Ida luba laritawagúniwa lounwen Hesusu?

Lidan arütíkulu le, gayarabei hadariruni tidan hibibülian guánarügü óunabagülei lun álügüdahani le adüga humaalibei húniwagua. Ánhadün busén gayarabei hakutihani gefentiña luagu Heowá óunabagülei úara huma.

1. Ida liña lariñagun Hesusu lun laritawagúniwa lounwen?

Ariñagati Hesusu houn ha afalarubalin lun lan haritaguni lounwen lau hayusurunu fein tuma diwéin kei sínbolu. Mini tan fein lúgubu Hesusu ani diwéin mini tan lita. (Aliiha huméi Lúkasi 22:19, 20.)

Maganatu meha fein to layusuruboun Hesusu lébini. Tidan Bíbülia yusuwati lébini kei sinbólu lánina figóu. Ligíati aban meha sínbolu buitu fein tuguya lánina lúgubu Hesusu le mafigounbei. Líchuguni lúgubu kei sákürifisiu adügati lun lagumuchagun sákürifisiu hani animaalugu le meha adügǘbei lábugiñe Lilurudun Moisesi (Ebüréu 10:5, 9, 10). Aban sínbolu diwéin lánina hitaü gebegiti le láwiyurubei Hesusu kei sákürifisiu lun ferudunawa lan wafigoun. (Aliiha huméi 1 Féduru 1:19; 2:24 luma 3:18.)

2. Ídaba waritaguei lounwen Hesusu?

Hilati Hesusu lidan Luéyuri Esefuruni 14 lidan nisán (hahatira huríu). Gumesetiña huríu abahüdei weyu lárigi lálüdün Weyu. Guñoun lánina 14 lidan nisán hou lumuti Hesusu éigini le lánina Luéyuri Esefuruni úara hama lani apostolugu. Lárigiñeti aba lagumeseruni aban iseri efeduhani: aban adineruni lun laritawagún lounwen. (Aliiha huméi Lúkasi 22:14, 15.)

Uguñe weyu, haritagua hamuti lumutuniña Bungiu lounwen Hesusu, ligía layusurubei Bungiu lun lesefuruniña sun gürigia lídangiñe figóu luma óunweni (Áfuriduni 12:5-7, 13, 17). Ábanrügüñein meha wéiyaasu luagu irumu ladügǘn lufeduna Luéyuri Esefuruni, ligíati ábanrügüñein giñe wéiyaasu laritawagún lounwen Hesusu lidan irumu, lárigiñe lálüdün weyu 14 lidan nisán según kalendariu tídangiñeti Bíbülia. (Aliiha huméi Huan 1:29.)

3. Kátaña éigibaña tídangiñe fein gurá hagía tídangiñe diwéin?

Danbei le líchugunu Hesusu diwéin houn ha afalarubalin, aba lariñagun: “Kopu le tau diwéin to, liseinin iseri lidaradun Bungiu huma.” (1 Korintuna 11:25). Aba lerederun iseri daradu leweñegua daradu le lánina Lúrudu le meha ichugúbei lun Moisesi, le ídanbei füramasei lan Bungiu houn ísüraelina ánhaña lan ñüdün lau le lubeibei lidan sun katei, lumutuniñabaña lan (Áfuriduni 19:5, 6). Gama lumoun, mídintiña ísüraelina lau le lubeibei Bungiu. Ligíati ladügünbei Heowá aban iseri daradu. (Aliiha huméi Heremíasi 31:31.)

Adüga lumuti daradu le hama 144,000 gürigia. Lau iseri daradu le lanügüba Bungiu abiniruni hádangiñe fiú gürigia houn saragu. Seremei lun daradu le habihiba saragu míñunu gürigia lídangiñe sun néchani abiniruni le lánina ibagari magumuchaditi lidan aban paraísu ya ubouagu. Añahein fiú hádangiñe 144,000 eseriwida lun Bungiu uguñe weyu ya ubouagu. Hagíarügüñanu gayara héigin tídangiñe fein ani gurá hagía tídangiñe diwéin to lídanboun kopu “liseinin iseri lidaradun Bungiu”. (Aliiha huméi Lúkasi 12:32 luma Arufudúni 14:1, 3.)

4. Ka buiti lanügübei Aritaguagülei luagu lounwen Hesusu woun?

Aritaguagülei irumu-auti luagu lounwen Hesusu íderagua lumutiwa eteingirei lueirin línsiñehabu Heowá. Ladüga línsiñehabu óunaha lumuti Liráü ubouagun lun lounwen luagu wafigoun. Ligíati dan le wachülürün lidoun Aritaguagülei, lunti wasaminarun luagun buiti le lanügübei lounwen Hesusu woun luma luagu ida luba lan warufudun teinki wamani Heowá luma Hesusu luagu le hadügübei wawagu. (Aliiha huméi Huan 3:16 luma 2 Korintuna 5:14, 15.)

Hadeiruba lanwoun ariñahani lidan páhina 206 darí 208 tidan líburu to, hadügün gefentiña luagu Heowá. Kátima san tarufudahabei Bíbülia?