Hosué hama gabaónna

Fureseti lasubudirúniwa le asuseredubei Herikó lidan amu burí fulasu Kanán. Ábati hóundaragun urúeigu lun hageindagun hama ísüraelina. Ánhañati gabaónna, amu katei hasaminarubei hadügün. Dáütiña daüguaü to binaduharu, ábati houdin ariñaga lun Hosué: “Lídangiñe fulasu díseti wayabin. Aganbaadiwa luagu Heowá luma luagu sun le ladügübei huagu Ehiptu luma Moabü. Füramasebá woun mageindagunbadün lan wama, ábameti weseriwidun hun”.

Afiñeti Hosué houn, ábati lariñagun houn mageindagunbei lan hama. Ǘrüwa weyu lárigiñe, aba lasubudiruni mama lan lídangiñe fulasu díseti hayabin. Ñein lan Kanán hawinwanda. Ábati lálügüdüniña Hosué gabaónna: “Ka uagu heyeedawa?”. Hariñaga lun: “Ladüga wanufude, lugundun subudi wamuti lageindaguña lan Heowá le Hubungiute huéigiñe. Adüga humá lubeiti fulesei woun, máfaragua humawa”. Gúnfuli lumuti Hosué le füramase lubéi, ani ígira lumutiña wínwanñu.

Murusun dan lárigiñe, aba hayabin seingü urúeigu kananna hau sun hasudaranigu ageindagua hama gabaónna. Éibugati Hosué hama lisudaranigu sun áriebu lun houdin esefuraña. Laruganbei, gumesetiña ageindagua lúmagiñe binaafin. Aba hanurahan kananna lidoun sun fulasu. Meberesenga halíñoun lan houdin, adügati Heowá lun léiguadun huya dereguati le wéinamuti hawagun. Ábati lamuriahan Hosué luma Heowá lun ladügün lun lerederun weyu rara. Ka uagu lamuriahei Hosué lira anhein mararamungili lubéi meha léibaagun weyu lubaragiñe lira? Ladüga weiri lan lafiñen luagu Heowá. Málüdünti weyu darí hagañeiruniña ísüraelina urúeigu kananna hama hasudaranigu.