Ida Luba gagurabaguadi wamá?

1. Ka uagu gayara lubéi weferidiruni waguraasun?

GUMESETI lagumuhóun dan lun ubóu le lidan irumu 1914, dan le lagumeserunbei Larúeihan Mesíasi. Kei resultóu lánina wuribu le adügǘbei sielu, aba láguruni Hesusu Satanási ubouagun hau sun lumafianun (aliiha huméi Arufudúni 12:7-9). Ariñagatu Bíbülia luagu “murusunrügaali lan lidaani” Satanási (Aruf. 12:12). Gama lumoun, duraali lagumuhóun dan le saragu irumu, ani gayarati hasaminarun fiú lubúeingu Bungiu gíbeyaali lan dan lidura lagumuhóun burí dan le. Féridi wamaali san waguraasun lidan awanha lan agurabahei le lunbei ladügüni Heowá?

2. Kaba wakutiha lidan arütíkulu le?

² Peliguruti magurabaguadi, lugundun gayarati ladügün lun wóuserun sin lichú aau. Kaba íderaguawa lun wagurabahan sin weferidiruni waguraasun? Lidan arütíkulu le lichugúba óunabagülei lun burí álügüdahani le: 1) Ka leksióun lánina gurasu wafurendeirubei lúmagiñe profeta Mikeasi? 2) Kaba burí sügǘ amakürei lagumuchun wagurabahan? 3) Ida luba weteingiruni Heowá luagu luguraasun?

KA WAFURENDEIRUBEI LÍDANGIÑE LANI MIKEASI HÉNPULU?

3. Ida liña meha gádantiña ísüraelina lidan lidaani Mikeasi?

³ (Aliiha huméi Mikeasi 7:2-6.) Ariha lumuti Mikeasi ida liña lan agadeireina lan hamadagua ísüraelina luma Heowá lábugiñe larúeihan Aasi, aban urúei wuribati, darí lun heferidiruni hamadagua luma Heowá. Ariñagati meha profeta luagu ítara haña lan ísüraelina ha múaragunbaña kei “hiyu” ani “kei aban búbugati”. Ítara kei límiruniña hiyu sun ha aguurutiña luagu, adügatiña meha ísüraelina wuribatiña hagía dañu lun sun le ayarafaduti houn. Aba laribadun katei hadan darí lun harihini iduheguaü kei ni kata. Kei subudi lani Mikeasi siñabei lan ladügün ni kata lun lasansiruni gádantiña, aba ladaarunu lanigi lun Heowá ani aba lagurabahan lau gurasu. Chouru lumuti meha ladügüba lan Heowá somu katei danme le lachülürün oura lun ladügüni.

4. Ka burí lénrengunga úmabei wagagibudagua?

⁴ Ítara kei meha Mikeasi, wawinwanduña haganagua gürigia ha hawouguounrügüti hasaminara. Saragu hádangiñe ‘meteingiraditiña, minebenti katei lánina Bungiu houn ani mínsiñehabutiña’ (2 Tim. 3:2, 3). Sun wagía nidiheritiwa dan le warihin hóuserun wánigu paaná lidan wadagimanu, leskuelarugu o wabesinanigu kamá hamuga hagía súdinitimabaña ubouagu. Gama lumoun, gagibuguatiña fiú lubúeingu Heowá luma aban katei wuribatimati. Ariñagati meha Hesusu houn lani disipulugu hasufuriruba lan éibaahouni hámagiñe haduheñu, ani dimurei burí le layusurubei lun lafuranguagüdüni lani profesía genegeguati luma le lídanbei Mikeasi 7:6. Ariñagati Hesusu: “Lau niabin, hafanreinraguba ha mafiñenbaña nuagu hama ha afiñebaña nuagu; lawuribuhaba wügüri luma lúguchi, isaani tuma túguchu, ídiñu tuma tágürü; lagaganiraguba kada aban hama liduheñu” (Mat. 10:35, 36). Ma lénrengun lawandúniwa habulan iduheñu ha amu hafiñen wawéi! Ánhawa agagibudagua luma óuchawaguni le, mígiraguagüda wamá woungua lun héredun waduheñu o wamadagu wawagu. Lubaragiñe lira, sigí wamá úaragu lun Heowá ani agurabaha wamá lau gurasu lun laransehani katei. Ánhawa amuriaha ídemuei luma, líchugubei erei luma lichú aau le wemegeirubei lun wawandun.

