12 Áfaaguaba luagu le babusenrubei badügün

KA MINI LUBÉI?

Dan le báfaagun luagu le babusenrubei badügün, mámaali aban uénedü ni ábanrügü katei le babusenrubei lun lasuseredun. Lun bibihini le uágubei báfaagua, mégeiwati lubuidun aransehani, aranseñu ban lun badügün asansiruni luma benefa ban.

Gayaraati báfaagun luagu aban katei le gayaraabei bibihini lidan fiu weyu, lidan saragu hati, lidan aban irumu o lóugiñe. Lun lagunfulirun le uágubei báfaagua lun bibihini lárigiñe saragu dan, mégeiwati lun badügün lirahüñü áfaaguni lubaragiñe.

KA UAGU LUNTI LUBÉI BADÜGÜNI?

Ladügüba bibihini le uágubei báfaagua lúntima bafiñerun buougua, lúntima buidu lan banaagun bungua hama bumadagu luma lun gúndaatima ban.

Afiñetimaabadibu buougua. Anhein bibiha lirahüñü katei le uágubei báfaagua, báfaaguba luagu katei le wéinamutimati. Líderagubadibu giñe lira lun bagagibudagun luma turobuli le lánina sagü weyu, kéiburi dan le hadügüdarun amu buagu.

Buídutimabei banaagun bungua hama bumadagu. Hínsiñeti houn gürigia hama hamá gürigia ha subudibalin le habusenrubei ani áfaagua hagía lun habihini. Úati giñe aban igaburi buídutimati lun lederebugudun aban umadaguaü kei dan le hawadigimaridun úara lun habihini le uágubei háfaagua.

Gúndaatimabadibu. Dan le báfaagun luagu aban katei ani ibiha bumuti, gúndaatimati basandiragun bungua.

“Hínsiñeti nun náfaagun luagu le nabusenrubei nadügün ladüga adügati le lun beresegu lan nisaminan. Buiti nasandiragun nungua dan le nibihini le uágubei náfaagua, dan le narihin nárigoun ani gayaraati nariñagun: ‘Ibihanaali!’” (Christopher).

ADUNDEHANI TÍDANGIÑETI BÍBÜLIA: “Le erederuti aríagua garabali mábunagunbei, le erederuti aríaaha dúerirugun, malubahanbei” (Apurichihati 11:4).

KA GAYARAABEI BADÜGÜNI?

Lun báfaagun luagu le babusenrubei badügün ani ibihabeime, falabei adundehani burí le.

Anuadirabéi kaba lan uagu báfaagua. Bürübei sun le babusenrubei badügün, lárigiñe, anuadirabéi kaba lan uagu báfaagua furumiñe.

Saminabéi ida luba lan bibihini. Adügabéi le lau kada aban lídangiñe katei le uágubei babusenra báfaagun:

• Anuadirabéi kaba lan dan badügei.

• Bürübei kada aban lídangiñe katei le lunbei badügüni lun bibihini.

• Saminabá luagun burí turobuli le úmabei gayara lan badunragun luma ida luba lan bagagibudagun luma.

Adügabéi. Mama mosu lidan lan lubudubu sun katei lubaragiñe bagumeserun. Saminabéi ka lan katei lunbei badügüni furumiñe lun bibihini le uágubei babusenra báfaagun ani adügabéi. Arihabéi átirihali lan bawanserun lidan lirahüñü katei le ibiha báalibei.

ADUNDEHANI TÍDANGIÑETI BÍBÜLIA: “Aransehani le saminawati buidu, buiti lasalirun” (Ariñawagúni 21:5).