Barǘ humaña profetagu keisi aban hénpulu: Hoeli
1. Dan le wapurichihan, ida luba wáyeihani ǘnabuguni le larufudubei Hoeli?
1 Katei meha san profetabei Hoeli? Tidan líburu to anügübalin liri, ariñagarügüti “liráü [lan] Petueli” ligía (Hoe. 1:1). Luágutima luganute Bungiu layanuha óunagülei ǘnabuguti le, mama luagu luadigimari. Ani dan le wapurichihan adüga wamuti ligiaméme: áfaaguatiwa lun hetenirun gürigia lun Heowá luma tun Lererun, lubaragiñe wáluahan lun layanuhóun buidu wawagu luma lun lichugún uéiriguni woun (1 Ko. 9:16; 2 Ko. 3:5). Ma lueirin dǘgüdaguaü le líchugubei uganu le wapurichihabei! Akutiha wamá fiú katei luáguti lani Hoeli profesía le íchugubei emenigini woun ani ínchahalawa arufuda ubebeni.
2. Kei yarafaali lubéi luéyuri Heowá, ka lunbei wadügüni?
2 “Yarafaali luéyuri Wabureme [Heowá]!” (Hoeli 1:15.) Lau sun sügühali lan yarafa lun ǘrüwa-milu irumu lúmagiñe labürüdǘniwa dimurei burí le, lagunfuliruña lagumuhóun wéiyaasu uguñe weyu. Gíbetimarügaali turóbuli ubouagu, ani lidan fulasu le ídanbei wapurichiha daritiwa gürigia ha arufudatiña mabahüdǘni lau uganu buiti, adüga hagía bula wau. Arufuda lumuti katei burí le, wawinwanduña lan lidan lagumuhóun dan (2 Tim. 3:1-5; 2 Fe. 3:3, 4). Kei yarafaali lubéi lagumuchagüle ubóu, gíbeti resun wama lun wíchuguni apurichihani lidan furumiñeti lúgaaru lidan wabagari (2 Fe. 3:11, 12).
3. Guentó lidan yarafaali lan óunwenbu asufuriruni, ka uagu súdini lubéi lun wakipuragun woungua beresegu lidan apurichihani?
3 ‘Aban aramudaguagülei Heowá houn lumutuniña.’ (Hoeli 3:16.) Ariñagati giñe bérusu le ‘ladadagaruba lan sielu luma múa’, chóuruti ladimurehaña lan luagu lidaani lanügüni Heowá lasiadihan lídanme óunwenbu asufuriruni. Ma wagundan lau wasubudiruni lesefurubaña lan Heowá lubúeingu ha úaraguabaña! (Aruf. 7:9, 14.) Wakipuragun woungua beresegu lidan apurichihani, luma warihini ida liña lan lágüdahaniwa Heowá ru ligía erei woun, líderagubadiwa lun laganwoundun wafiñen luma lun gayaratima lan wawandun, megei wabéi katei burí le lun werederun wínwanñu danme le lachülürün óunwenbu asufuriruni le yarafaalibei.
4. Ka uagu gayara lubéi wagundaarun ani gagibugua wagíame lau emenigini luma le lunbei lasuseredun ámuñegü?
4 Íbini añahein lan ariñagutiña luágurügüñein lan katei wuribati ladimureha luganute Hoeli, le linarün katei, ruti aban lubuidun emenigini lánina asalbaruni houn lumutuniña Bungiu (Hoe. 2:32). Ligíati, gagibugua wamá luma le lunbei liabin lau emenigini, apurichiha waméi uganu buiti le luáguti Larúeihan Bungiu lau ubebeni ani ánhara wamá lun amisurahani le adügǘbei woun lidan Hoeli 2:23, le ñein lubéi lariñaga: “Gunda humá luma Wabureme [Heowá] le Wabungiute”.