Ka meha ladügübei Hesusu dan le ya lubéi ubouagu?

Liibe-agei dan, dan le hasaminarun gürigia luagun Hesusu, saminatiña luagun aban irahü figigili, luagun aban profeta chuti lau o luagun aban wügüri hilamémeeli. Afiñetün san lídehaba lan waturiahan buidu luagu libagari Hesusu ya ubouagu lúntima wasubudiruni buidu? Lidan arufudahani le, warihiba fiu lídangiñe katei wéiriti lubuidun le meha ladügübei Hesusu luma ida luba lan lahuudun hun.

1. Ka meha dasi gebegitimabei lun Hesusu?

Líchuguni Hesusu “uganu le luáguti larúeihan Bungiu houn” gürigia ligía meha dasi gebegitimati le lagunfulirubei (aliiha huméi Lúkasi 4:43). Apurichiha lumuti uganu buiti luáguti ladügüba lan meha Bungiu aban arúeihani, le lunbei laransehani sun haturobulin gürigia.a Sügüti ǘrüwa irumu dimí apurichihei uganu gíchigaditi gurasu le lau ubebeni (Matéu 9:35).

2. Ka meha uagu ladüga Hesusu milaguru?

Anihein saragu abahüdaguni tidan Bíbülia le arufudubalin lubafu Bungiu “lau milaguru luma burí seini le ladügübei [...] lídangiñe [Hesusu]” (Adügaü 2:22). Ruti Bungiu ubafu lun Hesusu lun lagalumadun luriban dan, léigagüdün saragu milu gürigia, lareidaguagüdün sánditiña luma lun ladügün lunya habagaridun fiu hilaaña (Matéu 8:23-27; 14:15-21; Márükosu 6:56; Lúkasi 7:11-17). Arufuda lumuti milaguru le meha ladügübei Hesusu Bungiu lan óunahabalin. Arufuda lumuti giñe woun gabafu lan Heowá lun laransehani sun waturobulin.

3. Ka gayaraabei wafurendeiruni lídangiñe ligaburi lawinwandun Hesusu?

Súnwandan gaganbadi lan meha Hesusu lun Heowá (aliiha huméi Huan 8:29). Lau sun áluga hamá meha amu gürigia lun hararamuni, adüga lumuti meha Hesusu sun le lariñagubei Lúguchi lun lidan sun libagari. Arufudati le gayara lan heseriwidun gürigia lun Bungiu íbini laganagua lénrengunga. Ítara liña líchugun Hesusu aban hénpulu woun lun wafalaruni (1 Féduru 2:21).

5. Arufudahati meha Hesusu katei le wéiriti lebegi

Apurichiha lumuti meha Hesusu uganu buiti luáguti Larúeihan Bungiu, arufudaha ligía katei le gayaraabei líderaguniwa lidan wabagari. Ariha wamá fiu hénpulu lidan yanu le líchugubei Hesusu luéigiñe aban wübü. Aliiha huméi Matéu 6:14, 34 luma 7:12, ábameti hayanuhan luagu álügüdahani burí le:

• Ka adundehani buiti líchugubei Hesusu lidan burí bérusu le?

• Afiñetün san gayara lan líderaguniña adundehani burí le gürigia uguñe weyu?

6. Adügati meha Hesusu milaguru

Ruti meha Heowá ubafu lun Hesusu lun ladügün saragu milaguru. Lun harihin aban hénpulu, aliiha huméi Márükosu 5:25-34 o ariha huméi BIDÉU. Ábameti hayanuhan luagu álügüdahani burí le:

BIDÉU: Tareidagun aban würi lídangiñe tisandi (5:10)

• Según le warihibei lidan bidéu, ka meha tachoururubei würi to sándiboun?

• Ka hínsiñebei hun luagu milaguru le?

Aliiha huméi Huan 5:36, ábameti hayanuhan luagu álügüdahani le:

• Ka meha larufudubei milaguru le ladügübei Hesusu?

LE HAFURENDEIRUBEI

Apurichiha lumuti meha Hesusu uganu buiti luáguti Larúeihan Bungiu, adügati milaguru ani gaganbaditi lun Heowá lidan sun katei.

Águyuguagüdüni

• Kátima wadagimanu ladügübei Hesusu dan meha le ya lubéi ubouagu?

• Ka larufudubei milaguru burí le ladügübei Hesusu?

• Ka burí katei le gayaraabei lahuudun woun lidan wabagari larufudahabei Hesusu?

FURENDEI HUMÁ LANWOUN

Kátima uganu lapurichihabei Hesusu?

“Ka uagu súdini lubéi Larúeihan Bungiu lun Hesusu?” (Garüdia Awisahatu, to lánina 1 lidan diisi-hati, irumu 2014)

Ariha huméi ka lan uagu chouru wabalin susere lan burí milaguru le meha ladügübei Hesusu.

“Los milagros de Jesús: ¿qué puede aprender de ellos?” (La Atalaya, to lánina 15 lidan sedü-hati, irumu 2004)

Aliiha huméi ida liña lan lasansiruni aban gürigia libagari lárigiñebei lafurendeirun mámarügüñein lan meha luouguoun Hesusu lasaminara.

“Lo más importante de mi vida era yo” (La Atalaya, to lánina 1 lidan diisi-hati, irumu 2014)

Ariha humá aban lísüta lau katei burí súdiniti le meha ladügübei Hesusu, según le ladügübei furumiñe.

“Libagari Hesusu ubouagu” (Adundehani lun taturiahóun Lererun Bungiu, seksióun 4)