Gabafutu Lererun Bungiu

1. Ka uagu chouru wabalin gabafu tan Lererun Bungiu? (Ariha humóun iyawaü burí to lídanboun lagumeseha arütíkulu).

KEISI lubúeingu Heowá chouru wamuti luagu “wínwantu [lan] Lererun Bungiu ani gabafu tuguya” (Ebü. 4:12). Ariha wamaali gabafuti lan luganute Bungiu le tídanbei Bíbülia lun lasansiruni wabagari luma habagari amu gürigia. Añahein fiú gürigia lubaragiñebei gefén hamá luagu Heowá, íweruhatiña meha, yúsutiña düroga ani adüga hagía figóu lánina agamariduni. Añahein amu subudiwatiña meha ubouagu o gaseinsuntiña meha, gama lumoun masuuniti meha habagari (Apur. 2:3-11). Seremei Bíbülia, saragu hádangiñe gürigia ha meha féridiguañabaña guentó gemenigihaña ani subudi hamaali kaba lan hadüga lau habagari. Chóuruti aliiha wamaali lan luáguti habagari fiú hádangiñe lidan seksióun “Sansi tumuti Bíbülia habagari”, tidan Garüdia Awisahatu”. Ariha wamaali giñe íbini lan gefén wamá luagu Heowá, sun wagía megei wamuti tídehan Bíbülia lun wasigirun éredagüdei wamadagua luma Heowá.

2. Ka burí asansiruni hadügübei fiú kristiánugu lidan furumiñeti sígulu lau tubafu Lererun Bungiu?

² Maweiriduntu wanigi luagu hadügün saragu gürigia óunwenbu burí asansiruni dan le haturiahanu Lererun Bungiu. Ligiaméme meha asuseredubei houn kristiánugu lánina furumiñeti sígulu ha meha lúnbaña houdin sielun (aliiha huméi 1 Korintuna 6:9-11). Ayanuhati meha apostolu Pábulu hawagu hawuyeri gürigia ha lúnbaña mebelurun hamá lidoun Larúeihan Bungiu, ani lárigiñe aba lariñagun houn kristiánugu: “Añahein hídangiñe, ítara hiña meha”. Gama lumoun, íderagua tumutiña Lererun Bungiu luma sífiri sandu lun hasansirun. Íbini lárigiñe kristiánugu hamá, añahein fiú adügatiña meha figóu wéinamuti ani aba hagadeiruni hamadagua luma Heowá. Kei hénpulu, ayanuhatu Bíbülia luagu aban kristiánu anuadirúaali le meha mósubei labugún. Lárigiñe, aba ladügüni asansiruni le mégeiwabei ani aba lagiribudun lidoun damuriguaü (1 Ko. 5:1-5; 2 Ko. 2:5-8). Ruti gurasu woun warihini asansiruni burí le hadügübei íbirigu lau tídehan Lererun Bungiu.

3. Kaba wariha lidan arütíkulu le?

³ Kei le ru laaru lubéi Heowá Lererun to gabafuboun woun, busentiwa wayusurunu buidu (2 Tim. 2:15). Ligía warihibei lubéi lidan arütíkulu le ka lan lunbei wadügüni lúntima wasagarun buiti lídangiñe tubafu Lererun Bungiu lidan ǘrüwa katei. Furumiñe, lidan wabagari. Libiaman, lidan apurichihani. Ani lǘrüwan, lidan arufudahani luéigiñe plataforma. Líderagubadiwa arütíkulu le arufudei wínsiñehabu luma weteingiradi lun Wáguchi le siélubei, le arufudahabei woun lun wabuidun guánarügü (Isa. 48:17).

LIDAN WABAGARI

4. a) Ka lunbei wadügüni anhein busén wabéi tíderaguniwa Lererun Bungiu? a) Ida liña hadüga lun gadaani humá lun haliihanu Bíbülia?

⁴ Anhein busén wabéi lun tíderaguniwa Lererun Bungiu, lunti waliihanu súnwandan, sagü weyu anhein gayara (Hos. 1:8). Inarüni beresegu wamá, gama lumoun, moun lumuti wígirun lun ladügün wani buligasion le súdinitimabei o somu katei lun maliihan wamanu Bíbülia (aliiha huméi Éfesuna 5:15, 16). Gayarati waliihanu Bíbülia binaafin, furumiñeguarügü oura wéyuagu o guñoun. Sandiguatiwa woungua kei abürühati Bíbülia le ariñagubei: “Wéiriti línsiñe barufudahan nun! Sun weyu nau asaminara luagun!” (Sal. 119:97).

5, 6. a) Ka uagu súdini lubéi hararamagun gürigia asaminara? b) Ida luba wasagarun buiti lídangiñe wasaminarun luagun le waliihabei? c) Ida liña lahuudun hun haliihanu Lererun Bungiu luma hasaminarun luagun le haliihabei?

