugu badiseihaña luma 3) houn kristiánugu ha adisedubaña luéi damuriguaü.

ATURIAHATIÑA BÍBÜLIA

4. Ka lasaminarubei Heowá hawagu aturiahatiña Bíbülia?

⁴ Haturiahañoun san Bíbülia? Arufudati lira busén lan Heowá lun humada lan ani líderaguñadün lan lun hayarafadun lun (Huan 6:44; Adü. 13:48). Ariñagatu Bíbülia: “Ánheinti saminaü, Bungiu óuchagubalin”. Mini lan lira ariha lani Bungiu áfaaguni le hadügübei lau hafurendeirun luagu ani gúndaati lau larihini asansiruni le hadügübei lun hawinwandun según lilurudun (Ari. 17:3; 27:11). Adügati lebegi esefuruni lun aban humá lumada Heowá (Rom. 5:​10, 11). Maweiyasun humá abulieidei katei le!

5. Ida luba hafalaruni aturiahatiña Bíbülia adundehani le lídanbei Filipuna 3:16?

⁵ Ida luba harufuduni heteingiradi luagu lebegi esefuruni? Harufudubei lau hafalaruni adundehani le líchugubei apostolu Pábulu houn filipuna: “Lau sun luwuyeri, lunti wabagaridun úaragua luma katei le furendei wamaalibei” (Fili. 3:16). Lidan amu dimurei, sigí humá abuiduragüdei humadagua luma Bungiu kei hadügüni darí guentó, mígira humá lun ñein lan ni kata eberesehatün lun héibugun luéigiñe üma le anügübei lidoun ibagari magumuchaditi (Mat. 7:14; Luk. 9:62).

6. Ka gayaraabei hadügüni aturiahatiña Bíbülia anhein hénrengu lubéi houn hadügün somu asansiruni lidan habagari? (2 Lúrudu 30:​11-14; ariha humóun giñe iyawaü).

⁶ Hénrenguti san hun lun hánharun lun somu arufudahani tídangiñeti Bíbülia le málügilibei lúmagiñe hafurendeiruni? Aban katei le gayaraabei hadügüni hakutihan luagu, amuriaha hugíame luma Heowá lun líderagunün lun gunfuranda humani (Sal. 86:11). Anhein hénrengumemegili lubéi hun lun hánharun lun arufudahani ligía íbini lárigiñe hakutihan luagu, áfaagua humá lun masaminarun humá saragu luagu. Lau sun lira, sigiméme humá aturiahoun Bíbülia. Ánheinti hénrengu lubéi hun lun hígirun somu échuni le mínsiñebei lun Heowá, ka lunbei hadügüni? Mabulieida huméi subudi lani Bungiu luagu gafigoun wamá ani mamuriahanti wama lun wadügün somu katei le wásiñarubei adüga. Gayaraati gaganbadi humá lun lilurudun (aliiha huméi 2 Lúrudu 30:​11-14). Ani füramaseti líderagubadün lan (Isa. 41:​10, 13; 1 Ko. 10:13). Ligíati, mábürühala harüna. Lubaragiñe herederun abouchaguei hichügü luagu katei le hénrengubei hun lun hadügün, teni humá lun sun katei buiti le ladügübei Heowá huagu, kei burí lebegi esefuruni. Eibu aganwoundeina lan ínsiñeni le hasandirubei luagu Heowá, harihibei “ménrenguti [lan] lagunfulirúniwa lugumadin” (1 Huan 5:3).a

