ÁLÜGÜDAHANI BURÍ TUAGU BÍBÜLIA
Ka uagu laguahóua lun Hesusu Liráü Bungiu?
Mániti Bungiu aban weiriou lun garáü lan tau. Ligía adügübalin sun katei le gabagaribei. Gama lumoun, kei súngubei lubéi wagía adügǘwatiwa lau ubafu lun wáyeihani ligaburi, wáwati lun furumiñeti wügüri, Adán, “[liráü] Bungiu”. Ítarameme, wáwati giñe lun Hesusu ‘Liráü Bungiu’ lugundun adügǘwati lau igaburi libe ligaburi Lúguchi. (Aliiha huméi Lúkasi 3:38 luma Huan 1:14, 49.)
Ídabuga ladügǘwa Hesusu?
Adüga lumuti Bungiu Hesusu lubaragiñe ladügüni Adán. Le linarün katei, ligía furumiñeti gürigia le ladügübei, ani lau lídehan ligía ladügüni sun le líbiri katei, íbini ánheligu. Ligía tariñagunbei Bíbülia “ligía ígiramaübei, le lóugiñebei sun katei le adügǘbei”. (Aliiha huméi Kolosana 1:15, 16.)
Lubaragiñe nasirua lan Hesusu Belén, aban meha sífiri ligía sielu. Dan le lachülürünbei dan, aba lásügüragüdüni Bungiu libagari Hesusu turageirugun María lun nasirua lan kei wügüri. (Aliiha huméi Lúkasi 1:30-32; Huan 6:38 luma 8:23.)
Ka uagu ladüga Bungiu lun nasirua lan Hesusu ubouagu kei aban wügüri? Ka wadagimanu espechaliti ladügübei? Anhein háluaha óunabagülei tidan Bíbülia, harihibei laganwoundun hisubudin luma heteingiradi luagu le ladügübei Bungiu luma Hesusu luagu wafulesein.