Ida luba waranserun lubá Aritaguagülei?

Lúmagiñe irumu le, gíbetimabei dan wama lun waranserun lubá Laritaguagüle lounwen Kristu. Danme ladügǘn Aritaguagülei labadinagua dimaasu, madügǘnwabei adamuridaguni Habagari luma Heseriwidun ani danme ladügǘn samudi o dimaasu, michugúnbei yanu houn sun gürigia luma Taturiahóun Garüdia Awisahatu. Ka gayaraabei wadügüni lun wayusuruni dan ligía buidu? Ítara kei meha ladügǘn lidan furumiñeti sígulu, uguñe weyu, mosu ladügǘn fiu aransehani lubá weyu espechaliti le (Lk 22:7-13; km 3/15 1). Ani mosu giñe laranserunu kada aban wádangiñe lanigi. Ida luba wadügüni?

• Lau wararamagun asaminara luagu lisudinin wachülürün lidoun adamuridaguni ligía (1 Ko 11:23-26).

• Lau wafurieidun lun Heowá luma lau wakutihani ida liña lan wamadagua luma (1 Ko 11:27-29; 2 Ko 13:5).

• Lau waliihan ariñahani tídangiñeti Bíbülia le afuranguagüdübalin le mini lubéi Aritaguagülei, ráramagua wagíame asaminara luagu le waliihabei (Hn 3:16; 15:13).

Añahein íbirigu ha aliihabalin bérusu burí tídangiñeti Bíbülia le anuadirúbei lubá Aritaguagülei le tídanbei garüdia Taturiahóun Lererun Bungiu sagü weyu, ani ráramaguatiña giñe asaminara luagu. Añahein fiu ha ayusurubalin rekuáduru le ǘnabubei. Ani añahein amu ha akutihabalin arütíkulu burí tani Garüdia Awisahatu to ayanuhaboun luagu Aritaguagülei luma luagu ínsiñeni le larufudubei Heowá luma Hesusu woun. Ladügüba furumiñeguarügü katei le hanúadirun lúntima hayarafadun lun Heowá luma lun Liráü.