7. Ka katei uágubei gayara lan hararamagun asaminara nibureintiña ha gagübürigubaña gefentiña luagu Heowá?

⁷ Gefentiña san luagu Heowá bagübürigu ani harufudahañein inarüni bun? Anhein ítara liña lubéi, aban giñe aturiahati Bíbülia buguya. Ani isaanigu, hagía aturiahatiña ha lúnbaña súdinitima hamá houn agübürigu. Ligía tariñagunbei Bíbülia: “Yarafa humá lun Bungiu, ábame giñe layarafadun hun” (Sant. 4:8; 1 Kro. 28:9). Ánhabu ayarafada lun Bungiu, ábame giñe layarafadun bun. Mama luagu gefentiña lan luagu Heowá bagübürigu larihinbei Heowá buagu, arihati buagu ladüga busén lan lun gamadagua ban luma. Ka adügübei lun buidu lan bumadagua luma Bungiu? Ladüga lebegi esefuruni, aban katei le lunbei mabulieidun bani (Rom. 5:​1, 2). Ka uagu máfaagun bubéi lun bararamagun asaminara luagu le mini lubéi lounwen Hesusu bun lubaragiñe bidin lidoun Aritaguagülei? Gayaraati línchahanibu bararamagun asaminara luagu lounwen Hesusu lun busén ban baganwoundagüdüni beseriwidun lun Heowá luma lun báfaagun lun bibihini. Ítara luba barufuduni weiri lan beteingiruni Heowá luagu líchuguni Liráü lun lesefuruniwa.b

KRISTIÁNUGU BADISEIHAÑA

8. Ida liña harufuduni kristiánugu ha badiseihaña afiñe hamá luagu lebegi esefuruni?

⁸ Anhein badiseihadün lubéi, arufuda humaali lidan ámuñegeinarügü igaburi afiñe humá luagu lebegi esefuruni. Kei hénpulu, adügaadün asansiruni lidan hibagari lun hayarafadun lun Heowá luma lun gaganbadi humá lun lilurudun. Falá humaali lugumadin Hesusu lun hapurichihan luma lun hadügün disipulugu. Derege humaali hibagari lun Heowá, badisei huguya. Másiñati giñe gagibuguaadün lan luma híchugun amu gürigia lidere dan hun ladüga heseriwiduña lan lun Bungiu (2 Tim. 3:12). Awanduni luma afiñeni le harufudubei arufudati hínsiñe lan Heowá hun ani teinki humani luagu lebegi esefuruni (Ebü. 12:​2, 3).

9. Ka katei gayaraabei lasuseredun houn kristiánugu badiseihaña?

⁹ Lunti hóunigiragun kristiánugu badiseihaña houngua. Ka uagu? Ladüga lau lásügürün dan gayaraati hagumeserun eferidirei heteingiradi luagu lebegi esefuruni. Samina wamá luagu le asuseredubei houn kristiánugu ha Éfesubaña. Lau sun ariñaga lan Hesusu houn buidu lan hadüga luagu hawandun, ariñagati houn lílana damuriguaü: “Anihein aban katei hadüga magundantina lau: Maweirinhali nínsiñe hun kei meha furumiñe” (Aruf. 2:​3, 4). Arufudati dimurei le lariñagubei Hesusu gayara lan lafurieidun aban kristiánu lun Heowá, lidin adamuridagua, láfuridun apurichiha, lau sun lira, ladügüñein ladüga héchuhali lan adügei, mama luagu ínsiñeni le lasandirubei luagu Heowá. Ka gayaraabei wadügüni ánhawa ariha mítaranhaali lan ínsiñeni le wasandirubei luagu Heowá kei meha?

10. Ida luba wafalaruni adundehani le lídanbei 1 Timotéu 4:​13, 15?

¹⁰ Ariñagati apostolu Pábulu lun Timotéu lun lararamagun asaminara luagu láhuduragun lun Heowá luma lun lederegeragun lungua sunsuinagubei lun eseriwiduni le (aliiha huméi 1 Timotéu 4:​13, 15). Ida luba wafalaruni adundehani le? Lau wararamagun asaminara luagu le gayaraabei wadügüni lun meferidirun wamani ubebeni le wasandirubei lidan weseriwidun lun Heowá (Rom. 12:11). Kéiburi hamuga, lau wíchugun arigei lun le ariñawagúbei lidan adamuridaguni, aranse wagía buidu lubá. Gayaraati giñe wasagarun saragu buiti dan le waturiahan wábuguarügü lau burí wáluahan aban fulasu le ñein lubéi gayara lan wararamagun asaminara úouga eberesehatiwa. Ánhawa afalarei sun adundehani le, laganwoundatimaba eteingiruni le wasandirubei luagu lebegi esefuruni luma luagu sun katei le adüga láalibei Heowá wawagu, ítara kei lárügüdün watu erei dan le lichugúniwa lubúa. Lanwoun lira, lidan lidaani Aritaguagülei, gayaraati wararamagun asaminara luagu katei buiti le wibihibei lau aban wamá gefentiña luagu Heowá. Chóuruti líderagubadiwa lan katei le lúntima gebegi lan lebegi esefuruni woun, katei le adügübei lun gamadagua wamá luma Heowá.

