ÁLÜGÜDAHANI BURÍ TUAGU BÍBÜLIA
Ida liña lahuudun lounwen Hesusu woun?
Dan le meha ladügünbaliña Bungiu gürigia, busenti meha lun hawinwandun lun súnwandan ubouagu, sin sandi ni óunweni. Gama lumoun, aba maganbadi lan Adán, le furumiñeti wügüri, lun Bungiu ani aba leferidiruni chansi ligía. Kei lirahüñü lubéi Adán sun wagía, galagante wamuti óunweni (Rómana 5:8, 12; 6:23). Óunaha lumuti Heowá, Bungiu le inarüniti, Liráü ubouagun lun lounwen luma lun libihini le meha leferidirubei furumiñeti wügüri. (Aliiha huméi Huan 3:16.)
Hilati Hesusu lun gayara lan wawinwandun lun súnwandan ubouagu. Ka hisaminanbei luagu ibagari magumuchaditi?
Seremei lounwen Hesusu wawagu gayara lubéi ferudunawa lan wafigoun ani anihein haali chansi lun wawinwandun ubouagu lun súnwandan. Ariñaga tumuti Bíbülia ida luba lan ibagari ligía sin aweiyaduni, sin sandi ni óunweni. (Aliiha huméi Isaíasi 25:8; 33:24 luma Arufudúni 21:4, 5.)
Ida luba waritaguni lounwen Hesusu?
Guñoun le lubaragiñebei lounwen Hesusu, aba lariñagun houn lani disipulugu lun haritaguni lounwen lau aban damuriguaü sensiyuti. Waritaguni sagü irumu íderagua lumutiwa lun wasaminarun luagu lueirin ínsiñeni le hasandirubei Hesusu luma Heowá wawagu. (Aliiha huméi Lúkasi 22:19, 20 luma 1 Huan 4:9, 10.)
Lidan irumu le, laritawagúba lounwen Hesusu leindi 14 lidan gádürü-hati, lárigiñe lálüdün Weyu. Amisuraha wamutün lun hachülürün. Híchuguba gefentiña luagu Heowá ha lídanbaña fulasu le ñein lubéi haganawa lanwoun ariñahani hun. (Aliiha huméi Rómana 1:11, 12.)