Fánreinti Lánina Álügüdahani
◼ Ka lunbei hafurendeiruni irahüñü lun hawanserun lidan hafiñen?
Gíbeti katei hadügün agübürigu kristiánugu lun hagüriaruniña hasaanigu kei labusenruni Heowá (Efe. 6:4). Kei hénpulu, akutiha hamuti bérusu lánina sagü weyu hama sagü binaafin lugundun ariha hamuti buidu lan resultóu le lanügübei. Añahein iduheñu arihatiña ani akutihatiña aban bidéu lidan guñoun lánina háhuduragun lun Bungiu úara o lidan burí amu ókaasion, akutihatiña somu arütíkulu súdiniti le tídangiñeti líburu Los jóvenes preguntan, adügatiña dürama luagu somu abahüdaguni tídangiñeti Bíbülia o asayahatiña ámuñegueinarügü sügǘ. Gama lumoun, lun hawanserun isaanigu darí lederebugudun hafiñen, mosu giñe hafurendeiruni inarüni le hulilitimabei tídangiñe Bíbülia (Ebü. 6:1).
Samina wamá murusun luagu le warufudahabei houn gürigia ha wadarirubaña lidan apurichihani. Liibe-agei dan, áfaaguatiwa wagumeserun aturiahani tídangiñeti Bíbülia hama tau líburu Kátima san tarufudahabei Bíbülia? lidan furumiñeti bisida o ábanya lárigiñe. Dan gumuhali waturiahanu líburu Kátima san hama, aba waturiahanu líburu “Redei humá lidan línsiñehabu Bungiu”. Ka uagu wadügei? Ladüga ru tumuti líburu Kátima san subudi tídangiñeti Bíbülia létima mégeiwabei houn, ánhounti líburu “Línsiñehabu Bungiu” íderagua tumutiña awinwandei adundehani méiniti le tídanbei Bíbülia. Adügati taturiahóun biángubei líburu to lun “ragüñu” lan habagari ha iserigiñabaña luagu Kristu luma lun “deregüdagu [hamá] lidan hafiñen” (Kol. 2:6, 7). Ma buídubei giñe wakutihani ariñahaniméme le hama wasaanigu? Súdiniti hafurendeirun luagu lebegi asalbaruni, luagu Larúeihan Bungiu luma luagu le asuseredubei houn hilaaña. Mégeitiña giñe irahüñü hafurendeiruni ka lan uagu lígira Bungiu lun ñein lan asufuriruni luma ida liña lan wasubudiruni wawinwanduña lan lidan lagumuhóun dan. Mosu hachoururuni hámañein lan gefentiña luagu Heowá inarüni, gunfuranda hameime adundehani méiniti le tídanbei Bíbülia, furendei hagíame asubudirei “le buídubei lumoun le wuribabei” (Ebü. 5:14). Inarüni lunti lan gabaroun hamani agübürigu lirumudiri kada irahü luma le liyaraabei gunfuranda. Íbini ítara, gíbetiña irahüñü ibihatiña gunfuranda hamá inarüni tídangiñeti Bíbülia le huliliti lúmagiñe hañüraü (Luk. 2:42, 46, 47).
Lun híderawagun agübürigu, lichugúba adundehani lun taturiahóun líburu Kátima san lidan jw.org. Gayarabei hadariruni iduheñu lidan seksióun ENSEÑANZAS BÍBLICAS > JÓVENES lidan wani páhina lidan Internet. Ámuñegü, lichugúba giñe adundehani lun taturiahóun líburu “Línsiñehabu Bungiu” ñein. Gayarati giñe tayusurún bián líburu to ítara sin lidiniwa lidoun páhina lánina Internet. Agübüriguba desidírei anhein buídubei lubéi hayusuruni ariñahani le lidan Guñoun lánina Háhuduragun Iduheñu lun Bungiu úara, o danme haturiahan luma kada isaani o danme harufuduni houn ida luba lan haturiahan hábuguarügü.