Heresibiruba saragu abinirúni anhaün abadiseira!

Ariñagati Hesusu mosu lan wabadiseirun lun kristiánugu wamá (aliiha huméi Matéu 28:19, 20). Ka mini lubéi badisei? Ka lunbei ladügüni aban gürigia lun labadiseirun?

1. Ka mini lubéi badisei?

Lídangiñe güriegu liabin dimurei badisei ani abulucha dúnarugun mini lubéi. Dan meha le labadiseirunbei Hesusu, bulugüdawati lidoun duna Hordán, lárigiñe, aba láfuridun “dúnarugugiñe” (Márükosu 1:9, 10). Dan le habadiseirun kristiánugu inarünitiña, bulugüdawatiña giñe sunsuinagubei lidoun duna.

2. Ka larufudubei aban gürigia dan le labadiseirun?

Dan le labadiseirun aban gürigia, arufuda lumuti deregeguaali lan lungua lun Heowá. Ida liñati lederegeragun aban gürigia lungua lun Heowá? Lau ladügün aban furíei lun Heowá le ídanbei lariñaga lun busén lan leseriwidun lun lun súnwandan. Adügǘwati furíei le lubaragiñe badisei. Lidan, aba füramase lan gürigia lun Heowá lúnrügüba lan láhuduragua ani ladügǘniwa lan lugundan Bungiu ligíatimaba lan un letenira lidan libagari. Ariñagati Hesusu: “Le busenti lafalarunina, bulieiléi káteiñein lan”, mini lan le mosu lan láyeihani gürigia ligía Hesusu, gaganbadi ligíame lun larufudahan (Matéu 16:24). Adügati lederegeragun gürigia lungua luma labadiseirun lun gamadagua lan luma Bungiu luma hama ha áhuduragubaña lun.

3. Ka lunbei ladügüni gürigia lun labadiseirun?

Anhein busén hubéi habadiseirun, furumiñe mosu hafurendeirun luagu Heowá, héregüda humeime hafiñen luagu (aliiha huméi Ebüréu 11:6). Éibume laganwoundun hisubudin luma hafiñen, hínsiñetimabei Heowá hun. Chóuruti ladügüba lan lira lun busén humá hapurichihan luagu luma lun úaragua lan ligaburi hawinwandun luma lugumadin (2 Timotéu 4:2; 1 Huan 5:3). Danme le “hagaburidun keisi lunti lan hagaburidun lánigu” Heowá, másiñati hanúadirun lun hederegeruni hibagari lun luma lun habadiseirun (Kolosana 1:9, 10).a

SIGÍ HUMÁ AFURENDEIRA

4. Le wafurendeirubei lídangiñe labadiseirun Hesusu

Lun hafurendeirun amu katei luáguti labadiseirun Hesusu aliiha huméi Matéu 3:13-17. Ábameti hayanuhan luagu álügüdahani burí le:

• Aban meha san irahü figigili Hesusu dan le labadiseirunbei?

• Ida liña meha labadiseirun? Séwarügüti san murusun duna lábulugun?

Lárigiñe labadiseirun Hesusu, aba lagumeserun adügei wadagimanu espechaliti le líchugubei Bungiu lun. Aliiha huméi Lúkasi 3:21-23 luma Huan 6:38, ábameti hayanuhan luagu álügüdahani le:

• Lárigiñe labadiseirun Hesusu, ka dasi líchugubei furumiñe lidan libagari?

5. Gayaraati hagunfulirun lau le mégeiwabei lun habadiseirun

Másiñati hasandirun anufudei láurügü hasaminarun luagun hederegeragun hungua lun Bungiu luma lun habadiseirun. Lau sun lira, anhaün asigira afurendeira luagu Heowá luma asubudirei buidu, chóurutimabei hasandiragun hungua lun hadügüni lubuidun katei le. Lun hasubudirun fiu gürigia ha adügübalin lira, ariha huméi BIDÉU.

BIDÉU: Derebugugüdabei bumadagua luma Heowá (1:11)

Aliiha huméi Huan 17:3 luma Santiagu 1:5, ábameti hayanuhan luagu álügüdahani le:

• Ka gayaraabei líderaguni aban gürigia lun laranserun lubá labadiseirun?

1. Deregeguatiwa woungua lun Heowá dan le wariñagun lun busén wamá weseriwidun lun lun súnwandan.

2. Dan le wabadiseirun, warufuduñein houn amu deregeguaadiwa lan woungua lun Bungiu.

6. Dan le wabadiseirun, aba hádangiñehadiwa lan liduheñu Heowá

Dan le wabadiseirun, aba hádangiñehadiwa lan iduheñu ha lídanbaña úarani lidan sun ubóu. Meberesenga halíana lan wagía ni le winwan wamaalibei, ligiaméme wafiñenbei súngubei ani úaraguati wawinwandun luma lilurudun Bungiu. Aliiha huméi Sálumu 25:14 luma 1 Féduru 2:17, ábameti hayanuhan luagu álügüdahani le:

• Según larufuduni bérusu burí le, ka buiti lanügübei badisei?

LE HAFURENDEIRUBEI

Ariñagati Hesusu mosu lan wabadiseirun lun kristiánugu wamá. Lun wibihini lira, mosu wéredagüdüni wafiñen luagu Heowá, gaganbadi wamá lun lilurudun luma wederegeragun woungua lun.

Águyuguagüdüni

• Ka mini lubéi badisei ani ka uagu lunti lubéi wabadiserún?

• Ka larufudubei badisei?

• Ka lunbei ladügüni aban gürigia lubaragiñe lederegeragun lungua lun Bungiu ani badisei ligía?

FURENDEI HUMÁ LANWOUN

Furendei huméi ka lan inarünibei luagu badisei luma ka lan iyeenibei.

“Ka mini lubéi badisei?” (Ariñahani lídangiñeti jw.org)

Arihaya humá fiu adundehani le gayaraabei líderagunün lun hibihin habadiseirun.

“Ínchaha lumutiwa ínsiñeni luma eteingiruni le wasandirubei luagu Heowá lun wabadiseirun” (Garüdia Awisahatu, ǘrüwa-hati, irumu 2020)

Aliiha humá luagu aban wügüri le anúadirubei labadiseirun mama luagu dagaguarügü lan luagu.

“Querían que descubriera la verdad por mí mismo” (La Atalaya, to lánina 1 lidan bián-hati, irumu 2013)

Ariha huméi ka lan uagu buidu lubéi lun háfaagun lun habadiseirun luma ida luba lan haranserun lubá.

“¿Debería bautizarme ya?” (Lo que los jóvenes preguntan. Respuestas prácticas, bolumen 2, kapítulu 37)