Ka uagu waweiyada ani hilagua wagía?

Ariñagati Bungiu lun: “Anhoun beiga [...] bóunweba” (Agumesehani 2:17). Mébunabei hamuga eweridihani le lun hamuga laweiyadamémeba lan Adán ani hilá ligía. Subudi lumuti meha Adán móunwenbei lan anhein meigin tídangiñe tin wewe tuguya.

Memegeirunti meha Adán tuma Ewa lun heigin tídangiñe tin wewe tuguya lun habagaridun, lugundun anuhein meha saragu amu furuda lidan fuluri-agei (Agumesehani 2:9). Lun hamuga meigin hamá tídangiñe tin wewe tuguya, gaganbadibaña hamuga lun le íchugubalin habagari houn, ani harufuduñein hamuga inebe lan liricha Bungiu houn lun lariñaguni le lunbei hadügüni houn.

KA UAGU LOUNWE ADÁN TUMA EWA?

Lun gunfuranda wamani ka lan uagu lounwe Adán tuma Ewa, mosu wakutihan aban katei le ayanuhóubei dan ligía, le anügübei wuribani woun íbini uguñe weyu. Yúsuti Mafia aban hewe lun lariñagun aban óunwenbu iyeeni. Ariñagatu Lererun Bungiu: “Wéiriti tisumadin hewe hádangiñe sun animaalugu áraabuna ha ladügübaña Wabureme Bungiu, aba tariñagun tun würi: Lariñahare lubeiti Bungiu hun lun meigin humá tídangiñe tin ni aban tídangiñe tídibu wewe ya fuluri-ágeirugu?” (Agumesehani 3:1).

Aba tóunabunu Ewa: “Gayaraati weigin tídangiñe tin furumiñeguarügü tídibu wewe, ánheinti tídangiñe tídibu wewe to lamidanguaboun fuluri-agei ariñagati Bungiu woun lun meigin wamá ni lun waguurun tuagu tin wewe tugía, ladüga ánhawa lan eiga tídangiñe wóunweguba”. Ábati tariñagun hewe: “Móunwegunbadün. Subudi lumuti Bungiu luagu danme lan heigin tídangiñe tin tídibu wewe tuguya, léfegechuba lan hagu lun hasubudiruni le buídubei luma le wuribabei, ábameti ítara humá kei Bungiu”. Ítara liña lariñagun Mafia yee lan Heowá ani lamahaduña lan meha lun libihin Adán tuma Ewa somu katei buiti (Agumesehani 3:2-5).

Ábürühatu Ewa tidoun sádara tuguya. Aba terederun aríaguei tídibu wewe ligía darí lun tawamadun furuda tuguya tun. Ábati tínchuni túhabu ani aba tárügüdünu, gumese tuguya eigoun. Ariñaga tumuti Lererun Bungiu le asuseredubei lárigiñe: “Ñéingiñe aba tíchugun lun túmari, aba giñe leigin” (Agumesehani 3:6).

Ma funa lanarime íruni le lasandirubei Heowá lau larihin aba lan hanúadirun lisaanigu ha hínsiñebaña lun maganbadi hamá lun! Kati ladügübei? Aba lariñagun lun Adán: “Bagañeiruboun beigan fein lau lárouga bun, darime bagiribudun bárigoun lidoun múa le aubei badügǘwa, lídangiñe múa badügǘwa basaliraguayaba múame” (Agumesehani 3:17-19). Ani ítara liña lasuseredun, “nefu-san-darandi irumu lau [Adán] ligía lounwen” (Agumesehani 5:5). Dan le lóunwenbei Adán mídinti ni sielun ni lidoun amu fulasu le ñein habéi sífirigu. Lubaragiñe meha ladügüni Heowá Adán lídangiñe múa, mabagariti meha Adán, dan le lóunwenbei ábanya lasaliragun múame, lidan amu dimurei, ua yaali meha. Ma lirun!

KA UAGU GAFIGOUN WABÉI?

Kei aba lubéi lanúadirun Adán tuma Ewa maganbadi hamá lun Bungiu, mámaaña meha gürigia ha úati mégeiti hawagu ani féridi hamuti chansi lun hawinwandun lun súnwandan. Lúmagiñe dan ligía, aba lasansirun hágubu: gafigounhaña meha. Ani mámarügüñein houn ladüga hafigouhan wuribati, galagante hamuti giñe hadügawagun figóu hámagiñe. Ariñagati Rómana 5:12: “Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei”.

Ariñagatu Lererun Bungiu ítara liña lan óunweni kei belu to adouraguboun hau sun lílana burí fulasu ani kei aban manda to adouraguañahaboun hau sun néchanigu (Isaíasi 25:7). Ítara tiña belu to adouraguboun hau sun gürigia kei aban hemereedu péisiniti le uéibei siñá lan lanurahan ni aban. Ligíati “hóunwegun[bei] súngubei ladüga lídangiñe lan Adán hayabin” (1 Korintuna 15:22). Guentó, adüga wamuti ligiaméme álügüdahani le ladügübei apostolu Pábulu lúniwagua: “Kaba san esefurana lídangiñe igaburi lánina figóu le nídanbei, le anügübalina lidoun óunweni?”. Kaba san esefurawa? (Rómana 7:24).