5, 6. Ida liña meha labiniruni Heowá Mikeasi, ani ka meha profesía marihin lubéi lagunfulirun?

⁵ Ariha lumuti Mikeasi lafayeiruáha luagu luguraasun. Ariha lumuti ida liña lan lagumuchun Aasi lau sun luriban larúeihan, ani ariha lumuti giñe Esekíasi, le liraü Aasi, ibihei arúeihani luma lagumeseruniya áhuduraguni inarüniti. Gúnfuliti giñe asiadiruni le meha lariñagubei Heowá lun lariñaguni Mikeasi kóntüra Samaria dan le hebelurunbei asiriana árügüdei diisi türibu le lani Ísüraeli (Mik. 1:6).

⁶ Gama lumoun, marihin lumuti meha Mikeasi lagunfulirun sun profesía le lariñagubei lau lídehan Heowá. Kei hénpulu, abürühati: “Lídanme lagumuhóun dan, lederebugüdüwaba wübü le ñein tubéi litenpulun Wabureme. Ligíaba wübü íñutima; íñubei sügǘ lau furumiñeguarügü wübü. Hayabiba sun néchanigu luagun; hayabiba saragu gürigia ariñageina: ‘Higougu, wawarira luagun luwübürin Wabureme’” (Mik. 4:1, 2). Íbini meha marihin lani Mikeasi lagunfulirun profesía le, ladüga lounwen saragu dan lubaragiñe lagunfulirun, desidírühali meha úaragua lan lun Heowá darí lounwen, meberesenga ka lan hadügübei amu. Ani ariñagati: “Ha híbiri gürigia, falá hamutiña ani gaganbaditiña houn habungiutegu, ánheinti wagía Wabureme [Heowá] le Wabungiute wafalarubei ani gaganbaditiwa lun súnwandan” (Mik. 4:5). Gayarati meha lagurabahan Mikeasi lau gurasu lidan dan hénrenguti ligía ladüga weiri lan lafiñen luagu lagunfulirubei lan Heowá sun lani füramasei. Anha, afiñeti meha profeta úaraguati le luagu Heowá.

7, 8. a) Ka uagu gayara lubéi wafiñerun luagu Heowá? b) Kaba wadüga lun furese lan lásügürün dan woun?

⁷ Afiñetiwa san luagu Heowá ítara? Anihein saragu resun lun wafiñerun, lugundun ariha wamaali lau wagu lagunfulirun profesía le tídanbei liliburun Mikeasi. Lidan “lagumuhóun dan”, saragu míñunu gürigia lílana sun néchani, türibu luma iñeñein warihaña luagun “luwübüri Wabureme”. Saragu hádangiñe lídangiñetiña ageiraü le gáganiguati, ani íbini ítara, adügaaña “awouhagülei tau hefeinte” ani máhaaña lun houdin awuribuha (Mik. 4:3). Ma lueirin chansi hadan wamá lubúeingun Heowá ha darangilabaña!