⁵ Gama lumoun, úati buídurügü lan waliihanu Bíbülia. Mosu wasaminarun buidu luagun le waliihabei (Sal. 1:1-3). Ítararügübei gayara lan wagunfuliruni lichú aau le wadarirubei tidan Lererun Bungiu. Dandu anhoun waliiha tidan gárada o lidan somu máhina, lunti wadügün lun lachülürün le waliihabei tidoun wanigi.

⁶ Ida luba wasagarun buiti lídangiñe wasaminarun luagun le waliihabei? Añahein gürigia, dan le haliihanu Bíbülia aba burí hararamagun ani aba hálügüdagun houngua: Ka san larufudahabei le nun luagu Heowá? Nadügüñein san le ariñawagúbei ya lidan nibagari? Aniheingua san somu katei le ídanbei mosu lan nasansirun?”. Ánhawa araramagua asaminara tuagun Lererun Heowá ani furíei wagía lun, busenbadiwa wafalaruni adundehani le líchugubei woun. Ítara luba wasagarun saragu buiti lídangiñe tubafu Lererun Bungiu lidan wabagari (2 Ko. 10:4, 5).

LIDAN APURICHIHANI

7. Ida luba wayusurunu Lererun Bungiu buidu lidan wapurichihan?

⁷ Ida luba wayusurunu Lererun Bungiu buidu dandu lidan wapurichihan kei dan le warufudahani inarüni houn amu gürigia? Adüga wamuti dan le wayusurunu súnwandan. Ariñagati aban íbiri: “Lun hamuga bidin luma Heowá muna tuagu muna, buguyarügüñadibu hamuga san ayanuha o bígiruñein hamuga Heowá lun layanuhan?”. Ka meha labusenrubei lariñagun? Dan le lan waliihan lun somu gürigia tídangiñe Bíbülia, ítara liña kamá wígiruña lun Heowá lan ayanuha. Gabafutimati aban bérusu le wanúadirun buidu sügǘ lau furumiñeguarügü katei le wariñagubei (1 Tesa. 2:13). Ligía lunti lubéi wálügüdagun woungua: “Dan le napurichihan, áfaaguatina san lun naliihanu Bíbülia sagü gayara lan?”.

8. Ka uagu ua lubéi buídurügü lan waliihan bérusu tídangiñeti Bíbülia houn gürigia?

⁸ Inarüni ua lan buídurügü lan waliihan bérusu tídangiñeti Bíbülia houn gürigia. Ítara kei meha lasuseredun lidan furumiñeti sígulu, hiibe-agei gürigia úati gunfuranda hamani le tariñagubei Bíbülia (Rom. 10:2). Ligía moun lumuti lubéi wasaminarun gunfuranda lani aban gürigia bérusu ladügarügü aliiha wamaali lan lun. Mosu wasagarun dan lun wáguyuguagüdüni dimurei burí le súdinitimabei ani afuranguagüda wameime. Anhein wadüga ítara, gayarabei tachülürün Lererun Bungiu lidoun hasaminan luma tidoun hanigi gürigia (aliiha huméi Lúkasi 24:32).

9. Afuranguagüda huméi lau aban hénpulu ida luba lan wadügün lun hasandirun gürigia inebesei tuagu Bíbülia dan le waliihan somu bérusu houn.

⁹ Danme le waliihan aban bérusu, lunti wadügün lun hasandirun gürigia inebesei tuagu Bíbülia. Gayaraati wariñagun: “Ariha waméi le lariñagubei Bungiu luagu katei le”. Gama lumoun, ánhawa ayanuha luma aban gürigia le lídangiñeti aban échuni mama kristiánu, gayarati wariñagun: “Ariha huméi le lariñagubei abürüdǘni sagüráuti”. O anhein meberesegun lubéi gürigia ligía lau relihión, gayarati wálügüdüni: “Aganbañaha humaali san binadu burí dimurei le?”. Kei le amu habéi gürigia hawariuagua, mosu waranseruni le lunbei wariñaguni según lemegeirun kada gürigia (1 Ko. 9:22, 23).

10. a) Abahüdagua huméi le asuseredubei lun aban íbiri lidan apurichihani. b) Abahüdaha huméi ida liña lan harihini tubafu Lererun Bungiu lidan apurichihani.

¹⁰ Ariha hamaali saragu íbirigu dan le lan hayusurunu Lererun Bungiu lidan apurichihani gani tan aban óunwenbu efekütu hawagu gürigia. Kei hénpulu, abisidahati meha aban íbiri aban gürigia wéiyaali le barühali saragu irumu aliihoun wani garüdia. Luagu aban weyu, lárigiñe lígirunu Garüdia Awisahatu lun gürigia ligía, aba desidírü lan laliihan aban bérusu tídangiñeti Bíbülia lun le áfuachubei tidan garüdia tuguya. Aba laliihani 2 Korintuna 1:3, 4, le ñein lubéi lariñaga luagu Heowá: “Ligía Wáguchibei le gudemehabubei woun; ani aranseñu liña lun líchugun gurasu woun súnwandan”. Ariñagati giñe ñein ruti lan “dǘgüdaguaü woun lidan sun wasufurirun”. Aba tañuludagun lanigi gürigia ligía saragu darí lun lamuriahan luma íbiri ligía lunya laliihani bérusu burí ligía lun. Lárigiñe, aba lariñagun luagu megei hamá saragu gurasu dandu ligía kei lani weiriou ani busén lan laganwoundun lisubudin tuagu Bíbülia. Kei aubei warihei, wéiriti tubafu Lererun Bungiu hawagu gürigia dan le wayusurunu lidan apurichihani (Adü. 19:20).

