Nibureintiña “awadigimaridameme humá [...] darí hasubudiruni ka lan asalbarunibei le tímatimaati”

1. Ka uagu aban lubéi pasu súdiniti badisei? (Arihaboun iyawaü to lídanboun lagumeseha arütíkulu).

SAGÜ irumu habadiseirun saragu milu aturiahatiña Bíbülia. Saragu hádangiñe nibureingiña o íbini irahüñü. Háfuga kristiánugu lan hagübürigu. Agia buguya, badiseihadibu san? Anhein ítara liña lubéi, ariñagatiwa bun buidu lan badüga. Sun kristiánugu lunti hadügüni katei le lun gayara lan hesefurun (Mat. 28:19, 20; 1 Fe. 3:21).

2. Ka uagu moun lumuti lubéi banufudedun ni banurahan luéi bederegeragun bungua lun Bungiu?

² Íbini dará lani badisei bena lun bibihin saragu abinirúni, barüti giñe saragu buligasion. Ka uagu? Ladüga dan le babadiseirunbei óunabatibu anha lun álügüdahani le: “Lau lubafu lani Hesukrístu sákürifisiu, asakürihaadün san luagu hifigoun ani deregeguaadün hungua lun Heowá lun hadügüni lugundan?”. Aban sínbolu lánina deregeguaadibu lan bungua lun Bungiu badisei, lidan amu dimurei, füramasei le badügübei lun Heowá luagu hínsiñebei lan bun ani badügübei lan lugundan ligibuagun furumiñeguarügü katei. Lunti san basakürihan luagu badügüni füramasei súdiniti le? Uá. Mama aban katei wuribati bíchaagun bungua lúhaburugun Bungiu. Lugundun, kagia amu katei gayaraabei badügüni? Ánhabu meseriwidun lun Heowá, lábugiñebadibu lubafu Satanási. Ani mabusenrunti Satanási lun besefurun. Lubaragiñe lira, busenti lun beferidiruni bemenigin lun bawinwandun lun súnwandan ladüga bidin luéigiñe lóubadina ani aba bamahadun lun lugumadin Heowá.

3. Ka burí abinirúni ibiha báalibei luagu bederegeruni bibagari lun Heowá?

³ Saminabá luagun abinirúni le resibi báalibei ladüga bederegeragun bungua lun Heowá badisei buguya. Kei le derege baali lubéi bibagari lun Heowá, gayaraahali bariñagun lau saragu ichouruni: “Anihein Nabureme numa, manufudetina. Kaba gayara lan gürigia adüga nau?” (Sal. 118:6). Úati ni kata buídutimati luéi berederun luéigiñe lóubadina Bungiu luma lun lagundaarun bau.

ABAN KATEI LE LUNBEI BADÜGÜNI

4, 5. a) Ka uagu wariñaga lani lan kada gürigia buligasion lederegeragun lungua lun Bungiu? b) Ka uma wagagibudagua sun kristiánugu meberesenga warumudiri?

⁴ Anhein badiseihadibu lubéi, moun lumuti basaminarun ítara liña lan bumadagua luma Heowá kei dan le anihein lan aban gágamuru buma ani bagübürigu afayeirubalin sun le bagastarubei. Íbini anhein habiñegili lubéi bagübürigu bawinwanda, buguya lun badügüni biyaraati lun besefurun, mama bagübürigu. Ka uagu lunti lubéi baritaguni katei le? Ladüga ibidiñeti bun kaba burí lan lénrengunga lunbei badunragun luma ámuñegü. Kei hénpulu, háfuga ñǘraügidibu lan dan le babadiseirunbei. Gama lumoun, anhein ábanhadibu lubéi nibureinti, háfuga bagagibudagun luma amu burí óuchawaguni o basandirun amu katei. Afuranguagüda tumuti aban nibureintu katei le ítara: “Libe-agei dan, dan le ñǘraügidibu, masandiraguntibu bungua wuriba luagu aban ban gefenti luagu Heowá ladüga siñá lan beigin fein lánina lagunfulirúniwa irumu leskuelarugu. Gama lumoun, dan le aweirideina ban ani aba laweiridun bayumahan luagu agamariduni, mosu bachoururuni luagu gaganbadi lan lun Heowá buídutimabei súnwandan”.

⁵ Inarüni mámarügüñanu lan nibureintiña agagibudagua luma iseri óuchawaguni lidan habagari. Ha abadiseirúbaña dan le wéinamuhaña gagibuguatiña giñe luma óuchawaguni le magurabun hamuti. Háfuga lidan luáguti maríei, átuadi o wadagimanu. Le linarün katei, meberesenga warumudiri, sun wagía gagibuguatiwa luma katei burí le óuchagubalin úaraguni le warufudubei lun Heowá (Sant. 1:12-14).