⁸ Maribanti busén wamá lagumuchun Heowá lau lagübüri ubóu le lau lóufudagun. Gama lumoun, lun wagurabahan lau gurasu mégeitiwa warihini katei kei larihini Heowá. Rúhali aban weyu lun lasiadiruniña gürigia. Ani layusurubei Hesukrístu, “aban wügüri le anúadira láalibei”, lun ladügüni katei le (Adü. 17:31). Gama lumoun lubaragiñe ladügüni, líchuguña chansi houn sun hawuyeri gürigia lun “hayabin lun hasubudiruni inarüni”, lun hawinwanduni le hafurendeirubei luma lun hasalbarun. Anihein saragu ibagari lidan peliguru (aliiha huméi 1 Timotéu 2:3, 4). Ánhawa etenira lun warufudahani inarüni luáguti Bungiu houn gürigia, chátibei wasandiruni dan. Yarafa madise, háfuga sódinibei lagumuchun dan le. Ani danme le lasuseredun katei le, wéiribei wagundan lau beresegu wamá apurichihei Larúeihan Bungiu!

KA SUGǗ LUNBEI LAMAKÜRÜNI LAGUMUCHUN WAGURABAHAN?

9-11. Gúnfuli haali san profesía le lídanbei 1 Tesalónikana 5:3? Afuranguagüda huméi hóunabagüle.

⁹ (Aliiha huméi 1 Tesalónikana 5:1-3.) Yarafa madise, hariñaguba néchanigu: “Lídanñein darangilaü luma achoururuni sun katei”. Anhein mabusenrun wabéi lárügüdüniwa sügǘ le magaradahanga, lunti wasigiruni adundehani le líchugubei apostolu Pábulu lidan 1 Tesalónikana 5:6: “Lunti agagudúañu wamá, súruañu wagíame”. Líderagubadiwa wakutihani sügǘ burí le aranserubalin üma lubá ñunsu súdiniti le lun agagudúañu wamá.

¹⁰ Lárigiñe kada aban lídangiñe wuribu le wéinamubei, aba hiñuruni néchanigu hamalali luagu darangilaü. Lárigiñe le furumiñeti wuribu, aba ladügǘniwa Sétanu hani Néchani (Liga de Naciones, lidan chumagü) lun gayarabei lan hibihini darangilaü lun sun ubóu. Lárigiñeti libiaman wuribu, hibe-agei gürigia aba híchuguni hemenigin luagu Óundaruni hani Néchanigu (Organización de las Naciones Unidas, ONU). Dandu polítiku kei lábutigu relihión ru hamaali hemenigin luagu tanügübei lan biángubei óundaruni to darangilaü houn sun gürigia. Kei hénpulu, írida hamuti lílana Óundaruni hani Néchanigu irumu 1986 kei Irumu lánina Darangilaü lidan sun Ubóu. Lidan irumu ligía, óundaraguatiña urúeigu hama lábutigu relihión luma tichügüdina Ligilisi Katóliku lidan uburugu italiana le gíribei Asís lun hafurieidun luagu darangilaü.

¹¹ Gama lumoun, ni ñunsu luáguti lídanñein lan danrangilaü luma ichouruni sun katei le ariñawagubei lidan dan ligía, ni amu ñunsu kei lira madügünti lun lagunfulirun profesía le lídanbei 1 Tesalónikana 5:3. Ka uagu? Ladüga masuseredungili “günringuaü hawagun sódini”, le uágubei layanuha profesía.

12. Ka katei subudi wamaalibei luagu ñunsu le ariñagubei “Lídanñein darangilaü luma achoururuni sun katei”?

¹² Kaba san íchigei ñunsu súdiniti le lánina ‘darangilaü luma achoururuni’? Kaba hagaradan lábutigu sétanu le ariñagubei kristiánugu hamá (cristiandad) luma amu burí relihión mama inarüniti? Ida luba ñein hamá gumadimatiña ha lílana ámuñegueinarügü néchani lidan ñunsu súdiniti le? Mariñagun tumuti Bíbülia. Meberesenga ida luba lan lasuseredun, o anhein genegebei lubéi inarüniti lan, le wasubudirubei iyeenibei lan le lunbei hariñaguni. Lasigiruba ubóu lábugiñe lubafu Satanási. Wéirihali lagadeirun ubóu ani lasigiruba agadeira. Ligíati, hírubei anhein ígiraguagüda somu wádangiñe lungua lun iyeeni le laburuchaguagüdübei Satanási ani dürügualeime úaraguni le larufudubei lun Bungiu.

