Ida liña lamainirúniwa wawadigimari lidan sun ubóu?

Wagía gefentiña luagu Heowá, sagü irumu adügatiwa ani afanreinha wagía saragu míñunu Bíbülia tuma burí amu agumeiraguagüdüni ani maguburahantiwa tuagu; bunaguatiwa giñe Luban Wadamuridagun tuma burí áfisi to hani gefentiña luagu Heowá ani ténitiwa tun lun magadeirun tan; ru wamuti giñe hemegeirun saragu misionerugu houn luma houn eseriwidutiña Betelirugu, ani óunahatiwa giñe ídemuei lidoun burí fulasu le ñein lumuti chagaguaü kéiburi durumandei o hárabaganali. Halíagiñe san láfurida seinsu lun sun burí katei le?

Mamuriahantiwa diisi lídangiñe kada san ani másügüragüdüntiwa ágeidinaü lun labudahóun seinsu. Íbini mégeiwa lan bandi seinsu lun letenirúniwa lun wadagimanu lánina apurichihani, mamuriahantiwa seinsu hama gürigia. Lóugiñe san irumu guentó lúmagiñe labürüdǘn tidan tibiaman Garüdia Atalaya luagu chouru wamani líderaguñadiwa lan Heowá. Lárigiñe ariñagatu: “Maweiyasunbei [wóundarun] ebegira ídemuei hámagiñe gürigia”. Ani ítara liña (Matéu 10:8).

Amainirúati lau budagia lau gundaü. Gíbetiña gürigia hínsiñehabutiña lun wawadigimari lánina arufudahani tídangiñeti Bíbülia ani íderagua hamutiwa lau hani budagia. Wagía gefentiña luagu Heowá ídehatiwa lau wadaani, were, luma waseinsun lun gayara lan wadügüni lugundan Bungiu lidan sun Ubóu (1 Krónikasi 29:9). Tidan Luban Wadamuridagun luma lidan burí fulasu le ñein lubéi ladǘguwa adamurini, anuhein burí gafu to ídanboun gayara lan híchugun sun ha busentiña híchugun budagia. Libe-agei budagia le weresibirubei, hámagiñe gürigia mégeihabutiña liabin ha ítarabaña kei würi hilaali túmari to uáguboun layanuha Hesusu buidu ladüga tíchugun bián gáwanaü tidoun gafu ténpulurugu (Lúkasi 21:1-4). Furumiñeguarügü gürigia gayarati lareidun seinsu lun líchugun budagia “keisi lasandiruni tidan lanigi” (1 Korintuna 16:2; 2 Korintuna 9:7).

Chouru wamuti lasigiruba lan Heowá ánhingichoun hanigi gürigia ha busenbaña híchugun uéiriguni lun lau harisin lun hasigirun ídeha lidan wadagimanu lánina lapurichihóun Larúeihan Bungiu lun gayarabei lan lagunfulirúniwa lisuuni (Ariñawagúni 3:9).

• Ka idan larihíwa amu lan wóundarun luéi le líbiri relihión?

• Ida liña layusurún budagia?