6. a) Ka mini lubéi mébeha lan bederegeragun bungua lun Heowá? b) Ka larufudahabei Filipuna 4:11-13?

⁶ Aban katei le lunbei líderagunibu lun úaragua ban lun Bungiu lidan furumiñeguarügü kesi, baritaguni mébeha lan bederegeragun bungua lun. Mini lan le füramase haadibu lan lun Lurúeite sun ubóu beseriwiduba lan lun meberesenga le lunbei lasuseredun, íbini anhein hígira bagübürigu hama bumadagu (Sal. 27:10). Lidan furumiñeguarügü kesi, gayaraati bamuriahan luma Heowá lun líchugun erei bun lun bagunfulirun lau bederegeragun bungua lun (aliihabei Filipuna 4:11-13).

7. Ka mini lubéi bawadigimaridun “lau duari luma inebesei” luagu besefurun?

⁷ Busenti Heowá lun lumada ban. Gama lumoun, mosu báfaagun lun lumada ban Bungiu lun gayara lan besefurun. Ariñagati Filipuna 2:12: “Awadigimaridameme humá lau duari luma inebesei darí hasubudiruni ka lan asalbarunibei le tímatimaati”. Arufudati dimurei burí le mosu lan basaminaruni buidu kaba lan badüga lun bóunigiruni bumadagua luma Heowá luma lun úaragua ban íbini laganagua turóbuli. Mafiñerabá saragu buougua. Haritaguabá íbini lan ha seriwihañabaña lun Bungiu luagu saragu irumu charatiña. Ligíati, kaba íderaguabu lun báfaagun lun besefurun?

SÚDINITI TATURIAHÓUN BÍBÜLIA

8. Ka lunbei badügüni dan le baturiahanu Bíbülia bábuguarügü? b) Ka uagu súdini lubéi aturiahani le?

⁸ Lun lumadagu wamá Heowá, mosu waganbuni ani ayanuha wagíame luma. Dan le waturiahanu Bíbülia wábuguarügü ligía waganbuni Bungiu. Mini lan le mosu lan waliihanu Lererun Bungiu tuma burí agumeiraguagüdüni tídangiñetu Bíbülia, ani samina wagíame luagun le waliihabei. Danme le badügüni, haritaguabei mama lan aban ehersísiu lun saminaü taturiahóun Bíbülia, kéiburi dan le bafurendeirun somu ariñahani lun básügürün aban egüsámini leskuelarugu. Lubaragiñe lira, ítara liña kei dan le báluahan iseri burí katei le gayaraabei bafurendeiruni luagu ligaburi Heowá. Líderagubadibu badügüni katei le lun bayarafadun lun, ani ábame giñe layarafadun bun (Sant. 4:8).

9. Ka burí agumeiraguagüdüni íderagubadibu lidan baturiahan bábuguarügü?

⁹ Rúharu lóundarun Heowá saragu agumeiraguagüdüni lun tíderagunibu lun bakipurun aban programa buiti lun baturiahan. Ariha wamá fiú katei le gayaraabei badariruni lidan páhina jw.org. Lábugiñe fánreinti “Jovenes”, badarirubei fánreinti “Actividades para estudiar la Biblia”, le gayaraabei líderagunibu lun bafurendeirun katei buiti lídangiñe fiú abahüdaguni tídangiñeti Bíbülia. Lidan ligiaméme fánreinti, badarirubei adundehani lun aturiahani le ñein lubéi lariñaga “¿Qué enseña realmente la Biblia?”, le lunbei líderagunibu éredagüdei bafiñen luma lun bafuranguagüdüni. Tidan garüdia ¡Despertad! to lánina gádürü-hati irumu 2009, badariruba amu burí ligaburi aturiahani lidan arütíkulu “Los jóvenes preguntan. ¿Cómo disfrutar la lectura de la Biblia?”. Súdiniti baturiahan luma basaminarun luagun le bafurendeirubei lun basigirun áfaagua lun besefurun (aliihabei Sálumu 119:105).

SÚDINITI FURÍEI

10. Ka uagu súdini lubéi furíei lun kristiánu le badiseihali?

¹⁰ Furendeihadiwa aganba wamani Heowá dan le waturiahanu Bíbülia. Gama lumoun, anhein busén wabéi wayanuhan luma, mosu wafurieidun lun. Wagía kristiánugu, moun lumuti warihini furíei keisi aban katei le wadügübei kei aban échuni o lúnrügü buidu lan lasalirun sun le wadügübei. Lidan furíei gayara lan wayanuhan luma Heowá. Ani busenti Heowá laganbunibu (aliihabei Filipuna 4:6). Danme le nidiheri ban luagu somu katei, haritaguabei ru tani Bíbülia lubuidun adundehani le bun: “Ígirabei bidiheri lun Aburemei” (Sal. 55:22). Afiñetibu san gayara lan líderagunibu katei le? Gayaraati hachoururuni saragu íbirigu bun íderagua laaña lan hadügüni katei le. Ani gayaraati giñe líderagunibu.