13. Ka uagu hágüdahei ánheligu gabafutiña ligarabalin agünrinchawaguni?

¹³ (Aliiha huméi Arufudúni 7:1-4.) Lidan awanha lan agurabahei lagunfulirun 1 Tesalónikana 5:3, añahan ánheligu gabafutiña ágüdahei lanarime garabali le lánina óunwenbu asufuriruni. Ka hagurabahabei? Hagurabahañein lagunfulirun le lariñagubei apostolu Huan: haseyarún ‘lumutuniña Bungiu’, lidan amu dimurei, kristiánugu anúadirutiña.a Danme le gumuhali lagumuhóun aseyaruni, ligíaalime hígiragüdüni ánheligu garabali lánina agünrinchawaguni. Kábati asusereda?

14. Ka arufudubalin luagu yarafaali lan tagünrinchawagun Babilónia to Wéiriboun?

¹⁴ Tagünrinchawagúba Babilónia to Wéiriboun, óundaruni lánina relihión mama inarüniti lidan sun ubóu. Lidan dan ligía, siñabei híderagunun “fulasu burí, gürigia, iñeñein luma néchani” ha uágubaña temenigida. Gumeseediwa ariha seini luagu yarafaali lan tagünrinchawagun (Aruf. 16:12; 17:15-18; 18:7, 8, 21). Furanguti gíbeeña lan adisedutiña tuéi: dandu relihión kei lábutigu relihión wéiriti layanuhóun wuriba hawagu tidan bigibigitu, radiu tuma burí periódiku, arufudati le luagu míbeeña lan gürigia luéigiñe hóubadina. Lau sun lira, ha alidihabarun Babilónia to Wéiriboun saminatiña luagu moun lumuti lan hadiheridun luagu ni kata. Ma lanarime bulíeiguaü! Lárigiñeme lawisahóun luagu “lídanñein [lan] darangilaü luma achoururuni sun katei”, hábürühaba polítiku ha lídanbaña ubóu le lani Satanási luagun relihión mama inarüniti sódini ani hagumuchuba lau sunsuinagubei: úadigiaalime relihión mama inarüniti ubouagu. Furanguti lunti lan wagurabahani sügǘ burí le lau gurasu (Aruf. 18:8, 10).

IDA LUBA WETEINGIRUNI HEOWÁ LUAGU LUGURAASUN?

15. Ka san uéigiñe madügün láagili lubéi Heowá le lunbei ladügüni?

¹⁵ Íbini weiri lan hawiyeduni gürigia liri Heowá, anihamémegua agurabaha lau gurasu lun lachülürün oura le buídutimabei lun ladügüni le lunbei ladügüni. Ka uagu? Ladüga mabusenrunti lun hagünrinchawagún gürigia ha buídubaña (2 Fe. 3:9, 10). Sandí wamuti san ligiaméme? Lubaragiñe lachülürün luéyuri, gayarati warufuduni seremei wamani gaguraasun lan Bungiu lidan burí igaburi le lunbei wakutihani.

16, 17. a) Ka uagu lunti lubéi wíderaguniña íbirigu ha ígira hamaali hapurichihan luma damuriguaü? b) Ka uagu súdini lubéi lun hagiribudun lun Heowá íbirigu ha ígira hamaalibei heseriwidun?

¹⁶ Íderagua wamaña íbirigu ha lǘhabei mapurichihan hamá madamuridagun hagía. Ariñagati meha Hesusu anihein lan ugundani sielu dan le tadeirún ábanrügü mudún to meha eferidiruboun (Mat. 18:14; Luk. 15:3-7). Furanguti berese lan Heowá hau sun ha arufudubaña ínsiñeni luagu liri, íbini ha meseriwidunbaña lun guentó. Dan le wíderaguniña lun hagiribudun lidoun damuriguaü, ídehatiwa lun lagundaarun dandu Heowá kei lani ánheligu.