DAN LE HARUFUDAHAN LUÉIGIÑE PLATAFORMA

11. Ka buligasion hánibei íbirigu ha arufudahabaña luéigiñe plataforma?

¹¹ Sun wagía hínsiñeti woun woudin adamuridagua luma lidan adamurini. Adüga wamuti lun wáhuduragun lun Heowá. Gama lumoun, adüga wamuti giñe lun wasagarun buiti lídangiñe arufudahani le weresibirubei ñein. Chóuruti aban lan lubuidun chansi habihibei íbirigu ha arufudahabaña luéigiñe plataforma, gama lumoun, aban giñe buligasion wéiriti (Sant. 3:1). Ligía lunti lubéi hachoururuni tídangiñeti lan Bíbülia sun le harufudahabei. Anhein huguya lubéi aban hádangiñe íbirigu hagía, ka lunbei hadügüni lun gabafu tan Lererun Bungiu hawagu gürigia ha aganbubalün?

12. Ida luba san lachoururuni íchuguti yanu tuágutima lan Bíbülia layanuha lidan liyanun?

¹² Chouru huméi tuágutima lan Bíbülia hayanuha lidan hiyanun (Huan 7:16). Houcha humá lun madügün lan ligaburi híchuguni yanu o abahüdaguni luma hénpulu burí le hayusurubei lun marihíniwa lan lisudinin bérusu burí le haliihabei. Ani haritagua huméi giñe mama lan ligiaméme haliihan tídangiñe Bíbülia luma harufudahan tídangiñe Bíbülia. Le linarün katei, ánhadün ayusura saragu bérusu, maritagun habéi hibe-agei gürigia bérusu burí ligía. Ligíati, anúadira huméi bérusu burí le lunbei hayusuruni lau duari, ani ígira humá dan lun haliihani, hafuranguagüdüni, híchugun somu hénpulu luma lun hariñaguni ida luba lan wayusuruni lidan wabagari (Neem. 8:8). Anhein aban lubéi yanu le tíchugubei lóundarun Heowá, aturiaha huméi dimurei luma burí bérusu le lídanbei, ani áfaagua humá lun gunfuranda humani ida liña lan úara lan luma ariñahani. Lárigiñe, ábame hanúadahani bérusu burí le lunbei hayusuruni lun harufudahani saminaü le súdinitimabei lidan yanu (hadariruba adundehani le huuti lidan leksióun 21, 22 luma 23 tidan líburu Benefíciese de la Escuela del Ministerio Teocrático). Gama lumoun, súdinitimati hamuriahan ídemuei luma Heowá lun gayara lan hafuranguagüdüni arufudahani gebegiti le tídanbei Lererun (aliiha huméi Ésüdürasi 7:10; Ariñawagúni 3:13, 14).

13. a) Ka efekütu lánibei tayusurún Bíbülia lidan aban adamuridaguni tuagu aban íbiri? b) Ida liña lahuudun tayusurún Bíbülia lidan adamuridaguni hun?

¹³ Ariha waméi óunwenbu efekütu le lánibei tayusurún Bíbülia lidan adamuridaguni tuagu aban íbiri Australiana. Wuribati meha tásügürüni íbiri to dan le ñǘraügiru, gama lumoun, aba tánharun lun uganu le tídanbei Bíbülia ani aba tederegeruni tibagari lun Heowá. Íbini ítara, hénrenguti meha tun tafiñerun hínsiñe tan lun Heowá. Luagu aban weyu, aba taganbun aban bérusu lidan adamuridaguni le achülürübei tidoun tanigi. Lárigiñe tasaminarun saragu luagun bérusu ligía luma lárigiñe taliihan amu burí bérusu, aba tachoururuni hínsiñe tan lun Bungiu.a Agia huguya, aganbañahadün san aban bérusu lidan adamuridaguni o lidan adamurini wéiriti le ánhingichubarun hanigi? (Neem. 8:12).

14. Ida luba warufuduni weiri lan tebegi Lererun Bungiu woun?

¹⁴ Chóuruti seremei wamani Heowá, Wabungiute le hínsiñehabubei, luagu líchugunu Lererun woun luma luagu lagunfuliruni lani füramasei lun ladügün lun tadurarun lun súnwandan (1 Fe. 1:24, 25). Ligíati, aliiha wamóun súnwandan, adüga waméi le wafurendeirubei tídangiñe ani yusu wamóun lun wíderagun amu. Ítara luba warufuduni hínsiñe lan lubuidun idewesei le woun ani weiri lan lebegi woun. Ani le súdinitimabei, warufudubei hínsiñe lan Heowá woun, ladüga lisaminan tídanbei.