11. Ka uagu lunti lubéi beteingiruni Heowá súnwandan?

¹¹ Mosu wafurieidun lun Heowá súnwandan, mámarügü dan le busén wamá lun líderaguniwa. Ariñagatu Bíbülia: “Geteingiradi humá giñe” (Kol. 3:15). Háfuga anihein lan dan wadiheridun saragu luagu waturobulin darí lun wabulieidagun luéi saragu abinirúni le resibi wamaalibei. Ka uagu máfaagun bubéi lun basaminarun sagü weyu luagun ǘrüwa katei le uágubei gayara lan beteingiruni Heowá? Ariñagatu aban nibureintu gíritu Awigaili, to abadiseiruboun dan le 12 lubéi irumu tau: “Saminatina úati lan ni aban gürigia ubouagu le lunti weteingiruni saragu kei Heowá. Mosu weteingiruni súnwandan luagu katei burí le ledewehabei woun. Hínsiñeti nun naritagun aban katei le naganbubei luagu aban weyu: ‘Samina wamá aba lan wásaarun aban weyu ani lérügüñein katei burí le uágubei wíchiga seremei lun Heowá aban weyu lubaragiñe ligíarügüñein wama. Átiribei hamuga san katei wama?’”.a

SÚDINITI BAWINWANDUNI KATEI BUNGUA

12, 13. Ka uagu súdini lubéi basaminarun ida liña lan basandiruni luagu buidu lan Heowá?

¹² Íderagua lumuti Heowá urúei Dawidi agagibudagua luma saragu turóbuli hénrenguti. Ligíati, layanuhaña meha Dawidi luagu le lawinwandubei dan le lariñagunbei: “Houcha humá, ariha humeime luagu buidu lan Aburemei. Fuleseiwatiña gürigia ha hemenigibaña luagu” (Sal. 34:8). Afuranguagüda lumuti arütíkulu le lisudinin barihini bungua luagu buidu lan Heowá. Dan le baliihanu Bíbülia tuma burí wani agumeiraguagüdüni, luma dan le bidin adamuridagua, furendeitibu abahüdaguni le ruti gurasu luagu ida liña lan líderagun Heowá fiú gürigia lun úaragua hamá lun. Gama lumoun, dan le aweirideina ban keisi kristiánu, mégeitibu barihini lúhabu Heowá lidan bibagari. Ariha baali san bungua luagu buidu lan Heowá?

¹³ Sun kristiánugu ariha wamaali woungua buidu lan Heowá. Amisuraha láadiwa lun wayarafadun lun luma lun Liráü. Ariñagati Hesusu: “Siñati liabin ni aban numoun anhein mama lubéi lanügün Bungiu Úguchili le óunahabalina” (Huan 6:44). Saminatibu san achawa láadibu lan Heowá luouguoun? Háfuga lasaminarun somu nibureinti: “Nágübürigu lanügübaña Heowá, ánheinti nuguya falarügü numutiña nagübürigu”. Gama lumoun, dan le bederegeragun bungua lun Heowá ani badisei buguya, arufuda bumuti buidu lan bumadagua luma Heowá. Guentó subudi lumutibu buidu. Ariñagatu Bíbülia lau ichouruni: “Anhein le hínsiñehabubei lun Bungiu, subudi lumuti Bungiu gürigia ligía keisi lánigu” (1 Ko. 8:3). Áfaaguaba súnwandan lun barihini gebegi lan bubara tidan lóundarun Heowá.

14, 15. Ka uagu gayara lubéi léredagüdüni apurichihani bafiñen?

¹⁴ Sandi bumuti giñe buidu lan Heowá dan le barihini líderagunibu lun bayanuhan luagu bafiñen lidan apurichihani luma leskuelarugu. Añahein gürigia hénrenguti houn hapurichihan houn hánigu paaná leskuelarugu ladüga ibidiñeti houn ida luba lan hóunabun. Gayaraati susereeli lan katei le bun. Ani gayaraati hénrengutima lan anhein mosu lubéi bayanuhan houn saragu gürigia lidan aban. Ka gayaraabei líderagunibu?