¹⁷ Hádanñadün san gürigia ha meseriwidunhañabaña lun Heowá? Háfuga aba mídinhadün lan adamuridagua ladüga ladügün o lariñagun somu íbiri somu katei le gáriti hun. Lüha san lasuseredun katei le? Anhein ítara liña lubéi, álügüdagua humá hungua: “Buídutimahali san nibagari guentó? Gúndaatimatina san? Heowá san achararubei nun, o aban gürigia gafigounti? Óuserañaha láadina san Heowá wuriba?”. Le linarün aban katei, súnwandan larufuduni Bungiu lareini woun. Íbini dan le magunfulirun wamá lau wederegeragun woungua lun, ígirati lun wagundaarun lau katei buiti le ladügübei (Sant. 1:16, 17). Gama lumoun, mabulieida waméi yarafaali lan luéyuri Heowá. Anihán dan lun wagiribudun lun Wáguchi le siélubei luma lidoun damuriguaü, fulasu le chóurutimabei lidan burí lagumuhóun weyu le (2 Lur. 33:27; Ebü. 10:24, 25).

18. Ka uagu lunti lubéi wíderaguniña ha adundehabalin damuriguaü?

¹⁸ Íderagua wamaña ha alidihabalin damuriguaü lau úaraguni. Kei Hóuniri mudún le hínsiñehabuti, adundeha lumutiwa Heowá ani góunigilawa. Lun lira irida laali Liráü keisi Hóuniri mudún le Méinitimabei (1 Fe. 5:4). Añahein hóuniri mudún óunigiraña kada aban hádangiñe mudún ha lídanbaña lóugiñe san milu damuriguaü le yaabei ubouagu (Adü. 20:28). Dan le wíderaguniña ha adundehabalin damuriguaü lau úaraguni, arufuda wamuti lun Heowá luma lun Hesusu luagu seremei waña lan houn luagu sun le hadügübei wawagu.

19. Ida luba gayara lan lidan wamá aban?

¹⁹ Yarafagua wamá wóuniwagua. Ka mini lubéi le? Dan le hagagibudagun súdaragu ha aranseruaaña buidu hama háganiñu, aba hayarafadagun hámagua. Ítara liña hadügün lun hénrengu lan houn áganiñu hebelurun. Le linarün aban katei, hanarimetimaahali lawuribuhan Satanási kóntüra lumutuniña Bungiu. Mámaali lidaani wawuribuhan wámagua, lubaragiñe lira anihán lóurate wayarafadun wóuniwagua, lun feruduna wamani hachara wíbirigu luma lun wafiñerun luagu ladundehan Heowá.

20. Ka lunbei wadügüni guentó?

²⁰ Sun wagía mosu agagudúañu wamá ani mosu giñe ‘gagurabaguadi wamá’. Agurabaha wamá lau gurasu lun lichugúniwa ñunsu luagu “lídanñein [lan] darangilaü luma achoururuni sun katei”, agurabaha waméi giñe lagumuhóun haseyarún kristiánugu anuadirúaaña. Ligíaalimeti hígiragüdüni gádürü ánheligu gabafutiña garabali lánina agünrinchawaguni ani ábame tagünrinchawagún Babilónia to Wéiriboun. Lidan awanha lan agurabahei sügǘ súdiniburiti le, gaganbadi wamá houn ha adundehabarun lóundarun Heowá. Redei wamá lidan aban ani mígiraguagüda wamá woungua lun Satanási ni houn lumafianu, ani sigí waméi adundehani le líchugubei abürühati Sálumu: “Sun huguya ha hemenigibaña luagu Aburemei here humá gaguraasun huguyame” (Sal. 31:24).