11, 12. Anhein anihein lubéi dan wasandirun weferidiruñein lan ubebeni le meha wasandirubei, mini lan san lira mama lan líchuguñein Heowá lani sífiri sandu woun? (Ariha humóun giñe iyawaü).

¹¹ Mábürühala warüna anhein anihein lubéi dan wasandirun mítaranhaali lan ubebeni le wasandirubei kéiñaha. Masaminara wamá giñe michu lani Heowá lani sífiri sandu woun. Mabulieida waméi le labürühabei apostolu Pábulu dan le lariñagunbei luagu lani ministeriu: “Anhein nadüga lau sun magundani, nagunfulirarügüña lau wadagimanu le líchugubei Bungiu nun” (1 Ko. 9:17). Ka labusenrunbei lariñagun?

¹² Kei le aubei warihei, anihein meha dan henren lan lun Pábulu lun lapurichihan. Íbini ítara, sigimémeti apurichiha. Gayaraati giñe wadügüni ligiaméme. Sigiméme wamá adüga le buídubei, íbini anihein lan dan henren lan woun. Amuriaha wamá luma Heowá lun líderaguniwa adügei katei “kei labusenruni” (Fili. 2:13). Bereseguñu wamá lidan weseriwidun lun Heowá. Chouru waméi ánhawa lan adügei sun katei le, líderagubadiwa lan lira lúntima laganwoundun ínsiñeni le wasandirubei luagu Heowá luma lunya wasandirun ubebeni.

13. Ida luba wasigirun arihei anhein derebuguñu waña lubéi lidan wafiñen?

¹³ Ariñagati 2 Korintuna 13:5: “Aríagua humá hungua anhein derebuguñu hiña lubéi lidan hafiñen; hóuchagua humá hungua”. Lun wafalaruni adundehani le, álügüdagua wamá woungua: “Ru numuti san Larúeihan Bungiu furumiñe lidan nibagari? Arufuda lumuti san isebáhari le nanúadirubei iyereegu lan katei wuribati nun? Áfaaguatina san lun ñein lan darangilaü luma úarani hadan íbirigu?” (Sal. 97:10; Mat. 6:33; Efe. 4:​2, 3). Lidan lidaani Aritaguagülei, ligía aban lubuidun dan lun wasaminarun luagu álügüdahani burí le. Dan le wararamagun asaminara luagu le ladügübei Heowá luma Hesusu wawagu, ínchaha lumutiwa lira lun warufuduni weteingiradi luma lun warufuduni mama lan wawinwanduña lun wadügüni wagundan, wawinwanduña lan lun wafalaruni Kristu.

KRISTIÁNUGU HA ADISEDUBAÑA LUÉI DAMURIGUAÜ

14. Ka uagu hadiseda fiu kristiánugu lídangiñe damuriguaü?

¹⁴ Añahein kristiánugu aba hadisedun luéi damuriguaü íbini meha barühaña lan saragu hati o irumu eseriwida lun Heowá lau úaraguni. Ka uagu? Másiñati ladüga lan saragu “idiheri luagu burí katei lánina ibagari le” (Luk. 21:34). Añahein amu, másiñati aba lan hachugeragun ladüga le lariñagubei o le ladügübei somu íbiri (Sant. 3:2). Ani añahein amu, másiñati adügaaña lan aban figóu le wéiriti ani hanufudetiña háluahan ídemuei. Anhein adügaali lubéi katei burí le o amu burí katei lun hadisedun luéi damuriguaü, ka gayaraabei hadügüni? Ida luba líderagunün hasaminarun luagu lebegi esefuruni?

15. Ida liña larufuduni Heowá hínsiñememegiña lan kristiánugu ha adisedubaña luéi damuriguaü lun? (Esekiéli 34:​11, 12, 16).