¹⁵ Furumiñe saminabá ka lan uagu bachoururei inarüniti lan bafiñen. Lidan jw.org, anuhein líburu burí lánina aturiahani lidan saragu iñeñein lun tíderagunibu asaminara ka lan bafiñenbei, ka lan uagu bafiñerei luma ida luba lan bafuranguagüdüni. Ka uagu masagarun bubéi dan lun báluahani? Anhein inarüni lubéi chouru bani le bafiñerubei ani aranse buguya buidu, busenbadibu bayanuhan luagu liri Heowá (Her. 20:8, 9).

16. Kaba íderaguabu lun manufude ban bayanuhan luagu bafiñen?

¹⁶ Gama lumoun, háfuga badadagaramémeba lan dan le bayanuhan luagu bafiñen íbini ánhabu aransera buidu. Ariñagatu aban nibureintu 18 irumu tau to abadiseiruboun dan le 13 lubéi irumu tau: “Subudi numuti ka lan nafiñenbei, gama lumoun, anihein dan hénrengu lan nun nafuranguagüdüni”. Kati tadügübei? Ariñagatu houcha tan tayanuhan luagu inarüni lau darangilaü. Abahüdaguatu: “Ayanuhatiña nánigu paaná furangu luagu le hadügübei. Ka uagu madügün nubalin ligiaméme? Ligíati, dan le nabahüdaguña lan somu katei houn, aba nariñagun: ‘Ligirabuga dan le níchuguña lan külase tídangiñeti Bíbülia aba...’. Lárigiñe, aban nasigirun abahüdagua. Íbini mama lan nayanuhaña houn tuagu Bíbülia, añahein hádangiñe aba hálügüdünina ka lan nadügübei dan le narufudahan tuagu Bíbülia. Eibu nadügüni katei le, aba ménrenguntima lan nun nayanuhan. Ani buiti nasandiragun nungua sagü nayanuhan luagu inarüni”.

17. Ka uagu súdini lubéi wayanuhan lau ichouruni luagu wafiñen?

¹⁷ Ánhabu inebehabu houn ha híbiri ani berese buguyame hau, háfuga ítara luba lan giñe hóuserunibu. Arihabei le meha tasaminarubei Olivia, aban nibureintu 17 irumu tau to abadiseiruboun dan le ñǘraügiru: “Súnwandan meha hanufude nan luéi hasaminarun gürigia hanarime lan nafuudun tuagu Bíbülia anhoun nírida dan le nayanuhan”. Gama lumoun, aba tagumeserun arihei katei lidan amu igaburi. Lubaragiñe terederun asaminara luagun tanufude, aba tasaminarun: “Gíbetiña nibureintiña ibidiñeti ni kata houn hawagu gefentiña luagu Heowá, ani wagíarügüñanu Gefentiña hasubudirun. Ligíati, gániti ligaburi wóuserun efekütu lidan ligaburi hóunabun. Anhein haburi wabéi lun wayanuhan houn luagu wafiñen o ánhawa ayanuha luagu lau anufudei, gayaraati hasaminarun magundan wamá luagu Gefentiña wamá. Gayaraati íbini wuriba lan hóunabun dan le harihini machourun wamani le wariñagubei. Gama lumoun, anhein warufuda chouru wamani le wafiñerubei ani ayanuha wagía lau ichouruni, gayaraabei inebe wamá houn”.

SIGIBA ÁFAAGUA LUN BESEFURUN

18. Ka lunbei badügüni lun besefurun?

¹⁸ Ariha wamaali aban lan buligasion sériuti háfaagun gürigia lun hesefurun. Lun bibihini, mosu baliihanu Bíbülia ráramagua buguyame asaminara luagun le baliihabei, mosu bafurieidun lun Bungiu ani samina buguyame luagun abinirúni burí le ru láalibei bun. Líderagubadibu katei burí le lúntima bachoururuni luagu anihein lan Heowá buma. Ani línchahabadibu giñe lun bayanuhan luagu bafiñen (aliihabei Sálumu 73:28).

19. Ka uagu lunti lubéi wáfaagun lun wesefurun?

¹⁹ Ariñagati Hesusu: “Le busenti lafalarunina, bulieiléi káteiñein lan, ragülei luágabun le lánina asufuriruni ani falalana” (Mat. 16:24, TNM). Furanguti dan le lan wafalaruni Hesusu mosu lan wederegeruni wabagari lun Heowá ani badisei wagía. Dará lumuti katei le üma wabá lun wibihin saragu abinirúni guentó luma ibagari magumuchaditi lidan iseri ubóu le füramase lubéi Bungiu. Ligía anihein lubéi saragu resun wama lun wasigirun áfaagua lun wesefurun.