Yusu wamóun líburu Kátima san buidu
Eibu hafurendeiruni gürigia ha únbaña wíchiga aturiahani ka lan tariñagubei Bíbülia, ani falá haméi lidan habagari, arufuda hamuti gumeseeña lan adüga umadaguaü luma Heowá (Sal. 1:1-3). Anhein wayusura sun ídemuei le tídanbei líburu Kátima san buidu, gayaraabei wíderaguniña awansera.
Álügüdahani le lídanbei lagumeseha kapítulu. Gumeseti kada kapítulu lau burí álügüdahani le ounabúbei lidan. Gayaraati wadügüni álügüdahani burí ligía lun aturiahati, gama lumoun mama lun lóunabuni, adügarügü wabéi lun wínchahani abusenra laganwoundagüdüni lisubudin luagu ariñahani le lídanbei kapítulu. Gayaraati giñe wamuriahan luma lun lóunabuni álügüdahani burí ligía lidan fiu dimurei. Háfuga lariñagun somu katei le múaranti luma inarüni, gama lumoun mama mosu wafuranguagüdüni lun ouraméme ligía mítaran lan, líderagubadiwa le lariñagubei lun gunfuranda wamani kábatima lan wafuranguagüda lun lidan aturiahani (Ari. 16:23; 18:13).
Lanwoun ariñahani. Anhein gunfuranda laali lubéi aturiahati ariñahani le lídanbei kapítulu, gayaraabei wariñagun lun lun laliihani lanwoun ariñahani luáguti kapítulu ligía ligía lábugua. Dánmeyati waturiahan luma amu weyu, gayaraabei wadügün álügüdahani lun lun wasubudiruni anhein anihein lubéi somu katei lemegeirun wafuranguagüdüni lun. Gama lumoun, anhein wariha mégeiwa lan wadügüni, direi wamá fiu minutu lídangiñe waturiahan lun wakutihani párafu burí le lídanbei lanwoun ariñahani dayarügü o murusun murusun. Gayaraati waliihani párafu adüga wagíame álügüdahani le samina wamaali lun.
Rekuáduru lánina águyuguagüdüni. Gumuti kada kapítulu lau aban rekuáduru lánina águyuguagüdüni le ñein lubéi ladarirúa lóunabagüle álügüdahani le lídanbei lagumeseha kapítulu. Anhein wáguyuguagüda luma aturiahati, warihibei anhein gunfuranda laali lubéi puntu le súdinitimabei lidan aturiahani ani anhein gayara lubéi lubéi afuranguagüda. Lárigiñe waliihani óunabagülei luma burí bérusu le lídanbei rekuáduru, amuriaha wamá luma lun layusuruni bérusu burí ligía lun lafuranguagüdüni ka lan uagu inarüni lubéi óunabagülei le lídanbei rekuáduru (Adü. 17:2, 3).