¹⁵ Ráramagua humá asaminara luagu le lasandirubei Heowá hawagu ha adisedubaña luéi damuriguaü. Mabulieidagunti hawéi, ariha lumutiña kei mudún ha féridihaña ani láluahañanu. Lanwoun lira, bereseti hau ani íderagua lumutiña lunya hagiribudun lun (aliiha huméi Esekiéli 34:​11, 12, 16). Ladügüñein san Heowá ligiaméme huagu? Chouru huméi ítara liña lan! Arufudatün hínsiñememegili lan Heowá hun lau aünha lan aturiahei ariñahani le. Mabulieida huméi ariha lan Heowá katei buiti huagu ani ligía lachawahanbalün lidoun inarüni. Kei sigimémegili lubéi ariha katei buiti huagu, busenti tídangiñe sun lanigi lunya hagiribudun lidoun damuriguaü.

16. Ka gayaraabei líderaguniña kristiánugu ha adisedubaña luéi damuriguaü lunya hagiribudun lun Heowá? (Ariha humóun giñe iyawaü).

¹⁶ Samina humá luagu dimurei buíduburiti le, le tídanbei garüdia Jehová desea que vuelva: “Chouru huméi ñeinbei lan Heowá hurugabu lidan aünha lan áfaagua lunya hagiribudun lun. Líchuguba erei hun lun hagagibudagun luma idiheri le lánina ibagari, líderagubadün giñe lun mareidahan humá igarihabu tidan hanigi, feruduna lubadün, íderagua laünme lun heseriwidun lun lau aban laruman saminaü. Ladügüba sun katei burí le lun ménrenguntima lan hun lunya heseriwidun lun Heowá úara hama íbirigu”. Lanwoun lira, mabulieida huméi giñe busén hamá wéiyaaña lidan afiñeni híderagunün ladüga ítara haña “kei aramudaguagülei luéi garabali luma luéi luriban dan” (Isa. 32:2). Chouru wamuti weiri lan heteingiradi luagu lebegi esefuruni ani busentün harufuduni eteingiruni ligía lun Heowá. Ligíati, álügüdagua humá hungua: “Ka gayaraabei nadügüni lunya gamadagua nan luma Heowá?” (Isa. 1:18; 1 Fe. 2:25). Kéiburi, gayaraati san hagumeserunya adamuridagua? Gayaraati san hayanuhan luma aban wéiyaali lidan afiñeni ani ariñaga huguyame lun busén humá hagiribudun lun Heowá? Másiñati ladügüba lan wéiyaali lidan afiñeni ligía aransehani lun líchugun aban íbiri aturiahani tídangiñeti Bíbülia hun luagu fiu dan. Chouru huméi labinirubei lan Heowá sun áfaaguni le hadügübei lun harufuduni heteingiradi luagu lebegi esefuruni.

IDA LUBA HARUFUDUNI HETEINGIRADI?

17, 18. Ida luba wayusuruni wadaani buidu lidan lidaani Aritaguagülei?

¹⁷ Ariñagati Hesusu óunaha lani Bungiu “Liráü le ábanrügüti, lun lounwen luagu [w]afigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Yusu lumuti Heowá lounwen Hesusu lun lesefuruniwa lídangiñe lubafu figóu luma óunweni. Maweiyasun wamá arihei katei le kamá aban katei le maweirinti lisudinin (Rom. 3:​23, 24; 2 Ko. 6:1). Lidan lidaani Aritaguagülei gachansintiwa lun wararamagun asaminara luagu lueirin ínsiñeni le larufudubei Heowá luma Hesusu wawagu, ani ínchaha lumutiwa ínsiñeni ligía lun warufuduni weteingiradi houn.

¹⁸ Ida luba harufuduni heteingiradi luagu lebegi esefuruni? Másiñati mítaranbei lan ligaburi harufuduni heteingiradi luma ligaburi harufuduni amu. Chouru huméi labinirubei lan Heowá sun áfaaguni le hadügübei luma áfaaguni le hadügübei sun lubúeingu lidan sun ubóu, ha mámaalibei “houn guánarügü habagarida”, habagariduña lun le “óunwebei hawagu, sará ligía lídangiñe óunweni” (2 Ko. 5:15).